Read kirikeni Aịzaya 61 Bible Online

Aịzaya 61 - kirikeni bible

Aịzaya 61

¹Kụrọmamgba Nyanaḅọ Ḅe oria kụrọ mị se ị̀ mịẹ ḅeinmasam. Ori ị̀ sẹlẹ pịkị ị̀ fịrịmamẹ na Àrị iḅi oku mị ọkịḅo igwein apụma pịrị, Kuḅie kansapụ ma gwọ, Ḍuko kunḅaraḅie sime apụma pịrị na ini soḅịa, Pịkị ḍuko ikoli ḅie sime apụma pịrị na ikoli ḅie ini soḅịa.

²Ori ị̀ se sẹịnmẹ na à ḍuko finjima na Sịkị mị ḅo lasam, Nyanaḅọ Ḅe oria tomonima ḍụaḅọrọma Pịkị ini na tarakapụma inumaḅịa sịkị mị. Ori ị̀ se sẹịnmẹ na ḍụẹịn ḍin arịapụ mamgba kuḅie à nwọ kụrọma,

³Zaịyọn ḅie ḍụẹịn ḍin arịapụ ma Ḅieḅẹlẹ se ini pịrị ngịrị na karaka, Boma nime chu kururu na karaka. Ini ejema sime ọkụ simeḅịa Anị Nyanaḅọ Ḅe ḅarana ḍipi ejema. Inimgba karakaraye mị mịẹḅịa, Tamụnọ Ḅe ọ̀ mịẹsaye ma gose ini ò bomaḅịa.

⁴Ḅọlọ sịkị ngịsị kan sara sa opuamama ini kpoto àrị namaḅịa.

⁵Ị̀ya tomoni, igoniapụ fịrịnwẹngị ọ́ pịrịḅịa. Ini ọ́mịna namama ḍikiḍiki ḅịa Ini ozu ḍipi pịkị irumịẹ chịnmgbọlụ ozuma tẹlịma ọ́ pịrịḅịa.

⁶Nyanaḅọ Ḅe agbamịẹapụ ḅara ini nwọse ó nemiḅịa, Mịna Tamụnọ Ḅe oria fịrịnwẹngịapụ ini nwọse ọ́ chịnḅịa. Sẹsẹ ma nyana ngọma ómine arịa tọrụḅẹlẹ nyanaḅịaye-ẹ Ọ́ pịkị àrị se opuaye mịẹḅịa na ọ́mịnaye-ẹ.

⁷Ọ́mịna ḅụgerere mamgba kulumasam. Ọ́mịna ama ḅie ómine angaḅịa, Ọ́ kọn ala ḅụ, ye mama-kiri-mama-kiri ḅụ sọ ọ́ pịrịḅịa; Ọ́mịna ḅieḅẹlẹ sime gbasoḅịa.

⁸Nyanaḅọ Ḅe nwọ ḅẹmẹ, “À karakaraye mị ḅẹlẹmamẹ anịsịkị à taraka se nweni pụnda na siyemịẹ na wẹrịmamẹ. Ị̀ kuḅiemgbọlụ laḅara à nwọse gbẹịnye se ị̀ya tomonima pịrịḅịa À pịkị ini na sime gbaso ọḅọkụ fịḅịa.

⁹Sẹsẹ ma ḅie inia awọma ẹrẹ soḅịa; Ini ọrịḅọ goyegoye nemiḅịa na Ini ma anị à ḅẹlẹmasapụ-ẹ.”

¹⁰Jerusalẹm mị anị ḅieḅẹlẹaḅẹ Nyanaḅọ Ḅe mịẹsaye mị gose. Owuḅọ ya ḅịa ẹrẹchị ini ḅirimasa iremeniḅọ sime ọkụ á nwọ simemẹ. Tamụnọ Ḅe ḍụaḅọrọma na ọmụḅaraiḅi na ọ̀ nwọse á ḅirimasam.

¹¹Pikipikiye ofori-ẹ ḅịpị toluma se sẹnị àrị chịnmgbọlụ ḅara, Kụrọmamgba Nyanaḅọ Ḅe ori oria tomonima ḍụaḅịa, Sẹsẹ mamgba ò boma ḅịa.