Read kirikeni Agbamịẹ Apụ 6 Bible Online

Agbamịẹ Apụ 6 - kirikeni bible

Agbamịẹ Apụ 6

¹Nyanaḅọ Ḅe ma olokoma chụa se Moziz ḅe pịrịmẹ.

²Nemikase Nyanaḅọ Ḅe ḅụ si mịẹḅọ omi-ẹ nwọ ḅẹḅẹ, nụḅọ agbamịẹḅịa, anị nụḅọ juo Izrẹlḅọ se nụḅọ ḅara chụaye, anịkanịka ḍikiḍiki nụḅọ pịrị nwọḅẹye, anịkanịka nụḅọye furu, anịkanịka nụḅọ inuma

³anịkanịka faye gose iruokọn pịkị anịaḅụ chịẹ yekarịfị na ngịsị nụḅọ ọrịkẹ nwọḅẹ ḅọ.

⁴Tomoniḅọ ma ayema ḅụ gbọrịye si mịẹmẹ ḅẹḅẹ, karakaraka ḅọkọ ḅụ ọ̀ nyanaḅọ aye goyegoye ọ̀ gbẹịn nyanaḅọ mị pịrịḅịa, ḅẹrẹ ọ̀ ḅarasimẹ ini nwọ ḍọkịḅo gbọrị ene mị ḅụ. Ò yema gbẹịn nyanaḅọ ḅe pịrịḅịa; se chụaḅụ ọ̀ pịkị ye mị se sọnọ-a kiri ḍie ḅe gbọrị kiri gbẹịnḅịa gbẹịnye ḅaraḅụ.

⁶Ḅẹḅẹye ḅụ oforika pịkịna yela gbọrị ajirima anịkanịka ẹkpẹịn ọ̀ nwọ ọkịḅo agbamịẹḅọ ḅe pịrịḅịa. Àrị enema ḅie ini se fịrịnwẹngị igbiki mị la-ọkụ anị ini ḍiki se ọ̀ la ḅịpị mị na kịẹnmaḅịaye-ẹ.

⁷Mịn ḅaraḅụ agbamịẹḅọ ḅe ò si ḅụ ḅarasin agba mịẹ Nyanaḅọ Ḅe pịrịḅịa, se ini si ḅụ ḅarasin ọ̀ pịrịḅịa.

⁸Nyanaḅọ Ḅe tọn Moziz ḅe pịrịmẹ

⁹na ọ̀ ma olokoma chụa se Erọn ḅe na oria owuapụ awọma na nwọ pịrị dọkịma agbama na kpakịmaye ḅụ. Dọkịma agba mị agbamịẹ ẹbẹ mị ọgọnọ ḅụ mị anị simeḅịaye-ẹ bebe ḍin mị mgba, fịnị mị sọnị anị kọrị ḅụ simeḅịa.

¹⁰Anịsịkị agbamịẹḅọ ḅe oria koro lọkọ-ḅịtẹ ḅụchụaye mị na kpụlụ tumochụaye mị na chụa se, agbamịẹ ẹbẹ mị ḅụ oḅolo fọn ma sin se agbamịẹ ẹbẹ mị anga sịkị saraḅịa.

¹¹Anịsịkị ori oria ḅụchụayema ḍinma se fọn ma ọkị pakaso fịafịa gbọrị anga nwọ munḅịa.

¹²Agbamịẹ ẹbẹ mị ọgọnọ ḅụ fịnị mị kọrị ḅụ simeḅịa, ngịsị bin ẹkẹ. Dede goyegoye agbamịẹḅọ ḅe ọ̀ fịnị seni anịa ḅie chụaḅịa, dọkịma agba mị seni anịa ọgọnọ ḅụ ọrụtọnma koromaḅịa, pịkị gboloma agba mị ḅe ḅẹlẹkị mị se anịa ọgọnọ dọkịmaḅịa.

¹³Agbamịẹ ẹbẹ mị ọgọnọ ḅụ fịnị mị kọrị ḅụ simeḅịa, ngịsị anị bin ẹkẹ.

¹⁴Ma anị fịaye mgbọlụ agbama oloko ma-ẹ. Erọn furoḅie gbọrị agbamịẹḅọ anị fịaye mgbọlụ agba mị mịẹ Nyanaḅọ Ḅe pịrịḅịaye-ẹ agbamịẹ ẹbẹ mị tọrọkọ ḅụ.

¹⁵Anịsịkị ḅarakuḅu ḅeinḅịa fịlawa na pulo na pịkị anịa ọgọnọ gbana insẹnsị mị na ọkị se agbamịẹ ẹbẹ mị ọgọnọ dọkịmaḅịa, se ḍiepakụma na anịmgba ini se agbamịẹ Nyanaḅọ Ḅe pịrịsam. Mịn agba mị anịa kụnụ Nyanaḅọ Ḅe ọ̀ ḅụḅẹlẹḅẹlẹmẹ.

