Read kirikeni Agbamịẹ Apụ 19 Bible Online

Agbamịẹ Apụ 19 - kirikeni bible

Agbamịẹ Apụ 19

¹Nyanaḅọ Ḅe nwọse Moziz ḅe ḅẹmẹ

²ḍuko Izrẹl sẹ mị pịrị, “Ọ́ fịafịa ḅụ sime, anịatịḅị, Ị̀rị̀ Nyanaḅọ, ọ́mịna Tamụnọ Ḅe, à fịafịamẹ.

³Ọ́mịna ḅie ḅọḅọ nụḅọ nyengiḅọ na ḍaḅọ na osi, pịkị ị̀ya Ịnyọsara Ene mị sọnị nwọ koko, anị à tọn ọ́ pịrịsa ḅaraḅụ. Ị̀rị̀ anị Nyanaḅọ, ọ́mịna Tamụnọ Ḅe-ẹ.

⁴“Ómine ị̀ wẹrịso se mun ini kara aye tẹkẹma; ómine ikulele se oru mịẹ se àrị tẹkẹma. Ị̀rị̀ anị Nyanaḅọ, ọ́mịna Tamụnọ Ḅe-ẹ.

⁵“Ọ́ nama ḅaa se gboloma agba mịẹḅịa sịkị, à se ọ́ pịrị olokoma ọ́ nwọ koko, agba mị àrị ọkịḅịa.

⁶Nama ọ́ nwọ ḅaa ene mị ḅụ ómine anị pẹịḅịa anịkanịka anịḅe ene ḅa. Kọn se mun tẹrẹ-a ḍin la nama goyegoye ọ́ dọkịma,

⁷anịatịḅị anị ḅarị fịafịakẹ, nemikase anị pẹịḅọ omi-ẹ ḅẹḅẹ, agba mị à ḅarị ọkị ẹkẹ.

⁸Anị pẹịḅọ goyegoye, se osiḅụ wẹrị ị̀ pịrịye nụḅọ nwọse papaye mịẹmẹ nwọḅẹ ḅẹrẹḅarasi nụḅọ nwọ nyanaḅịa, nụḅọ pịkị ḅarị ị̀ya tomonima ḅie gbọrịḅọ sọ ẹkẹ.

⁹“Ọ́mịna ozuma ḅie ọ́ fịaye mgbọlụ pẹlẹḅịa sịkị, piri aka ḅụ sime ayema ọ́ pẹlẹma, ọ́ pẹlẹ kọnma ịpịamgba ma sọ ó vinpịkị mun ḅarị àrị pẹlẹma.

¹⁰Ọ́mịna irumịẹ chịnmgbọlụ ozuma ḅie ọ́ ḅara gbarịaye ma ó vinpịkị mun àrị gbalama, sokoro koroaye ma sọnị ó dekima; ọ́ wẹrịso igwein apụma na jịn sẹ apụma na pịrị. Ị̀rị̀ anị Nyanaḅọ ọ́mịna Tamụnọ Ḅe-ẹ.

¹¹“Ó furu ma, ó nweni inumama, anịkanịka iruokọn ma.

¹²Ị̀ya ẹrẹ se yeḅereni ma ị́ nemikase mịẹ ẹkẹ ḅẹḅẹ, anị ḍikisima ọkịḅo ị̀ya ẹrẹ mị pịrịḅịa. Ị̀rị̀ anị Nyanaḅọ ọ́mịna Tamụnọ Ḅe-ẹ.

¹³“Gbọrịḅọ sọnị jụmḅọ pụnụmama pịkị kụrọḅara se jụmḅọye ọkịma. Ị́ fịrị ḅụ ọkịḅọ ḅe oria gbẹịnye mị ọlọchịẹmama, gbọrị ene kẹngẹ sọnị.

