Read kirikeni Agbamịẹ Apụ 8 Bible Online

Agbamịẹ Apụ 8 - kirikeni bible

Agbamịẹ Apụ 8

¹Nyanaḅọ Ḅe nwọse Moziz ḅe ḅẹmẹ,

²“Erọn ḅe na oria owuapụ awọma na ọkị se à pakaḅoḅo Ikowarị mị ḅọkọ ḅụ sọmun se agbamịẹapụ ḅụchụayema na, se tịḅị kiri saraḅịa pulo mị na, si agbamịẹ ayamburama owoi nambulo ḅe na, mama ajirima ma na, pịkị suka fịturu kana mị na, nwọ ọkịḅo.

³Anịsịkị bebe tomoni ogbo mị mgba nwọ chịn koḅirima anịanga ḅụ.”

⁴Moziz ḅe Nyanaḅọ Ḅe tọn ḅara mị nwọ mịẹmẹ, se tomoni ogbo mị ḅo koḅirima sịkị,

⁵ọ̀ nwọse ini ḅẹmẹ, “À nwọ mịọkụ mịẹ mun-arịye mị anị Nyanaḅọ Ḅe tọnye-ẹ.”

⁶Moziz ḅe Erọn ḅe na oria owuapụ awọma na ọkị pakụma ḅo se ini ḅẹmẹ na ini ḅụ mịẹfịafịa ma mengi nwọ ḅiri.

⁷Ọ̀ kpụlụ ḅụchụaye mị na koroḅụchụaye mị na se Erọn ḅe chụa mẹ, pịkị nangwọ ḅịtẹ mị se ò konju ḅọrọmamẹ. Ọgọnọ gbana ḅụchụaye mị ọ̀ nwọse ọ̀ chụa se iḅiọkụma ḍori ḅirikunye mị se anị ọlọkịkịmamẹ ò konju ḅụ.

⁸Ori ekpe gbẹịnye mị se ọ̀ chụa se ò ḅo Agbamịẹapụma se karakaraye nemi nemi ye mị se anịa ḅie chụamẹ.

⁹Ọ̀ tịḅị fịna ḅịtẹ mị se ọ̀ tịḅị fịna mẹ pịkị goli goliye mị se anịa tọrọkọ oḅolomẹ, anị osiḅụ sime mị ḅe elekima mị-ẹ, Nyanaḅọ Ḅe tọn ọ̀ pịrịsa ḅaraḅụ.

¹⁰Anịeso Moziz ḅe tịḅịkiri sara pulo mị ọkị se Nyanaḅọ Ḅe pakaḅoḅo Ikowarị mị ọgọnọ saramẹ, pịkị anịa ḅie sime aye mamgba ḅụ na, se mịn ḅaraḅụ ò ye mamgba se osiḅụ wẹrị Nyanaḅọ Ḅe pịrịmẹ.

¹¹Ò pulo mị ḅụ ye ọkị se sọnọma sịkị se agbamịẹ ẹbẹ mị sanamẹ, pịkị anịa fịrịnwẹngịaye ma na, bazini mị ḅụ na pịkị anịa chuku sẹkẹye mị na, seni àrị se osiḅụ wẹrị Nyanaḅọ Ḅe pịrịḅịa gose.

¹²Ori Erọn ḅe se agbamịẹḅọ fịrịkiri ḅụ koromamẹ, tịḅịkiri sara pulo mị se ọ̀ tịḅịkiri sara mị ḅụ.

¹³Anịeso, Moziz ḅe Erọn owuapụ awọma ọkịpakụmaḅo se ḅụchụayema seni ini chụa, ḅirikunye ma se inia konju kpọ, pịkị chu ma seni ini chiramẹ, anị Nyanaḅọ Ḅe tọnsa ḅaraḅụ.

¹⁴Anịsịkị Moziz ḅe se si agbamịẹḅịa ayamburama owoi nambulo ḅe ọkịḅomẹ, se Erọn ḅe na oria owuapụ awọma na ḅara se nama ḅe tịḅị ọgọnọ ḅụ gbanamẹ.

