Read kirikeni Jerimaya 25 Bible Online

Jerimaya 25 - kirikeni bible

Jerimaya 25

¹Josaya tọkụ Jẹhoịakim ḅe Juda amanyanaḅọ sọ inein karama kụra ḅie, Nyanaḅọ Ḅe oria oku ḅo ị̀ ḅara lamẹ anị Juda tomonima gbolomaye. (Mịn anị tatarị kụra-ẹ Nebukadneza ḅe Babilọn amanyanaḅọ sọ.)

²À ḍuko Juda na Jerusalẹm na tomoni mamgba pịrịmẹ,

³“Mị ḅe-sitẹrẹ-akụra-fịnjị, Josaya, Amọn tọkụ ḅe, oyitẹrẹ-fịnjị karama kụra ḅie sakị Juda da ọkịḅo mịmgba la, Nyanaḅọ Ḅe, ori ọkwẹịn ị̀ pịrịsam, mà à pịkị ò ḍuko ị̀ pịrịye ḍuko ọ́ pịrịka sịkị ofori-ẹ. Ọkụma ọ́ tọrụ se anị ḍikikẹ.

⁴Ó pokikẹ anịkanịka tọrụ se anị ḍikikẹ, Nyanaḅọ Ḅe pa oria fịrịnwẹngịapụ, ịkịankoroapụma nwọse ọ́ fịrịmaḅẹ nwọḅẹ sọ.

⁵Ini ḍuko ọ́ pịrịmẹ na, ọ́mịna sitịḅị-a mịẹmịẹyema ḍumo ḅụ ọ́ pịkị mịẹso sịkị ómine angama-muḅịa ọkụ Nyanaḅọ Ḅe se gbọtụma ómine na ọ́mịna ḅieju-aḍapụma na pịrị ama mị ḅie.

⁶Ini ḍuko ọ́ pịrịmẹ na ó jịn-a oru tẹkẹma, pịkị Nyanaḅọ Ḅe ịganịmama, anị tịḅịtu ómine tẹmẹ jịn-a oru pịrị ḅụ. Ó nemikase Nyanaḅọ Ḅe ḅịpị poki ọkụma, mgbọkụ ò fomuḅara se ọ́ pịrị ẹkẹ.

⁷Ọkụma Nyanaḅọ Ḅe na mịnaḅụ na nwọ ḅẹmẹ na ómine ò poki ḍụkụkẹ. Anịnakaraka, ọ́mịna orutẹkẹ mị ọ́ nwọse ori ịganịmamẹ, se oria fomuḅara dekiḅo ọ́ tịḅị ọgọnọ gbanasam.

⁸“Anịẹrẹchị, ómine ò poki ḍụkụka ḅụ, Kụrọmamgba Nyanaḅọ Ḅe nwọ ḅẹmẹ,

⁹‘Àrị ọgọnọju sime-a tomoni mamgba, pịkị ị̀ya fịrịnwẹngịḅọ Babilọn Amanyanaḅọ Nebukadneza ḅe na, fịrịmaḅoḅịa. Àrị ini ọkịḅoḅịa ini ḅo Juda na anịa ḅie angapụma na owusọḅịa pịkị anị kelema amama mamgba na. À mịn sẹ mị na anị kelema ama mamgba na, kanḅịa, anị kanḅụ sime gbasoḅịa tẹmẹfama ḅaraḅụ. Ị̀rị̀, Nyanaḅọ Ḅe, ọkwẹịnsam.

¹⁰Ini oloku se ḍorokuarịye ma na pịkị ini ereya-alalị-fị se ḅieḅẹlẹarị oloku ma na, à mịẹse àrị yawụḅịa. Ini ḅarị pulo nyana ẹkẹ inia tọnjie ma ḅie, fịayemgbọlụ ḅarị pịkị sime ẹkẹ.

¹¹Mịn ama mị mgba kansara soḅịa pịkị tẹmẹfamaḅịa, pịkị kpekima anga sẹma kụra tesi oyifịnjị se fịrịnwẹngị Babilọn amanyanaḅọ ḅe pịrịḅịa.

¹²Anị ḅọrọso, à fomuḅara se Babilọn na anịa amanyanaḅọ ḅe na pịrịḅịa inia sima gose. Àrị anị sẹ mị kanḅịa, se anị kansara ḅụ sime gbasoḅịa.

¹³À fomuḅara se Babilọn mị pịrịḅịa, Jerimaya ḅe ḅụ à ḅọrọ ẹrẹma se mị ḍiri mị ḅie gịẹịn ye mị, na ḅọkọḅọkọ ḅụ àrị ísí-a sẹma kanḅịa nwọ ḅẹye mị.

