Read kirikeni Aịzaya 65 Bible Online

Aịzaya 65 - kirikeni bible

Aịzaya 65

¹Nyanaḅọ Ḅe nwọ ḅẹmẹ, “À ḅụkarakaramamẹ pẹkẹrẹ ḅịpị se ị̀ya tomonima tẹkẹma nwọ pịrị, ọkụma ini tẹkẹ kẹ. À ḅụkarakaramamẹ mịẹsosịkị ini ị̀ ḍọkịḅịa sịkị ini ị̀ ọrịḅịa ọkụ, ọkụma ini mịẹ ḍụkụkẹ. Sẹ mị mgba ị̀ tẹkẹ ḍụkụkẹ, anịẹḅẹsọ à pa sịkịmamgba ḅụkarakaramamẹ ini pẹkẹrẹḅịa ẹrẹchị, ‘Mịn Ị̀rị̀-ẹ; À ḅarachụa ọ́ pịrịḅịa.’

²Sịkịmamgba à ḅụkarakaramamẹ ó ḅosa se ị̀ya tomonima kereni, anị sitịḅị-ḅie-chụa siaye mịẹ, se inia ḅụḅẹlẹ ateli da mun arịapụ ma.

³Ini ḅụgerere nemika ḅaraḅụ pa ị̀ ịganịmaye mịẹ-aḅẹ. Chịnmgbọlụ ozuma ḅie ini ḍiepịrịaye agbamịẹ oru pịrị, pịkị oru-agbamịẹ-ẹbẹma ọgọnọ insẹnsị dọkịma-dọkịmamẹ.

⁴Ene ḍin sịkị, ini pokoloma ḅie na iḍupuma ḅie na simenyọ mun fịsapụ tẹmẹ ma chịn se yegbelagbelamẹ. Ini oporopo nama pẹị pịkị ini se agba-mịẹ-nama-fụlọ sinsinmẹ.

⁵Anịsịkị ini jịn apụ ḅẹaḅẹ, ‘Ó sikima mịnaḅụ; wa opuma fịafịamẹ, ọ́ ḅara se wa lamama!’ Àrị ineda tọrụ se nwọ simeapụ ḍiki ẹkẹ—ị̀ya ịganị inia ḅụ sime ọkụ, anị kọrị se bin ẹka fịnị sime ọkụ simemẹ.

⁶“À se ini pịrịka fomuḅara à tọn ḅọrọsam, ini laḅịa fomuḅara pịkị gịẹịn koromasam. Ini mịẹsayema à ḍiki tọrụsin ẹkẹ, ọkụma ini arịa gbẹịnye nyanaḅịa

⁷ini na inia ḅieju-aḍapụma na mịẹ-a sima ḅụ. Chịngịma ọgọnọ oru-a warịma ḅie ini insẹnsị dọkịma pịkị ị̀ ḍuko simasam. Anịẹrẹchị ini mịẹḅọrọsa sima la ọkụ ḅe fomuḅara à nwọse ini pịrịḅịa.”

⁸Nyanaḅọ Ḅe nwọ ḅẹmẹ, “Iḅi tụmgbakị elelenda simaḅịa gbọrịḅọ sọnị ofori-ẹ, anịnakaraka, ini àrị se iru-mịẹḅịa. Anị à pịkị ị̀ya tomoni mamgba ḅaa-sin-ẹka-ọkụ-ẹ—fịrịnwẹngị ị̀ pịrị apụma ini ḍumoḅịa.

⁹Izrẹlapụma ḅie Juda furo apụma àrị ini ḅẹlẹmaḅịa, inia furoḅie pakaḅoḅịapụma, ị̀ya tụndụ amama nyanaḅịa. Ị̀ya tomoni, à sẹlẹ ọkị se fịrịnwẹngị ị̀ pịrịarị apụma, anị nyọ angaḅịa.

¹⁰Ini ị̀ tẹkẹ tẹkẹḅịa, ini pịkị inia ananama na nambuloma na se mun Sharọn Ḅele nyọ mị ḅụ, ịrụasọsọ nyọ na pịkị Ḅụfụka Pẹsịkiri nwọ chịn nyọ mị ḅụ ịrụapakapaka nyọ ḅụ nama fịaye se namama pịrị àrị fịḅịa.

¹¹“Ọkụma anị ọ́mịnaḅụ kịrịye sọḅịa, ómine ị̀ sịkị apụma, ómine Zaịyọn ị̀ya osi nyana chịngị mị se ye chịnka se mun Gadị na Mẹnị, anị iḅifụḅara oruma tẹkẹtẹkẹ apụma.