¹⁵Moziz ḅe ọ̀ ḅaa se oria oju pulo mị ḅụ tọn aye ọkị, se ọ̀ ḅaratụmgbalị mị se anịa ḅie chu seni agbamịẹ ẹbẹ mị ḅụ ịkọlị ma ḅụ sime ịvalị ma ọgọnọ sanamẹ, anị se osiḅụ wẹrịḅịa gose. Anịsịkị ọ̀ nama oju pulo mị ḅụ kọnye mị se agbamịẹ ẹbẹ mị chuku ḅụ saramẹ. Mịn ḅaraḅụ ori anị se osiḅụ wẹrị pịkị anị mịẹfịafịamamẹ.

¹⁶Moziz ḅe ḅụlọ ḅie ayema ḅụ sime ḅẹlẹkị mị mgba nwọ ọkịmẹ, iḅi paranga mị na, pịkị nịna akpa ma na, arịa ọgọnọ sime ḅẹlẹkị ma na, se arịmgba seni agbamịẹ ẹbẹ mị ọgọnọ ḅụ dọkịmamẹ.

¹⁷Owoi nambulo ḅe ḅụ kọnye ma ọ̀ nwọ ọkịmẹ, nama oju apụra mị sọnị, mịnị mị na, pịkị ịla ma na, se ori àrị seni ini pike sime nyọ mị ḅụ sikima mun dọkịmamẹ, anị Nyanaḅọ Ḅe tọnsa ḅaraḅụ.

¹⁸Anịa ḅụ jịnye, Moziz ḅe ini se dọkịma agba mị mịẹḅịa ajirima ḅe ọkịḅomẹ, se Erọn ḅe na oria owuapụ awọma na inia ḅarama se nama ḅe tịḅị ọgọnọ gbanamẹ.

¹⁹Moziz ḅe ori ọ̀ ḅaa se oria oju pulo mị se agbamịẹ ẹbẹ mị ḅụ inein-a ịkọlị mamgba ḅụ saramẹ.

²⁰Ori ajirima ḅe kẹnị kirikiri ḅụ koromamẹ, ò mengi se ḅụlọ ḅie ayema na ọḅụju ḅụọma na sịkịrịmẹ, se tịḅị mị na, ḅẹlẹkị mị na, pịkị ajirima ḅe ḅụ kọn aye mamgba na se agbamịẹ ẹbẹ mị ọgọnọ ḅụ dọkịmamẹ, anị Nyanaḅọ Ḅe tọnsa ḅaraḅụ. Mịn dọkịma agba mị fịye agba-ẹ, anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.

²²Anịsịkị Moziz ḅe pịkị maịn karama ajirima ḅe ọkịḅomẹ, anị se agbamịẹ fịrịkiri ḅụ koromaḅịa apụma inia wu ḅe; Erọn ḅe na oria owuapụ awọma na inia ḅarama se nama ḅe tịḅị ọgọnọ gbanamẹ.

²³Moziz ḅe ọ̀ ḅaa se oria oju pulo mị ḅụ ye ọkị se Erọn ḅe oria amaḅaranga ḅeri mị ọgọnọ tanmẹ, oria amaḅaranga opu ḅaratụmgbalị mị ḅụ na, pịkị oria amaḅaranga opu ḅụọtụmgbalị mị ḅụ na.

²⁴Anịsịkị ori Erọn owuapụ awọma ọkịpakụmaḅo se nama ḅe oju pulo mị ḅụ ye ọkị se inia amaḅaranga ḅeri ma ọgọnọ tanmẹ, inia amaḅaranga opu ḅaratụmgbalị ma ḅụ na, pịkị inia amaḅaranga opu ḅụọtụmgbalị ma ḅụ na. Moziz ḅe nama oju pulo mị ḅụ kọnye mị se agbamịẹ ẹbẹ mị ḅụ inein-a ịkọlị mamgba ḅụ saramẹ.

²⁵Ọ̀ ḅẹlẹkị mị ọkịmẹ, opu tumo mị na, ḅụlọ ḅieaye ma gbẹịn ḅẹlẹkị mị mgba na, iḅi paranga mị na, nịna akpa ma na arịa ọgọnọ ḅụ sime ḅẹlẹkị mị na, pịkị amaḅaranga ọḅụju ḅụọ mị na.

