Read kirikeni Agbamịẹ Apụ 14 Bible Online

Agbamịẹ Apụ 14 - kirikeni bible

Agbamịẹ Apụ 14

²pịrịmẹ anị ḅụkan obi kọnso se ḅo ḅụ iḅisa ḅọ ḅụmịẹfịafịama gbolomaye. Ọ̀ fịafịasam ini nwọ ḍukopakụmaḅịa ene mị ḅụ ini ò se ḅo agbamịẹḅọ ḅe pịrịḅịa,

³se agbamịẹḅọ ḅe ori ọkị ini pike ịnyọsara sime nyọ mị ḅụ pakaso mun iḅiọkụma ò ḍikikpaịnmaḅịa. Nemikase obi mị gwọsam nwọ ḅẹḅẹ,

⁴agbamịẹḅọ ḅe ọ̀ kụrọ pịrịḅịa na ini mama fịafịa feni nwọ ọkịḅo, pịkị awụ chịn gbọrị ikiḅa na, gbọrị pulo-pulo ḍiki na, pịkị gbọrị chịn ịsaka na.

⁵Anịsịkị agbamịẹḅọ ḅe ọ̀ kụrọ pịrị se ini mama fenima ḅụ gbọrị wu ḅaa, se ịwọ ideri mengi ḅie sime okoma ḅẹlẹ ḅie daḅịa.

⁶Ori ísí feni ḅe na, awụ chịn ikiḅa mị na, pulo-pulo ḍiki mị na, pịkị chịn ịsaka mị na ọkị se ini ḅaa feni ḅe oju pulo mị ḅie suḅịa.

⁷Pulo mị ọ̀ nwọse sọnọma sịkị seni ḅụkan obi mị kọnse ḅụmịẹfịafịamaḅịaḅọ ḅe sanaḅịa, anịsịkị ò ḍukopakụmaḅịa na ọ̀ fịafịasam. Ḍumo feni ḅe ọ̀ nwọ wẹrịso se ò fin ele mị saḅa soḅịa.

⁸Tomoniḅọ ḅe ori oria ḅụchụayema sịkịrị, ọ̀ ḅụ inime mamgba sẹịnsin, se mengi ḅiriḅịa, anịsịkị re mị ọ̀ fịafịasaye-ẹ. Ori ineda so ini pike ịnyọsara sime nyọ mị munḅịa, ọkụma oria ikowarị mị ḅie ọ̀ sọka mun sọnọma ḍin nwọ laḅịa.

⁹Sọnọma ḍin karama ene mị ḅụ ọ̀ pịkịna ọ̀ tịḅị na, ọgụrẹ ma na, ọ̀ tọrụ anjị na, pịkị ọ̀ ḅụ sime inime mamgba nwọ sẹịnsinḅịa; oria ḅụchụayema ọ̀ nwọ sịkịrị pịkị mengi ḅiriḅịa, anịsịkị re mị ọ̀ fịafịasaye-ẹ.

¹⁰Nine-a ḍin karama ene mị ḅụ mama ajirima na gbọrị kụra lasa anana na ọ̀ nwọse ḅoḅịa, ḅẹḅẹaye ḅụ oforika aye, oliv pulo se gwa fịlawa tẹrẹ-a loko na, pịkị oliv pulo gbọrị kongo ololo se tẹrẹ-a kiri pu ḅe gbọrị kiri na.

¹¹Agbamịẹḅọ ḅe ọ̀ ma agbamịẹaye ma na tomoniḅọ ḅe na ọkị se Nyanaḅọ Ḅe pakaḅoḅo Ikowarị mị ḅọkọ munḅịa.

¹²Anịsịkị agbamịẹḅọ ḅe ori ajirima ma ḅụ gbọrị wu ọkị se pulo gbọrị kongo ololo se tẹrẹ-a kiri pu se gbọrị kiri mị ḅụ chụa se kpoto pẹkẹrẹḅo agbamịẹ Nyanaḅọ Ḅe pịrịḅịa. Ori àrị se sosikima ḍiepịrịye agbamịẹ Nyanaḅọ Ḅe pịrịḅịa; anị sime agbamịẹḅọ ḅe pịrịye ḅaraḅụ.

