Read kirikeni Agbamịẹ Apụ 10 Bible Online

Agbamịẹ Apụ 10 - kirikeni bible

Agbamịẹ Apụ 10

¹Erọn owuapụ awọ, Nedab ḅe na Abaịhu ḅe na, iniaḅụ ḅọḅọ nụḅọ ḅụrọchụa panị mị deki se anyịmgbọlụ na insẹnsị na se anịa ḅie chụa, se agbamịẹ Nyanaḅọ Ḅe pịrịmẹ. Ọkụma mị fịnị mị osi nyanayekẹ anịatịḅị, Nyanaḅọ Ḅe ori ọkọse ini ḅẹkẹ.

²Bẹkẹma ḅaraḅụ Nyanaḅọ Ḅe fịnị se ini dọkịma ḅaamẹ, anịanga Nyanaḅọ Ḅe tọrụkuḅu ḅụ.

³Anị Moziz ḅe nwọse Erọn ḅe ḅẹye-ẹ, “Mịn anị Nyanaḅọ Ḅe ḍuko ye mịẹ, ọ̀ nwọ ḅẹmẹ na, ‘Fịrịnwẹngị ị̀ pịrịarịḅọ goyegoye osi se ị̀ya fịafịa mị pịrị; àrị ị̀ya boma mị se ị̀ya tomonima ḍieḅịa.’” Ọkụma Erọn ḅe ọ̀ yawụma simemẹ.

⁴Moziz ḅe Mishaẹl ḅe na, Ẹlzafan ḅe na nwọ chịnmẹ, anị Ọzaịẹl owuapụ awọma, anị Erọn ḍa ḅe numbireowu ḅe, se nwọse ini ḅẹmẹ, “Ó ḅo mịnyọ ḅụ ọ́mịna mịnapụma ojuma deki pakụma osi nyana Ikowarị mị ḅie, se ini se mun ini pike ịnyọsara sime nyọ mị ḅụ paka mun nụngọ ogbo koroma.”

⁵Anị ini ḅo fịapụma oju-a ḅụchụayema ọlọ se ini pike ịnyọsara sime nyọ mị ḅụ ini deki paka mun nụngọ ogbo koromaye-ẹ, anị Moziz ḅe tọnsa ḅaraḅụ.

⁶Anịsịkị Moziz ḅe nwọse Erọn ḅe na oria owuapụ awọ Ẹleaza ḅe na Itama ḅe na ḅẹmẹ, “Ọ́mịna tịḅị inime ma adalaka ḅaraḅụ ó se koromama, ọ́mịna ḅụchụayema sọnị ọ́ kanma, ọ́ ḅụ se kururu ḅara wẹrịma. Ómine ọkọ mịẹmẹ ḅẹḅẹ, ọ́ fịḅịa, se Nyanaḅọ Ḅe ori ịganị nyana bebe tomoni kpo mị mgba pịrịḅịa. Ọkụma ọ́mịna juo Izrẹlapụ mamgba ini ḅereni ini pịrị se ini mị fị mị gose kururuḅịa, anị Nyanaḅọ Ḅe se sẹịn fịnị mị mịẹye mị.

⁷Ikowarị mị ḅọkọ ḅụ ọ́ ḅụọ pọkọma anịka ọ́ fịḅịa, anịatịḅị Nyanaḅọ Ḅe oria osi pulo ini nwọse ọ́mịna tịḅị sara se ọ́ mịẹfịafịamasam.” Anịẹrẹchị Moziz ḅe ḅẹ ḅara ini nwọ mịẹmẹ.

⁸Nyanaḅọ Ḅe nwọse Erọn ḅe ḅẹmẹ,

⁹“Ị́rị́ na ị́ya owuapụ awọma na, ómine ọfịrị iru anịkanịka tọrụḅaa iru goyegoye ḅumẹ ḅẹḅẹ, à pakaḅoḅo Ikowarị mị ḅie ọ́ sọẹkẹ; ó nemikase sọmẹ ḅẹḅẹ, ọ́ fịḅịa. Mịn oloko mị anị ị́ furoḅie pakaḅo apụ mamgba kokoḅịaye-ẹ ọkịmun ḅụọḅụọ la.

