Read kirikeni Jerimaya 10 Bible Online

Jerimaya 10 - kirikeni bible

Jerimaya 10

¹Izrẹl-a tomoni, ọ́ Nyanaḅọ Ḅe nyana ọ́ pịrị oku mị ọ́ nwọ poki.

²Ori ọkọ ḅẹmẹ, “Jịn-a sẹ mịẹmịẹye ọ́ nwọ ḍukonwẹngịma; sotọrụ ómine ọrịarị kịrị aye ọ́mịna ḅalafamama, jịn-a sẹ apụ àrị ḍiki ḅalafamẹ nwọḅẹ sọ.

³Mịna tomonima tẹkẹ-a mịẹmịẹyema sọye mịẹkẹ. Ini piriḅie eje pẹlẹgbinmẹ; akanịḅọ yekaraye ini nwọse anị karamẹ,

⁴se seleḅa na goli na se anị ḅirimamẹ. Ini churu se anị kakịmẹ anị kụrọma chịẹ se ḅịkị ẹka ḅara.

⁵Nwọ sime agbambuḅọ oru anị se ozu ḅie fenima desin se àrị chịnmgbọlụma fịẹkaḅara, àrị ineda ọkwẹịnkẹ; ini àrị dekiḅịa; anịatịḅị àrị ineda nwẹngịkẹ. Ómine àrị ḍikiḅalafama: àrị ineda ọ́ ḅụ simaḅịaye ofori-ẹ, àrị pịkị se ọ́ mịẹḅịa iḅi ofori-ẹ.”

⁶Nyanaḅọ, ị́ kịkẹḅọ ofori-ẹ; ị́ ḍụḅamẹ, pịkị ị́ya ẹrẹ ḍụḅamẹ pịkị kụrọmẹ.

⁷Tụḅọ osi se ị́ pịrị ẹka, ị̀rị̀ sẹ mamgba nyana amanyanaḅọ ḅe? Osi se ị́ pịrị gbẹịnmẹ. Ị́ kịkẹḅọ ofori-ẹ sẹma ḅie sime yenemi apụ mamgba ḅụ anịkanịka arịa amanyanapụ mamgba ḅie.

⁸Inimgba ini yenemikẹ pịkị oḅori sọmẹ. Nde ḅara-se-kara chịnpẹkẹrẹ oru ḅụ ini ḍawọḅoḅịaye?

⁹Spen-sẹ-ḅie ḅo seleḅa anị ini se inia oru ma ḅirimaye-ẹ Ufaz ḅie ḅo goli na, arịmgba ḅarafịrị nwẹngịapụ mịẹye-ẹ; gẹnịgẹnị ḅịtẹ anị ye-ḍori-ḍin-apụ se àrị ḅirimaye-ẹ.

¹⁰Ọkụma ị́rị́, Nyanaḅọ Ḅe, anị karakara Tamụnọ Ḅe-ẹ, ị́rị́ anị ḍumo àrị Tamụnọ Ḅe-ẹ pịkị simegbaso amanyanaḅọ ḅe-ẹ. Ị́ ịganịsa ḅẹḅẹ, sẹkiri jikemẹ; sẹma ineda ị́ya ịganị mị inema ẹkẹ.

¹¹(Ómine tomonima ḍuko ini pịrị na àrị oru ma anị so mị na tomonikiri mị na tẹmẹka oru ma àrị kanḅịa. Mịn tomonikiri mị ḅie àrị ḅarị nyọ nyana sime ẹkẹ.)

¹²Nyanaḅọ Ḅe oria kụrọ ḅụ tomonikiri mị tẹmẹmẹ; oria nemi ḅụ ọ̀ sẹkiri mị tẹmẹmẹ se pịkị so ma ịsụn pakụmamẹ.

¹³Ọ̀ pịrị kụrọ ḅụ so ọgọnọ sime mengi ma ekereamẹ; tomonikiri mị ḅe kuluma nyọ ḅụ ò soḅuno ma ọkịḅomẹ. Ò so alagba mị mịẹse anị ene ḅie ḅịamẹ, se oria yekokowarị mị ḅie fọrụ mị fịrịma pakụmamẹ.

¹⁴Mayema ọrị ḅụ, tomonima koromamẹ na ini ḅarị yenemikẹ pịkị koroma nyanakẹ; oru tẹmẹ apụma inia ḅie tọn-aye-ma ọkọpakakẹ, anịatịḅị ini tẹmẹ-a oru ma iruo pịkị ḍumo nyanaka-a-tamụnọ-ẹ.

¹⁵Àrị sọye nyanakẹ anịẹrẹchị ini àrị ḍiki simaḅịa; ini àrị kansinḅịa Nyanaḅọ Ḅe ḅo àrị na sọḅịa sịkị.

¹⁶Jekọb Tamụnọ Ḅe ori àrị na kịkịnakẹ; ori anị yemamgba tẹmẹye-ẹ, ọ̀ pịkị Izrẹl mị sẹlẹsam ḅo ọ̀ ḅarakuḅu-a tomoni sọ. Kụrọmamgba Nyanaḅọ anị oria ẹrẹ-ẹ.

¹⁷Jerusalẹm-a tomoni, owuni ó kelekelemasam! Ómine ọ́mịnaye ma koḅiri.

¹⁸Nyanaḅọ Ḅe ori ó desinḅịa mị ama ḅie, ori ọ́ kọsịmaḅịa, se gbọrịḅọ sọ kọn ẹkẹ. Nyanaḅọ Ḅe ọkọ ḅẹmẹ.

¹⁹Jerusalẹm-a tomonima owupakụmamẹ, “Nde anị mịnaḅụ ọyịọkụ! Mịna ịnọ ma ḅịa ẹkẹ. Wa nwọ chịnmẹ na mị anị wa ineda inemaḅịaye-ẹ!

²⁰Mịna ikowarịma kansam; àrị ọlọ ḍiki ma sọ pẹlẹsam. Mịna awọ mamgba ini sofamasam; gbọrịḅọ sọ ofori-ẹ mịna ikowarịma pịkị nwọ pike chịẹma; arịa ḅọkọ-kiki-a ḅịtẹma se sụkaḅịa ḅọ ofori-ẹ.”

²¹À pẹkẹrẹmẹ, “Mịna tịḅịnịma ini yenemikẹ; ini Nyanaḅọ Ḅe gbelakẹ na ori ini dagbụkụkụma-ẹ. Mị ini gose ḅịkịye-ẹ, se mịna tomonima ini galagalasam.

²²Poki! Ḅẹrẹ ḅosam! Ọgọnọju gbọrị sẹ ḅie kpọma pakasam; anịa owunima Juda opuamama pịkị onwun ele mịẹḅịa, piri obiri anga nyọ ḅara.”

²³Nyanaḅọ, à nemimẹ gbọrịḅọ sọ nụḅọ ḅereniḅoye nwọ nemiḅọ ofori-ẹ; gbọrịḅọ sọ ineda ḅẹrẹtọn nụḅọ ḍumo pịrị ẹkẹ.

²⁴Ị́ya tomonima datekerema, Nyanaḅọ, ọkụma opuma kụrọḅara se mine na mịẹma anịkanịka ị́ya ịganị sịkịḅụ fomuḅara se wa pịrịma; anịka anị mịna kuluma sọḅịa.

²⁵Ị́ya ịganị mị pịkị tịḅịtu ị́ pịrị ḍụkụka sẹma da pịkị ị́ sịkịarị tomonima na. Ini ị́ya tomonima ḅaasam; ini gbọtụma okorona okorona wa kan famasam, se mịna sẹ mị se sara mịẹsam.