Read kirikeni Jerimaya 24 Bible Online

Jerimaya 24 - kirikeni bible

Jerimaya 24

¹Nyanaḅọ Ḅe ini se Oputẹkẹwarị mị tọrọkọ koroma mama figi chịnmgbọlụ kana se ị̀ ḍiemẹ. (Mịn mị paka sịkị anị Babilọn Amanyanaḅọ, Nebukadneza ḅe, Jẹhoịakim tọkụ Jẹhoịakin, Juda Amanyanaḅọ ḅe, ikoli ḅaraḅụ, Jerusalẹm ḅie ori na Juda tịḅịnịma na ḅarafịrịnwẹngịapụ ma na, jokoma fịrịnwẹngịapụma na, ọkị se so Babilọn mun ḅọrọso sịkị mị-ẹ.)

²Tatarị kana ḅie sime-a chịnmgbọlụma anị iḅiaye ma-ẹ, anị ḅọlọka ḅụ ḅịa-arịye ma-ẹ; ísíye ḅie sime ayema anị opuma siaye ma-ẹ, fị gbẹịnkaye ma-ẹ.

³Anị, Nyanaḅọ Ḅe ị̀ ḅẹye-ẹ, “Jerimaya, ị́ che ọrị?” Àrị ọ̀ pẹkẹrẹmẹ, “Figi chịnmgbọlụ-ẹ. Iḅiaye ma àrị opuma iḅimẹ, siaye ma àrị opuma sime, ngịsị fị gbẹịnkẹ.”

⁴Anịḅụ Nyanaḅọ Ḅe nwọse ị̀ ḅẹmẹ,

⁵“Ị̀rị̀, Nyanaḅọ, Izrẹl Tamụnọ Ḅe, koromamẹ na ini ọkịso Babilọn mun apụma iḅi figi chịnmgbọlụma kịkẹye-ẹ, à pịkịna iḅitọrụ se ini ḍikiḅịa.

⁶Àrị iḅitọrụ se inia ḅụ wẹrịḅịa, se ini pịkịmaḅo mị ama mị laḅịa. Àrị ini namachịẹmaḅịa, àrị ini kankoroma-ẹkẹ; àrị ini ḍipiḅịa, àrị ini wọrọsin-ẹkẹ.

⁷À yenemi-kuḅie se ini pịrịḅịa ini se nemi na Ị̀rị̀ anị Nyanaḅọ Ḅe-ẹ. Anịsịkị, ini ị̀ya tomoni sọḅịa se ị̀rị̀ inia Tamụnọ sọḅịa, anịatịḅị ini inia kuḅie mgba se pịkịma ị̀ damaḅoḅịa.

⁸“Juda Amanyanaḅọ, Zẹdẹkaya ḅe na, oria ama-ḍikiḍiki-kụrọ-nyana-ogbo-apụ ma na, kọn Jerusalẹm-a tomonima, anị mị ama mị ḅie sime anịkanịka so Ijipt mun apụma na, Ị̀rị̀, Nyanaḅọ Ḅe, àrị fị gbẹịnka figi chịnmgbọlụma mịẹọkụ nwọse ini mịẹḅịa.

⁹À se ḅo inia ọgọnọ gbanaḅịa ḅụfụka mịẹḅịa bebe sẹkiri mị ḅie sime sẹ mamgba ḅalafaḅịa. Tomoni ini se ḍẹrịye mịẹḅịa, pịkị ini se kpọtiḅịa, se ini inia ẹrẹ mị se ini woriḅịa àrị ini galagalama koroma nyọ goyegoye ḅụ.

¹⁰Àrị ọmụ se ḅoḅịa, ḅuruḅaa na obi na, ọkịmun gbọrịḅọ sọ ḅarị, à se ini na inia ḅieju-aḍapụma na pịrị ama mị ḅie ofori-ẹ ẹka sịkị laḅịa.”