Read kirikeni Jerimaya 12 Bible Online

Jerimaya 12 - kirikeni bible

Jerimaya 12

¹“Nyanaḅọ, à nemikase ị̀ya ḅẹrẹ se ị́ tọrọkọ koroma ọkụma, ị́ ḅẹrẹ iḅi kọn ị̀ pịrịḅịa. Anịsọ àrị ị́ gbelaḅịa karakara ḅẹrẹ ḅịpị gbolomaye. Cheye gose sitịḅịnyanapụma ye ini na lọkọlọkọ-ao? Cheye gose ye ḅịrị furuapụ ma pịrị-ao?

²Ị́rị́ àrị ḍipimẹ, se àrị kuno chụamẹ; àrị sẹnị se chịnmgbọlụ chụamẹ. Ini sịkịmamgba ị́ ḅụ iḅiye ḍukomẹ, ọkụma ini jokoma ị́ gbolomaye nwọ abalakẹ.

³Ọkụma, Nyanaḅọ, ị́rị́ ị̀ nemimẹ; à mịẹye ị́ ọrịmẹ ị́ pịkị nemimẹ àrị ị́ ḅẹlẹma la ọkụ. Mịna siapụma fọnọsin, se ḅaaḅịa nyọ mun anana fọnọsin ọkụ; ómine àrị koru ọkịmun ini àrị ḅaaḅịa sịkị la.

⁴Mịna kiri mị anị samịna mun nde sịkị la ḅe, se ozuma ḅie osueinma fị mun nde sịkị la ḅe? Nama na feni na fịaḅẹ mịna tomonima nyana sitịḅị gose, ‘Na Tamụnọ Ḅe wa mịẹarịye ma ori ọrịkẹ’” nwọḅẹ tomonima.

⁵Nyanaḅọ Ḅe ọkọ ḅẹmẹ, “Jerimaya, nemikase tomoni na arụḍia ḅụ ị́ ḅụ ịnyọ fa ọkụma, nde ineda asụn na arụḍiaḅịa ọkụ? Ị́ ineda opu sẹ ḅie chịẹka sịkị, nde Jọdan anga sime opu ejema ḅie ị́ yeḅịa ye?

⁶Ị́ya mịnapụ, ị́rị́ na gbọrị furo apụma pembe ị́ dẹrịmẹ; ini jịn apụ ḅụ sọ ị́ dapakamẹ. Kuḅie-se-iniaḅụ gbanama, ini ikiapụ ḅara se ọkwẹịn sọ.”

⁷Nyanaḅọ Ḅe ọkọ ḅẹmẹ, “Àrị Izrẹl mị sarasam; à sẹlẹọkị sẹ mị àrị anị sịkịsam! À ḅẹlẹmapụ ma àrị ini se inina-tarakapụma kụrọ ḅie dẹrịsam.

⁸À sẹlẹọkị apụma ini vinpịkị ị̀ dapakasam; piriḅie sime chịrịḅa ọkụ, ini ekerea ị̀ dasam, anịgose àrị ini ḍikiḅụnwọnwọmẹ.

⁹À sẹlẹọkị apụma, ini feni kịkẹmẹ ḅọkọḅọkọ ḅụ ọgankwọ ọ́ dapakaḅịa. Piri-a namama chịn àrị ḅo sọ alalị mị fị!

¹⁰Tọn-a jịn-a sẹ ḍikiḍiki apụ ị̀ya irumịẹ chịnmgbọlụ ozu mị kansam; ini ị̀ya ele ma nanga kiri pịrịsam; ini ị̀ya iḅi ama mị pịkị onwun ele mịẹsam.

¹¹Ini anị se papa piri ele mịẹsam; anị ị̀ tọrụkuḅu kpọngọlọma simemẹ. Bebe kiri mị mgba onwun ele sọsam; se pịkị balaḅọ ofori-ẹ.

¹²Onwun ele chịngịma saḅakoro nyọ mamgba tomoni pakaḅo ye ọfọịn ọkị aḅẹ. Àrị ọmụ fịrịmasam na bebe nyọ mamgba kan sara; gbọrịḅọ sọ deinma sime ẹkẹ.

¹³Ị̀ya tomonima ini fịlawa mịẹ ịpịamgba ḍipimẹ, ọkụma osuein mị ini kpokponimaye-ẹ; ini ḅakama fịrịnwẹngịsam, ọkụma anịaḅụ ini nyanaye ofori-ẹ. Ị̀ya kụrọ ịganị gose inia ḍipiaye ma pakakẹ.”

¹⁴Nyanaḅọ Ḅe nwọ ḅẹmẹ, “À ḍukoḅịaye omi-ẹ Izrẹl na palịangapụ gbolomaye ḅụ, anị à se ị̀ya tomoni Izrẹlapụma pịrị ama mị kan apụma. Àrị ini sitịḅịnyanapụma ọkịsinḅịa inia sẹma ḅie, ini burasin chịn ọkụ, se à Juda mị ḍụaḅịa inia ḅaraḅie.

¹⁵Ọkụma àrị ini ọkịso sa ḅẹḅẹ à ḍikiḅụgerere nyana ini pịrịḅịa; à gbọrị-sẹ-gbọrị-sẹ ọkịḅo nụḅọ ḅo kiri koromaḅịa nụḅọ opu sẹ ḅie.

¹⁶Nemikase ini inia kuḅie mgba se ị̀ya tomonima tẹkẹḅara nwọ ọkị se yekarịfịḅịa ḅẹḅẹ, Nyanaḅọ Ḅe ḍumo wara sịkị, ini gbọrị sịkị ḅụ Beal karịfị ḅara se ị̀ya tomonima ḍie ọkụ mị—anịsịkị ini ị̀ya tomonima ḅụapụ sọḅịa, se lọkọlọkọ nyanaḅịa.

¹⁷Ọkụma nemikase ḅịpịpoki-ẹka gbọrị sẹ omi-ẹ ḅẹḅẹ, anịsịkị à gbọtụma anị sẹ mị burasin se anị kansinḅịa. Ị̀rị̀, Nyanaḅọ Ḅe ọkwẹịnsam.”