¹⁰Sime Tamụnọ Ḅe pịrịye na tomoni ogbo se fịrịḅụ chuḅịaye na ḅụ kịrịye ị́ nwọ nemi sikimaḅịa, Tamụnọ Ḅe ḅụ fịafịaye na fịafịakaye na.

¹¹À Moziz ḅe ḅụ ḅọrọ se ị́ pịrị oloko mamgba ị́ seni Izrẹlapụma ḍieḅịa.”

¹²Moziz ḅe nwọse Erọn ḅe na oria kọn mama owuapụ awọ, Ẹleaza ḅe na Itama ḅe na ḅẹmẹ, “Fịayemgbọlụ agba mị ḅụ kọnye mị nwọ ọkị ini se Nyanaḅọ Ḅe pịrị fịye agba mị ḅụ, anị se suka fịturu mịẹ, se agbamịẹ ẹbẹ mị anga sịkị ḅụ ó sime anị fị, anịatịḅị mị opuma osiḅụ sime agba-ẹ.

¹³Osiḅụ sime nyọ ḅụ ó sime anị fị; mị ini se agbamịẹ Nyanaḅọ Ḅe pịrị fịye mị ḅụ ọ́ lalama ḍiekiri-ẹ. Anị Nyanaḅọ Ḅe tọn ị̀ pịrị ọkụ-ẹ.

¹⁴Ọkụma ị́rị́ na ị́ furoḅie apụma na, ekpe mị na ọḅụju ḅụọ mị na, anị Izrẹlapụma seni gboloma agbamịẹ Nyanaḅọ Ḅe pịrị se, sime agbamịẹapụma pịrị ayema pẹị. Fịafịa nyọ goyegoye ḅụ ómine ineda sime àrị pẹịḅịa. Ma agbama sime ị́rị́ na ị́ya awọma na pịrịmẹ Izrẹlapụma se ḅo gboloma agbamịẹ ayema ḅụ ọ́ lalama ḍiekiriye ḅaraḅụ.

¹⁵Ini nwọ ḅẹlẹkị mị se ḅo fịye agbamịẹ Nyanaḅọ Ḅe pịrịḅịa sịkị, anị ini pịkị ọḅụju ḅụọ mị na ekpe mị na se ḅoḅịaye-ẹ. Nama mị ḅụ mịna pẹkẹrẹ ma sime ị́rị́ na ị́ya awọma na pịrị gbasomẹ, anị Nyanaḅọ Ḅe tọn ḅaraḅụ.”

¹⁶Moziz ḅe, se simịẹ agbamịẹḅịa oḅori ḅe gbolomaye nwọ gbela se naamẹ na ini ọ̀ dọkịmasam. Ori Ẹleaza ḅe na Itama ḅe na ḍiki ịganị se nwọse ini gbelamẹ,

¹⁷“Cheye gose ómine osiḅụ sime nyọ ḅụ simịẹ agbamịẹye mị fịka? Anị opuma osi nyanamẹ, Nyanaḅọ Ḅe pịkị anị se ọ́ pịrịmẹ ó se tomoni ogbo mị mịẹ-a sima deki sinḅịa ẹrẹchị.

¹⁸Ọ́ nwọ nama ḅe oju pulo mị se osiḅụ sime Ikowarị ḅie ḅoka sịkị, mgbọkụ ómine anịanga sime agbamịẹye mị pẹịsam, à tọn ọ́ pịrị ḅaraḅụ.”

¹⁹Erọn ḅe nwọse ọ̀ pẹkẹrẹmẹ, “Nemikase mịmgba à simịẹ agbamịẹye mị fịmẹ ḅe ọkụma, Nyanaḅọ Ḅe ọ̀ ḅụḅẹlẹḅe? Tomonima inia simịẹ agbamịẹye mịmgba ini nwọse ḅo Nyanaḅọ Ḅe pịrịmẹ, ini pịkị inia dọkịma agbamịẹ ayema se ḅomẹ, anịẹḅẹsọ nwọ sime ḅalafama aye ị̀ ḅụ pakamẹ.”

²⁰Moziz ḅe mịn mị naa sịkị anị ọ̀ ḅụ na dein koromẹ.