Read kirikeni Aịzaya 9 Bible Online

Aịzaya 9 - kirikeni bible

Aịzaya 9

¹Ngịsị ini ineda pọkọsoḅịa ọkụ ofori-ẹ mịsịkị tọrụsiọrị mị ḅie. Zẹbụlọnị na Naftalaị na sẹma gbọrị sịkị ḅụ ḅụgerere arịa tọrụ sọmẹ, ọkụma osi sime ma sẹma pịrịḅịa tọrọkọju, Mẹditirenia ḅụ ịrụapakapaka nyọ ọkịmun Jọdan ḅụ ísí pẹkẹrẹ amama la, pịkịna mun Galili-na-mịnaḅụ na la, anị jịn sẹ apụma angarị nyọ mị.

²Kanakana ḅie nwẹngịapụma ini opu enekuḅu ọrịsam. Ini kanakana kpe ama ḅie angapụma, mịọkụ enekuḅu ḅịa inia ọgọnọ saraḅẹ.

³Ị́ opu ḅieḅẹlẹ se ini pịrịsam Nyanaḅọ; ị́ mịẹse inia ḅieḅẹlẹsam. Ị́ mịẹsaye mị inia ḅieḅẹlẹmamẹ, tomoni ịpịamgba pẹlẹ sịkịḅụ ḅieḅẹlẹḅẹlẹ ḅara mị anịkanịka ini ọfọịn ḅo ngọ ḍia ọkị sịkị ḅe ḅieḅẹlẹḅara.

⁴Anịatịḅị ini pụnụma sime ikuye mị ị́ anị kansinsam pịkịna inia aba ḅụ ini fomu sime fomuye mị na. Ị́ya tomonima pụnụma se iniaye ma sima sẹma ị́ àrị nẹngịmasam, anị ḅọlọsa sịkịḅụ Midia owunima ị́ nwọ nẹngịma ọkụ mị.

⁵Ama mị gbẹịnmachịẹ owunima inia okoro-akpaka ma na inia ḅụchụaye tomoni pulo ḅụ ḅein aye mamgba na fịnị àrị dọkịma sinḅịa.

⁶Ini tọkụ yi wa pịrịsam! Gbọrị owutọkụ ini nwọ seni wa pịrịsam! Ọ̀ pịkịna mịna tịḅịdaḅọ sọḅịa. Ini nwọseni ọ̀ chịnḅịa, “Ḅụgbiripuma Yetetemaḅọ,” “Opu Tamụnọ,” “Ḍumogbamaso Ḍaḅọ,” “Dein Ḅụ Ḅẹrẹtọn Àrị Amanyanaḅọ.”

⁷Oria amanyana kụrọ mị anị tọrọkọ munḅịa; oria amanyanakiri mị sịkịmamgba dein nyanaḅịa. Amanyanaḅọ Devid ḅe kiriḍinmaḅọ ḅara ọ̀ nwọseni ḅẹrẹtọnḅịa, oria kụrọ mị, karakaraye mịẹ ḅụ na, tọrụkụnka ḅẹrẹkọn ḅụ na anị simeḅịa, mịọkụ sakịmun ḅene-ḅene laḅịa. Kụrọmamgba Nyanaḅọ Ḅe ọ̀ tọnpẹlẹsam na ma mamgba ọ̀ mịẹḅịa.

⁸Nyanaḅọ Ḅe, ọ̀ ḅẹrẹkọn pẹlẹ Izrẹl amanyanakiri mị pịrịsam, anị Jekọb furoḅie pakaḅo apụma.

⁹Izrẹlapụ mamgba na, Sameria opuama mị ḅie angaḅọ goyegoye na, nemiḅịa na ori mịn mị mịẹmẹ. Mịọkụ ini opuaye mịẹ pịkị ḅụbomaḅẹ. Ini nwọ ḅẹmẹ,

¹⁰“Fọị aḅaịn seni nama warịma ḅịkịkorosam, ọkụma ḍụparị warị wa nwọ nama arịa tịḅịḍinmaḅịa, ini seni anị namaḅịa sịkaka ejema ini pẹlẹgbinsam, ọkụma iḅitẹịn awụ chịn wa nwọ seni àrị ḍinmaḅịa.”

