Read kirikeni Jerimaya 11 Bible Online

Jerimaya 11 - kirikeni bible

Jerimaya 11

¹Gbọrị ene Nyanaḅọ Ḅe ọkọse ị̀ ḅẹmẹ,

²“Ọḅọkụ mị ḅe olokoma poki. Ḍuko Juda na Jerusalẹm na tomonima pịrị

³na Ị̀rị̀, Nyanaḅọ, Izrẹl Tamụnọ Ḅe, worinime se mị ọḅọkụ mị olokoma kokokaḅọ goyegoye tịḅị ọgọnọ gbanasam.

⁴Anị àrị inia ḅieju-aḍapụma na fị ọḅọkụ mịye-ẹ, àrị Ijipt, inia ḅụ kọrịfịnị kịkẹ ama mị ḅie, ini ọkịpakụmaḅo sịkị. À ḍuko ini pịrịmẹ, ini ị̀ ḅịpị poki se à tọn ini pịrịye goyegoye mịẹ. À ḍuko ini pịrịmẹ na ini nemikase ị̀ ḅịpị pokimẹ nwọ ḅẹḅẹ, ini ị̀ya tomoni sọḅịa se àrị inia Tamụnọ sọḅịa.

⁵Anịsịkị à ḅereni inia ḅieju-aḍapụma pịrịye à nwọ mịẹḅịa, na àrị ngọ nyana pịkị yepakụma lọkọlọkọ kiri mị, mịọkụ ini anga nyọ mị, se ini pịrịḅịa.” À ḅimẹ, “Anị ọkọsime, Nyanaḅọ.”

⁶Anịeso, Nyanaḅọ Ḅe ị̀ ḅẹmẹ, “Juda opuamama ḅie na Jerusalẹm ateli ma ḅie na mun. Anịnyọ ḍuko kelema tomonima pịrị ị̀ya oku mị ini nwọ poki se ọḅọkụ mị olokoma ḍukoye mịẹ.

⁷Àrị Ijipt ḅie inia ḅieju-aḍapụma ọkịpakụmaḅo sịkị, à kụrọma inia ḅerijinemẹ na ini ị̀ ḅịpị poki. À pịkị pa inia ḅerijine ḅo mị ene lamẹ.

⁸Ọkụma ini ị̀ pokikẹ anịkanịka à ḍukoye mịẹkẹ. Anịnakaraka ḅẹḅọ ḅẹḅọ pa ininachịn siye mịẹma mun-aḅẹ. À tọn ini pịrịsam ini ọḅọkụ olokoma koko, ọkụma ini ḍụkụkẹ. Anịgose anịa ḅie sime fomuḅara mamgba à nwọ ọkịḅo inia tịḅị ọgọnọ gbanaye-ẹ.”

⁹Anị Nyanaḅọ Ḅe ị̀ ḅẹye-ẹ, “Juda na Jerusalẹm-a tomonima na, ini ḅẹrẹ ḅịa ị̀ pịrịaḅẹ.

¹⁰Ini pịkịma inia ḅieju-aḍapụma mịẹ sima damamunsam, anị à ḍuko ini pịrịarịye ma mịẹḍụkụkapụ ma; ini jịn-a oru tẹkẹsam. Izrẹl na Juda na, àrị inia ḅieju-aḍapụma na fị ọḅọkụ mị ini kansam.

¹¹Anịgose, Ị̀rị̀, Nyanaḅọ Ḅe, mịọkụ inia ḅerijine aḅẹ na à ḅụfụka ọkịḅo aḅẹ, ini ineda ḅie pọkọ ẹka ḅụfụka. Se ini owupakụma ị̀ pịrịḅịa sịkị àrị ini poki-ẹkẹ.

¹²Anịsịkị Juda na Jerusalẹm na tomonima ini agbamịẹ pịrịpịrị-a oru ma nwọ damamunḅịa ḅarachụa ḍọkị ḅụ. Ọkụma arịa oru ma ineda ini ḍụa ẹkẹ mị ḅụfụka mị ḅoḅịa sịkị.