²⁶Anịsịkị kana mị ḅie suka fịturu gbọrị okpokpo ọ̀ nwọ dekimẹ, ini se osiḅụ wẹrị Nyanaḅọ Ḅe pịrị ayema ḅụ, ini pulo se gwa mịẹ gbọrị okpokpo na, pịkị ịkịka gbọrị pẹkẹrẹ na, ori árị se ḅẹlẹkị mị na amaḅaranga ọḅụju ḅụọ mị na ọgọnọ gbanamẹ.

²⁷Ma fịaye mamgba ò se Erọn ḅe na oria owuapụ awọma na ḅara chụamẹ, se ini árị seni sosikima ḍiepịrịye agba mịẹ Nyanaḅọ Ḅe pịrịmẹ.

²⁸Anịsịkị Moziz ḅe inia ḅara fịye mị ọkị se agbamịẹ ẹbẹ mị ọgọnọ ḅụ dọkịmamẹ, dọkịma agbamịẹye mị ọgọnọ ḅụ, anị se agbamịẹapụ fịrịkiri ḅụ koroma mị ḅe agba ḅaraḅụ. Mịn mị anị fịye agba-ẹ, anịa kụnụ mị Nyanaḅọ Ḅe ọ̀ ḅụḅẹlẹḅẹlẹmẹ.

²⁹Moziz ḅe ekpe mị ọkị se anị seni sosikima ḍiepịrịye agba mịẹ Nyanaḅọ Ḅe pịrịmẹ. Anị Moziz ḅe oria ḍiekiri-ẹ ajirima ḅe ḅụ tomoniḅọ se agbamịẹḅọ fịrịkiri ḅụ koroma mị ḅụ. Moziz ḅe Nyanaḅọ Ḅe tọn ọkụ anị ò se yegoyegoye mịẹ ọkụ-ẹ.

³⁰Moziz ḅe tịḅịkiri sara pulo mị ḅụ da aye na nama oju pulo mị ḅụ da aye na nwọ ọkịmẹ agbamịẹ ẹbẹ mị ọgọnọ ḅụ árị se Erọn ḅe na oria owuapụ awọma na, pịkị inia ḅụchụayema ḅụ na sanamẹ. Mịn ḅaraḅụ ori ini na inia ḅụchụayema na mịẹfịafịama se Nyanaḅọ Ḅe pịrịmẹ.

³¹Moziz ḅe nwọse Erọn ḅe na oria owuapụ awọma na ḅẹmẹ, “Ọ́ nama mị ọkị Nyanaḅọ Ḅe pakaḅoḅo Ikowarị mị ḅọkọ ḅụ sọmun, anị nyọ ómine anị chụọ, pịkị sime anị pẹị, pịkị kana mị ḅie sime fịturu mị se anị na fị, anị ini se agbamịẹ fịrịkiri ḅụ koroma apụ ḅaraḅụ, anị Nyanaḅọ Ḅe tọnsa ḅaraḅụ.

³²Nama mị anịkanịka fịturu mị ḅụ kọnye kọnye ọ́ dọkịma.

³³Ikowarị mị ḅọkọ ḅụ ọ́ ḅụọ pọkọka mun sọnọma ḍin nwọ laḅịa, ọkịmun ọ́mịna agbamịẹ fịrịkiri mịẹmịẹaye ma kara sịkị nwọ la.

³⁴Nyanaḅọ Ḅe mịmgba wa nwọ mịẹye mị tọn wa pịrịmẹ, se ọ́mịna sima deki sinḅịa ẹrẹchị.

³⁵Ikowarị mị ḅọkọ ḅụ ó sime mun sọnọma ḍin nwọ laḅịa, ḍin na enekaka na ḅụ, se Nyanaḅọ Ḅe tọn ayema mịẹḅụ. Ómine ọkọ mịẹka ọkụma ọ́ fịḅịa. Mịn ḅara anị Nyanaḅọ Ḅe tọn ị̀ pịrị ọkụ mị-ẹ.”

³⁶Anịẹrẹchị Erọn ḅe na oria owuapụ awọma na Nyanaḅọ Ḅe Moziz ḅe ḅụ ḅọrọ tọnye goyegoye nwọ mịẹmẹ.