¹⁶Agbamịẹapụma kirikọnye mị fịḅịa. Fịturu sumaye sọka ḅaraḅụ ini anị fọị se gbọrị fịafịa nyọ ḅụ sime se anị fịḅịa, Nyanaḅọ Ḅe pakaḅoḅo Ikowarị mị odo mị ḅieḅụ. Nyanaḅọ Ḅe anị seni agbamịẹapụma pịrịmẹ, fịye agbamịẹ ayema ḅụ mị inia ḍiekiri-ẹ, anị opuma osiḅụ omi-ẹ, anị simịẹ agbamịẹ ayema na yepẹkẹrẹ ḅo agbamịẹ ayema na osiḅụ sime ọkụ mị.

¹⁸Erọn furoḅie owutọkụ goyegoye anị fịḅịa ọkịmun ḅụọḅụọ la. Anị ini se agbamịẹ Nyanaḅọ Ḅe pịrị fịye mị ḅụ inia ḍiekiri-ẹ. Jịn papaḅọ ḅụ ḅara se anị lamaḅọ goyegoye; anịaḅụ sime osi kụrọ mị ye se nụḅọ lamaḅịa.

¹⁹Nyanaḅọ Ḅe ma olokoma chụa Moziz ḅe pịrịmẹ

²⁰Erọn owuapụ awọma se agbamịẹapụ fịrịkiri ḅụ koroma mị ḅụ. Ini pulo seni ọ̀ tịḅị sara ene mị ḅụ ori agbamịẹ ḍiepịrịaye se ḅo Nyanaḅọ Ḅe pịrịḅịa. Fịlawa gbọrị loko ḅie ḅeinḅịaye (ene ḅene ḅene fịaye mgbọlụ agbamịẹye mị lala ọkụ mị), dede anịaḅụ ikiḅa, saso pịkị anịaḅụ ikiḅa.

²¹Ini pulo se anị na iḅiọkụma pikiriḅịa, se anị seni panị-ḅẹlẹ ḅie chụọ anịsịkị mịẹse anị iḅiọkụma kọsị, se anị seni fịaye mgbọlụ agba mịẹ, anịa kụnụ Nyanaḅọ Ḅe ọ̀ ḅụḅẹlẹmẹ.

²²Erọn ḅe ḍinma se ḅo Gele Agbamịẹḅọ sọ ḅọ goyegoye mị agba mị nwọ mịẹḅịa ọkịmun ḅụọḅụọ la. Ini okorona okorona anị dọkịma se agbamịẹ Nyanaḅọ Ḅe pịrịḅịa.

²³Agbamịẹḅọ se fịaye mgbọlụ mịẹ agba mị ḅụ tomoniḅọ fịḅịaye ofori-ẹ, anịmgba ọ̀ dọkịmaḅịa.

²⁴Nyanaḅọ Ḅe tọn Moziz ḅe pịrịmẹ

²⁵na ọ̀ ma olokoma chụa se Erọn ḅe na oria owuapụ awọma na nwọ pịrị, si gose mịẹḅịa agbama ẹrẹchị. Si gose mịẹḅịa agba nama ḅe agbamịẹ ẹbẹ mị ḅụ ọgọnọju daọrụ mị ḅụ mị ini ọ̀ ḅaaḅịaye-ẹ, anị ini se dọkịma agbamịẹḅịa namama ini nwọ ḅaaḅaa nyọ mị. Mịn mị opuma osi nyana agba-ẹ.

²⁶Nama ḅe se agba mịn mịẹḅịa agbamịẹḅọ ḅe, osiḅụ sime nyọ ḅụ mị ò sime anị pẹịḅịaye-ẹ, Nyanaḅọ Ḅe pakaḅoḅo Ikowarị mị odo mị ḅie ḅụ.

²⁷Ḅara se nama ḅe oju mịnị lamaḅọ goyegoye, anị ḅọrọ tomoniḅọ-o anịkanịka nama-o, anị nyana osi kụrọ mị anị ye se nụḅọ lamaḅịa. Nemikase nama ḅe oju pulo mị ḍosi mun sara ḅụchụaye omi-ẹ ḅẹḅẹ, osi nyana gbọrị nyọ ḅụ ini anị sịkịrịḅịa.

²⁸Ini se nama mị chụọ aḅaịn ḅẹlẹ goyegoye ini ḅaaḅịa, ọkụma nemikase ikulele ḅẹlẹ ini nwọse anị chụọmẹ ḅẹḅẹ, ini iḅiọkụma anị guro se mengi se anị sịkịrị sinḅịa.

²⁹Agbamịẹapụ furoḅie owuḅọ goyegoye ineda mị agbamịẹ nama mị pẹịḅịa; opuma osiḅụ simeye-ẹ.

³⁰Ọkụma nemikase ini oju pulo mị se Ikowarị mị ḅie sọmun se mịẹmịẹye ḅaraḅụ si dekisin agbamịẹḅịa wu omi-ẹ ḅẹḅẹ, ori nama ḅe ini pẹị ẹkẹ; ini ọ̀ dọkịmaḅịa.