Read kirikeni Jerimaya 21 Bible Online

Jerimaya 21 - kirikeni bible

Jerimaya 21

¹Juda Amanyanaḅọ, Zẹdẹkaya ḅe, Pashọ, Malkaya tọkụ ḅe na agbamịẹḅọ, Zẹfanaya, Measaya tọkụ ḅe na, mị yeḅi ḅịpị se ị̀ sẹịnmamẹ:

²“Sisi, ọkwẹịn Nyanaḅọ Ḅe pịrị mịna tịḅị gose, anịatịḅị, Nebukadneza, Babilọn Amanyanaḅọ ḅe na oria ọmụ ogbo mị na, ini opuama mị gbẹịnmachịẹ aḅẹ. Ọbịasi Nyanaḅọ Ḅe ḅo oria gbọrị ḅụbuamaye mịẹ wa pịrịḅịa se Nebukadneza ḅe mịẹse ori ọḅụdaḅịa.”

³Anịsịkị Nyanaḅọ Ḅe ọkwẹịn ị̀ pịrịmẹ na, à ḍuko ini se ị̀ fịrịmapụ ma pịrịye-ẹ

⁴ini mun ḍuko Zẹdẹkaya ḅe pịrị Nyanaḅọ Ḅe, Izrẹl Tamụnọ Ḅe ḍukoye mị, “Zẹdẹkaya, à mun ị́ya ọmụ ogbo mị inumaḅịa anị mun Babilọn amanyanaḅọ ḅe ọmụ ogbo mị na owu sọ mun apụma. Ị́ya owunima owuniaye à koḅiri ama mị ogboku tunduruma koromaḅịa.

⁵Àrị ị̀ya ịnyọ, ị̀ya ịganị, ị̀ya ḅụosọ, pịkị yesima ịganị mamgba se ị́rị́ na sọḅịa.

⁶Mị ama ḅie ḍumo simearịapụ mamgba à nwọ ḅaaḅịa; tomonima na namama na, arịmgba ḅalafama obi ḅụ fịḅịa.

⁷Ọkụma, ị́rị́ na ị́ya fịrịtịḅịnị ma na pịkị owu ḅie fịkapụ ma na, ḅuruḅaa ḅie na fịkapụ na, pịkị obi ḅụ fịkapụ ma na, à mịẹḅịa Nebukadneza Amanyanaḅọ ḅe na ómine-na-tarakapụma na ó kun soḅịa, anị ómine ḅaa ḍọkịarịapụ ma. Nebukadneza ḅe ori ó se fị ḅie chuḅịa. Ọ̀ ḅarasin pịrị, anịkanịka ḍikiḅụgerere nyana pịrị, anịkanịka ḍikitịḅịfoin nyana pịrịḅịa gbọrịḅọ sọ ofori-ẹ. Ị̀rị̀, Nyanaḅọ Ḅe, ọkọ ḅẹmẹ.”

⁸Anịsịkị, Nyanaḅọ Ḅe, ḍuko ị̀ pịrịmẹ na, à ḍuko tomonima pịrịye-ẹ, “Ó poki! Ị̀rị̀, Nyanaḅọ Ḅe, se ọ́ pịrị aḅẹ na, ọ́ pamun fịḅie chuḅịa ateli ma na ḍumo ḅie chuḅịa ateli ma na ọ́ nwọ sẹlẹ.

⁹Opuama mị ḅie simeḅọ goyegoye, nụḅọ owu ḅie anịkanịka ḅuruḅaa ḅie, anịkanịka obi ḅụ ḅọrọ se fịḅịa. Ọkụma pakamun se nyana ḅereni Babilọn apụma pịrịḅọ goyegoye opuama mị gbẹịnmachịẹ-arị-apụ ma, ini nụḅọ ḅaa ẹkẹ; nụḅọ ḍumo ḅụ soḅịa.

¹⁰Àrị ị̀ kuḅie mịẹkụrọmasam siḅụ ḅarasin mị opuama mị pịrịka ḅụ, ọkụma ori anị kanḅịa. Àrị anị saḅaḅọrọma Babilọn Amanyanaḅọ ḅe pịrịḅịa, se ori anị dọkịma kiri lamaḅịa. Ị̀rị̀, Nyanaḅọ Ḅe, ọkọ ḅẹmẹ.”

¹¹Nyanaḅọ Ḅe nwọ ḍuko ị̀ pịrịmẹ, à mịn oku mị ḍuko Juda amanyana warị mị pịrị, anị Devid furo apụma: “Ó poki, Ị̀rị̀, Nyanaḅọ Ḅe, ḍukoarịye mị. Ọ́ ḍọkịḅo ọrị na ene ḅene-ḅene karakara ḅẹrẹ ọ́ nwọ kọnmẹ. Ini inuma arịḅọ ḅe ḍụa ori inuma arịḅọ ḅe ḅaraḅie. Ị́ nemikase ọkọ yekẹ nwọ ḅẹḅẹ, ị́ mịẹarị siye mị ị̀ya ịganị mị mịẹḅịa anị ini ineda binma ẹka fịnị kọrị ọkụ kọrịḅịa.

¹³Ị́rị́, Jerusalẹm, pẹsị nyọma ọgọnọju ḅụ ị́ sime waraḅẹ, eleogbo chịẹpaka ḍụparị sime ọkụ. Ọkụma àrị ị́rị́ na owu sọḅịa. Ị́rị́ ọkọ ḅẹmẹ na gbọrịḅọ sọ ineda ị́ dapaka ẹkẹ, anịkanịka ị́ya ogbokiaye ma kantolu ẹkẹ.

¹⁴Ọkụma à fomuḅara se ị́ pịrịḅịa ị́ya sima gose. À fịnị se ị́ya amanyanaḅọ odo ḅụ chụa, se anị fịnị mị anị kelemaye goyegoye nwọ dọkịma saraḅịa. Ị̀rị̀, Nyanaḅọ Ḅe, ọkọ ḅẹmẹ.”