Read kirikeni Agbamịẹ Apụ 4 Bible Online

Agbamịẹ Apụ 4 - kirikeni bible

Agbamịẹ Apụ 4

¹Nyanaḅọ Ḅe tọn Moziz ḅe pịrịmẹ

²ḍuko Izrẹlapụma pịrị na nemika ḅaraḅụ simịẹ se Nyanaḅọ Ḅe chụa olokoma kan ḅọ goyegoye nụḅọ ma olokoma koko ḅịa.

³Nemikase Gele Agbamịẹḅọ ḅe si mị mịẹmẹ se ḅẹrẹ ḅarasi ọkịḅo tomonima ọgọnọ gbanamẹ ḅẹḅẹ, ḅẹḅẹye ḅụ oforika gbọrị ayamburama owoi nambulo ọ̀ nwọse ḅo agbamịẹ Nyanaḅọ Ḅe pịrịḅịa, ọ̀ mịẹ si mị gose.

⁴Ori owoi nambulo ḅe se Ikowarị mị ḅọkọ ḅo seni ọ̀ ḅarama se nama ḅe tịḅị ọgọnọ gbana se ọ̀ ḅaaḅịa Nyanaḅọ Ḅe tọrụkuḅu.

⁵Anịsịkị Gele Agbamịẹḅọ ḅe ori owoi nambulo ḅe oju pulo mị ḅụ ye ọkị se anị se Ikowarị mị ḅie sọmunḅịa.

⁶Ori ọ̀ ḅaratụmgbalị se nama ḅe oju pulo mị ḅie su se anị se sọnọma sịkị se osiḅụ sime nyọ mị kikima ḅịtẹ mị tọrọkọ ḅụ sanaḅịa.

⁷Anịsịkị ọ̀ pịkị nama ḅe oju pulo mị ḅụ ye ọkị se insẹnsị dọkịma ẹbẹ mị ḅụ ịkọlị ma ḅe ịvalị ma ọgọnọ ḅụ saraḅịa Ikowarị mị ḅie ḅụ. Kirikọn nama oju pulo mị ọ̀ nwọse agbamịẹ aye dọkịma ẹbẹ mị chuku ḅụ sara, anị Ikowarị mị ḅọkọ ḅụ simeye mị.

⁸Ḅe owoi nambulo ḅe ḅụ ḅẹlẹkị mị mgba ọ̀ nwọ ọkịḅịa, ḅụlọ ḅie ayema ḅụ ḅẹlẹkị mị na,

⁹nịna akpa ma na pịkị arịa ọgọnọ sime ḅẹlẹkị mị na, pịkị iḅi paranga mị na.

¹⁰Agbamịẹḅọ ḅe mị ḅẹlẹkị mị se dọkịma agbamịẹ ẹbẹ mị ọgọnọ ḅụ dọkịmaḅịa, anị ini ḅaa seni gboloma agba mị mịẹḅịa nama ḅe ḅẹlẹkị mị ọ̀ nwọ mịẹ ọkụ mị.

¹¹Ọkụma nama ḅe oju apụra mị na, oju mịnị mị mgba na, tịḅị mị na, ḅụọma na, ḅụlọ ḅie ayema na, pịkị ịla ma na,

¹²ini pike sime anga mị ḅụ ori àrị deki pakaso mun ḅụmịẹfịafịama anga, anị fọn sara nyọ mị ḅụ, fịnị seni àrị dọkịmaḅịa.

¹³Nemikase bebe Izrẹl sẹ mị mgba nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ,

¹⁴anịsịkị ini mịẹ si mị ini nwọ nemi ḅo gbọrị kirikiri, sẹ mị gbọrị ayamburama owoi nambulo ọkịḅo seni simịẹ agba nwọ mịẹḅịa. Ini ori ọkị se Nyanaḅọ Ḅe pakaḅoḅo Ikowarị mị nwọ munḅịa;

¹⁵ama mị ḅie tịḅịdapụ ma inia ḅarama seni ọ̀ tịḅị ọgọnọ gbana, se anị anga ḅụ ọ̀ ḅaaḅịa.

¹⁶Gele Agbamịẹḅọ ḅe owoi nambulo ḅe oju pulo mị ḅụ ye ọkị se Ikowarị mị ḅie sọmunḅịa,

¹⁷se ọ̀ ḅaratụmgbalị se ḅie chu se anị seni sọnọma sịkị se nyọ kikima ḅịtẹ mị tọrọkọ ḅụ sanaḅịa.

¹⁸Pịkị nama ḅe oju pulo mị ḅụ ye ọkị se insẹnsị dọkịma ẹbẹ mị ịkọlị ma ḅụ ịvalị ma ọgọnọ ḅụ saraḅịa Ikowarị mị ḅie ḅụ, kirikọn nama oju pulo mị ọ̀ nwọse agbamịẹ aye dọkịma ẹbẹ mị chuku ḅụ saraḅịa, anị Ikowarị mị ḅọkọ ḅụ simeye mị.

¹⁹Anịsịkị oria ḅẹlẹkị mamgba ọ̀ nwọ ọkị seni agbamịẹ ẹbẹ mị ọgọnọ ḅụ dọkịmaḅịa.

