Read kirikeni Aịzaya 66 Bible Online

Aịzaya 66 - kirikeni bible

Aịzaya 66

¹Nyanaḅọ Ḅe nwọ ḅẹmẹ, “So mị anị ị̀ya amanyanaḅọ ngada-ẹ, anịsịkị sẹkiri mị ị̀ya ḅụọ-gbanaye-ẹ. Ndende sime warị anịsịkị ị́ nwọ nama ị̀ pịrịḅe, àrị angaḅịa nyọ mị ndende sime nyọ?

²Ị̀rị̀ ḅarana bebe tomonikiri mị mgba tẹmẹmẹ! Ḅụ-iderimapụ ma na, siḅụ pịkị apụma na, pịkị ị̀ ḍikiḅalafa se ị̀ ḅịpị poki apụma na àrị ini ḍiki ḅieḅẹlẹmẹ.

³“Tomonima inia ḅụḅẹlẹaye ini nwọ mịẹmịẹmẹ. Yemamgba iniaḅụ gbọrịaye-ẹ; ini nambulo ḅaa agbamịẹ-o, anịkanịka mbuḅọ ini nwọse agbamịẹ-o, ini ḅọrọ anana tọkụ se agbamịẹ anịkanịka obiri kọngọ pẹlẹ sọnị, ini ḅọrọ fịayemgbọlụ se ḍiepịrịaye agbamịẹ anịkanịka oporopo pulo se ḍiepịrịaye agbamịẹ sọnị; ini ḅọrọ insẹnsị se tẹkẹ oru pịrị sọnị. Ḅụngụngụma ḅara se tẹkẹtẹkẹ mị inia ḅieḅẹlẹmamẹ.

⁴Anịẹrẹchị àrị opu fa ọkịḅo inia ọgọnọ gbanaḅịa—ini ḍikiḅalafafa gbọrịaye ma—anịatịḅị àrị ini chịn sịkị gbọrịḅọ sọ ị̀ pẹkẹrẹkẹ anịkanịka àrị ọkwẹịn sịkị ḅụ ini ị̀ pokikẹ. Ị̀ ḅịpị pokika mị na siaye mịẹ mị na ini nwọ sẹlẹ ọkịmẹ.”

⁵Nyanaḅọ Ḅe ḍukoarịye ọ́ nwọ poki, ómine ọ̀ tẹkẹtẹkẹ pịkị ọ̀ ḅịpị pokipoki apụma: “Ómine ị̀ ḅụ nyana ḅerenimẹ gose, ọ́mịna tomonima ḅie ḍapụ taraka se ọ́ wẹrịmamẹ, ini pịkị ḅarị ómine na mịẹgbolomaye nyanakẹ. Ini ó kombo se nwọ ḅẹmẹ, ‘Ye Nyanaḅọ Ḅe oria opu mị ḍiepakụma se ọ́ ḍụa, mịẹsosịkị wa ọ́mịna ḅieḅẹlẹ mị ọrịḅịa ḅara.’ Ọkụma inina-mịnaḅụ-na ini ḅụgerere ḅụ sọḅịa!

⁶Ó poki! Nwọ opuama mị ḅie opuma oloku àrị tịḅịḅie ma, Oputẹkẹwarị ḅie fiearị ayema, anị Nyanaḅọ Ḅe se ori-na-tarakapụ ma pịrịarị fomuḅara oloku tịḅịḅie-ẹ!

⁷“Ị̀ya fịafịa opuama mị, bẹkẹma ḅaraḅụ tọkụ yi eremeniḅọ sime ọkụ anị nwọ simemẹ, yi jikeka ḅaraḅụ.

⁸Jịn ene ḅụ ọkọsimeye ọrị anịkanịka naa sa gbọrịḅọ omi? Gbọrị ene ḅụ ini yi sẹ omi? Zaịyọn mị anị opuma tọrụsiọrị ẹkẹ, yi anị jike kirikiri anị yiḅịa.

⁹Ó koromama na àrị ị̀ya tomonima ọkịḅo yi eke mị lasịkị re à ḅarị ḅereni se ini yi ẹka-ẹ.” Nyanaḅọ Ḅe ori ọkwẹịnsam.

¹⁰Ó Jerusalẹm na ḅieḅẹlẹ; ómine anị gose ḅieḅẹlẹ, ómine mị opuama mị ḅẹlẹmapụ mamgba! Ómine anị na ḅieḅẹlẹ mịọkụ, ómine ḍụẹịn ḍin anị pịrịsa apụ mamgba!

¹¹Anịa sọaye ma ḅe tọrụḅẹlẹ ọ́ nwọ nyanaḅịa, anị tọkụ nyengiḅọ kuḅie ḅụ ndondoarị sịkị ḅụ sime ọkụ.

¹²Nyanaḅọ Ḅe nwọ ḅẹmẹ, “Kuluma ẹka mịẹaye ḅara sọ à nwọse ḅo ọ́ pịrịḅịa; sẹma ḅe ngọma, samịna ẹka ideri mengi seri ọkụ àrị nwọse seri ḅo ọ́ pịrịḅịa. Nyengiḅọ kuḅie ndoarị tọkụ ọ́ nwọ kịkẹḅịa, anị nyengiḅọ ḅara ḅie deki tọkụ ḅẹlẹma ọkụ.

