Read kirikeni Agbamịẹ Apụ 23 Bible Online

Agbamịẹ Apụ 23 - kirikeni bible

Agbamịẹ Apụ 23

¹Nyanaḅọ Ḅe ma olokoma se Moziz ḅe pịrịmẹ

²Tamụnọ Alalị ma gose, Izrẹlapụma ḅo koḅirima se tẹkẹḅịa sịkị.

³Ó se ọ́mịna fịrịnwẹngịḅịa sonio-a ḍin ọ́ nwọ nyanamẹ, ọkụma ó se ḅiekoroma na sọnọma ḍin karama ene mị, Ịnyọsara Ene mị, anị ịnyọsara ene-ẹ. Anị ene mị ḅụ ọ́ fịrịnwẹngịma, ọkụma okoḅirima sime tẹkẹ. Ịnyọsara ene mị sime Nyanaḅọ Ḅe pịrịmẹ, ómine anga nyọ goyegoye.

⁴Ọ́ ma alalị ma ḍukopakụma ini tọn se àrị koroḅịa sịkị ma ḅụ.

⁵Saḅaḅọrọ Alalị mị, osi seni Nyanaḅọ Ḅe pịrị gose ini fịarị alalị mị, ịrụa tuma sịkị ḅụ mị anị sakị sakịye-ẹ, ngei akalụ mị ḅie oyi inein-a ḍin fịnjị karama ene mị ḅie.

⁶Akalụ jie-a ḍin ene ḅie Suka Fịturu Alalị mị kiri ọkịḅịa, sọnọma ḍin ḅụ fịturu sumaye sọ fịturu ọ́ fị ẹkẹ.

⁷Tatarị ene mị ḅie ó ḅo koḅirima tẹkẹḅịa se ọ́mịna eneḅeneḅene-a fịrịma ḅụ gbọrịye sọnị ọ́ nwẹngị ẹkẹ.

⁸Sọnọma ḍin mị ó se fịye agbamịẹ Nyanaḅọ Ḅe pịrịḅịaye-ẹ. Sọnọmẹ karama ene mị ḅụ ọ́ pịkị ḅo koḅirima tẹkẹḅịa, ọkụma ọ́mịna eneḅeneḅene-a fịrịma ḅụ gbọrịye sọnị ọ́ nwẹngị ẹkẹ.

⁹Ó ḅo Nyanaḅọ Ḅe se ọ́ pịrịarị ama mị ḅie sọ se ọ́mịna ịpịamgba ma pẹlẹsa ḅẹḅẹ, tatarị izuruku ma ó se mun agbamịẹḅọ ḅe pịrị.

¹⁰

¹¹Ori anị seni sosikima ḍiepịrịaye agba mịẹ Nyanaḅọ Ḅe pịrịḅịa, mịẹse ori ómine ọkịḅịa ọkụ. Ịnyọsara ene mị ḍukoma ene mị ḅụ mị agbamịẹḅọ ḅe ori anị se Nyanaḅọ Ḅe pịrịḅịaye-ẹ.

¹²Ọ́mịna ịpịamgba ḍiepịrịaye agbamịẹ ayema se ḅo gbọrị ene mị ḅie anị ọ́ pịkị gbọrị kụra la gbọrị ajirima, ḅẹḅẹye ḅụ oforika wu nwọse dọkịma agbamịẹ Nyanaḅọ Ḅe pịrịḅịa.

¹³Oliv pulo na mama kọpụ fịlawa na se gwa fịye agba ọ́ nwọse ọ̀ ḅụ chụa ḅoḅịa. Mịn agba mị anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ. Ọ́ pịkịna iru gbọrị ololo se anịa ḅụ chụa ḅoḅịa.

¹⁴Ịwọ ịpịamgba ma ḅụ gbọrịye sọnị ọ́ fịma, anị ịwọ na ịwọ na ḅụ, fọịye-o anịkanịka se fịturu mịẹye ḅụ sọnị ọkịmun ó ma ayema se ḅo ḍiepịrịaye agbamịẹ Nyanaḅọ Ḅe pịrịka simeogbo. Mịn oloko mị ọ́mịna furo ḅie apụ mamgba anị kokoḅịa ọkịmun ḅụọḅụọ laḅịa.

¹⁵Ịpịamgba izuruku ma ọ́ nwọse ḅo Nyanaḅọ Ḅe pịrị Ịnyọsara ene mị ḅụ sakị, sọnọma fẹnịanga ọ́ nwọ kịẹn karamaḅịa.

