Read kirikeni Jerimaya 22 Bible Online

Jerimaya 22 - kirikeni bible

Jerimaya 22

¹Nyanaḅọ Ḅe nwọse ị̀ ḅẹmẹ na à so Juda amanyanaḅọ odo mị mun, anị Devid furo ḅọ ḅe, se anịnyọ ḍuko amanyanaḅọ ḅe na oria fịrịtịḅịnị ma na, Jerusalẹm-a tomonima na pịrị, na Nyanaḅọ Ḅe ḍukoye ini nwọ poki.

³“Ị̀rị̀, Nyanaḅọ Ḅe, tọn ọ́ pịrịmẹ na ọ́ karakara pịkị mịẹgbẹịnye nwọ mịẹ. Ini inumarịḅọ ḅe ḍụa ori inumarịḅọ ḅe ḅara ḅie. Siḅara se igoniapụ na anga ma, anịkanịka ini pụndama; nyengiḅọ na ḍaḅọ na koroma fịsa awọ, anịkanịka deapụ fịsa eremeni nwọ pụndama; se pịkị ḅẹrẹtịḅị nemika apụ ḅaama mị osiḅụ sime nyọ mị ḅụ.

⁴Ó nemikase kọkọma à tọn ḅara mị mịẹ ọkụma, anịọkụma Devid furo ḅie apụma anị amanyanapụ sọmamunḅịaye-ẹ. Pịkị ini na inia fịrịtịḅịnị ma na, inia tomonima na, anị mị amanyanaḅọ odo onu ḅọkọ ma ḅie owuni kporokporoma na asụnma na, ọgọnọ ḅọrọḅịaye-ẹ.

⁵Ọkụma ó nemikase ị̀ ḅịpị pokika se à tọn ayema mịẹka ọkụma, à ye karị ọ́ pịrịaḅẹ na mị amanyanaḅọ odo mị, anị ḅịkị kọsịḅịa. Ị̀rị̀, Nyanaḅọ Ḅe, ọkọ ḅẹmẹ.”

⁶“Ị̀ ḅụḅụ, Juda amanyanaḅọ odo mị na kịkịna nyọ anị Giledị ama mị na Lẹbanọn Tụndụ ma na-ẹ; ọkụma àrị anị mịẹse anị ḅo kpọngọlọma simeḅịa, gbọrịḅọ sọ angaka nyọ ḅara.

⁷Anị kanḅịa owuapụ à nwọse sẹịn aḅẹ. Inimgba inia apala ma se ḅoḅịa, se anịa iḅi awụ chịnma pẹlẹ fịnị ḅie gbinḅịa.

⁸“Anị ḅọrọso tọn-a igoniapụ anịnyọ ḅọrọḅịa se jụmḅọ jụmḅọ gbelaḅịa, cheye gose Ị̀rị̀, Nyanaḅọ Ḅe nwọ sime ḅara se mị opuama mị mịẹ.

⁹Anịsịkị, ini pẹkẹrẹḅịa, anịatịḅị Ị̀rị̀ ọ́mịna Tamụnọ Ḅe ómine na fị ọḅọkụ mị ọ́ nwọ sarakoromasam, se jịn-a oru tẹkẹ, pịkị tịḅịtu àrị pịrịsam.”

¹⁰Juda-a tomoni, Amanyanaḅọ Josaya ḅe gose ómine owuma; ọ́ ḍụẹịn ḍin ọ̀ pịrịma oria fị gose. Ọkụma ómine iḅiọkụma owu, oria tọkụ, Joahaz ḅe gose; ini ori ọkị soaḅẹ, ọ̀ ḅarị jenejene pịkịmaḅo ẹkẹ, ḅarị jene se ini ò yi ama mị ọrị ẹkẹ.

¹¹Nyanaḅọ Ḅe, Josaya tọkụ, Joahaz, anị Juda ḅie ḍawu amanyanakiri ọkịḅo ḅọ ḅe ḅụ, nwọ ḅẹmẹ, “Ọ̀ mịanga wẹrịso se sosam, jenejene ọ̀ ḅarị pịkịmaḅo ẹkẹ.

¹²Ò sime se fịḅịa sẹ ḅie ini ori ọkị nwọ munsam, ọ̀ ḅarị mị ama mị ọrị ẹkẹ.”

¹³Fịfa sime ori owuḅọ ḅe pịrịmẹ nwọ karakaraka ḅọkọ ḅụ oria warị namaḅọ ḅe; se pịkị furu ḅọkọ ḅụ anị mịẹ ḍụḅamaḅọ ḅe,; ori oria amapụ ma mịẹse ini papa inia sịkị fama fịrịnwẹngị mẹ, gbẹịnye oforika ḅara ḅụ.

¹⁴Fịfa sime ori owuḅọ ḅe pịrị anị nwọ ḅẹ na, “àrị opuma ḍụḅa warị nama ị̀ ḅụ pịrịḅịa, ḅakama ḅelema ḅie nyana nyọ ọgọnọju ḅụ.” Anịḅụ ò ḅo awụ chịn se pẹlẹḅọkọ ma chụa, se pulo-pulo agba se anị tan.

¹⁵Anị mị mịẹse ị́ iḅitẹịn amanyanaḅọ sọḅe ị́ nemikase awụ chịn se ị́ya warịma nama iḅimatẹịn ísíapụma yema nẹngị ọkụma? Ị́ ḍaḅe, ò ḅeinma ḅieḅẹlẹ ḍumo kọnmẹ. Sịkịmamgba ọ̀ karakara pịkị jụmḅọ inumakẹ, ò deki mịẹye goyegoye, ḅịrị ọ̀ pịrịmẹ.