¹⁴Ḅeri inikiḅọ ḅe ò worima, tọrụmgbọlụ pụnḅọ ḅe yese ọ́ tọrọkọ mgbẹsẹ koromama se anị ọ̀ mịẹse ọ̀ ḅụọ tọmbụlọma. Ómine ị̀ ḍikiḅalafa; Ị̀rị̀ anị Nyanaḅọ ọ́mịna Tamụnọ Ḅe-ẹ.

¹⁵“Ọ́ karakara ḅẹrẹkọn apụ sọ, oloko la ḅẹrẹ ọ́ nwọ kọn àrị sịkị, igweinḅọ ḅe ò jusọma, pịkị ngọkọnḅọ ḅe sọnị ò ḍikiḅalafama.

¹⁶Ọ́ gbọrịḅọ ḅụ sọnị iruo-a ḅẹrẹ ḍukoma ḅọrọma, tomoniḅọ mịnaḅụ ḍụa ḅẹrẹ ḍukoarị sịkị, ị́ ḍuko se ọ̀ ḍụaḅịaye omi-ẹ ḅẹḅẹ ḍuko pakụma. Ị̀rị̀ anị Nyanaḅọ Ḅe-ẹ.

¹⁷“Ḅụosọ nyana gbọrịḅọ sọnị pịrịma, ọkụma ị́ ori na nyana ḅẹrẹ mị fama, mịẹse ò gose ị́ simịẹḅọ sọ ẹka ḅara.

¹⁸Gbọrịḅọ ḅụ sọ sowu ḅima anịkanịka papa ò ḍikiḅieḅuma, ọkụma ị́ ḅụ ḅẹlẹma ọkụ nwọse ị́ juo tomoniḅọ ḅẹlẹma. Ị̀rị̀ anị Nyanaḅọ Ḅe-ẹ.

¹⁹“À tọn ayema ọ́ nwọ mịẹ. Ó ḅereni ma tomoni na anga namama jịn kịrị nama furama. Mama kịrịkịrị fịaye mgbọlụ ọ́ nwọse gbọrị ozu ḅie ḍipima. Kịrịkịrị mama ḅịtẹ tọrụ ó se ḅụchụaye gbin chụama.

²⁰“Tomoni nemikase nemisam na omoni eremeniḅọ tọrụpakụma owuḅọ na simesam; ọkụma á tịḅị igbiki mị ma gbẹịnkẹ, se á ḅo ngẹrị á tịḅị nyanakẹ, anịsịkị jịn owuḅọ ḅo árị na gbolomamẹ ḅẹḅẹ, ini mama apụma ini fomuḅara daḅịa, ọkụma ini ini ḅaa ẹkẹ, anịatịḅị omoni ḅara ḅie ma á pakaḅokẹ.

²¹Tomoniḅọ ḅe gbọrị ajirima ọ̀ nwọse à pakaḅoḅo Ikowarị mị ḅọkọ ḅoḅịa, anị oria pẹkẹrẹ ḅo agbamịẹye ḅaraḅụ,

²²agbamịẹḅọ ḅe nama ḅe se ḅụmịẹfịafịama mịẹmịẹye mị mịẹ tomoniḅọ ḅe pịrịḅịa, se oria si mị dekisinḅịa ẹrẹchị, se Tamụnọ Ḅe si ḅụḅarasin ọ̀ pịrịḅịa.

²³“Ó ḅo Kenan ama mị ḅie sọ se anịa ḅie kịrịkịrị-a chịnmgbọlụ ḍipimẹ ḅẹḅẹ, tatarị tẹrẹ-a kụra ma ḅie chịnmgbọlụma fịafịakẹ nwọḅẹ ḅara ọ́ nwọse àrị ọkị. Anịsịkị mị ḅụ ómine anị fị ẹkẹ.

²⁴Inein karama kụra mị ḅie chịnmgbọlụ mamgba ó se osiḅụ wẹrị mịẹḅaka agba mịẹ ḅaraḅụ; se ḍiepakụma na ị̀ ḅụ ó ḅieḅẹlẹ nyanamẹ, Ị̀rị̀ ọ́ Nyanaḅọ Ḅe.