¹⁶Ḍin-a mesi oyi fịnjị karama ene mị ḅụ anị sọnọmẹ karama Ịnyọsara ene mị ḅọrọ se mun laḅịa ene mị ḅụ, ọ́ pịkị jịn ịwọ ịpịamgba ḍiepịrị agbamịẹaye se ḅo Nyanaḅọ Ḅe pịrịḅịa.

¹⁷Fịturu mama okpokpo gbọrị furo gbọrị furo nwọse ḅo sosikima ḍiepịrịye agbamịẹ seni Nyanaḅọ Ḅe pịrịḅịa. Fịlawa mama kọpụ anị ó se gbọrị fịturu okpokpo, gbọrị fịturu okpokpo mịẹḅịaye-ẹ, fịturu sumaye anịa ḅie sọḅịa se ómine anị se Nyanaḅọ Ḅe pịrị, anị ọ́ tatarị pẹlẹḅịa ịpịamgba ma ḅụ agbamịẹaye ḅaraḅụ.

¹⁸Sẹ mị gbọrị kụra lasa sọnọma anana awọ na, gbọrị owoi nambulo na, mama ajirima na, anị ḅẹḅẹye ḅụ oforikaye nwọse fịturu mị ḅụ chụa se dọkịma agba mịẹ Nyanaḅọ Ḅe pịrịḅịa, fịaye mgbọlụ agbamịẹye mị na pịkị iru agba mịẹye mị na ini se chụaḅịa. Mịn agba mị anịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

¹⁹Ọ́ pịkị gbọrị kụra lasa gbọrị ẹkpẹịn se si agbamịẹḅịa, pịkị gbọrị kụra lasa mama ajirima se gboloma agba nwọ mịẹḅịa.

²⁰Agbamịẹḅọ ḅe fịturu mị na mama ajirima ma na ọ̀ nwọ se sosikima ḍiepịrịye agba mịẹ Nyanaḅọ Ḅe pịrịḅịa, àrị sime agbamịẹ apụma pịrịmẹ. Ma agbamịẹ ḍiepịrịayema osiḅụ àrị omi-ẹ.

²¹Anị ene mị ḅie ọ́mịna eneḅeneḅene-a fịrịma ọ́ nwẹngịma, ọkụma ó koḅirima sime tẹkẹ. Ọ́mịna furo ḅie apụ mamgba mị oloko mị koko mun ḅụọḅụọ laḅịa, ini anga nyọ mamgba ḅụ.

²²Ọ́mịna ozuma ḅie ọ́ fịye sokuḅịa sịkị; ozuma aka ḅụ sime ịpịamgba ma ọ́ pẹlẹma, ọ́ pịkị ozuma ḅie wẹrịsosa ịpịamgba ma sọnị ḅarị vinpịkị mun àrị pẹlẹma. Ómine àrị wẹrịso igwein apụma na jịn sẹ apụma na pịrị. Nyanaḅọ Ḅe anị ọ́mịna Tamụnọ Ḅe-ẹ.

²³Sọnọma akalụ mị ḅie ngei ene mị ḅụ ó sosikima kịrị ịnyọsara ọ́mịna ḅụ pịrị, se oḍu mị fiesa ḅẹḅẹ ó ḅo koḅirima sime tẹkẹ.

²⁴

²⁵Ó fịye agba mịẹ Nyanaḅọ Ḅe pịrị, se ọ́mịna eneḅeneḅene-a fịrịma ḅụ gbọrịye sọnị ọ́ nwẹngịma.

²⁶Sọnọma akalụ mị ḅie oyi-a ḍin karama ene mị ḅụ anị tomonima inia sima dekisin mịẹmịẹye mị ini nwọ mịẹḅịa ene mị-ẹ, kụra kụra ḅụ ini mịẹmịẹye mị. Anị ene gbọrịye sọnị ngịsị ọ́ fịma; ó ḅo koḅirima sime tẹkẹ, se fịye agba mịẹ Nyanaḅọ Ḅe pịrị.

²⁷

²⁸Anị ene ọ́ fịrịnwẹngịma, anịatịḅị anị ene ḅụ mị ó Nyana Tamụnọ Ḅe tọrọkọ ómine ọ́mịna sima dekisinḅịa mịẹmịẹye mị kiri ọkịḅịaye-ẹ.

²⁹Anị ene ḅụ yefị ḅọ goyegoye ḅarị Tamụnọ-a tomoni ḅie gbọrịḅọ sọ ẹkẹ.

³⁰Nemikase anị ene ḅụ fịrịnwẹngịḅọ omi-ẹ ḅẹḅẹ, Nyanaḅọ Ḅe ḅarana nụḅọ ḅaaḅịa.