¹³Jerusalẹm ḅie àrị ọ́mịna kuḅie kụrọmaḅịa, nyengiḅọ mịna tọkụ kuḅie kụrọma ọkụ.

¹⁴Mịn mị paka se ómine ọrị sịkị, ọ́mịna ḅieḅẹlẹḅịa; anị ọ́ mịẹse ọ́ kụrọ pịkị ịnyọ nyanaḅịa. Anịsịkị anị ó nemiḅịaye-ẹ na Ị̀rị̀, Nyanaḅọ Ḅe, ḅịpị pokiapụ ma à ḅarachụa ini pịrịpịrịmẹ; à pịkị ị̀ya ịganị mị ḍiepakụma ị̀rị̀na-tarakapụ ma pịrịpịrịmẹ.”

¹⁵Nyanaḅọ Ḅe ọ̀ fịnị na ḅoḅịa. Irisi mị pamba ma ọgọnọ ḅụ anị ò ḅo fomuḅara se ori ịganị nyana pịrị apụma pịrịḅịaye-ẹ.

¹⁶Fịnị na okola-agiji na anị ò se bebe tomonikiri ḅie mgba fomuḅara se ḅẹrẹḅarasi se ọ̀ ḍọkịḅọ ọrị apụma pịrịḅịaye-ẹ—ḅakapụ pịkị fịḅie sọḅịa.

¹⁷Nyanaḅọ Ḅe nwọ ḅẹmẹ, “Oru tẹkẹ gose mịnaḅụ mịẹfịafịamapụ ma ḅe kuluma mị kpeki ini pịrịsam, anị nwọ igira sara mun osiḅụ sime fịayemgbọlụ ozuma ḅie sọ se oporopo nama na, ofunguru na, pịkị jịn-a ḅụngụngụma fịaye fịfị apụma na.

¹⁸Inia koromama na inia mịẹmịẹaye ma na à nemimẹ. À ḅo sẹsẹ ma ḅie sime tomoni mamgba koḅirima-ẹḅoaḅẹ. Iniḅo koḅirima sịkị, ị̀ya kụrọ mị ineda mịẹḅịaye ini nwọ ọrịḅịa

¹⁹se ini nemiḅịa na Ị̀rị̀ anị fomuḅara se ini pịrịarịḅọ ḅe-ẹ. “Ọkụma àrị inia ḅie dapụ wẹrịso se ini se ma ị̀ya ẹrẹ so mị naaka pịkị ị̀ya opu mị na kụrọ mị na ọrịka ḅọlọ-a sẹma na, amama na fịrịmaḅịa anị Spen na, Libya na pịkị Lidia na; iḅi ḅara se lubu-tẹịn ḍin apụ anị munḅịaye-ẹ, ini pịkị so Tubal na Gris na munḅịa. Mịna amama ḅie ini ị̀ya opu mị ḍuko finjimaḅịa.

²⁰Ini sẹma ḅie, ị́ juo Izrẹlapụ mamgba nwọ pịkịmaḅo ḍiepịrịye ḅaraḅụ ị̀ pịrịḅịa. Jerusalẹm ḅie, osi nyana ị̀ya chịngị mị ọgọnọ, ini ini se ḅo ị̀ pịrịḅịa, asụnma na yepụra asụn ma na ike-nambuloma na owuni-kporokporo ma na pịkị ikulele arụ ma na, ị́ ḅẹḅịa na Izrẹlapụ, fịayemgbọlụ se ini mịẹfịafịama sa ye kokoye, ngịsị ma pụlakaye ḅie chụa se Oputẹkẹwarị ḅie ḅo ḍiepịrịaye agbamịẹ-ẹḅoarị ọkụ simemẹ.

²¹Àrị inia ḅie dapụ se agbamịẹapụ na Livaị apụ na mịẹḅịa.

²²“Ị̀ya kụrọ ḅụ, ịwọ sẹkiri mị na ịwọ so mị na sime ḅọlọ sịkị la ḅịa ọkụ anị ị́ furoḅie pakaḅoḅịapụ ma na ị́ya ẹrẹ mị na sime ḅọlọ sịkị laḅịa-ọkụ-ẹ.

²³Ịwọ Akalụ Alalị sịkị goyegoye pịkị Ịnyọsara Ene goyegoye ḅie sime apụ ḅo mịanga Jerusalẹm ḅie ị̀ tẹkẹtẹkẹḅịa,” Nyanaḅọ Ḅe ọkọ ḅẹmẹ.

²⁴“Ini soḅịa sịkị, sitịḅị-chụa se ị̀rị̀na-tụḅụrụ apụma ḅe fịsa ojuma ini ọrịḅịa. Àrị pẹịarị ngule ma ngịsị àrị fị ẹkẹ, pịkị ini dọkịmarị fịnị mị ngịsị bin ẹkẹ. Tọrụmgbọlụ se ini ọrị mị, anị ḅụngụngụmaye sọ tomoniḅọ goyegoye pịrịḅịa.”