Read kirikeni Jerimaya 20 Bible Online

Jerimaya 20 - kirikeni bible

Jerimaya 20

¹Agbamịẹḅọ Pashọ, Ima tọkụ ḅe, anị Oputẹkẹwarị mị ḅe tịḅịda fịrịnwẹngịḅọ ḅe, ị̀ ḅịpị naamẹ à ma ayema ḍukofinjima àrị sịkị,

²ọ̀ kụrọ pịrịmẹ na ini ị̀ fomu se ikoli se ị̀ ịkasị Bẹnjamin Onu Ḅọkọ nyọ Oputẹkẹwarị mị ḅie.

³Anịḅe eneḅa dedeḅie, Pashọ ḅe ikoli ma ḅie ị̀ sinpakụmaḅo sịkị mị àrị ọ̀ ḅẹye-ẹ, “Nyanaḅọ Ḅe Pashọ ọ̀ nwọse ị́ chịnkẹ. Ò se ị́ pịrịsa ẹrẹ anị, ‘Ḅalafamaḅọ Nyọ mamgba.’

⁴Nyanaḅọ Ḅe na-mịnaḅụ-na, nwọ ḅẹsam, ‘à mun ị́ mịẹ-ẹmun-aḅẹ ị́ ḅalafamaḅọ sọ ị́ ḅụ pịrị, pịkị ị́ya ikiapụ ma na, se ị́ inimgba ọrịḅịa inina-tarakapụ kongo ma ini ḅaaḅụ. À Juda-a tomoni mamgba se Babilọn amanyanaḅọ ḅe kụrọ chuku chuḅịa; ori ikoliapụ ḅara se dapụ ọkịso oria sẹ munḅịa pịkị dapụ se fị ḅụ chuḅịa.

⁵À pịkị mịẹse inina-tarakapụma mị opuama mị ọfọịn se anị nyana yemamgba na ngọma na ọkịmun Juda amanyanapụma ngọ koko-a warịma sọnị, ini pịkị yemamgba dekiso Babilọn munḅịa.

⁶Ị́rị́ ọkụma, Pashọ, ị́rị́ na ị́ furo na ini ó kun se Babilọn munḅịa. Anịju mị ị́ fị se ini ị́ ḍipiḅịaye-ẹ, ị́ya ikiapụ ma na, anị ị́ tọn-a iruo-ịkịankoro pịrị apụma.’”

⁷Nyanaḅọ, ị́ oḅori se ị̀ chịẹmasam, à pịkị oḅori sọmẹ. Ị́ kụrọ ị̀ nẹngịmẹ, ị́ pịkị ị̀ inumasam. Ḅẹḅọ ḅẹḅọ ị̀ se ḍẹrịye mịẹmẹ; ene mamgba ḅụ ini ị̀ kombo mẹ.

⁸Àrị ọkwẹịnḅịa sịkị goyegoye, àrị owu pakụmaḅịa pịkị olokuḅịa, “Ye sima! Kankọsịma!” Nyanaḅọ, ini ị̀ se ịmgbutimẹ se ị̀ mịẹiderimamẹ sịkịmamgba anịatịḅị àrị ị́ya oku mị ḍukopakụmamẹ.

⁹Ọkụma à ḅẹ na, “à Nyanaḅọ Ḅe se ḅieḅaramaḅịa se ḅarị oria ẹrẹ gose ọkwẹịn ẹkẹ,” anịsịkị anị ị́ya oku mị anị fịnị kọrị ọkụ se gbunma ị̀ ḅie kọrịarịye-ẹ. À ḅụkụrọma anị pụnụmẹ, ọkụma à ḅarị ineda anị ọlọ pịkịkẹ.

¹⁰À ḅẹḅọ ḅẹḅọ naamẹ miniminima ọkwẹịn aḅẹ, “Ḅalafamaye nyọ mamgba omi-ẹ! Anịgose ó ye wa ọ̀ ḅụye ḍuko tịḅịnịma pịrị!” Ị̀rị̀ na kpeki ikiapụ ma sọ ị̀ya ḅịkị korumẹ. Ini nwọ ḅẹmẹ; “Sosi wa ineda epele se ò tiḅoḅịa,” “anịsịkị ò kun se ọ̀ ḅara gbẹịn-fịye fịḅịa.”

¹¹Ọkụma ị́rị́, Nyanaḅọ, ị́ kụrọ na, ḅakama ị̀ya anga omi-ẹ, se ḅụọ-se-ị̀-chụarịapụ ma ini ḅịkịḅịa. Ini ḅụgerere nyana gbasoḅịa, anịatịḅị mịẹye-inia-ḅara sọ ẹkẹ. Inia ḅụgerere mị ngịsị nweni anịse ḅieḅarama ẹkẹ.

¹²Ọkụma, Kụrọmamgba Nyanaḅọ, ị́ karakara ḅara se tomoni ḍaḍikiḍikimẹ; inia kuḅie ma na koroma ma na ḅie simeye ma ị́ nemimẹ. Anịgose ye àrị ọrị na ị́ ị̀rị̀na-tarakapụ ma ḅara gbẹịn fịye fịmẹ, anịatịḅị ị̀ya ḅẹrẹ à se ị́ ḅarachụasam.

¹³Nime chu Nyanaḅọ Ḅe boma! Nyanaḅọ Ḅe boma! Ò siye mịẹapụ ma kụrọ ḅie ini pụndapụ ma ḍụaḅọrọmamẹ.

¹⁴Worinime se ini ị̀ yi ene mị pịrị! Ị̀ nyengima ị̀ yi ene mị se ḅieḅarama!

¹⁵Worinime se oriḅọ ḅe pịrị ị̀ ḍaḅe ḅieḅẹlẹma ḅọ ḅe ò ḅo ḅẹrẹ mị ḍuko ọ̀ pịrị sịkị, “Owutọkụ-ẹ! Ị́ owutọkụ nyanasam!”

¹⁶Ye ọ̀ Nyanaḅọ Ḅe ḍikiḅụgerere nyana pịrịka se kan opuamama kịkẹ. Ye ọ̀ ḅụakụ ḅe owu nwọ naa dedeḅie anịsịkị eneogboin ọmụ paịn ḅe oloku na,

¹⁷anịatịḅị ori ị̀ ḅaa tẹrẹrẹ ori ị̀ yikẹ. Anịsịkị ị̀ nyengima arịa yi ịla mị mgbọkụ ị̀ya iḍupu sọsam.

¹⁸Cheye gose ini ị̀ yi? Ḅo tọrụsiọrị na kururu na kẹngẹ nyana gose mọnọ-ọ, ḅo ḅụgerere ḅụ ị̀ya ḍumo pẹlẹ?