Read kirikeni Agbamịẹ Apụ 3 Bible Online

Agbamịẹ Apụ 3 - kirikeni bible

Agbamịẹ Apụ 3

¹Gbọrịḅọ nemikase oria nambuloma ḅie gbọrịwu seni gboloma ḍiepịrịye agba mịẹḅịa sịkị ḅẹḅẹye ḅụ oforika owoi anịkanịka ịrọrọ.

²Tomoniḅọ ḅe ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa, Nyanaḅọ Ḅe pakaḅoḅo Ikowarị mị ḅọkọ ḅụ. Erọn furo ḅie agbamịẹ apụma nama ḅe oju pulo mị seni agbamịẹ ẹbẹ mị ḅụ inein-a ịkọlị ma ḅụ mgba saraḅịa

³se nama ḅe ḅụ mà pẹkẹrẹ ma ọkịḅo se ḍiepịrịye fịaye agbamịẹ se Nyanaḅọ Ḅe pịrịḅịa: ḅụlọ ḅie ayema ḅụ sime ḅẹlẹkị mamgba na,

⁴nịna akpa ma na arịa ḅụ sime ḅẹlẹkị ma na, pịkị iḅi paranga mị na.

⁵Agbamịẹ apụma ma aye mamgba se dọkịma agbamịẹ ayema na chụa dọkịmaḅịa agbamịẹ ẹbẹ mị ọgọnọ. Mịn fịye agba mị anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.

⁶Nemikase anana anịkanịka oḅori ini nwọse gboloma agba mị mịẹmẹ ḅẹḅẹ, ḅẹḅẹye ḅụ oforika owoi anịkanịka ịrọrọ mị ini se anị mịẹḅịaye-ẹ.

⁷Tomoniḅọ ḅọrọ nemikase anana se ḍiepịrịye agba mịẹmẹ ḅẹḅẹ,

⁸ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Ikowarị mị tọrọkọ ḅụ. Agbamịẹ apụma oria oju pulo mị seni agbamịẹ ẹbẹ mị ḅụ inein-a ịkọlị ma ḅụ saraḅịa

⁹se mà ayema seni fịye agbamịẹ Nyanaḅọ Ḅe pịrịḅịa: ḅẹlẹkị mị na, bebe kokuogbo imgbe mị kpekima ḅẹlẹkị tumo mị na, bebe ḅụlọ ḅie ayema gbẹịn ḅẹlẹkị mị mgba na,

¹⁰nịna akpa ma na arịa ọgọnọ sime ḅẹlẹkị ma na, pịkịna iḅi paranga mị na.

¹¹Fịrịnwẹngịarị agbamịẹḅọ ḅe mịn mị mgba seni agbamịẹ ẹbẹ mị ọgọnọ dọkịma se fịye agba mịẹ Nyanaḅọ Ḅe pịrịḅịa.

¹²Nemikase tomoniḅọ ḅọrọ oḅori se ḍiepịrịye agba mịẹḅịa ḅẹḅẹ,

¹³ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Ikowarị mị tọrọkọ ḅụ. Agbamịẹ apụma oria oju pulo mị seni agbamịẹ ẹbẹ mị ḅụ inein-a ịkọlị ma ḅụ saraḅịa

¹⁴se mà ayema seni fịye agbamịẹ Nyanaḅọ Ḅe pịrịḅịa: ḅụlọ ḅie ayema ọgọnọ sime ḅẹlẹkị mị mgba na,

¹⁵nịna akpa ma na arịa ọgọnọ sime ḅẹlẹkị mị na, pịkịna iḅi paranga mị na.

¹⁶Agbamịẹḅọ ḅe mịn mị mgba ọ̀ dọkịmaḅịa agbamịẹ ẹbẹ mị ọgọnọ, anị Nyanaḅọ Ḅe ḅụḅẹlẹḅẹlẹ fịye ḅaraḅụ. Ḅẹlẹkị mamgba sime Nyanaḅọ Ḅe pịrịmẹ.

¹⁷Gbọrị Izrẹlḅọ sọnị ḅẹlẹkị anịkanịka oju pulo pẹị ẹkẹ; mịn mị anị bebe Izrẹlapụ mamgba koko gbasoḅịa oloko-ẹ ini anga nyọ anga nyọ ḅụ.