Read kirikeni Agbamịẹ Apụ 26 Bible Online

Agbamịẹ Apụ 26 - kirikeni bible

Agbamịẹ Apụ 26

¹Nyanaḅọ Ḅe nwọ ḅẹmẹ, “Ómine oru mịẹ koromama, anịkanịka agbambuapụ tẹmẹ, ḍụparị pike chịẹma, anịkanịka ḍụparị kara, se anị tẹkẹma. Ị̀rị̀ anị Nyanaḅọ ọ́mịna Tamụnọ Ḅe-ẹ.

²Tamụnọ alalị ma ọ́ nwọ koko, pịkị osi se ini ị̀ tẹkẹarị nyọ mị pịrị. Ị̀rị̀ anị Nyanaḅọ Ḅe-ẹ.

³“Ó nemikase ị̀ya olokoma sime ọkụ ḍiki angamẹ, pịkị ị̀ya olokoma kokomẹ ḅẹḅẹ,

⁴àrị ene se ọ́ fịrịmaḅịa karakara sịkị ḅụ, mịẹse kiri mị fịaye pakụma, ejema pịkị chịnmgbọlụ chụaḅịa ọkụ.

⁵Ọ́mịna fịayema ḅakaso ọkụma ọ́ pa ịpịamgba pẹlẹ aḅẹ, tụmgbakị elelenda kaịn sịkị mị ḅụ, ọ́ pịkị pa tụmgbakị elelenda kaịnḅịa ịpịamgba ḍipi sịkị mị ḅụ. Ọ́ fị ḅiye mamgba ọ́ nyanaḅịa, ọ́ pịkị deinma ọ́mịna ama mị ḅie angaḅịa.

⁶“À dein se ọ́ pịrịḅịa ọ́mịna ama mị ḅie, ọ́ pịkị gbọrịḅọ sọnị ḍikiḅalafa ẹkẹ ọ́ mọnọḅịa sịkị. Ama mị ḅie sime si nama mamgba àrị àrị desinḅịa, ọmụ pịkị ḅarị sime ẹkẹ anịanga.

⁷Ómine na tarakapụma ómine ini inumaḅịa;

⁸ọ́mịna ḅụ sọnọ apụ kịnị-a sọnọasi nẹngịmaḅịa, anịsịkị sọnọasi pịkị poku na sọnọ ẹndẹ nẹngịmaḅịa.

⁹Àrị ọ́ ḅẹlẹmaḅịa pịkị tọn-a awọ seni ọ́ pịrịḅịa; àrị ómine na fị ọḅọkụ mị ḅụ àrị ị̀ya pẹkẹrẹ mị kokoḅịa.

¹⁰Ó sokuḅịa fịayema ḅakaso ọkụma, àrị sime mun bebe kụra mị mgba laḅịa, anị sọnị, ómine olomu kụra ḅie fịaye se wokumaḅịa, ẹmbẹ se ịwọ ayema pịrịḅịa gose.

¹¹Ị̀ya osiḅụ sime Ikowarị mị ḅie à sime ọ́mịna ogboku angaḅịa, se ngịsị àrị ọḅụ pịkị ó gbin ẹkẹ.

¹²Àrị ómine na simeḅịa, àrị ọ́mịna Tamụnọ sọḅịa, ómine pịkị ị̀ya tomoni sọḅịa.

¹³Ị̀rị̀, Nyanaḅọ ọ́mịna Tamụnọ Ḅe, Ijipt mị ḅie ómine ọkị pakụmaḅomẹ mịẹse ọ́ ḅarị omoni sọ ẹka ḅara. Ómine ọlọ koroma kụrọ mị à nwọ anyịmamẹ mịẹse ọ́ tịḅị dekichịẹma nwẹngịḅịa ḅara.”

¹⁴Nyanaḅọ Ḅe nwọ ḅẹmẹ, “Ó nemikase ị̀ya olokoma kokokẹ ḅẹḅẹ, ó fomuḅara daḅịa.

¹⁵Ó nemikase ị̀ya olokoma koko ḍụkụka, anị à chụa ọ́ pịrị olokoma na à tọn ọ́ pịrị ayema na ḅụ, pịkị àrị ómine na fị ọḅọkụ mị nwọ kanmẹ ḅẹḅẹ,

¹⁶à fomuḅara se ọ́ pịrịḅịa. À fị na fa na ọkịḅo ọ́mịna ọgọnọ gbanaḅịa—ineda gwọḅịa ọkụ ofori obi na ọfịrị na, à nwọse ọ́ fịrịmaḅịa, anị mịẹse ọ́mịna tọrụmgbọlụma pụnḅịa pịkị ọ́mịna ḍumo famaḅịa. Ọ́ fịaye ḍipiḅịa, ọkụma anị iḅi se ọ́ mịẹ ẹkẹ, anịatịḅị ómine na tarakapụma ini ọ́ nẹngịma se ó ḍipiaye ma fịḅịa.

