Read kirikeni Jerimaya 23 Bible Online

Jerimaya 23 - kirikeni bible

Jerimaya 23

¹Ndende sime ḅalafama ḅara ḅẹrẹpẹlẹḅịpị Nyanaḅọ Ḅe nwọse ini ḅẹrẹtọn apụma tịḅị gbanaḅe, anị oria tomonima ḅaa, pịkị ini galagalamapụ ma!

²Mịn anị Nyanaḅọ, Izrẹl Tamụnọ Ḅe, ini-tọrụ-se-ḍiki, oria tomonima ḍikiḍiki nwọ ḅẹ ḅẹrẹtọn apụma ḅụ, ḍukoaye-ẹ: “Ma ọ́ tọrụ se ị̀ya tomonima ḅụ wẹrịkẹ, ómine ini galagalama se ini desinsam. Mịọkụ à fomuḅara se ọ́ pịrịḅịa ọ́ mịẹsa siye mị gose.

³Àrị ị̀ya kọn-a tomonima koḅiriḅoḅịa anị àrị ini galagalama mun chu amama ḅie, se ini pịkịna inia amakiri ḅoḅịa. Ini tọn-a awọ nwọ nyanaḅịa, se inia kịẹnḅịpị iwoḅịa.

⁴À ḅẹrẹtọn apụ tọnḅịa ini ḍikiḍikiḅịapụ. Ị̀ya tomonima ini ḅarị ḅalafa nyana ẹkẹ, anịkanịka ye inia ḅalafama ẹkẹ, à pịkị ḅarị fomuḅara se ini pịrị ẹkẹ. Ị̀rị̀, Nyanaḅọ Ḅe ọkọ ḅẹmẹ.”

⁵Nyanaḅọ Ḅe nwọ ḅẹmẹ, “À Devid furo ḅie karakaraye mịẹḅịa amanyanaḅọ sẹlẹḅịa sịkị ḅoaḅẹ. Ori amanyanaḅọ ḅe, ò nemi ḅụ karakara na mịẹgbẹịn ḅara na nwọse bebe sẹ mị ḍikiḍikiḅịa.

⁶Ori amadaḅịa sịkị, Juda tomonima ini ḍụaḅọrọma nyanaḅịa, pịkị Izrẹlapụma ini deinma ḅụ angaḅịa. Ini se ọ̀ chịnḅịa ye anị ‘Nyanaḅọ Mịna Ḍụaḅọrọmaḅọ.’

⁷“Sịkị mị ḅoaḅẹ,” Nyanaḅọ Ḅe nwọ ḅẹmẹ, “tomoni ḅarị ḍumo Tamụnọ ḅaraḅụ ị̀ karịfị ẹkẹ, Ijipt ama ḅie Izrẹl-a tomonima ḍụapakụmaḅọ ḅe.

⁸Anịnakaraka, ini ị̀ karịfịḅịa ḍumo Tamụnọ ḅaraḅụ, anị Izrẹl-a tomonima ọkịpakụmaḅoḅọ ḅe, ọgọnọju amama ḅie àrị ini galagalama sẹịn amama ḅie na. Anịsịkị mị ini inia amama ḅie angaḅịaye-ẹ.”

⁹Ị̀ kuḅie kọsịmẹ, à pịkị geregereaḅẹ. Nyanaḅọ Ḅe tịḅị gose, Nyanaḅọ Ḅe oria osiḅụ sime ọkwẹịn ma gose, àrị iru-ḅu-tọrụḅamaḅọ kịkẹmẹ, opuma iru-ḅu-tọrụḅamaḅọ.

¹⁰Ama mị ḅie kuḅie se Nyanaḅọ Ḅe ḅụgbanakapụ ḅeinmẹ; ini sitịḅịnyana ḍumo kọnmẹ pịkị inia kụrọ se fịrịnwẹngị irimamẹ. Nyanaḅọ Ḅe oria worinime gose ama mị kururumẹ se osuein mamgba samịnamẹ.

¹¹Nyanaḅọ Ḅe nwọ ḅẹmẹ, “Ịkịankoroapụma na agbamịẹapụma na ini Tamụnọ nemikẹ; àrị ini kunsam ini Oputẹkẹwarị ḅie siaye mịẹarị ogbo.

¹²Ini ḅọrọarị ateli ma sịnịnị-sịnịnịḅịa pịkị kanakanaḅịa; àrị ini mịẹḅịa inia ḅụọ tọmbụlọ se ini ḅịkịḅịa. À ḅụfụka ọkịḅo ini pụnụma-ẹmuaḅẹ; inia fomuḅara ini laḅịa sịkị ḅoaḅẹ. Ị̀rị̀, Nyanaḅọ Ḅe, ọkọ ḅẹmẹ.