²⁵Ọkụma sọnọ karama kụra mị ḅie chịnmgbọlụma ọ́ fịḅịa. Ó nemikase mịn mị mịẹmẹ ḅẹḅẹ, ọ́mịna chịnmgbọlụma àrị tọn-a fịaye chụaḅịa. Ị̀rị̀ anị Nyanaḅọ ọ́mịna Tamụnọ Ḅe-ẹ.

²⁶“Pulo oju ḅie pa sime nama ọ́ pẹịma. Àrị opu-a mịẹmịẹaye ma ọ́ ḍawọma.

²⁷Ọ́mịna tịḅị inime ma ọ́ sẹịn sin ma, anịkanịka ọgụrẹ ma kịrị pẹkẹrẹmama,

²⁸anịkanịka ọ́mịna oju ḅụ kingi se elekima chụama, se ḍiepakụma na ó ḍụẹịn ḍin aḅẹ. Ị̀rị̀ anị Nyanaḅọ Ḅe-ẹ.

²⁹“Ọ́mịna eremeni awọma ómine inia ḅụgereremama anị ini se Tamụnọ opu warị mị ḅie sẹfị ere mịẹḅụ; ó nemikase ọkọ simeye mịẹmẹ ḅẹḅẹ; anị ó vinpịkị mun jịn-a oru tẹkẹ aḅẹ, se bebe ama mị mgba ḅo sitịḅịnyana pịkị sẹfị apụ nwọ sọḅịa.

³⁰Ị̀ya Ịnyọsara Ene mị ó koko, pịkị ini ḅo ị̀ tẹkẹ àrị nyọ mị osi se anị pịrị. Ị̀rị̀ anị Nyanaḅọ Ḅe-ẹ.

³¹“Fịapụ tẹmẹ chịn yeḅiarịapụma mun inia tọrọkọ ye ḅima, ị́ ọkọ simeye mịẹmẹ ḅẹḅẹ ị́ fịafịakaḅọ sọḅịa. Ị̀rị̀ anị Nyanaḅọ ọ́mịna Tamụnọ Ḅe-ẹ.

³²“Olomusapụ ma ini osi, pịkị mangịma nyana ini pịrị. Osi ḅaraḅụ ị̀ ḅịpị poki; Ị̀rị̀ anị Nyanaḅọ Ḅe-ẹ.

³³“Ọ́mịna ama ḅie anga jịn sẹ apụma ó siye se ini mịẹma.

³⁴Ó seni ó juo Izrẹlḅọ ḅe na angaḅịa ọkụ mị ọ́ nwọse ini na anga, pịkị ó se ọ́ ḅụ ḅẹlẹma ọkụ ọ́ nwọse ini ḅẹlẹma. Ó se ḅiekoroma na ómine sọnị gbọrị sịkị ḅụ ómine igoniapụ sọmẹ Ijipt ama mị ḅie. Ị̀rị̀ anị Nyanaḅọ ọ́mịna Tamụnọ Ḅe-ẹ.

³⁵“Ó gbọrịḅọ sọnị inumama anị karakarakaye se yetọn ḅụ, anị ịsụn na iku na, pịkị ḅakaye na ḅụ.

³⁶Karakara yetọnye se anịa ịsụn mị tọn, karakaraye mị se anịa iku mị tọn, pịkị karakara yetọnye mị se anịa ḅaka la-ọkụ mị tọn. Ị̀rị̀ anị Nyanaḅọ ọ́mịna Tamụnọ Ḅe-ẹ, anị Ijipt mị ḅie ómine ọkịpakụmaḅo ḅọ ḅe.

³⁷Ómine ị̀ya olokoma na pịkị à tọn ọ́ pịrị aye mamgba na nwọ koko, pịkị àrị mịẹ. Ị̀rị̀ anị Nyanaḅọ Ḅe-ẹ.”