Read kirikeni Jerimaya 19 Bible Online

Jerimaya 19 - kirikeni bible

Jerimaya 19

¹Nyanaḅọ Ḅe nwọ ḍuko ị̀ pịrịmẹ na à mun ini aḅaịn se tẹmẹ ojongo fẹ. Ọ̀ pịkị nwọse ị̀ ḅẹmẹ na à sẹnịapụ ọkị tomonima ḅie, à pịkị olomu agbamịẹ apụma ḅie dapụ ọkị,

²se Pọtsẹd Onu Ḅọkọ mị ḅie ḅụ ḅọrọ paka Hinọm Pẹsịkiri nyọ mị mun. Anịnyọ anị ò se ị̀ pịrịḅịa oku mị à nwọ ḍuko finjiḅịaye-ẹ.

³Nyanaḅọ Ḅe nwọ ḍuko ị̀ pịrịmẹ na à ḅẹ, “Juda amanyanapụ na Jerusalẹm-a tomoni na, Ị̀rị̀ Kụrọmamgba Nyanaḅọ Ḅe, Izrẹl Tamụnọ Ḅe, nyana se ḍukoḅịaye ma ọ́ nwọ poki. Gbọrị ḅụfụka à nwọse mịanga ḅoḅịa, se anịa ḅụye naaḅọ goyegoye ḅeri teketekeḅịa.

⁴À mịn mị mịẹ-ẹmun-aḅẹ anịatịḅị tomonima ini ị̀ sarakoroma se mịanga mị pụlamasam, anị mịanga ḅụ agbamịẹ jịn-a oru pịrịḅụ, ini na inia ḅieju-aḍapụma na Juda amanyanapụma na ḅụ gbọrịye sọ nemika oru ma. Ini ḅẹrẹnemika tomoni pulo ọsụn mịanga ḅeinmasam,

⁵ini pịkị ẹbẹ nama Beal ḅe pịrịsam mịẹsosịkị ini inia awọma se agbamịẹ ḅụ fịnị ḅie dọkịmaḅịa ọkụ. Jene ma à nwọse yetọn ini pịrịkẹ na ini ọkọ mịẹ; ị̀ kuḅie sọ ma ọkọ tọnkẹ.

⁶Anịsịkị, sịkị mị ḅoḅịa, ini ḅarị Tọfẹt anịkanịka Hinọm Pẹsịkiri nwọse mịnyọ mị chịn ẹkẹ. Anịnakaraka, ini se anị lekiriḅịa ẹrẹ anị Nweni-ḅaa-Pẹsịkiri.

⁷Mịanga anị à Juda na Jerusalẹm na ḅe-a tomonima tọn aye mamgba dachịẹmaḅịaye-ẹ. Àrị ọmụḅaraiḅi se ini na tarakapụma pịrị se ini owu ḅie ini ḅaaḅịa. Àrị inia fị oju akpakpa ma se fenima na piri-a namama na pịrịḅịa fịye ḅaraḅụ.

⁸À se mị opuama mị kanḅịa ḅara mị mịẹso ọkụma, ḅọrọḅọ goyegoye ḅụgbiripu se abakwaḅịa.

⁹Tarakapụ ma opuama mị kelemaḅịa se anịa tomonima ḅaaḅịa. Ama mị gbẹịnmachịẹ mị kụrọso ọkụma, opuama mị ḅie sime apụma jụmḅọ jụmḅọ pẹị pịkị awọma pẹịḅịa.”

¹⁰Anịsịkị Nyanaḅọ Ḅe ḍuko ị̀ pịrịmẹ na àrị ojongo mị ḅaa ị̀rị̀ na mun apụma tọrọkọ

¹¹se ḍuko ini pịrị na Kụrọmamgba Nyanaḅọ Ḅe nwọ ḅẹmẹ, “à mịna tomonima na mị opuama mị na nwọ kanḅịa, se anị mị fị aḅaịn ojongo mị kịkẹḅịa, anị ineda ḅarị gbọrị ḅụ sime ẹka ye mị. Tomoni inia fịapụma ḍipiḅịa Tọfẹt ḅie anịatịḅị ini ḍụẹịn ḍipiḅịa jịn nyọ ofori-ẹ.

¹²À ḅerenimẹ na à mị opuama mị na anịa ḅie anga apụma na mịẹḅịa ini Tọfẹt mị sime ọkụ sime.

¹³Jerusalẹm mị ḅie warịma na Juda amanyanapụ warịma na, pịkị jokoma ochu ma ọgọnọ ini insẹnsị dọkịma lolia ma pịrị warịma na, pịkị ini iru sara pịrị oru mamgba—Tọfẹt mị fịafịaka ọkụ mị àrị fịafịa ẹka ọkụ-ẹ.”

¹⁴Anịsịkị à Tọfẹt mị wẹrịsomẹ, anị Nyanaḅọ Ḅe ị̀ fịrịma na à mun oria oku mị ḍukofinjima nwọ ḅe nyọ mị. À mun Oputẹkẹwarị mị odo mị ḅie chịẹ se oku mị ḍuko tomoni mamgba pịrịmẹ na

¹⁵Kụrọmamgba Nyanaḅọ Ḅe, Izrẹl Tamụnọ Ḅe, ḍukosam, “À fomuḅara se mị opuama mị na anị na kpeki ama mamgba na pịrị-ẹmun-aḅẹ à ḍuko na à mịẹḅịa nwọḅẹ ḅaraḅụ, anịatịḅị ómine ininachịnmẹ, pịkị à ḍuko ọ́ pịrịayema pokikẹ.”