¹³Ini se si agba na, dọkịma agba na mịẹḅịa namama ḅaaḅaa osiḅụ sime nyọ mị ḅụ mị ori ajirima ḅe ḅaaḅịaye-ẹ. Ori ọkọ mịẹḅịa anịatịḅị kpoto pẹkẹrẹḅo agba mị na si agba mị na sime agbamịẹḅọ ḅe pịrịmẹ, anịatịḅị àrị opuma osiḅụ omi-ẹ.

¹⁴Agbamịẹḅọ ḅe ori anana tọkụ ḅe oju pulo mị ḅụ ye ọkị se ini mịẹfịafịamaḅịaḅọ ḅe amaḅaranga ḅeri mị ọgọnọ ḅụ na, amaḅaranga opu ḅaratụmgbalị mị ḅụ na, amaḅaranga opu ḅụọtụmgbalị mị ḅụ na nwọ tanḅịa.

¹⁵Agbamịẹḅọ ḅe ori oliv pulo mị ḅụ ye ọkị se, oria ereḅaranga ḅarakuḅu mị ḅie sarase,

¹⁶oria amaḅaranga ḅaratụmgbalị se anịa ḅie gbọ se sọnọma sịkị se anị nyọ ḅụ Nyanaḅọ Ḅe tọrụkuḅu ḅụ sanaḅịa.

¹⁷Ọ̀ ḅarakuḅu ḅie sime pulo mị na anana tọkụ ḅe oju pulo mị na ọ̀ nwọ ọkị se ini mịẹfịafịamaḅịaḅọ ḅe amaḅaranga ḅeri mị ọgọnọ ḅụ na, oria amaḅaranga opu ḅaratụmgbalị mị ḅụ na, pịkị oria amaḅaranga opu ḅụọtụmgbalị mị ḅụ na tanḅịa.

¹⁸Ọ̀ ḅarakuḅu ḅie kọn pulo mị ọ̀ nwọse tomoniḅọ ḅe tịḅị saraḅịa. Mị ò seni ḅụmịẹfịafịama mịẹmịẹye mị mịẹḅịa ọkụ mị-ẹ.

¹⁹Anịsịkị agbamịẹḅọ ḅe ò si agba mị mịẹḅịa pịkị, ḅụmịẹfịafịama mịẹmịẹye mị mịẹḅịa. Anịeso, anị dọkịma agbamịẹḅịa nama ḅe ọ̀ nwọ ḅaaḅịa

²⁰se anị seni fịaye mgbọlụ agba mị na chụa dọkịmaḅịa agbamịẹ ẹbẹ mị ọgọnọ ḅụ. Mị ḅara mị anị agbamịẹḅọ se ḅụmịẹfịafịama mịẹmịẹye mị mịẹḅịa ọkụ mị-ẹ, se tomoniḅọ ḅe ọ̀ fịafịaḅịa.

²¹Nemikase tomoniḅọ ḅe igweinḅọ-ẹ se ori ineda mịẹkụkụḅịaye ofori-ẹ ḅẹḅẹ, gbọrị ajirima kẹngẹ ọ̀ nwọse ḅo oria ḅụmịẹfịafịama mịẹmịẹye mị mịẹḅịa, anị oria kpoto pẹkẹrẹḅo agbamịẹ Nyanaḅọ Ḅe pịrị ḅaraḅụ, Nyanaḅọ Ḅe oria sosikima ḍiepịrịye agba mị sime agbamịẹḅọ ḅe pịrịmẹ. Oliv pulo se gwa fịlawa gbọrị loko kẹngẹ ọ̀ nwọse ḅoḅịa fịaye mgbọlụ agba mị gose pịkị oliv pulo ḅụ gbọrị kongo ololo se tẹrẹ-a kiri pu ḅe gbọrị kiri na.

²²Ọ̀ pịkị mama okuku anịkanịka mama elesika na nwọse ḅoḅịa, gbọrị wu anị si agbamịẹye-ẹ, ísí wu ḅe anị dọkịma agbamịẹye-ẹ.

²³Oria ḅụmịẹfịafịama mịẹmịẹye mị ḅe nine-a ḍin karama ene mị ḅụ ori àrị ọkịḅo agbamịẹḅọ ḅe pịrịḅịa, Nyanaḅọ Ḅe pakaḅoḅo Ikowarị mị ḅọkọ ḅụ.

