Read kirikeni Agbamịẹ Apụ 2 Bible Online

Agbamịẹ Apụ 2 - kirikeni bible

Agbamịẹ Apụ 2

¹Tomoniḅọ fịaye mgbọlụ se ḍiepịrịye agbamịẹ seni Nyanaḅọ Ḅe pịrịḅịa ḅẹḅẹ, ọ̀ tatarị anị gbẹịn dẹkịdẹkịmaḅịa. Ori oliv pulo na pịkị insẹnsị na seni anịa ọgọnọ saraḅịa

²anịsịkị mị ori anị ọkịḅo Erọn furoḅie agbamịẹ apụma pịrịḅịaye-ẹ. Fịrịnwẹngịarị agbamịẹḅọ ḅe ḅarakuḅu ḅeinḅịa gbẹịn dẹkịdẹkịma fịye mị na pulo na, pịkị insẹnsị mị mgba na nwọ ọkị se agbamịẹ ẹbẹ mị ọgọnọ dọkịmaḅịa, se ḍiepakụma na anịmgba ini se ḍiepịrịye agbamịẹ Nyanaḅọ Ḅe pịrịmẹ. Mịn fịye agba mị anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.

³Kirikọn fịaye mgbọlụ agbamịẹ ḍiepịrịye mị sime agbamịẹ apụma pịrịmẹ; anị opuma osiḅụ omi-ẹ, ini se agbamịẹ Nyanaḅọ Ḅe pịrị fịye mị ḅụ ini anị sinpakụmaḅomẹ nwọḅẹ sịkị.

⁴Nemikase agbamịẹ ḍiepịrịye mị ini seni fịnị ḅie fọịsa fịturu-ẹ ḅẹḅẹ, fịturu sumaye ngịsị anịa ḅie sọẹkẹ. Oliv pulo ini nwọse fịlawa mị na gwa se fịturu okpokpo ma mịẹ kụrọmaḅịa, anịkanịka ini oliv pulo seni ịkịka ma nwọ tanḅịa.

⁵Nemikase agbamịẹ ḍiepịrịye mị ini seni finjima ḅẹlẹ ḅie chụọ fịturu-ẹ ḅẹḅẹ, ini oliv pulo se gwa fịlawa mị ini se anị mịẹḅịaye-ẹ, ọkụma fịturu sumaye anịa ḅie sime ẹkẹ.

⁶Anị pu kọsịma se pulo mị seni anịa ọgọnọ sara ị́ anị seni ḍiepịrịye agbamịẹḅịa sịkị ḅụ.

⁷Nemikase agbamịẹ ḍiepịrịye mị ini se panị ḅie chụọ fịturu-ẹ ḅẹḅẹ, fịlawa na oliv pulo na mị ini se anị mịẹḅịaye-ẹ.

⁸Seni ḍiepịrịye agbamịẹ Nyanaḅọ Ḅe pịrịḅịa ḅaraḅụ anị se ḅo, se anị se agbamịẹḅọ ḅe pịrị, anị anị se agbamịẹ ẹbẹ mị dama munḅịaḅọ ḅe.

⁹Agbamịẹḅọ ḅe ori anịa ḅụ ye ọkịḅịa se ḍiepakụma na anịmgba ini se ḍiepịrịye agbamịẹ Nyanaḅọ Ḅe pịrịmẹ, se ori anị dọkịmaḅịa agbamịẹ ẹbẹ mị ọgọnọ. Mịn fịye agba mị anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.

¹⁰Kirikọn agbamịẹ ḍiepịrịye mị sime agbamịẹ apụma pịrịmẹ; anị opuma osiḅụ omi-ẹ, ini se agbamịẹ Nyanaḅọ Ḅe pịrị fịye mị ḅụ ini anị sinpakụmaḅomẹ nwọḅẹ sịkị.

¹¹Ó seni fịaye mgbọlụ ḍiepịrịye agbamịẹ Nyanaḅọ Ḅe pịrịarị ayema fịturu sumaye ọ́ nwọse mịẹ ẹkẹ; ó seni agbamịẹ Nyanaḅọ Ḅe pịrịḅịa fịye ḅụ fịturu sumaye anịkanịka ḅẹịn ngịsị sọ ẹkẹ.

¹²Kụra goyegoye ọ́ tatarị pẹlẹḅịa ịpịamgba ma arịa ḍiepịrịye agba ọ́ nwọ se ḅo Nyanaḅọ Ḅe pịrịḅịa, ọkụma agbamịẹ ẹbẹ mị ọgọnọ ini anị ḍọkịma ẹkẹ.

¹³Fịaye mgbọlụ agbamịẹ ḍiepịrịye goyegoye fụn seni anịa ḅụ sara, anịatịḅị fụn mị anị ómine na Tamụnọ Ḅe na ogboku sime ọḅọkụ mị ḍiepakụmamẹ. (Ọ́mịna ḍiepịrịye agbama ḅụ mgba fụn sọḅịa gbarịmaka ḅaraḅụ.)

¹⁴Ọ́ tatarị pẹlẹ ịpịamgba ma ḅe ḍiepịrịye ọ́ nwọse ḅo Nyanaḅọ Ḅe pịrịḅịa sịkị fọịsa ịpịamgba anịkanịka gbẹịnsa fịye nwọse agba mị mịẹ.

¹⁵Oliv pulo seni chụa pịkị insẹnsị se anị ọgọnọ sara.

¹⁶Agbamịẹḅọ ḅe fịye mị ḅụ anị pẹkẹrẹ mị ọ̀ dọkịmaḅịa, pịkị se ḍiepakụmaye mịẹḅịa pulo mị na, pịkị insẹnsị mị mgba na sọnị, anị se Nyanaḅọ Ḅe pịrị fịye agbamịẹ ḍiepịrịye ḅaraḅụ.