¹⁷Àrị ọ́ dapakaḅịa, mịẹse ini ọ́ nẹngịmaḅịa ọkụ, anịsịkị ómine na tarakapụma ḅo ḅẹrẹtọn ọ́ pịrịḅịa; ọ́mịna ḅala opuma faḅịa se gbọrịḅọ sọnị ó ḍukoka simeogbo ọ́ mangịḅịa.

¹⁸“Nemikase ma mamgba ọ́ ḅụ mịẹse, ọ́ pa ị̀ ḅịpịpoki ḍụkụkẹ ḅẹḅẹ, sọnọma sịkị à nwọse ọ́mịna fomuḅara mị mịẹ sumaḅịa.

¹⁹Ọ́mịna ininachịn opuayemịẹ mị, àrị anị anyịmaḅịa; ene ḅarị koro ẹkẹ, anịsịkị ọ́mịna kiri mị samịna ikulele kụrọ ọkụ anị nwọ kụrọḅịa.

²⁰Ọ́mịna kụrọ fịrị mamgba ḅarị iḅi se ọ́ mịẹ ẹkẹ, anịatịḅị ọ́mịna kiri mị anị ḅarị fịye pakụma ẹkẹ, chịnma sọnị ḅarị mgbọlụ chụa ẹkẹ.

²¹“Ó nemikase pa ị̀rị̀ na tụḅụrụaḅẹ pịkị ngịsị ị̀ ḅịpịpoki ḍụkụkẹ ḅẹḅẹ, à pịkị jịn sọnọma sịkị seni ọ́mịna fomuḅara mị mịẹsumaḅịa.

²²À si namama se ọ́ fịrịmaḅịa se ọ́mịna awọma ḅaaḅịa, ómine na anga nama mamgba à àrị ḅaaḅịa, ọ́mịna ḅụ bokapụ kẹngẹ anị kọnḅịaye-ẹ, anịsịkị ọ́mịna ateli ma ḅo gbọịnma simeḅịa.

²³“Nemikase mị fomuḅara mị ḅọrọso se ọ́ pa pịkị ị̀ ḅịpịpokikẹ se pa pịkị ị̀rị̀ na tụḅụrụaḅẹ ḅẹḅẹ,

²⁴ị̀rị̀ sọnị à pịkịna ọ́ dapaka se jịn sitẹịn tatarị-a ḅụfụka ma nẹngị sọnọma sịkị se fomuḅara seni ọ́ pịrịḅịa.

²⁵Fomuḅara seni ọ́ pịrị ḅụ, àrị ọmụ ọkịḅo ọ́mịna ọgọnọ gbanaḅịa, mịna ọḅọkụ mị ọ́ nwọ kansa ye gose, nemikase deinma nyanaḅịa gose ọ́ ḅụ koḅirima se ọ́mịna opuamama ḅie simemẹ ḅẹḅẹ, gwọḅịa ọkụ oforika obi à nwọse ọ́ fịrịmaḅịa, anịsịkị ọ́ ḅarị ine anị daka sịkị, ómine ọ́ ḅarama dekichịẹma se nyana ḅereni ómine na tarakapụma pịrịḅịa.

²⁶Fịye ḅọrọḅo ọ́ pịrịarị ẹmbẹ goyegoye à pẹlẹsinḅịa, anị mịẹse oyi-a eremeni gboloma se gbọrị ọpọchuku kẹngẹ ḅụ inia fịturu mamgba nwọ fọịḅịa. Ini àrị ḍiama se ọ́ pịrị se ọ́ fịso sịkị, ọ́ pa pịkị ḅuru pụkọtarị ḅụ simeḅịa.

²⁷“Ma ye mamgba ḅọrọ-eso se ọ́ pa pịkị ị̀rị̀ na tụḅụrụ pịkị ị̀ ḅịpịpoki ḍụkụkẹ ḅẹḅẹ;

²⁸ị̀rị̀ sọ àrị ị̀ya ịganị ḅụ ọ́ dapaka se jịn sitẹịn tatarị-a ḅụfụka ma nẹngị sọnọma sịkị se fomuḅara seni ọ́ pịrịḅịa.

²⁹Ḅuru ọ́ tarị so ọkụma ọ́mịna awọma ọ́ nwọ pẹịḅịa.

³⁰Chịngị ma ọgọnọ ḅụ ọ́mịna tẹkẹ-a nyọ mamgba à kansin, pịkị ọ́mịna insẹnsị ḍọkịma agbamịẹ ẹbẹ ma kan saraḅịa, se ọ́mịna fịsa ojuma seni ọ́mịna ḅịkịsa ḅarase kara oru ma ọgọnọ gbin saraḅịa. Opu kuḅie si ḅụ

³¹ọ́mịna opuamama à nwọ kansaraḅịa, ọ́mịna tẹkẹ-a nyọma kansin, à pịkị ọ́mịna agbama sịkịḅịa.