¹³Juda apụma ini ḅakama opuama nyana ọkụ anị ini pịkị ḅakama oru nyana ọkụ-ẹ; se Jerusalẹm ḅie angapụma sọ, inia ateli ma ḅaka ọkụ anị ini pịkị ateli ḅọkọ goyegoye ẹbẹ pike inia ḅụngụngụma Beal oru mị pịrị ọkụ-ẹ, agbamịẹḅịa gose.

¹⁴Jerimaya, mịna tomonima gose ị̀ tẹkẹma anịkanịka tẹkẹ ini pịrịma. Ini ḅụfụka ḅie sọ se ḅarachụa gose ị̀ chịnḅịasịkị, àrị ini poki ẹkẹ.”

¹⁵Nyanaḅọ Ḅe, ọkọ ḅẹmẹ, “À ḅẹlẹma tomonima siaye nwọ mịẹ aḅẹ. Che kụrọ ini nwọ nyana se ị̀ya Oputẹkẹwarị ḅie sime? Ini chịn-ao na àrị ineda ḅụfụka kikiḅe ini yeḅereni, pịkị nama agba mịẹ ọkụma? Anị ine mịẹse ini ḅieḅẹlẹ ḅe?

¹⁶À gbọrị sịkị ini chịnmẹ, ini anị ịnyanya chụa oliv eje, iḅi chịnmgbọlụ ḅụ ḅein eje-ẹ; ọkụma mịọkụ, soalagba ḅie fie ọkụ àrị ekerea se fịnị se anịa ịnyanya ma ḅụ chụaḅịa se arịa ịkpangị mamgba dọkịmaḅịa.

¹⁷“Ị̀rị̀, Kụrọmamgba Nyanaḅọ Ḅe, Izrẹl na Juda na ḍipi-pakụmamẹ, ọkụma mịọkụ à ḅụfụka se ini ẹrẹmasam. Ini ma mị fomuḅara mị dekiḅo iniaḅụ pịrịmẹ, anịatịḅị ini siye mịẹmẹ; ini ị̀ ịganịmamẹ ini nwọ agbamịẹ Beal ḅe pịrịsa sịkị.”

¹⁸Gbọrị ene Nyanaḅọ Ḅe ḍuko ị̀ pịrịmẹ ị̀rị̀ na tarakapụma ḅẹrẹḅia se ị̀ mịẹḍọkịye ma.

¹⁹Àrị ini ọkị-ḅaa-ẹmun-arị-kuḅie-ye-tọnka anana tọkụ kịkẹmẹ, se à pịkị nemikẹ na ị̀rị̀ anị ini siaye ḅia pịrịarịye-ẹ. Ini ḅẹ aḅẹ, “Ó ye wa eje mị na anịa chịnmgbọlụ na pẹlẹgbin; ó ye wa ọ̀ ḅaa mịẹsosịkị gbọrịḅọ sọ ḅarị ò se ḅiekoroma ẹka ọkụ.”

²⁰Anị à tẹkẹye-ẹ, “Kụrọmamgba Nyanaḅọ, ị́rị́ anị karakara ḅẹrẹkọnḅọ-ẹ, ị́ tomoni-a koroma na kuḅie na ḍaḍikiḍikimẹ. Àrị ị̀ ḅụ se ị́ ḅarachụasam; anịgose ye àrị ị́ ḍiki, mịnapụma ḅara sowu ḅi.”

²¹Anatọt owuapụma ị̀ ḅaa ḍọkịmẹ, ini pịkị ḍuko ị̀ pịrịmẹ ini ị̀ ḅaaḅịa, à nemikase pa Nyanaḅọ Ḅe oku mị ḍukomamun aḅẹ nwọ ḅẹḅẹ.

²²Anị Kụrọmamgba Nyanaḅọ Ḅe ḅẹye-ẹ, “À fomuḅara se ini pịrịḅịa! Inia asẹmẹnị ma owu ḅie ini ini ḅaaḅịa; inia awọmẹnịma ḅuruḅaa ḅụ ini fịḅịa.

²³À sịkị pẹlẹsam ḅụfụka ọkịḅo Anatọt-a tomonima pịrịḅịa sịkị, se anị sịkị lasịkị, gbọrịḅọ sọ ḍumo ẹkẹ.”