Read kirikeni Agbamịẹ Apụ 11 Bible Online

Agbamịẹ Apụ 11 - kirikeni bible

Agbamịẹ Apụ 11

¹Nyanaḅọ Ḅe ma olokoma se Moziz ḅe na Erọn ḅe na pịrịmẹ

²Izrẹlapụma gose. Kiri ọgọnọ nama ḅụ

³ḅụọ chuku pu pịkị fịye ọkọ tokuru wu goyegoye ómine ineda pẹịḅịa,

⁴ọkụma ike-nambulo, ḍụparị ḅie ofunguru, anịkanịka ịsụn ọ́ pẹịma. Àrị fịafịaka ḅara ọ́ nwọse àrị ọkịḅịa; àrị fịye ọkọ tokuru tokurumẹ nwọḅẹ sọnị, ọkụma arịa ḅụọ chuku ma pukẹ.

⁷Oporopo nama ọ́ pẹịma. Àrị fịafịaka ḅara ọ́ nwọse àrị ọkịḅịa, arịa ḅụọ chuku ma pumẹ nwọḅẹ sọnị, ọkụma àrị fịye ọkọ tokuru tokurukẹ.

⁸Ma namama ọ́ pẹịma, ọ́ pịkị ḅara se arịa fịsa ojuma sọnị lamama, anịatịḅị àrị fịafịakẹ.

⁹Inji ḅụ ẹgẹnẹ na ẹfẹfẹrị na nyanaye goyegoye ọ́ pẹị,

¹⁰ọkụma mengi ḅie anga se ẹgẹnẹ na ẹfẹfẹrị na nyanakaye goyegoye ọ́ pẹịma.

¹¹Ọkọ sime ayema àrị fịafịaka ḅara ọ́ nwọse àrị ọkị. Ómine àrị pẹịma anịkanịka arịa fịsa ojuma sọnị ọ́ ḅara se lamama.

¹²Mengi ḅie anga se ẹgẹnẹ na ẹfẹfẹrị na nyanakaye goyegoye ngịsị ọ́ pẹịma.

¹³Ma fenima ḅụ gbọrịye sọnị ngịsị ọ́ pẹịma: igo, ikpikikpiki, ọgankwọ, ikule, ogbolilo, ẹdẹlẹ, ḍụẹịn ama ọḅọkọ, ọjụ-feni, abajikịara, pịnabo, pambaḅusọka, intoru, oḅilengọ, akamakama pịkị poku na.

²⁰Pamba chụa ḍọkọḍọkọ feni mamgba fịafịakẹ,

²¹anị ḍosi ḍosi ayema sikima ọkụma.

²²Ómine ineda igurube na, adaịn na, akpakpa na pẹịḅịa.

²³Ọkụma ísí pamba chụa se ikiriarịye mamgba fịafịaka ḅara ọ́ nwọse àrị ọkị.

²⁴Ma namama arịa fịsa ojuma ḅara se nwọ lamaḅọ goyegoye nụḅọ fịafịaka ḅụ sime mun saso laḅịa: ḅụọ chuku ḅụ akpakpa nyana nama mamgba, anị akpakpa ma maịn pu pịkị fịye ọkọ tokurumẹ nwọḅẹye ma sikima ọkụma, inein-a ḅụọ nyana se ḅụọtụmgbalị inime chụa nama goyegoye fịafịakẹ. Arịa fịsa ojuma dekiḅọ goyegoye nụḅọ ḅụchụayema nwọ sịkịrịḅịa, nụḅọ pịkị fịafịaka ḅụ sime mun saso laḅịa.

²⁹Piri-ofunguru, ofunguru, ọpịpị pịkị ambilembile na, arịmgba fịafịaka ḅara ọ́ nwọse àrị ọkị.

³¹Ḅara se àrị lama anịkanịka arịa fịsa ojuma lamaḅọ goyegoye nụḅọ fịafịaka ḅụ sime mun saso laḅịa.

³²Arịa fịsa ojuma sokoro ye ọgọnọ koromẹ ḅẹḅẹ, anị ḅarị fịafịakẹ. Anị ini ḅọrọ ḍụpọ se mịẹye sọnị, ḅịtẹ sọnị, nama oju apụra sọnị anịkanịka akpa sọnị, ini anị se mịẹye goyegoye. Ini anị se mengi ḅie suḅịa, anị fịafịaka ḅụ sime mun saso laḅịa.