¹³Sameria ịkịankoroapụma inia sima àrị ọrịsam; ini Beal ḅe ẹrẹ ḅụ yeḍuko se ị̀ya tomonima dairimasam.

¹⁴Ọkụma à pịkị Jerusalẹm ḅie sime ịkịankoroapụma ọrịsam sitẹịnye nwọ mịẹ ḅụ: ini sẹfị pịkị iruo kọnmẹ; ini ḅarachụa siye mịẹapụ pịrịye gose, tomoni ḅarị siyemịẹ ḅụ dachịẹkẹ. Ị̀ ḅụ, inimgba ini Sọdọm na Gomọra na kịkẹmẹ siyemịẹ ḅụ.

¹⁵“Anịẹrẹchị, mịn Ị̀rị̀, Kụrọmamgba Nyanaḅọ Ḅe, ḍukoye-ẹ, Jerusalẹm ịkịankoroapụma ḅụ: Àrị akụ ịnyanya se ini pịrịḅịa ini fị, pịkị nweniḅa ḍiri se ini pịrịḅịa ini ḅu, anịatịḅị ịkịankoroapụma ḅụḅụ Tamụnọ osika ama mị mgba kelema sam.”

¹⁶Kụrọmamgba Nyanaḅọ Ḅe nwọse Jerusalẹm-a tomonima ḅẹmẹ, “Ịkịankoroapụma ini ḍukoaye ma ó pokima; ini iruo kọn ọ́mịna kuḅie ma kụrọma aḅẹ. Inia kuḅie koromaye anị ini ḍuko ọ́ pịrịarịye-ẹ; Ị̀rị̀ ḍukoyekẹ.

¹⁷À ḍukoaye ma pokika apụma kuḅie ini nwọ kụrọma se nwọ ḅẹaḅẹ na yemamgba ini na iḅiḅara munḅịa. Ini pịkị ḍuko ininachịnḅọ goyegoye pịrịmẹ na gbọrị ḅụfụka sọ ọ́ la-ẹkẹ.”

¹⁸À nwọ ḅẹmẹ, “Mịna ịkịankoroapụma ḅụ gbọrịḅọ sọ Nyanaḅọ Ḅe ḅọị-a koroma ma nemikẹ. Inia ḅụ gbọrịḅọ sọ ma oria oku mị naa, anịkanịka anị kaịnḅokẹ, anịkanịka anị poki, anịkanịka tọrụ pịkị ò ḍukoye mị dakẹ.

¹⁹Oria ịganị mị anị irisi-ẹ, sitịḅịnyanapụma tịḅị ọgọnọ fieḅọrọḅịa kụrọ fọrụ-ẹ,

²⁰anị pịkị kuluma ẹkẹ ọkịmun ọ̀ tọn se ọ̀ mịẹḅịaye ma ọ̀ nwọ yesoka simeogbo. Tọrọkọju ḅoḅịa enema ḅie mị oria tomonima ḅelema mịn mị kaịnḅoḅịaye-ẹ.”

²¹Nyanaḅọ Ḅe nwọ ḅẹmẹ, “Ị̀rị̀ mịna ịkịankoroapụma fịrịmakẹ, ọkụma anịsọ ini munmẹ. À gbọrị oku sọ se ini pịrịkẹ, ọkụma anịsọ ini ị̀ya ẹrẹḅụ ọkwẹịnmẹ.

²²Ini nemikase ị̀ya ḅọị-a koroma ma lekiri ọkụma, mgbọkụ ini ị̀ya oku mị ḍuko ḅelema ị̀ya tomonima pịrịsam, se ini inia ḍumo ḅụ, inia siamịẹmịẹye ma na sitịḅị ma na ḅụ ḅarasinsam.

²³“Ị̀rị̀ anị nyọ mamgba ḅụ sime Tamụnọ-ẹ, à gbọrị nyọ kẹngẹ ḅụ simesimekẹ.

²⁴Gbọrịḅọ sọ ofori-ẹ ọ̀ ḅọị sime se àrị ori ọrịka nyọ. Ị́ nemika na nyọ mamgba ḅụ àrị omi-ẹ, so mị ḅie na tomonikiri mị ḅie na?

²⁵Anị ịkịankoroapụma ḍukoaye ma à nemimẹ, anị ị̀ya ẹrẹ se iruoaye ḍukoma ḅọrọarịapụ ma, na ḍawọju àrị ị̀ya oku se ini fịrịmamẹ.

²⁶Anị ịkịankoroapụma ini tẹmẹḅọ iruo ma se ị̀ya tomonima dairima mun nde sịkị laḅe?

²⁷Ini nwọ chịnmẹ na ini ḍukoarị ḍawọ ma ineda ị̀ya tomonima mịẹse ini ị̀ se ḅieḅaramaḅịa, anị inia ḍapụma ị̀ se ḅieḅarama se Beal ḅe daọkị-ọkụ-mị.