²⁴Agbamịẹḅọ ḅe ori anana tọkụ ḅe na oliv pulo mị na nwọ ọkị se sosikima ḍiepịrịye agbamịẹ Nyanaḅọ Ḅe pịrịḅịa, anị sime agbamịẹḅọ ḅe pịrịye ḅaraḅụ.

²⁵Ori anana tọkụ ḅe ḅaa se oria oju pulo mị ḅụ ye ọkị se tomoniḅọ ḅe amaḅaranga ḅeri mị ọgọnọ ḅụ na, oria amaḅaranga opu ḅaratụmgbalị mị ḅụ na pịkị oria amaḅaranga opu ḅụọtụmgbalị mị ḅụ na nwọ tanḅịa.

²⁶Agbamịẹḅọ ḅe ò pulo mị ḅụ ye ọkị se oria ereḅaranga ḅarakuḅu mị ḅie sara

²⁷se oria amaḅaranga gbọrị ḅaratụmgbalị se anị seni anị nyọ ḅụ Nyanaḅọ Ḅe tọrụkuḅu sanaḅịa sọnọma sịkị ḅụ.

²⁸Ọ̀ nama oju pulo mị se tan anga ma ọ̀ pịkị oliv pulo mị se nwọ tanḅịa, tomoniḅọ ḅe amaḅaranga ḅeri mị ḅụ na, oria amaḅaranga opu ḅaratụmgbalị mị ḅụ na, pịkị oria amaḅaranga opu ḅụọtụmgbalị mị ḅụ na.

²⁹Ọ̀ ḅarakuḅu ḅie kọn pulo mị ọ̀ nwọse tomoniḅọ ḅe tịḅị kiri saraḅịa, mị ḅara mị ò seni ḅụmịẹfịafịama mịẹmịẹye mị mịẹḅịa ọkụ-ẹ.

³⁰Anịsịkị okuku ma anịkanịka elesika ma ḅụ gbọrị wu ọ̀ nwọse se

³¹si agbamịẹḅịa, pịkị ísí wu ḅe se dọkịma agba nwọ mịẹḅịa; pịkị fịaye mgbọlụ agba mị na. Mị ḅara mị anị agbamịẹḅọ ḅe se ḅụmịẹfịafịama mịẹmịẹye mị mịẹḅịa ọkụ-ẹ.

³²Mị ḅụkan obi kọnḅọ ḅe se ọ̀ ḅụmịẹfịafịamaḅịa oloko mị-ẹ, ori ineda seni agba mị mịẹ gbẹịn ayema nyanaḅokẹ nwọ ḅẹḅẹ.

³³Nyanaḅọ Ḅe ma olokoma se Moziz ḅe na Erọn ḅe na

³⁴pịrịmẹ anị oḅopuroḅa warị ḅụ wasama na gbolomaye ḅụ. (Ma olokoma kiri ọkịḅịa sịkị anị Izrẹlapụma Kenan mị ḅie sọmun ḅọrọso sịkị-ẹ, anị Nyanaḅọ Ḅe ḅereni ini pịrị na sime ini pịrịḅịa nwọḅẹ ama mị.) Tomoniḅọ nemikase ḍọkịḅo ọrịmẹ na Nyanaḅọ Ḅe oḅopuroḅa se nụḅọ warị fịrịmasam nwọ ḅẹḅẹ, ò somun anị gbolomaye ḍuko agbamịẹḅọ ḅe pịrị.

³⁵

³⁶Agbamịẹḅọ ḅe ma ò ḅo oḅopuroḅa ma ḍikika simeogbo ọ̀ kụrọ pịrịḅịa na anịa ḅie sime aye mamgba ini tan pakụma; mịẹsosịkị ọ̀ ḅẹ ẹka ḅara na warị mị ḅie sime aye mamgba fịafịakẹ. Anịsịkị ò mun warị mị ḅụ

³⁷oḅopuroḅa mị ḍikikpaịnmaḅịa. Nemikase elelenda tọrụ anịkanịka pulo-pulo tọrụ chụaye omi-ẹ ḅẹḅẹ, pịkị warị agbagba mị pẹị ḅie sọ aḅẹ ḅẹḅẹ,

³⁸ọ̀ warị mị ịkasị koroma se soḅịa sọnọma ḍin ḅụ.

