Read kirikeni Agbamịẹ Apụ 22 Bible Online

Agbamịẹ Apụ 22 - kirikeni bible

Agbamịẹ Apụ 22

¹Nyanaḅọ Ḅe tọn Moziz ḅe pịrịmẹ

²ḍuko Erọn ḅe na oria owuapụ awọma na pịrị. “Ọ́ ḅụgerere ọkịḅo ị̀ya osiḅụ sime ẹrẹ mị pịrịma, anịẹrẹchị ọ́ kun se Izrẹlapụma se osiḅụ wẹrị, se ḅo ị̀ pịrịarị agbama pịrị. Ị̀rị̀ anị Nyanaḅọ Ḅe-ẹ.

³Nemikase ọ́mịna furo ḅie gbọrịḅọ fịafịaka ḅụ simearịogbo Izrẹlapụma se osiḅụ wẹrị ị̀ pịrị osiḅụ sime ị̀ pịrịayema kpekimaḅọ goyegoye, ngịsị agbamịẹ ẹbẹ mị ḅụ nụḅọ ḅarị fịrịnwẹngị ẹkẹ. Mịn mị ọkịmun ḅụọ ḅụọ laḅịa. Ị̀rị̀ anị Nyanaḅọ Ḅe-ẹ.

⁴“Erọn ḅe furo ḅie ḅụkan obi kọnḅọ anịkanịka ọgị obi kọnḅọ osiḅụ sime agbamịẹ ḍiepịrịayema fị ẹkẹ, nụḅọ fịafịaka simeogbo. Ḅụ se fịafịakaye lama agbamịẹḅọ goyegoye nụḅọ ḅarị fịafịa ẹkẹ, anị ḅọrọ fịḅọ anịkanịka konju koromaye ḅụ saraḅọ,

⁵anịkanịka ḅara se fịafịaka nama anịkanịka fịafịaka tomoniḅọ lamaḅọ sọnị.

⁶Ḅo fịafịakaḅọ sọsa agbamịẹḅọ goyegoye ọ̀ fịafịaka ḅụ sime mun saso ḅiri laḅịa, anị sọnị, osiḅụ sime agbamịẹ ḍiepịrịayema ọ̀ fị ẹkẹ ò mengi ḅirika simeogbo.

⁷Ịrụa mị binsa ḅẹḅẹ ọ̀ fịafịasam, anịsịkị re mị ori agbamịẹ ḍiepịrịayema ḅụ oria fịayema ọ̀ nwọ fịḅịaye-ẹ.

⁸Amatẹmẹso fị kọn nama anịkanịka owoi nama ḅaa wu ọ̀ pẹịma; anị ò se fịafịakaḅọ mịẹḅịa. Ị̀rị̀ anị Nyanaḅọ Ḅe-ẹ.

⁹“Agbamịẹapụ mamgba ini à chụa olokoma kokoḅịa. Anị ofori, ini ḅẹrẹḅarasi nyana se fịḅịa, anịatịḅị osiḅụ sime olokoma ini kokokẹ. Ị̀rị̀ anị Nyanaḅọ Ḅe-ẹ à pịkị ini mịẹfịafịamamẹ.

¹⁰“Agbamịẹ furo mị ḅieḅọ kẹngẹ anị osiḅụ sime agba mịẹ ḍiepịrịayema fịḅịaye-ẹ; jụmḅọ ngịsị àrị fị ẹkẹ, agbamịẹḅọ ḅe na angaḅọ sọnị anịkanịka ori ọkọ ḅo ḅọ sọnị.

¹¹Ọkụma agbamịẹḅọ ḅe oria igbiki se fẹ omoniapụ anịkanịka oria warị ḅie ini yiḅọ ineda ori ọkịḅo fịye mị fịḅịa.

¹²Agbamịẹḅọ eremeni tọkụ, se agbamịẹkaḅọ na sime ḅọ, osiḅụ sime agbamịẹ ḍiepịrịayema á fị ẹkẹ.

¹³Ọkụma agbamịẹḅọ eremeni tọkụ ḅụ deḅọ fị, anịkanịka deḅọ na sose vinpịkị so ḍawu ḅe warị munsa tọkụ yika ḅọ ma, anị ḍawu ḅe fịye se pịrịḅọ ma, ḍawu ḅe agbamịẹḅọ ḅaraḅụ ọkịḅo fịye mị á fịḅịa. Agbamịẹ furo mị ḅieḅọ kẹngẹ anị fịye mị fịḅịaye-ẹ.

¹⁴“Nemikase agbamịẹ furo mị ḅieḅọ kaḅọ nemika ḅaraḅụ osiḅụ sime agbamịẹ ḍiepịrịayema nwọ fịmẹ ḅẹḅẹ, ori anị laye mị se agbamịẹḅọ ḅe gbẹịnḅịa, pịkị anị ḅe sọnọ-a kiri ḅụ gbọrị kiri se chụa ọ̀ pịrịḅịa.