³¹Mịn oloko mị anị sime ọ́mịna furo ḅie apụ mamgba pịrịmẹ, ọkịmun ḅụọḅụọ laḅịa, ini anga nyọ mamgba ḅụ.

³²Esenia-a ḍin ene mị ḅụ ịrụa tuma sịkị ọkịmun oyi-a ḍin ene mị ḅụ ịrụa mị tuma sịkị la, mị ene mị ọ́ nwọ wẹrị sosikima kịrị ịnyọsara ene ḅaraḅụ, anị sịkị mị ḅụ gbọrịye sọ ọ́ fị ẹkẹ.

³³Tịḅịkikima warịma ḅe Alalị mị sọnọma akalụ mị ḅie jie-a ḍin ene ḅụ anị sakịmun sọnọma ḍin laḅịa.

³⁴

³⁵Ma tatarị enema ḅie ó ḅo koḅirima sime tẹkẹ; ọ́mịna eneḅeneḅene-a fịrịma ọ́ nwẹngịma.

³⁶Sọnọma ḍin ma ḅie eneḅeneḅene ó fịye agbamịẹ Nyanaḅọ Ḅe pịrịḅịa. Nine-a ḍin karama ene mị ḅụ ọ́ pịkị ḅo koḅirima sime tẹkẹ, se pịkị fịye agba mịẹ Nyanaḅọ Ḅe pịrịḅịa. Anị ene mị tẹkẹ ene-ẹ, anịgose ọ́ gbọrị fịrị sọ nwẹngị ẹkẹ.

³⁷(Ma ma anị Tamụnọ Alalị ma-ẹ, ómine arịa ḅụ ḅọrọ osi se Nyanaḅọ Ḅe pịrịayema, anị ḅo gboloma tẹkẹ na pịkị fịye agba mịẹ na ḅụ, dọkịma agbamịẹ ḅụ na, fịaye mgbọlụ agbamịẹaye ḅụ na, agbama ḅụ na, iru agba mịẹaye ḅụ na, anị ene ene ḅụ mịẹ gbẹịn ḅaraḅụ.

³⁸Ma alalị ma ọ́ nwọse Ịnyọsara ene ḅe ayema na chụa fịḅịa, ma agbamịẹ ḍiepịrịayema ọ́ pịkị nwọse sịkị sịkị ḅụ ḍiepịrịayema na chụa mịẹḅịa, ọ́mịna yeḅereni ḅịpị mịẹḅeinma agba na, pịkị kuḅie lokoloko ḅaraḅụ mịẹ Nyanaḅọ Ḅe pịrị agbama na.)

³⁹Ọ́mịna ozuma ḅie ó fịye sokusa ḅẹḅẹ mị alalị mị ọ́ nwọ fị sọnọma ḍin ḅụ, sọnọma akalụ mị ḅie jie-a ḍin ene ḅụ ọ́ sakị. Tatarị ene mị anị sosikima ịnyọsara ene nwọ sọḅịa, nine karama ene mị pịkị ịnyọsara ene sọḅịa.

⁴⁰Anị ene mị ḅụ ọ́mịna iḅitẹịn chịnmgbọlụma ḅie daye ọ́ nwọ ọkị, kọrọ ḅarama na pịkị ịnyanya chụa chịn ịkpangị ma na ọ́ nwọ ọkị, se Tamụnọ alalị fị, seni osi se Nyanaḅọ ọ́mịna Tamụnọ Ḅe pịrị.

⁴¹Ómine anị fị mun sọnọma ḍin nwọ la, kụra mị ḅie. Mị oloko mị ọ́mịna furo apụ mamgba anị koko mun ḅụọḅụọ laḅịa.

⁴²Bebe Izrẹlapụ mamgba tịḅịkikima warịma ḅie mị ini anga mun sọnọma ḍin ma laḅịaye-ẹ,

⁴³mịẹse ọ́mịna awọma nemiḅịa ḅara na Nyanaḅọ Ḅe ori Izrẹlapụma mịẹse ini papa tịḅịkikima warịma ḅie angamẹ, ori Ijipt mị ḅie ini ọkịpakụmaḅo sịkị ḅụ. Ori anị Nyanaḅọ ọ́mịna Tamụnọ Ḅe-ẹ.

⁴⁴Mị Moziz ḅe wẹrị Tamụnọ alalị ma fịḅịa ọkụ olokoma chụa Izrẹlapụma pịrị ḅara mị-ẹ, se osi seni Nyanaḅọ Ḅe pịrịḅịa ẹrẹchị.