³³Nemikase inia ojuma sokoro aḅaịn kuku ọgọnọ koromẹ ḅẹḅẹ, anịa ḅie simeye goyegoye ḅarị fịafịa-ẹkẹ; kuku mị ini anị ḅaaḅịa.

³⁴Fịḅịa fịye ọgọnọ ḅụ ọkọ sime kuku ḅie pakaḅo mengi saramẹ ḅẹḅẹ, anị ḅarị fịafịa-ẹkẹ; pịkị ọkọ sime kuku ḅie sime ḅuḅuye goyegoye fịafịa-ẹkẹ.

³⁵Arịa fịsa ojuma sokoro mun koro ye ọgọnọ goyegoye fịafịa-ẹkẹ; ini aḅaịn se tẹmẹ ḅẹlẹchịẹmaye anịkanịka yefọịye sọnị ị́ anị ḅaakọsịmaḅịa,

³⁶ọkụma nemikase ideri mengi anịkanịka opu mengi ḅie àrị sokoro koromẹ ḅẹḅẹ, anị fịafịa ḅụ simeḅịa, arịa fịsa ojuma layelaye fịafịakẹ nwọḅẹ sọnị.

³⁷Nemikase arịaḅụ gbọrịye sokoro ini ḍipiḅịa chịnmgbọlụ ọgọnọ koromẹ ḅẹḅẹ, chịnmgbọlụ mị pa fịafịa waraḅẹ.

³⁸Ọkụma nemikase chịnmgbọlụ mị mengi ḅie taḅụ simearịogbo arịaḅụ gbọrịye sokoro anị ọgọnọ koromẹ ḅẹḅẹ, chịnmgbọlụ mị ḅarị fịafịa-ẹkẹ.

³⁹Nemikase pẹịḅịa nama fịmẹ ḅẹḅẹ, ḅara se ọ̀ lamaḅọ goyegoye nụḅọ fịafịaka ḅụ sime mun saso laḅịa.

⁴⁰Se gbọrịḅọ nemikase nama mị ḅụ gbọrị pẹkẹrẹ pẹịmẹ ḅẹḅẹ, ori oria ḅụchụayema sịkịrịḅịa, ọkụma ọ̀ fịafịaka ḅụ sime mun saso laḅịa; fịsa oju mị dekiḅọ ḅe ori oria ḅụchụayema sịkịrịḅịa, ọkụma ọ̀ fịafịaka ḅụ sime mun saso laḅịa.

⁴¹Ḍọkọḍọkọ namama ngịsị ọ̀ pẹịma anị kiri ọgọnọ ikiri nwẹngịma ḅọrọ àrị ayema,

⁴²anị ḅọrọ ḅụlọse fọnọ aye sọnị, anịkanịka inein-a ḅụọ se nwẹngịaye sọnị, anịkanịka tọn-a ḅụọ chụaye sọnị.

⁴³Arịaḅụ gbọrịye pẹị ḅụ, ómine ọ́mịna ḅụ se fịafịaka kiri ḅụ koromama.

⁴⁴Ị̀rị̀ anị ọ́ Nyana Tamụnọ Ḅe-ẹ, ómine ọ́mịna ḅụ ma se fịafịa ḅụ wẹrị, anịatịḅị Ị̀rị̀ à fịafịa mẹ.

⁴⁵Ị̀rị̀ Nyanaḅọ Ḅe anị Ijipt mị ḅie ómine ọkịpakụmaḅo ḅọ ḅe-ẹ, à Tamụnọ sọ ọ́ pịrịḅịa ẹrẹchị. Ọ́ fịafịa ḅụ sime, anịatịḅị Ị̀rị̀ à fịafịamẹ.

⁴⁶Mị anị namama na, fenima na, mengi ḅie simeye goyegoye mamgba na, pịkị kiri ọgọnọ nwẹngịarịaye mamgba na gboloma oloko mị-ẹ.

⁴⁷Ómine ọ́ ḅụ ọbị se tẹmẹḅụ fịafịaye na tẹmẹḅụ fịafịakaye na nwọ nemi kịrịma, pẹị gbẹịn nama na pẹị gbẹịnka nama na ọ́ pịkị nwọ nemi kịrịma.