Read kirikeni Aịzaya 7 Bible Online

Aịzaya 7 - kirikeni bible

Aịzaya 7

¹Ọzaya tọkụ, Jotam ḅe yi tọkụ Ehaz ḅe Juda ḅie ḅẹrẹkọn àrị sịkị ḅụ, owu koromẹ. Siria amanyanaḅọ, Rezịn ḅe na Pẹka tọkụ Remalaya Izrẹl amanyanaḅọ ḅe na, owu seni Jerusalẹm mị pakamẹ, ọkụma ini ineda anị inumakẹ.

²Ọkwẹịn ḅo Juda amanyanaḅọ ḅe ḅeri lasịkị na Siria na Ifrem na ḅịpịogbosọ ḅụ inia owunima Izrẹl eke mị ḅụ ini omi-ẹ nwọḅẹye mị, ori na oria tomoni mamgba, inia ḅalafa-so-ọkụma fọrụ jikearị eje geregere ọkụ anị ini geregere ọkụ-ẹ.

³Nyanaḅọ Ḅe nwọse Aịzaya ḅe ḅẹmẹ, “Ị́ya tọkụ Shear-Jashọb ḅe ọkị, se ori na mun amanyana Ehaz ḅe na ịrịa. Ị́ ori ọrịḅịa nyọ anị ḅịtẹ ḍori apụma fịrịnwẹngịarị ateli mị ḅụ ọgọnọju ḍapa mị ḅie mengi mị ḅọrọḅo ogororo ḅie sarasara kuluma nyọ mị ḅụ.

⁴Ḍuko ọ̀ pịrị na ọ̀ ḅụkarakarama, se yawụma sime, ngịsị ọ̀ ḅalafama, anịkanịka ḅụḅalaḅala nyanama. Amanyanaḅọ Rezịn ḅe na oria tomoni Siriapụ ma na pịkịna amanyana Pẹka ḅe na kọn àrị ịganị mị, ḅalafamatẹịn mama fịnị-tuḅu onwoin nẹngịkẹ.

⁵Siria na Izrẹl na, inia amanyanaḅọ ḅe se chụa, ini ḅẹrẹḅiasam.

⁶Ini tọnmẹ ini owu seni Juda mị pakaḅịa se tomonima ḅalafama mịẹse ini iniaḅụ sọ se Tabiẹl tọkụ ḅe seni amanyanapụ emine mị ọgọnọ koromaḅịa ọkụ.

⁷“Ọkụma Ị̀rị̀, Nyanaḅọ Ḅe, à ḍukosam na ngịsị mịn mị mịẹkẹ.

⁸Cheye gose? Anịatịḅị Siria mị ḅe kụrọ anị Damaskọs mị-ẹ, anịsịkị Damaskọs mị ḅe kụrọ anị amanyana Rezịn yeḅụsọkaḅọ ḅe-ẹ. Izrẹl mị ọkụma, sẹ ḅaraḅụ anịa tọrụchịẹkẹ, sọnọ fa kụra tesi oyi fịnjị ḅie, anị kangulugulu ḅụ simeḅịa.

⁹Izrẹl mị ḅe kụrọ anị Sameria anịa tịḅịnị opuama mị-ẹ, anịsịkị Sameria mị ḅe kụrọ anị amanyana Pẹka yeḅụsọkaḅọ ḅe-ẹ. “Ị́ya ḅereni mị kụrọkẹ ḅẹḅẹ ị́ pịkị ineda kụrọma chịẹ ẹkẹ.”

¹⁰Nyanaḅọ Ḅe pịkịna jịn oku seni Ehaz ḅe fịrịmamẹ:

¹¹“Ị́ Nyana Tamụnọ Ḅe ḅẹ na ori elekima se ị́ pịrị. Anị ineda gbun ḍụẹịn ama mị ḅie ḅoḅịa anịkanịka ọgọnọju so mị ḅie ḅụ.”

¹²Ehaz ḅe nwọ pẹkẹrẹmẹ, “Gbọrị elekima sọnị à ḅi ẹkẹ. À ḅikẹ à Nyanaḅọ Ḅe ḍaḍiki.”

¹³Anịḅụ Aịzaya ḅe nwọ pẹkẹrẹmẹ, “Ó poki, mịọkụ, Amanyanaḅọ Devid furoḅie apụ. Inema nyana tomoni pịrịka mị ọ́mịna ḅụ ḅakasam—inema nyana Tamụnọ Ḅe pịrị sọnị ọ́mịna ḅụ ịnyọfasa?