¹⁶Igweinḅọ ḅe ori iḅi ḅẹrẹkọn ọ̀ pịrịmẹ, se ye mamgba pịkị iḅi ọ̀ pịrịmẹ. Anị Nyanaḅọ Ḅe nemi mị fiearịye-ẹ.

¹⁷Ọkụma ị́rị́, ị́ ḅụ iḅi ngẹrị mị ị́ ḍikiarịye-ẹ; ḅẹrẹnemikapụma ḅaa se kụrọ ḅara se ị́ya tomonima pụndamẹ. Nyanaḅọ Ḅe, ọkọ ḅẹmẹ.

¹⁸Anịọkụma, Nyanaḅọ Ḅe Josaya tọkụ Jẹhoịakim, Juda amanyanaḅọ ḅe ḅụ nwọ ḍukomẹ, “Gbọrịḅọ sọ oria ḍụẹịn ḍinma anịkanịka nwọ ḅẹ, ‘Mị che ḅalafamaye, inikio mị che ḅalafamaye!’ Gbọrịḅọ sọ ori owuma anịkanịka kururu ọ̀ pịrịma, pịkị ḅe ma ‘Ị̀ nyanaḅọ! Ị̀ya amanyanaḅọ!’

¹⁹Yepụra asụn ḍipi ọkụ ini ọ̀ fọnọ soḅịa se ò se mun nụngọ gbin wokumaḅịa, Jerusalẹm onu ḅọkọ ma ḅie tolupaka.”

²⁰Jerusalẹm-a tomoni ó so Lẹbanọn mun se oloku, ó Bashan ama mị mun se owu; Moab tụndụma ọgọnọ ómine ini chịn pakụma, anịatịḅị ọ́mịna ḅụ sọ apụ mamgba ọmụ inia ḅara sisam.

²¹Nyanaḅọ Ḅe ọkwẹịn ọ́ pịrịmẹ ye ómine na lọkọlọkọ sịkị, ọkụma ó poki ḍụkụkẹ. Anị ọ́mịna ḍumomgba ḅụ ọ́ mịẹaye-ẹ; ngịsị ọ́ Nyanaḅọ Ḅe ḅịpị poki ḍọkịkẹ.

²²Ọ́mịna ḅie tịḅịda apụma fọrụ ini ofurosinḅịa, ọ́ ḅụsọ apụma ini nwọ kun soḅịa owuni ikoli apụ ḅara; ọ́mịna opuama mị osi nyanaka ḅụ anị ḅụgerere ḅie sọḅịa, anị ọ́ mịẹsa siaye mamgba gose.

²³Lẹbanọn ini ọkịḅo awụ chịnma ḅie ó deinma sime waraḅẹ; ọkụma nde tomoni ó ḍikitịḅịfoin laḅịa ọkụ ḅụfụka ḅo ọ́ laḅịa sịkị, anị yiḅịa eremeniḅọ ḅụakụ kịkẹ ḅara.

²⁴Nyanaḅọ Ḅe nwọse Amanyanaḅọ Jẹhoịakin, Juda Amanyanaḅọ, Jẹhoịakim tọkụ ḅe, ḅẹmẹ, “Ị̀rị̀ ḍumo sime Tamụnọ Ḅe-ẹ nwọḅẹ sịkị goyegoye, ị́ ị̀ya amaḅara tụmgbalịḅụ sime elekima iringi nwọsọ sọ, àrị ị́ pọkọsinḅịa

²⁵se ị́ ọkị ị́ ḍikiḅalafa tomonima pịrịḅịa, anị ị́ ḅaa ḍọkịarị tomonima. Àrị ị́ se Babilọn Amanyanaḅọ Nebukadneza ḅe na oria owunima na pịrịḅịa.

²⁶Àrị ị́rị́ na ị́ nyengima na mịẹse ini kụrọḅara se ḅo ó kun soḅịa. Ó munḅịa sẹ anị ọ́mịna ḅụ gbọrịḅọ sọ ini nwọ yika nyọ; anịanga anị ómine mamapụ mamgba sime fịḅịaye-ẹ.

²⁷Mịn sẹ mị ọrị mị pịkị ọ́ tarịḅịa, ọkụma ọ́ ḅarị pịkịmaḅo ẹkẹ.”

²⁸À nwọḅẹmẹ, “Amanyanaḅọ Jẹhoịakin ḅe, fị se ini ḅarị-ọkịkaḅụ-wokuma ojongo ò ḅo nwọ kịkẹsa? Anị ini gose ori na oria awọma na kun so ma ini nemika ama mị munye?”

²⁹Yei kiri, kiri, kiri! Nyanaḅọ Ḅe ḍukoye poki:

³⁰“Ḅeḅọ ḅe ini oria awọma famaḅịa ḅẹrẹsi kọn ọ̀ pịrịsam, ḅo ngịsị ye-iḅi-pịrị-ẹkaḅọ nwọ sọḅịa. Oria furo ḅie ḅọ se Devid kiri mị ọkị se Juda daḅịa ḅọ ọ̀ nyana ẹkẹ. Ị̀rị̀, Nyanaḅọ Ḅe ọkọ ḅẹmẹ.”