Read kirikeni Aịzaya 63 Bible Online

Aịzaya 63 - kirikeni bible

Aịzaya 63

¹“Ḅe tụḅọ nwọ Idọm ḅie Bozra ama mị ḅie ḅo-ao? Ḅe tụḅọ nwọ kpaịnma pulo-puloaye ma ḅiri se kụrọ na ịnyọ na ḅụ ḅụọ sin sin nwẹngịma ḅo-ao?” Nyanaḅọ Ḅe ori-ẹ, ḍụaḅọrọma kụrọnịḅọ ḅe, ò ḅo oria ọmụḅaraiḅi mị ḍuko pakụma-ẹḅoaḅẹ.

²“Cheye gose oria ḅụchụayema gbọtụma pulo-pulo ḅara sime, se iru mịẹḅịa tụmgbakị elelenda nangaḅọ ḅụchụaye sime ọkụ?”

³Nyanaḅọ Ḅe nwọ pẹkẹrẹmẹ, “Iru mịẹḅịa tụmgbakị elelenda nanga ọkụ à nwọse sẹma nangasam, ḅo ḅarachụa ị̀ pịrị gbọrịḅọ sọnị ofori-ẹ. Ị̀ya ịganịḅụ àrị ini pọnjịmẹ se inia pulo ma mị ḅara se ị̀ya ḅụchụaye mamgba simasam.

⁴À ḍukopẹlẹsam na àrị ị̀ya tomonima ḍụaḅịa sịkị mị ḅo lasam; fomuḅara se ini na tarakapụma pịrịḅịa sịkị lasam.

⁵À nyọ mị ḍiki kelema so sịkị, anị ị̀ ḅụgbiripumamẹ na ḅarachụa ị̀ pịrịḅịa gbọrịḅọ sọnị àrị ọrịkẹ. Ọkụma ị̀ya ịganị mị ị̀ mịẹ kụrọmamẹ, anị à se ḅarana ọmụḅaraiḅi mị nyanaye-ẹ.

⁶Ị̀ya ịganị ḅụ à bebe sẹ mamgba nanga kọsịmamẹ. Ḍumo se ini pịrịarị pulo mị à nwọ ọsụn kiri saramẹ.”

⁷Nyanaḅọ Ḅe oria gbarịmaka ḅẹlẹma mị à nwọ ḍukoḅịa; Àrị ò bomamẹ, ọ̀ mịẹ wa pịrịaye mamgba gose. Ọ̀ ḅakama ngọ se Izrẹlapụma ḅẹlẹmasam oria ḍikiḅụgerere mị na sime gbaso ḅẹlẹma mị na gose.

⁸Nyanaḅọ Ḅe nwọ ḅẹmẹ, “Ini ma ị̀ya tomoni-ẹ; ini oḅori se ị̀ chịn ẹkẹ.” Anịẹrẹchị ori ini ḍụaḅọrọmamẹ

⁹inia tọrụsiọrị mamgba ḅie. Enjẹl ḅọkẹ, ọkụma Nyanaḅọ Ḅe na-mịnaḅụ-na ḅarana ini ḍụapakụmamẹ. Oria ḅẹlẹma na ḍikitịḅịfoin na ḅụ ori ini ḍụamẹ. Ḅọrọsa sịkị ma ḅie, sịkịmamgba ọ̀ tọrụ iniaḅụ omi-ẹ,

¹⁰ọkụma kụrọtịḅịḅie chụa ḅụ ini ori na tụḅụrụmẹ, anị mị ori ịganịmamẹ. Anịẹrẹchị Nyanaḅọ Ḅe ḅo inina-tarakaḅọ sọ se owu mị pịkị ini damẹ.

¹¹Ọkụma anịsịkị ini ḅọrọsaye ma se ḅiekoromamẹ, Moziz enema, Nyanaḅọ Ḅe fịrịnwẹngịḅọ ḅe, se ini nwọ gbelamẹ, “Nyanaḅọ Ḅe mịọkụ nde ori, tọrụ mị ḅie oria tomonima tịḅịnịma ḍụaḅọ ḅe? Nyanaḅọ Ḅe nde ori, ọ̀ tẹmẹ ḅe se Moziz ḅe pịrịḅọ ḅe?

¹²Nyanaḅọ Ḅe nde ori, Moziz ḅe ḅụ ḅọrọ oria kụrọ se opu ḅụgbiripumaye ma mịẹḅọ ḅe, tọrụ mị ḅie mengi mị se mama kiri ḍie se tọrọkọ ịsụn oria tomonima na gbun tọrụ mị ḅie ḅọrọḅọ ḅe, sime gbamasoḅịa ọmụḅaraiḅi opu ẹrẹ nwọ nyana mịnaḅụ pịrịḅọ ḅe?” Nyanaḅọ Ḅe inia tọrọkọ damẹ, piri asụnma arịa ḅụọma se ḅie kpọ nyana ọkụ anị inia ḅie-kpọ-ọkụ-ẹ, ini pịkị pụmbụkẹ.

¹⁴Ini nambulo se mun osuein paka pẹsịkiri ḅụ koroma ọkụ anị Nyanaḅọ Ḅe ịnyọsara se oria tomonima pịrị ọkụ-ẹ. Ori oria tomonima tọrọkọ da se osi ọkịḅo oria ẹrẹ mị pịrịmẹ.

¹⁵Nyanaḅọ, soḅie ị́ anga fịafịa pịkị boma nyana nyọ ḅụ wẹrị wa ḍiki. Ị́ nyana wa pịrị opu ḅieḅẹlẹ mị nde anị? Ị́ya kụrọ mị nde anị? Ị́ya ḅẹlẹma ma na ḍikitịḅịfoin ma na nde àrị? Wa sịkịma.

¹⁶Ị́rị́ mịna ḍa-ẹ, mịna ḅieju-aḍapụ, Ebraham ḅe na Jekọb ḅe na, ini wa nemikẹ, ọkụma ị́rị́, Nyanaḅọ Ḅe mịna ḍa-ẹ, sịkịmamgba wa ḍụarịḅọ ḅe-ẹ.

¹⁷Cheye gose ị́ wa wẹrịso se wa ị́ya ateli ḅụ irimaḅọrọ-ao? Cheye gose ị́ wa mịẹse mịna tịḅịḅie opuma kụrọ se wa ị́ ḅụ pịkịma so? Pịkịmaḅo, fịrịnwẹngị ị́ pịrịarịapụ ma gose, sịkịmamgba sime ị́ pịrị apụma gose.

¹⁸Mine ị́ya fịafịa tomonima mine na tarakapụma kala sịkịḅụ wa depakụmamẹ; ini kụrọ ḅụọ se ị́ya fịafịa tẹkẹ warị mị nanga kọsịmamẹ.

¹⁹Ngịsị ma ị́ ḅẹrẹtọn wa pịrịka ḅara ị́ nwọse mine na angamẹ, ngịsị ma wa ị́ya tomoni sọkẹ nwọḅẹ ḅara simemẹ.