Read kirikeni Jerimaya 16 Bible Online

Jerimaya 16 - kirikeni bible

Jerimaya 16

¹Nyanaḅọ Ḅe pịkị ọkwẹịn ị̀ pịrị se nwọ ḅẹmẹ,

²“Mị ḅara sime ọkụ sime nyọ ḅụ ere simema anịkanịka awọ yi ma.

³À ḍuko ị́ pịrịḅịa, mịanga ini yi awọma na ini yi apụma na ḅụ pakaḅịaye.

⁴Ini ḅalafama obi ḅụ fịḅịa, se inia ḍụẹịn-ḍinḅịaḅọ anịkanịka ini ḍipiḅịa ḅọ ofori-ẹ. Inia oju akpakpa ma fịaye-pakụma ọfịn-aye kiri ọgọnọ tunduruma sara ọkụ anị àrị tunduruma saraḅịa ọkụ-ẹ. Ini ọmụ ḅie ini ḅaaḅịa, anịkanịka ḅuruḅaa ḅie ini fịḅịa, se inia fịsa oju akpakpa ma àrị fịyesọ feni na piri nama na pịrịḅịa.

⁵“Ini ḍụẹịn-ḍin-arị warị ḅie ọ́ sọ ẹkẹ. Ó kururu gbọrịḅọ sọ pịrịma. À ḅarị dein se ị̀ya tomonima pịrị ẹkẹ anịkanịka ḅẹlẹma na ḍikiḅụgerere na se ini ḍie ẹkẹ.

⁶Ngọ nyanapụ na igwein apụ na fịḅịa mị ama ḅie, ọkụma ini ḍipiḅịaḅọ anịkanịka inia ḍụẹịn-ḍinḅịaḅọ ofori-ẹ. Kingi se mịnaḅụ pu, anịkanịka tịḅị sẹịn se oria kururu mị ḍiepakụmaḅịaḅọ ofori-ẹ.

⁷Gbọrịḅọ sọ jụmḅọ jụmḅọ na yefị ẹkẹ anịkanịka ḅuḅuye ḅu ẹkẹ, nụḅọ na ḅẹlẹmaḅọ fị saye gose, se nụḅọ kuḅie kụrọma. Nụḅọ ḍaḅọ na nyengiḅọ na fị saye gose nụḅọ ḅụ-ebera ḅịa ḅọ sọ ofori-ẹ.

⁸“Tomoni alalị fịaye fịarị warị ó munma. Ọ́ kpọnjị sime ini na ye fịma, pịkị ini na ye ḅuma.

⁹Ị̀rị̀, Kụrọmamgba Nyanaḅọ Ḅe, Izrẹl Tamụnọ Ḅe, nyana ḍukoḅịaye poki. Inia ereya-alalị ḅe nyọ fiema ḅieḅẹlẹ ma à nwọ deinmaḅịa. Mịanga sime-a tomonima, ḍumo ḅụ mịn mị mịẹ mị ọrịḅịa.

¹⁰“Ị́ maye mamgba ḍuko ini pịrị so sịkị, ini ị́ gbelaḅịa na à cheye gose mị fomuḅara se ini fomu. Ini gbelaḅịa, che oloko ini nwọ koro pịkị che sin ini nwọ mịẹsa, ini nyana Tamụnọ Ḅe tọrọkọ.

¹¹Anịsịkị ḍuko ini pịrị na, Nyanaḅọ Ḅe, ò ḍukosam, ‘Ọ́mịna ḅieju-aḍapụma ị̀ ḅụ ḅụsikima se tịḅịtu pịkị tẹkẹ jịn-a oru pịrịmẹ. Ini ị̀ sarakoroma se ị̀ya ḍie ayema ḅịpị pokikẹ.

¹²Ọkụma ómine sitẹịn aye nwọ mịẹ ọ́mịna ḅieju-aḍapụma nẹngịsam. Ómine mgba ininachịnmẹ, pịkị siye mịẹmẹ, ọ́ pịkị ị̀ ḅịpị pokikẹ.

¹³Anịọkụma, à mị ama ḅie ó sin jenejene ómine anịkanịka ọ́mịna ḅieju-aḍapụma ma nemika nyọ nwọ sẹịnḅịa. Se anịju ó jịn-a oru ma tẹkẹḅịa enekaka na ḍin na ḅụ, se à pịkị ó ḍikiḅụgerere ẹkẹ.’”

¹⁴Nyanaḅọ Ḅe, nwọ ḅẹmẹ, “Sịkị mị ḅoaḅẹ, tomoni ḅarị ị̀ ḅụ yekarịfị ẹkẹ, anị ḍumo Tamụnọ Ḅe, Ijipt ḅie Izrẹl-a tomonima ọkị pakụmaḅoḅọ ḅe.

¹⁵Anịnakaraka, ini ị̀ ḅụ ye karịfịḅịa ḍumo Tamụnọ ḅara ḅụ, anị àrị ọgọnọju ḅụ Izrẹl-a tomonima ọkị pakụmaḅoḅịa sịkị pịkị ísí-a sẹma ḅie, anị àrị ini galagalama sẹịn nyọma. Àrị ini pịkịmaḅo inia sẹ mị ḅie chuḅịa, anị à se inia ḅieju-aḍapụma pịrị ama mị. Ị̀rị̀, Nyanaḅọ Ḅe, ọkwẹịnmẹ.”

¹⁶Nyanaḅọ Ḅe nwọ ḅẹmẹ, “À tọn-a injiḅaapụ fịrịma ḅoaḅẹ ini ḅo mịna tomonima kun. Anịsịkị à tọn-a piride apụ fịrịma ḅoaḅẹ ini ḅo tụndụma ọgọnọ na chịngịma ọgọnọ na ḍụparịma ḅụ sime pokolo ma ḅie na ini depakụmaḅịa.

¹⁷Ini mịẹarịye goyegoye àrị ọrịmẹ. Ị̀ ḅụ ḅọịye ofori-ẹ; ini mịẹ siaye ma ị̀ tọrụ gbarịkẹ.

¹⁸Àrị ini mịẹḅịa ini mama kiri ḅe gbẹịnye nwọse ini mịẹarị sima na sitịḅị ma na gbẹịn, anịatịḅị ini fị oju kịkẹ ịnyọ nyanaka oru ma, se ị̀ya ama mị pụlamasam; se inia iruo-a oru ma se ama mị ḅeinmasam.”

¹⁹Nyanaḅọ, ị́rị́ anị ị̀ ḍikiḍiki se ịnyọ se ị̀ pịrịḅọ ḅe-ẹ; tọrụsiọrị sịkị ị́ ḅarachụa ị̀ pịrịmẹ. Sẹ sẹ tomonikiri mị ḅe-ịkọlị-ịkọlị ḅụ ị́ damaḅoḅịa se nwọ ḅẹḅịa, “Mịna ḅieju-aḍapụma nyanaye ofori-ẹ. Iruo-a oru ma sikima, ini nyanaye ofori-ẹ, sọye ḅụ oforika oru ma sikima.

²⁰Tomoniḅọ ineda nụḅọ oru tẹmẹḅe? Ẹn-ẹn, ò nemikase tẹmẹmẹ nwọ ḅẹḅẹ, àrị jokoma oru sọ ẹkẹ.”

²¹“Anịọkụma,” Nyanaḅọ Ḅe nwọ ḅẹmẹ, “à gbọtụma sẹma mịẹḅịa àrị ị̀ya kụrọ na ị̀ya ịnyọ na nwọ nemi; ini nemiḅịa na Ị̀rị̀ anị Nyanaḅọ Ḅe-ẹ.”