²⁰Ò seni si mịẹye agba mịẹ owoi nambulo ḅe mịẹ ọkụ, anị ḅe wu ḅe ḅụ sọnị ọ̀ pịkị mịẹḅịa ọkụ mị-ẹ, mịn ḅara mị ḅụ anị ò se tomonima inia si mịẹye agba mị mịẹḅịa ọkụ-ẹ, se ini si ḅụḅarasin ini pịrịḅịa.

²¹Anịsịkị ori owoi nambulo ḅe ọkị ini pike sime nyọ mị ḅụ paka mun ọ̀ dọkịmaḅịa, anị oria sima gose ọ̀ dọkịma owoi nambulo ḅe ọ̀ nwọ mịẹ ọkụ mị. Mịn anị se ama mị si mị dekisinḅịa agba mị-ẹ.

²²Nemikase ḅẹrẹtọnḅọ nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ,

²³ini ọ̀ mịẹ si mị se ò ḍie gbọrị kirikiri, gbọrị ẹkpẹịn ọ̀ nwọse ḅo oria agbamịẹḅịa anị ḅẹḅẹye ḅụ oforika wu.

²⁴Ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị. Mịn anị se si dekisinḅịa agba mị-ẹ.

²⁵Agbamịẹḅọ ḅe ọ̀ ḅaratụmgbalị se nama oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ọgọnọ ḅụ saraḅịa se kirikọnye mị seni agbamịẹ ẹbẹ mị chuku ḅụ saraḅịa.

²⁶Anịsịkị anịa ḅẹlẹkị mị mgba ọ̀ nwọ dọkịmaḅịa agbamịẹ ẹbẹ mị ọgọnọ ḅụ, anị se gboloma agbamịẹḅịa namama ḅẹlẹkị ma ọ̀ nwọ dọkịma ọkụ mị. Mịn ḅara anị agbamịẹḅọ ḅe ḅẹrẹtọnḅọ ḅe mịẹ si mị gose agba mị mịẹḅịa ọkụ-ẹ, ini pịkị si ḅụḅarasin ọ̀ pịrịḅịa.

²⁷Nemikase papa apụma ḅie gbọrịḅọ nemika ḅaraḅụ simịẹ se Nyanaḅọ Ḅe chụa koroma olokoma ḅụ gbọrịye kanmẹ ḅẹḅẹ,

²⁸ini ọ̀ mịẹ si mị se ò ḍie gbọrị kirikiri, gbọrị ịrọrọ oḅori ọ̀ nwọse ḅo oria agbamịẹḅịa, anị ḅẹḅẹye ḅụ oforika wu.

²⁹Ori ọ̀ ḅara se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị.

³⁰Agbamịẹḅọ ḅe ọ̀ ḅaratụmgbalị se nama ḅe oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ḅie saraḅịa, se kirikọnye mị seni agbamịẹ ẹbẹ mị chuku ḅụ saraḅịa.

³¹Anịsịkị ori ọ̀ ḅụ ḅẹlẹkị ma mgba nwọ sinḅịa, anị ḅaa seni gboloma agbamịẹḅịa namama ḅụ ḅẹlẹkị sin ọkụ mị, se anị seni agbamịẹ ẹbẹ mị ọgọnọ ḅụ dọkịmaḅịa, anịa kụnụ Nyanaḅọ Ḅe ḅụḅẹlẹḅẹlẹye mị. Mịn agbamịẹḅọ ḅe agba mị mịẹḅịa ọkụ-ẹ, se ini si ḅụ ḅarasin tomoniḅọ ḅe pịrịḅịa.

³²Tomoniḅọ nemikase anana se ḅo simịẹ agbamịẹ-ẹḅomẹ ḅẹḅẹ, ḅẹḅẹye ḅụ oforika ịrọrọ mị nụḅọ se ḅoḅịaye-ẹ.

³³Ori ọ̀ ḅarama se nama ḅe tịḅị ọgọnọ gbana se ọ̀ ḅaaḅịa agbamịẹ ẹbẹ mị ḅụ ọgọnọju daọrụ mị ḅụ, anị ini se dọkịma agbamịẹḅịa namama ini nwọ ḅaaḅaa nyọ mị.

³⁴Agbamịẹḅọ ḅe ọ̀ ḅaratụmgbalị se nama ḅe oju pulo mị ḅie chu se, anị se agbamịẹ ẹbẹ mị ịkọlị ma ḅụ ịvalị ma ḅie ḅụ saraḅịa, se kirikọnye mị seni agbamịẹ ẹbẹ mị chuku ḅụ saraḅịa.

³⁵Anịsịkị ori ọ̀ ḅụ sime ḅẹlẹkị mamgba nwọ sinḅịa, anị ḅaa seni gboloma agbamịẹ ananama ḅụ ḅẹlẹkị sin ọkụ mị, se ori anị se chụa ini seni fịye agba mịẹ Nyanaḅọ Ḅe pịrịpịrị ẹbẹ mị ọgọnọ anị dọkịmaḅịa. Mịn agbamịẹḅọ ḅe se agba mị mịẹḅịa ọkụ mị-ẹ, tomoniḅọ ḅe mịẹ si mị gose, se ini si ḅụ ḅarasin ọ̀ pịrịḅịa.