¹²Anị sifụḅara sọ ọ́ pịrị se ọ́ kụrọ fị kọnḅịa, anịatịḅị àrị ọ́ chịn sịkị, ómine ị̀ pẹkẹrẹkẹ, ọ́ pịkị àrị ọkwẹịn sịkị ị̀ pokikẹ. Ị̀ ḅịpị pokika mị ọ́ nwọ ḅereni ọkị se si mịẹ-aḅẹ.

¹³Anịẹrẹchị à ḍuko ọ́ pịrịaḅẹ na, nwọ ị̀ tẹkẹ pịkị ị̀ ḅịpị pokipoki apụma, ini ḅakama fịfịaye nyana fị pịkị ḅuḅuaye nyana ḅuḅịa, ọkụma ómine ma, ḅuru ọ́ tarịḅịa, mengi pịkị ọ́ tarịḅịa. Ini ma inia ḅieḅẹlẹḅịa, ọkụma ómine ọ́mịna ḅụgerereḅịa.

¹⁴Ḅieḅẹlẹ ḅụ ini nime chuḅịa, ọkụma ómine ma kuḅie kan kọsị ḅụ ómine owuḅịa.

¹⁵À sẹlẹ ọkịsapụma ini ọ́mịna ẹrẹ se worinime ḅụ chuḅịa. Ị̀rị̀ kụrọmamgba Nyanaḅọ Ḅe, ómine se fịḅie chuḅịa. Ọkụma àrị ịwọ ẹrẹ se ị̀ ḅịpị pokipoki apụma chịnḅịa.

¹⁶Ama mị ḅie ḅẹlẹma ḅiḅọ goyegoye nụḅọ kuḅie-se-ḅụgbana gbẹịn Tamụnọ Ḅe ḅara ḅẹlẹma mị ḅi, na ori ị̀ ḅẹlẹma-ẹ. Kuḅie-se-ḅụgbana gbẹịn Tamụnọ Ḅe ẹrẹ ḅụ yekarịfịḅọ goyegoye nyana ḅọrọsa ḅụfụkama, ini pịkị àrị se ḅieḅaramasam.”

¹⁷Nyanaḅọ Ḅe nwọ ḅẹmẹ, “Àrị ịwọ sẹkiri na ịwọ so na tẹmẹaḅẹ. Ḅọrọsa sịkị pakayema ini gbọtụma àrị se ḅieḅaramaḅịa.

¹⁸À tẹmẹayema ḅụ ó ḅieḅẹlẹ gbaso. À tẹmẹḅịa ịwọ Jerusalẹm mị, ḅieḅẹlẹ anịa ḅie ḅeinḅịa, anịa tomonima pịkị ḅieḅẹlẹ nyanaḅịa.

¹⁹Ị̀rị̀na-mịnaḅụ-na ḅieḅẹlẹ ị̀ ḅie ḅeinḅịa, Jerusalẹm na anịa tomonima na gose. Nweni ḅarị owu ẹkẹ anị nyọ, ḅarachụa-pịrị-chịn-pụkọ pịkị ḅarị sime ẹkẹ.

²⁰Awọmẹnị awọ ḅarị inia kala sịkị ḅụ fị ẹkẹ, tomoni mamgba pịkị ḍumo ḅọlọ sịkị laḅịa. Ḍumo mun kụra sọnọ-a si la apụma, nweni ini se asẹmẹnị chịnḅịa. Anịsịkị mị laka se ini fịmẹ ḅẹḅẹ, anị ị̀ya fomuḅara elekima sọ pakasam.

²¹Tomoni warị nama se arịa ḅie angaḅịa—jịn apụ arịa ḅie anga ẹkẹ. Ini irumịẹ chịnmgbọlụ ozu ḍipiḅịa se pịkị arịa sọaye ọrịḅịa—jịn apụ arịaḅụ ḅo iruḅu ẹkẹ. Eje ḅọlọ-a ḍin la ọkụ, ị̀ya tomonima ini ḅọlọ-a ḍin laḅịa. Ini nwẹngị-a fịrịma ḅe sọye tọrụḅẹlẹ ini ḅeinma nwọ nyanaḅịa.

²³Ini nwẹngị-a fịrịma ini na iḅiḅịa, siaye pịkị inia awọma ḅụ paka ẹkẹ. Àrị ini na inia furoḅie pakaḅoḅịa apụma na ḅẹlẹmaḅịa, ọkịmun ḅene-ḅene la.

²⁴Ma ini ị̀ tẹkẹ soka simeogbo àrị inia tẹkẹma pẹkẹrẹḅịa.

²⁵Piri obiri na anana awọ na gbọrị anga ye fịḅịa, chịrịḅa ḅe ọ̀ samịna osuein fịḅịa, nambulo osuein fị ọkụ, oruwuma fọn ḅo arịa fịye sọḅịa. Zaịyọn, ị̀ya osi nyana chịngị mị ọgọnọ, yese-nweni lama anịkanịka siaye ḅarị sime ẹkẹ.”