²⁸Ḍawọ kọn ịkịankoroḅọ ḅe ò ḅereni ọkị na papa ḍawọ mị ọ̀ kọnye-ẹ, ọkụma ị̀ya oku naa ịkịankoroḅọ ḅe, ori ị̀ya oku mị ḍuko wasamaḅịa kuḅie se ḅụgbana ḅaraḅụ. Osirosiroḅa se ịpịamgba mgbọlụma na otoma mị che iḅi mịẹ ḅe?

²⁹Ị̀ya oku mị anị fịnị na ineda ḍụparị na ḅaa kọsịmaḅịa amana na kịkẹmẹ.

³⁰Jụmḅọ jụmḅọ ḅịpị ọkwẹịn ọkịse ḅẹ na, ị̀ ḅara ḅomẹ nwọḅẹye ḍukowasamarị ịkịankoroapụma àrị ini na tụḅụrụmẹ.

³¹À pịkịna inia ịkịankoroapụma na tụḅụrụmẹ nwọ inia kuḅie tọn ayema ḍuko se ḅẹmẹ na ị̀ ḅara ḅomẹ nwọḅẹ apụma.

³²Ị̀rị̀ Nyanaḅọ Ḅe ḍukoarịye mị poki! Àrị inia ịkịankoroapụma na tụḅụrụmẹ, nwọ inia ḍawọ ma se ḅakama iruokọn-arị-apụ ma. Ini mịna ḍawọ ma ḍuko se ị̀ya tomonima dairimamẹ inia iruo ma na inia ḅụboma ma na ḅụ. Àrị ini fịrịmakẹ, anịkanịka tọn ini pịrịkẹ na ini mun, ini pịkị ḅarachụa tomonima pịrịarị ẹmbẹ ngịsị ofori-ẹ. Ị̀rị̀, Nyanaḅọ Ḅe ọkọ ḅẹmẹ.”

³³Nyanaḅọ Ḅe nwọse ị̀ ḅẹmẹ, “Jerimaya, ị̀ya tomonima ḅie gbọrịḅọ, anịkanịka ịkịankoroḅọ, anịkanịka agbamịẹḅọ ị́ gbela na, ‘Nyanaḅọ Ḅe oku mị che oku?’ Ị́ ḍuko ọ̀ pịrịḅịa, ‘Ị́ ikuye sọ Nyanaḅọ Ḅe pịrịmẹ, ọ̀ pịkị ị́ dalasin-ẹmun-aḅẹ.’

³⁴Nemikase ị̀ya tomonima ḅie gbọrịḅọ, anịkanịka ịkịankoroḅọ, anịkanịka agbamịẹḅọ, ọkwẹịn na ‘Nyanaḅọ Ḅe ikuye,’ nwọ ḅẹḅọ, à fomuḅara se oriḅọ ḅe na oria furo na pịrịḅịa.

³⁵Anịnakaraka, ọrụḅọḅọ nụḅọ ikiapụ na mịnapụ na gbela, ‘Che pẹkẹrẹḅịpị Nyanaḅọ Ḅe ọ̀ nwọ pịrịsa? Cheye, Nyanaḅọ Ḅe ọ̀ nwọ ḅẹsa?’

³⁶Anịḅụ ini ḅarị anị ọkwẹịn mị kọn ẹkẹ na ‘Nyanaḅọ Ḅe ikuye,’ anịatịḅị, nemikase anị ọkwẹịn kọnḅọ simesime, à jokoma ị̀ya oku mị mịẹ ikuma nụḅọ pịrịḅịa. Tomonima ini inia Tamụnọ Ḅe ọkwẹịn ma pịkị-iḅosam, ḍumo Tamụnọ Ḅe, Kụrọmamgba Nyanaḅọ Ḅe.

³⁷Jerimaya, ịkịankoroapụma gbela, ‘Che pẹkẹrẹḅịpị Nyanaḅọ Ḅe, ọ̀ nwọse ọ́ pịrị? Nyanaḅọ Ḅe, ò che ḅẹ?’

³⁸Se, ini nemikase ị̀ ḅịpị pokikẹ se anị ọkwẹịn mị, ‘Nyanaḅọ Ḅe ikuye,’ anịọkụma ḍuko ini pịrị na

³⁹àrị ini sẹlẹ se gelema ị̀ ḅụ ḍarịma gbinḅịa, ini na, à se inia-ḅieju-aḍapụ ma pịrị opuama mị na.

⁴⁰À kuluma nyanaka ḅụgerere ọkịḅo inia ọgọnọ gbanaḅịa, nweni ineda se ḅieḅaramakaye.”