Read kirikeni Agbamịẹ Apụ 21 Bible Online

Agbamịẹ Apụ 21 - kirikeni bible

Agbamịẹ Apụ 21

¹Nyanaḅọ Ḅe nwọse Moziz ḅe ḅẹmẹ, ḍuko Erọn furo ḅie agbamịẹapụma pịrị, “Gbọrị agbamịẹḅọ sọnị mịna ḅụ se ḅụfịafịamakaḅọ ḅara wẹrịma, anị ị́ya mịnaḅọ fị sịkị, ḅụ se ḍụẹịn ḍipi mịẹmịẹye ḅụ chu ḅụ,

²anị nyọngọrọ, ḍawu, oria owutọkụ, eremenitọkụ, numbireowu,

³anịkanịka ma owuḅọ simekase oria warị ḅie anga nụmbụrarọ tọkụ sikima.

⁴Ori ọ̀ ḅụ se ḅụ se ḅụfịafịamakaḅọ ḅara wẹrị-ẹkẹ, oria ogo mịna apụ ḅe fị ḅụ, ọ̀ ḅụ se chu ẹkẹ.

⁵“Gbọrị agbamịẹḅọ sọnị nụḅọ tịḅị sẹịn ẹkẹ, anịkanịka oria ọgụrẹ ma kịrị iderima ẹkẹ anịkanịka oria oju kin se ḍiepakụma ẹkẹ na ọ̀ ḍụẹịn ḍin aḅẹ.

⁶Ọ̀ fịafịa ḅụ simeḅịa pịkị ị̀ya ẹrẹ mị ḅụgererema ẹkẹ. Ori anị fịye agba mịẹmịẹ ị̀ pịrịarịye-ẹ, anịẹrẹchị ọ̀ fịafịaḅịa.

⁷Agbamịẹḅọ ḅe ori sẹfị nwẹngị kọn ḅọrọsa eremeni na sime ẹkẹ, anịkanịka owuḅọ nemi ḅọrọsa eremeniḅọ anịkanịka deḅọ na sosa eremeniḅọ; anịatịḅị ọ̀ fịafịamẹ.

⁸Tomonima ini agbamịẹḅọ ḅe se fịafịaḅọ ḅara wẹrịḅịa, anịatịḅị ori anị fịye agba mị mịẹ ị̀ pịrịarịye-ẹ. Ị̀rị̀ anị Nyanaḅọ Ḅe-ẹ; Ị̀rị̀ à fịafịamẹ, à pịkị ị̀ya tomonima mịẹfịafịamamẹ.

⁹Nemikase agbamịẹḅọ eremeni tọkụ ḅo sẹfị nwẹngị kọn mẹ ḅẹḅẹ, á ḍawu ḅe ḅụgereremamẹ; ini á dọkịma ḅaaḅịa.

¹⁰“Gele Agbamịẹḅọ ḅe ini osi pulo se ọ̀ tịḅị sarasam, ini pịkị ọ̀ mịẹfịafịamasam, agbamịẹḅọ ḅụchụayema chụaḅịa ẹrẹchị, anịgose ọ̀ tịḅị inime ma adalaka anịkanịka oria ḅụchụayema kan se ḍiepakụma na ọ̀ ḍụẹịn ḍin aḅẹ nwọḅẹye, ngịsị ọ̀ mịẹ ẹkẹ.

¹¹Ini ọ̀ mịẹfịafịama wẹrị ị̀ pịrịsam, anịẹrẹchị ori ọ̀ ḅụ se fịafịakaḅọ mịẹ ẹkẹ, ọ̀ pịkị ị̀ya osiḅụ sime Ikowarị mị pụlama ẹkẹ, anị anị wẹrịsomun fịḅọ sime warị ḅie sọḅụ, anị ḅọrọ ḍawu ḅe-ẹ anịkanịka nyọngọrọ ma-ẹ nwọḅẹ sọnị.

¹³Ma owuḅọ nemika eremeni tọkụ mị ò simeḅịaye-ẹ,

¹⁴deḅọ fị ḅọrọsa eremeniḅọ, deḅọ na sosa eremeniḅọ, pịkị sẹfị sa eremeniḅọ ò sime ẹkẹ. Oria sẹ ḅie ma owuḅọ nemika eremeni tọkụ kẹngẹ mị ò simeḅịaye-ẹ.

¹⁵Anị ofori oria awọma fịafịa ḅụ sime gbẹịn apụma iniḅo fịafịaka apụ sọḅịa. Ị̀rị̀ anị Nyanaḅọ Ḅe-ẹ, à pịkị ọ̀ sẹlẹ sikimamẹ Gele Agbamịẹḅọ ḅaraḅụ.”

¹⁶Nyanaḅọ Ḅe tọn Moziz ḅe pịrịmẹ

¹⁷ḍuko Erọn ḅe pịrị, “Ị́ furo ḅie oju ḅụ karakaḅọ goyegoye fịye agba mịẹ ị̀ pịrị ẹkẹ. Mị mịẹmịẹye mị anị ọkịmun ḅụọ ḅụọ laḅịa.

¹⁸Oju ḅụ karakaḅọ goyegoye nụḅọ agbamịẹ ị̀ pịrị ẹkẹ: anị ḅọrọ tọrụmgbọlụ pụnḅọ-o, ikeliḅọ-o, pengeḅọ-o, anịkanịka oju ḅụ tọkọrọsaḅọ sọ;

¹⁹gbọrị ḅara anịkanịka ḅụọ fịḅọ sọnị;

²⁰gbọrị ikeḅọ, anịkanịka ḅapa-amaḅọ sọnị, tọrụmgbọlụ anịkanịka oju kiri obi kọnḅọ sọnị; pịkị ini poḅọ sọnị.

²¹Erọn, agbamịẹḅọ ḅe furo ḅie ḅụ oju karakaḅọ goyegoye fịye agba mịẹ ị̀ pịrị ẹkẹ.

²²Ọkọ simeḅọ ḅe ini se agbamịẹ ị̀ pịrị fịye, ori ineda fịḅịa; anị osiḅụ sime fịye agba mị na pịkị opuma osiḅụ sime fịye agba mị sọnị,

²³ọkụma oria oju ḅụ karakaye omi-ẹ nwọḅẹ ẹrẹchị, osiḅụ sime nyọ kikima ḅịtẹ mị, ọ̀ ḅụ se anị kpekima ẹkẹ, agbamịẹ ẹbẹ mị sime anga sọnị ọ̀ pịkị la ẹkẹ. Ma osiḅụ sime ayema ori àrị seni osi oforika aye mịẹma, anịatịḅị Ị̀rị̀ anị Nyanaḅọ Ḅe-ẹ, à pịkị àrị seni osiḅụ wẹrịmẹ.”

²⁴Mị Moziz ḅe ḍuko seni Erọn ḅe na, Erọn owuapụ awọma na, pịkị bebe Izrẹlapụ mamgba na pịrịye mịẹ.