Read kirikeni Agbamịẹ Apụ 17 Bible Online

Agbamịẹ Apụ 17 - kirikeni bible

Agbamịẹ Apụ 17

¹Nyanaḅọ Ḅe tọn Moziz ḅe pịrịmẹ

²na ọ̀ ma olokoma chụa Erọn ḅe na oria owuapụ awọma na pịkị bebe Izrẹlapụ mamgba na nwọ pịrị.

³Anị ḅọrọ nambulo-o anịkanịka anana-o anịkanịka oḅori ḅaa se agbamịẹ Nyanaḅọ Ḅe pịrịḅịa Izrẹlḅọ goyegoye, nụḅọ anị ḅaa anga ḅaa anga, nụḅọ oloko kanmẹ, Nyanaḅọ Ḅe pakaḅoḅo Ikowarị mị ḅọkọ ḅụ sikima ọkụma. Ò pulo ọsụnsam, ọ̀ pịkị ḅarị Nyanaḅọ Ḅe a tomonima ḅie gbọrịḅọ sọ ẹkẹ.

⁵Mịn oloko mị fiearịye anị Izrẹl sẹ mị ḅie ọrịanga ọrịanga ḅụ ini ḅaaḅaa namama ini nwọse ḅo Nyanaḅọ Ḅe pịrịḅịa mịọkụ. Ini àrị se ḅo agbamịẹḅọ ḅe pịrịḅịa mịọkụ, se Ikowarị mị ḅọkọ ḅụ àrị ḅaaḅịa anị gboloma agba mịẹaye ḅaraḅụ.

⁶Agbamịẹḅọ ḅe ọ̀ nama ḅe oju pulo mị seni agbamịẹ ẹbẹ mị aka ma ḅụ saraḅịa Ikowarị mị ḅọkọ ḅụ, se ọ̀ ḅẹlẹkị mị dọkịmaḅịa, anịa kụnụ Nyanaḅọ Ḅe ḅụḅẹlẹḅẹlẹye mị.

⁷Izrẹlapụma ngịsị ini ḅarị ḅereni nyanakapụ sọ Nyanaḅọ Ḅe pịrị ẹkẹ, anị ele ma ḅie inia namama ḅaa se agbamịẹ seni si-a tẹmẹ ma pịrịḅụ. Izrẹlapụma ini mị oloko mị kokomun ḅụọ ḅụọ nwọ laḅịa.

⁸Izrẹlḅọ anịkanịka ini na sẹ mị ḅie anga jịn sẹ ḅọ sọnị ḅarị ọrịanga ọrịanga ḅụ dọkịma agba anịkanịka jịn

⁹agbamịẹ Nyanaḅọ Ḅe pịrịmẹ ḅẹḅẹ, Ikowarị mị ḅọkọ ḅụ sikima ọkụma, nụḅọ ḅarị Nyanaḅọ Ḅe a tomonima ḅie gbọrịḅọ sọ ẹkẹ.

¹⁰Izrẹlḅọ anịkanịka ini na sẹ mị ḅie anga jịn sẹ ḅọ sọnị pulo oju ḅie sime nama pẹịmẹ ḅẹḅẹ, Nyanaḅọ Ḅe ori nụḅọ dapakaḅịa, nụḅọ ḅarị oria tomonima ḅie gbọrịḅọ sọ ẹkẹ.

¹¹Ḍumo mị pulo mị ḅie anị omi-ẹ, anị Nyanaḅọ Ḅe gose oloko chụaye-ẹ na ini pulo mị mgba se agbamịẹ ẹbẹ mị ḅụ sara, seni tomonima mịẹasi ma dekisin gose. Pulo mị, anị ḍumo mị-ẹ, anị si dekisin mẹ.

¹²Anị Nyanaḅọ Ḅe gose ḍuko Izrẹlapụma anịkanịka inia ḅie anga jịn sẹ ḅọ goyegoye na pịrịye-ẹ na pulo oju ḅie sime nama ini pẹị ma-ẹ.

¹³Nemikase Izrẹlḅọ anịkanịka sẹ mị ḅie anga jịn sẹ ḅọ fịafịa nama anịkanịka feni tẹịnḅaamẹ ḅẹḅẹ, pulo mị ọ̀ nwọse kiri ḅie sara se onwun se anị gbẹịn.

¹⁴Ḍumo mị pulo mị ḅie anị omi-ẹ, anị Nyanaḅọ Ḅe gose Izrẹlapụma ḅẹye-ẹ na pulo mị ini se nama mị na chụa pẹị ma-ẹ, anị ḅara mịẹḅọ mịẹḅọ nụḅọ ḅarị oria tomonima ḅie gbọrịḅọ sọ ẹkẹ.

¹⁵Ḅẹḅọ ḅẹḅọ, anị ḅọrọ Izrẹlḅọ anịkanịka jịn sẹ ḅọ sọnị, papa ngẹrị fị nama anịkanịka si nama ḅaa wu pẹịḅọ goyegoye, nụḅọ mịna ḅụchụayema sịkịrị, pịkị mengi ḅiri, se koru ḅụ sime mun saso laḅịa, anịsịkị re mị ọ̀ fịafịasaye-ẹ.

¹⁶Nụḅọ ọkọ mịẹkẹ ḅẹḅẹ, nụḅọ anịḅe fomuḅara daḅịa.