¹⁵Agbamịẹapụma osiḅụ sime agbamịẹ ḍiepịrịayema ini àrị seni osi nyanakaye mịẹma,

¹⁶àrị fị gbẹịnka gbọrịḅọ sọnị ini se pịrị se fịma; mịn mị anị ḅẹrẹḅarasi na fomuḅara na ọkịḅo ọkọ mịẹḅọ ḅe pịrịḅịa. Ị̀rị̀ anị Nyanaḅọ Ḅe-ẹ, à pịkị agbamịẹ ḍiepịrịayema mịẹfịafịamamẹ.”

¹⁷Nyanaḅọ Ḅe tọn Moziz ḅe pịrịmẹ

¹⁸ọ̀ ma olokoma se Erọn ḅe na oria owuapụ awọma na pịkị bebe Izrẹlapụ mamgba na nwọ pịrị. Izrẹlḅọ anịkanịka Izrẹl mị ḅie anga jịn sẹ ḅọ dọkịma agbamịẹ aḅẹ ḅẹḅẹ, anị ḅọrọ se nụḅọ ḅereniye mịẹḅeinmaye anịkanịka papa ḅietọn agba sọnị, ḅẹḅẹye ḅụ oforika nama nụḅọ nwọse anị mịẹḅịa.

¹⁹Se agba mị mịẹḅịa owoi nama ḅe ḅẹḅẹye ọ̀ ḅụ sime ẹkẹ.

²⁰Ó nemikase ḅẹḅẹye ḅụ sime nama se agbamịẹ ọkụma Nyanaḅọ Ḅe ori anị ọkị ẹkẹ.

²¹Tomoniḅọ deinma agba mịẹ se Nyanaḅọ Ḅe pịrịḅịa ḅẹḅẹ, anị ḅọrọ ḅereniye mịẹḅeinmaye-o, anịkanịka papa ḅietọn agba sọnị, ḅẹḅẹye ḅụ oforika nama anị nụḅọ se mịẹḅịaye-ẹ, à nemikase agba mị ọkịḅịa ḅẹḅẹ.

²²Anị ḅọrọ tọrụmgbọlụ pụn nama-o anịkanịka ikeli wu-o, anịkanịka oju kọsịkọsị wu-o, anịkanịka ịnọ chụa wu-o, anịkanịka oju foin wu-o, anịkanịka oju adaka-adaka-adaka wu-o, ó se agbamịẹ Nyanaḅọ Ḅe pịrịma. Ọkọ sime nama ó se fịye agba mịẹma agbamịẹ ẹbẹ mị ọgọnọ ḅụ.

²³Gbọrị ḅara simeka nama ómine ineda se papa ḅietọn agba mịẹḅịa, ọkụma se ḅereniye mịẹḅeinma agba mịẹ ḅụ, Nyanaḅọ Ḅe ori anị ọkị ẹkẹ.

²⁴Ini posa nama, anịkanịka ye se lama sa wu, ó seni agbamịẹ Nyanaḅọ Ḅe pịrịma. Ọ́mịna ama mị ḅie mịn mị ini ḅereni pịrịkaye-ẹ.

²⁵Jịn sẹ ḅọ ḅara ómine ọkị nama ó se fịye agbamịẹma. Ọkọ sime namama ḅẹḅẹye ḅụ oforika ḅara à nwọse anị ọkị ẹkẹ, à pịkị àrị ọkị ẹkẹ.

²⁶Nambulo tọkụ anịkanịka anana tọkụ anịkanịka oḅori tọkụ yi koromasa ḅẹḅẹ, nyengi wu ḅe ḅụ ómine ò dekisin ẹkẹ mun sọnọma ḍin nwọ laḅịa, ọkụma nine-a ḍin karama ene mị ḅụ sakị, fịye agbamịẹ ḅụ Nyanaḅọ Ḅe ori ọkịḅịa.

²⁸Nambulo na oria tọkụ na anịkanịka anana na oria tọkụ na anịkanịka oḅori na oria tọkụ na ó se gbọrị ene ḅụ agbamịẹ ma.

²⁹Ọ́ mịẹḅaka se Nyanaḅọ Ḅe ḅẹ agbamịẹḅịa sịkị olokoma ọ́ nwọ ḍuko nwẹngị, mịẹse ori ọ́mịna agba mị ọkịḅịa ọkụ;

³⁰anị gbọrị ene mị ḅie anịmgba ọ́ pẹịfama, ye anịaḅụ kọn mun jịn ene ḅa dede lama.

³¹Nyanaḅọ Ḅe nwọ ḅẹmẹ, “Ómine ị̀ya olokoma koko; Ị̀rị̀ anị Nyanaḅọ Ḅe-ẹ.

³²Ọ́ ḅụgerere ọkịḅo ị̀ya fịafịa ẹrẹ mị pịrịma; Izrẹlapụ mamgba fịafịaḅụ sime ḅọ ḅara se ị̀ ọkị. Ị̀rị̀ anị Nyanaḅọ Ḅe-ẹ, à pịkị ó se fịafịaḅụ wẹrịḅịa;

³³Ị̀rị̀ anị pịkị Ijipt mị ḅie ómine ọkịpakụmaḅo ḅọ ḅe-ẹ, ọ́mịna Tamụnọ sọḅịa ẹrẹchị. Ị̀rị̀ anị Nyanaḅọ Ḅe-ẹ.”