¹¹Nyanaḅọ Ḅe inina-tarakapụma chukurumasam ini mun owu seni ini paka.

¹²Siria mị, ịrụapakapaka nyọ ḅụ, Filistia mị, pịkị ịrụasọsọ nyọ ḅụ Izrẹl mị mịnịḅịa ẹrẹchị inia ḅịpị ma finjisam. Anịẹḅẹ sọnị Nyanaḅọ Ḅe, oria ịganị ma pa kulumakẹ; ọ̀ ḅara pa ịsụn waraḅẹ fomuḅara se ini pịrịḅịa ẹrẹchị.

¹³Izrẹlapụma, ma ini pa siḅụ vinpịkịkẹ, Kụrọmamgba Nyanaḅọ Ḅe, fomuḅara se ini pịrịpịrịsam nwọḅẹ sọnị ma ini pa vinpịkị ma ọ̀ damamunkẹ.

¹⁴Gbọrị ene kẹngẹ ḅụ Nyanaḅọ Ḅe, ò fomuḅara seni Izrẹl tịḅịnịma na anịa tomonima na pịrịḅịa; ori ini pẹlẹsinḅịa, tịḅị na tumo na ḅụ.

¹⁵Olomuapụ ma na ḅịpịḅẹrẹlapụ ma na anị tịḅị mị-ẹ—anịsịkị tumo mị anị ịkịankoroapụ ma-ẹ, iruo aye telima àrị apụma.

¹⁶Mịna apụma tịḅịda apụma ini ini dairimasam pịkịna gbọtụma ini se ḅụḅalaḅala ḅie chusam.

¹⁷Anịẹrẹchị Nyanaḅọ Ḅe, ò ḅereni ẹkẹ asẹmẹnị ma ḅie gbọrịḅọ sọnị pọkọso, ọ̀ pịkịna ḍikitịḅịfoin nyana deapụ fịsa eremeni ma na ḍapụ na nyengiapụ na koroma fịsa awọmẹnịma sọ pịrị ẹkẹ; anịatịḅị tomoni mamgba Tamụnọ nemika pịkịna sitịḅịnyana apụ-ẹ, ini pịkị ḍukoye goyegoye siye-ẹ. Anịẹḅẹ sọ, Nyanaḅọ Ḅe ịganị mị kuluma ẹkẹ, ọkụma ọ̀ ḅara mị pa pịkịna ịsụnḅịa fomuḅara pịrịḅịa ẹrẹchị.

¹⁸Tomonima inia sitịḅịnyana mị ịga piri na ḍara-ḍara-ḍara piri na dọkịmarị fịnị sime ọkụ simemẹ. Anị kọrịarị ḅara anị opu piri ḅie kọrịarị fịnị tọrụkịrịkịrị onwoin pakụma so da ọkụ simemẹ.

¹⁹Anịatịḅị Nyanaḅọ Ḅe, ori ịganị aḅẹ, oria fomuḅara mị, anị fịnị kọrị ọkụ kọrị ama mị mgba kelema seni tomoni mamgba dọkịmasinmẹ, se ḅarachụa jụmḅọ jụmḅọ pịrịḅọ ofori-ẹ.

²⁰Nyọ nyọḅụ sẹ mị ḅie, tomoni ọrịanga-ọrịangaḅụ ini fịḅịaye pọkọ fịḅịa, ọkụma inia fịye pụkọtarị mị fa ẹkẹ. Inia awọmẹnị sọnị ini pẹịḅịa.

²¹Manasẹ apụma na Ifrem apụma na ini jụmḅọ jụmḅọ na owusọ mẹ, ini pịkịna gboloma owu seni Juda mị pakamẹ. Anịẹḅẹ sọnị, Nyanaḅọ Ḅe ịganị mị pa kulumakẹ; fomuḅara se ini pịrịḅịaye gose ọ̀ ḅara pa ịsụn waraḅẹ.