³⁹Sọnọma ḍin karama ene mị ḅụ ò vinpịkị ḅo se anị ḍikikpaịnmaḅịa. Nemikase oḅopuroḅa mị wasamamẹ ḅẹḅẹ,

⁴⁰ọ̀ kụrọ pịrịḅịa na warị mị ḅụ oḅopuroḅa chụa ḍụparịma ini nwọ sọkị sin se àrị se pakaso mun opu ama mị ḅie ḅụ gbọrị fịafịaka nyọ ḅụ gbin wokuma.

⁴¹Anị ḅọrọ sịkị warị mị ḅie ḅụ warị agbagba ma ọ̀ nwọ kpakpa, se kiri sara ayema ọ̀ tan pakaso mun opu ama mị ḅie ḅụ gbọrị fịafịaka nyọ ḅụ saraḅịa.

⁴²Anịsịkị ini jịn-a ḍụparị se ini sin-a ḍụparịma kiri ḍinma pịkị ịwọma warị agbagba ma sikiriḅịa.

⁴³Nemikase ini warị mị ḅụ ḍụparịma sin pịkị anị kpakpa so, pịkị sikiri fama sose oḅopuroḅa ma kpoto warị mị ḅie chụamẹ ḅẹḅẹ,

⁴⁴agbamịẹḅọ ḅe ò mun ḍikiḅịa. Anị nemikase wasamamẹ ḅẹḅẹ, warị mị fịafịakẹ.

⁴⁵Ini anị kan koromaḅịa, se anịa ḍụparịma na, anịa chịnma na, pịkị ini se anị sikiri aye mamgba na, opu ama mị ḅie ini àrị tan pakaso mun fịafịaka gbọrị nyọ ḅụ saraḅịa.

⁴⁶Warị mị ịkasị sime sịkị mị ḅụ anịa ḅie sọḅọ goyegoye nụḅọ fịafịaka ḅụ sime mun saso ḅiri laḅịa.

⁴⁷Warị mị ḅie ḅọlọlọ anịkanịka yefịḅọ goyegoye nụḅọ mịna ḅụchụayema sịkịrịḅịa.

⁴⁸Nemikase, agbamịẹḅọ ḅe ḅo warị ḍiki se so, ini pịkị kpoto warị mị sikirisam, se oḅopuroḅa mị ḅarị pakakẹ ḅẹḅẹ, ò ḍukopakụmaḅịa na warị mị fịafịamẹ, anịatịḅị oḅopuroḅa mị anị gbọtụma sosam.

⁴⁹Se warị mị mịẹfịafịama ḅụ, mama feni ọ̀ nwọ ọkịḅịa, awụ chịn na, pulo-pulo ḍiki na, pịkị chịn Ịsaka na.

⁵⁰Feni ma ḅụ ọ̀ gbọrị wu ḅaa se ịwọ ideri mengi ḅie sime okoma ḅẹlẹ ḅie daḅịa.

⁵¹Anịsịkị ori awụ chịn mị na, chịn Ịsaka mị na, pulo-pulo ḍiki mị na, pịkị ḍumo feni ḅe na nwọse ọ̀ ḅaa feni ḅe oju pulo mị na ịwọ ideri mengi mị na ḅie su seni bebe warị mị mgba sanaḅịa sọnọma sịkị ḅụ.

⁵²Mị ḅara anị ò seni feni ḅe oju pulo mị na, ideri mengi mị na, ḍumo feni ḅe na, awụ chịn mị na, chịn Ịsaka mị na, pịkị pulo-pulo ḍiki mị na se warị mị mịẹfịafịamaḅịa ọkụ mị-ẹ.

⁵³Anịsịkị ò ḍumo feni ḅe wẹrịso se ori ele mị ḅie fin opu ama mị ḅie pakasoḅịa. Mị ḅara anị ò seni warị mị mịẹfịafịama mịẹmịẹye mị mịẹḅịa ọkụ mị-ẹ, se anị fịafịaḅịa.

⁵⁴Ma anị ḅụkan obi ma oloko ma-ẹ;

⁵⁵ịnọ ma na, ọpọpọlị ma na, anịkanịka dọkịaye ma sọnị; pịkị ḅịtẹ ḅụ anịkanịka warị ḅụ paka oḅopuroḅa oloko ma-ẹ.

⁵⁶

⁵⁷Ma olokoma anị, ye fịafịa ḅụ sime sịkị na pịkị ye fịafịaka sịkị na nwọ ḍiepakụmaḅịaye-ẹ.