³²Àrị ọ́mịna ama mị kankoroma ḅịa ḅara mị, ḅo anị ọkị se angaḅịa ómine na tarakapụma inia ḅụgbiripuḅịa, anị kan kọsị la ọkụ mị.

³³Àrị ọmụ ọkịḅo ọ́mịna ọgọnọ gbana se ọ́ galagalama jịn sẹ apụ amama ḅie chuḅịa. Ọ́mịna ama mị gbọịnma simeḅịa, ọ́mịna opuamama sọnị kan guluguluḅịa.

³⁴Anịsịkị kiri mị ó se anị pịrị ḍụkụka ịnyọsara kụra ma ḅe ḅieḅẹlẹ nwọ nyanaḅịa; nyanapụ koromasosaye anị nwọsọ se ịnyọsaraḅịa; ọ́ nwọ kun ḅara ḅie ómine na tarakapụma amama ḅie simearị sịkị.

³⁵

³⁶“Ọ́mịna ḅụ kun ḅara ḅie simeḅịa apụma àrị ini mịẹse inia ḅalafa so ọkụma fọrụ jikearị ịnyanya ḅara sọnị mịẹse ọ́ mangịḅịa. Ọ́ mangịḅịa ḅara ọmụ ḅie ini ó ḍukoaḅẹ nwọḅẹ ọkụ simeḅịa, ọ́ pịkị ḅịkịḅịa gbọrị tarakaḅọ sọnị ómine na kpekika ḅụ.

³⁷Gbọrịḅọ sọnị ó ḍukoka simeogbo ọ́ ḅụọ tọmbụlọ se ọ́ ḅịkị jịnḅọ jịnḅọ ọgọnọ koro se ọ́ ḅarị ineda gbọrị tarakaḅọ na owusọ ẹkẹ.

³⁸Kun ḅara ḅie ó sime fịḅịa, ómine na tarakapụma kiri mị ọ́ chama mịnịḅịa.

³⁹Ọ́mịna ḅụ ḅụkụrọma kọnḅịa kala apụma, ọ́ papa gulugulu faḅịa ómine na tarakapụma amama ḅie, anị ọ́mịna sima na, pịkị ọ́mịna ḍapụma mịẹ-a sima na gose.

⁴⁰“Ọkụma ọ́mịna furo pakaḅo apụma ini inia sima na, pịkị inia olomu-a ḍapụma sima na nwọ ḍukopakụmaḅịa, anị ị̀rị̀ na tụḅụrụ pịkị nyana ḅereni ị̀ pịrịka apụma,

⁴¹ị̀ mịẹse àrị ini dapaka se ini se ini na tarakapụma ama ḅie kun ḅara ḅie chu apụma. Anịḅe kuluma, ọ́mịna furo pakaḅoḅịa apụma inia ḅụiderima pịkị inia si mị na nyana ḅerenika mị na ḅe fomuḅara mị dasosa ḅẹḅẹ,

⁴²anịsịkị re, mị à Jekọb ḅe na, Aịzịk ḅe na, pịkị Ebraham ḅe na fị ọḅọkụ mị nwọse ḅie koromaḅịaye-ẹ, à pịkị anị ama mị se ị̀ya tomonima pịrịḅịa nwọḅẹ ḅereniye mị mịẹ ịwọmaḅịa.

⁴³Tatarịye, anị simeọkụ simeọkụ sọnị, ama mị nyana tomonima anịa ḅie ini ḅarị sime ẹkẹ, mịẹse anị gbọtụma anịa ịnyọsara ḅieḅẹlẹ mị nyanaḅịa ọkụ; ini pịkị ḅeinma anịa fomuḅara daḅịa, ini ị̀ya olokoma na à tọn ini pịrịayema na sịkịye gose.

⁴⁴Ọkụma anị sọnị, ini nwọ ini na tarakapụma ama mị ḅie omi-ẹ nwọḅẹ sịkị, àrị okorona okorona ini sịkị anịkanịka ini ḅaasin ẹkẹ. Anị mị fieḅịa na àrị ini na fị ọḅọkụ mị kulumasam, Ị̀rị̀ anị Nyanaḅọ inia Tamụnọ Ḅe-ẹ.

⁴⁵Àrị inia olomu-a ḍapụma na fịsa ọḅọkụ mị à nwọ mịẹ ịwọmaḅịa anị àrị ị̀ya kụrọ mị se sẹ mamgba ḍie sịkị mị, anị Ijipt mị ḅie àrị ị̀ya tomonima ọkịpakụmaḅo mị ḅụ, mịẹse Ị̀rị̀, Nyanaḅọ Ḅe, inia Tamụnọ sọḅịa ọkụ.”

⁴⁶Ma mamgba anị Saịnaị Tụndụ mị ọgọnọ ḅụ Nyanaḅọ Ḅe chụa se Moziz ḅe pịrị olokoma na ọ̀ tọn se Izrẹlapụma pịrị-ẹ nwọḅẹ ayema na-ẹ.