¹⁴Iḅimẹ, anịọkụma Nyanaḅọ Ḅe na mịnaḅụ na elekima seni ị́ pịrịḅịa; ma owuḅọ nemika eremeniḅọ simekọn se gbọrị owutọkụ yi ọ́ pịrịḅịa, ‘Imanụẹl’ ini nwọse ọ̀ chịnḅịa.

¹⁵Ọ̀ sẹnịḅo ogula se mịna ḅarakuḅu tomoniḅọ sọḅịa sịkị, tomoni ndo mengi ḅuḅịa pịkịna ḅẹịn na taḅaḅịa.

¹⁶Anịsịkị mị maḅo laka simeogbo, ọ́mịna ḅalafamarị mama amanyanapụma amama kan seni tomoni ḅarị arịa ḅie anga ẹkẹ.

¹⁷“Nyanaḅọ Ḅe, Izrẹl amanyanakiri mị Juda ḅụ puaso sịkị ngịsị ḅo ọ́ lala ḅụfụka ma ḅụ sitẹịn aye ọ̀ nwọse ḅo ị́rị́ na, ị́ya tomonima na, pịkị bebe amanyanaḅọ furo mị na ọgọnọ gbana-ẹḅoaḅẹ—ò mun Asiria amanyanaḅọ ḅe ọkịḅoḅịa.

¹⁸“Anịsịkị mị ḅoḅịa sịkị, Nyanaḅọ Ḅe ori ọfịọn ḅụ elekima seni Ijipt apụma pịrịḅịa se ini Naịl Tọrụ mị ḅụ ḅọlọtẹịn ịkpangị ma ḅieḅụ ọmụmụ kpo saraḅo ọkụ ḅoḅịa, Asiriapụ ma pịkịna inia ama ḅie tomoni tẹịntẹịn akama ma pakaḅo ọkụ pakaḅoḅịa.

¹⁹Kpụlụkụ kpụlụkụ pẹsịkiri ma ḅie na, ịkụ-ma-ḅie-pokolo ma na àrị ḅein jụlẹpụḅịa, ịga-piri na nama fịfị osuein mamgba na àrị gbẹịnḅịa.

²⁰“Anịsịkị mị ḅoḅịa sịkị, Nyanaḅọ Ḅe gbọrị tịḅị-kịrịkịrịḅọ ọ̀ nwọ ọkọḅoḅịa, Yufretis Tọrụ mị saḅamanga ḅụ—Asiria sẹdaḅọ ḅe! — ọ́mịna ọgụrẹ ma na, ọ́mịna tịḅị inime ma na pịkị ọ́mịna oju ḅụ inime mamgba ọ̀ sẹịn kporikporimaḅịa.

²¹“Anịsịkị mị ḅoḅịa sịkị, gbọrị ozu kọrịḅọ ḅọrọ ḅụkụrọma gbọrị nambulo tọkụ na mama oḅori awọ na koko pakụmaḅomẹ ḅẹḅẹ,

²²àrị opuma ndo mengi pakụmaḅoḅịa, se ori arịaḅụ nyana ḅiye goyegoye nyanaḅịa. Iin fị mị ḅie kanị ḅọrọ kala apụma, ama mị ḅie ini ndo mengi ḅu ḅịa pịkịna ḅẹịn na nyana se taḅaḅịa.

²³“Anịsịkị mị ḅoḅịa sịkị, iḅi irumịẹ chịnmgbọlụ ozuma, gbọrị ozu, gbọrị ozu, irumịẹ chịnmgbọlụ ḅụ mẹndẹ oyiasi fịnjị fịnjị nyanaḅịa, gbọrịye gbọrịye pịkị seleḅa pẹkẹrẹ-a mẹndẹ oyiasi fịnjị fịnjị la gbẹịnmẹ, ọkụma ịga piri na aga-ikpu na koḅiri paka àrị gbẹịnḅịa.

²⁴Piride-apụ inia lubu ma na ḍẹịn ma na seni anịnyọ munḅịa. Iin ịga piri na aga-ikpu na opu osuein na bebe sẹ mị ḅie ḅeinḅịa.

²⁵Ini gbọrị sịkị ḅụ fịaye ḍipi ḍipi chịngịma ọgọnọ mgba, ịga piri arịa ọgọnọ sẹnị so ọkụma gbọrịḅọ sọnị ineda anịnyọ mun-ẹkẹ. Nambulo na anana na yefịfị nyọ anịḅo nwọ sọḅịa.”