¹⁴Babilọn apụma mịẹye gose à sise ini gbẹịnḅịa pịkị tọn-a sẹ na opu amanyanapụ na omoniapụ ini nwọ sọḅịa.’”

¹⁵Nyanaḅọ Ḅe, Izrẹl Tamụnọ Ḅe, nwọse ị̀ ḅẹmẹ, “Mị iru kọpụ-ẹ, ị̀ya ịganị anịa ḅie ḅein waraḅẹ. Anị ọkị se àrị ị́ fịrịma sẹịn sẹ mamgba mun, se ini mịẹ ini anị ḅu.

¹⁶Ini anị ḅu sịkị ini jiajiaḅịa se kuḅie deinka nyanaḅịa à se ini sẹịnmarị ọmụ mị gose.”

¹⁷Anị à Nyanaḅọ Ḅe ḅara kọpụ mị ọkịye-ẹ, se anị se Nyanaḅọ Ḅe ị̀-se-fịrịmasẹịn-sẹ mamgba mun nwọ pịrịye-ẹ, àrị ini mịẹmẹ ini anị ḅumẹ.

¹⁸Jerusalẹm na Juda ḅie sime ama mamgba na, arịa amanyanapụma na se chụa, tịḅịnịma na, ọ̀ mịẹmẹ ini anị ḅumẹ, mịẹso sịkị ini onwun ele nwọ sọḅịa ọkụ, tẹmẹfama pịkị ḅalafamaye-ẹ, anị pịkị mịẹso sịkị tomoni worinime se inia ẹrẹ ḅụ ini pịrịḅịa—ini pa mịẹarị ọkụ mị.

¹⁹Mịn anị iru mị ḅuḅịa ísíapụ mamgba kịẹnḅịpị mị-ẹ: Ijipt amanyanaḅọ ḅe na, oria fịrịnwẹngịapụma na, tịḅịnịma na; Ijipt apụ mamgba na Ijipt ḅie sime igoniapụ mamgba na; Ọz ḅie sime amanyanapụ mamgba; Filistia opuamama Ashkẹlọn, Gaza, Ẹkrọn na Ashdọd ḅụ kọn nyọ mị ḅe amanyanapụ mamgba; Idọm, Moab, pịkị Amọn-a tomoni mamgba na; Taya na Saịdọn na amanyanapụ mamgba na; Mẹditirenia amama ḅie amanyanapụ mamgba na; Didan na, Tima na, Bọz na, opuamama na; anị inia tịḅị inime ma kịrị iderimapụ mamgba na; Arebia amanyanapụ mamgba na; onwun ele-a sẹma ḅie amanyanapụ mamgba na; Zimraị na Ilam na, Midia na amanyanapụ mamgba na; ọgọnọju ḅọlọnyọ na kpeki nyọ na ḅụ amanyanapụ mamgba na, gbọrịḅọ gbọrịḅọ. Tomonikiri ḅie sime-a sẹ mamgba anị ḅuḅịa. Arịmgba ḅe kuluma, Babilọn amanyanaḅọ ḅe anị ḅuḅịa.

²⁷Anị Nyanaḅọ Ḅe nwọse ị̀ ḅẹye-ẹ, “Ḍuko tomonima pịrị na Ị̀rị̀, kụrọmamgba Nyanaḅọ Ḅe, Izrẹl Tamụnọ Ḅe, tọn ini pịrị aḅẹ na ini ḅu ọkị nweni anị inia tọrụ sọ se ọsụn, ọkị nweni ini ḅịkịkoro se ḅarị ineda sịsẹ ẹkẹ, à se ini sẹịnmarị ọmụ mị tịḅị gose.

²⁸Se ini nemikase ị́ ḅara kọpụ mị ọkị ḍụkụkẹ se anị ḅukẹ nwọ ḅẹḅẹ, anịsịkị ḍuko ini pịrị na Kụrọmamgba Nyanaḅọ Ḅe ḍukosam na ini pa anị ḅu nyanamẹ.

²⁹Àrị ị̀ya yesima fịrị mị sakịḅịa ị̀ya opuama mị ḅie. Ini chịn-ao fomuḅara ini laka ḅaraḅụ ini soḅịa? Ẹn-ẹn, à fomuḅara se ini pịrịḅịa, anịatịḅị àrị ọmụ se tomonikiri sime-a tomoni mamgba sẹịnmaḅịa. Ị̀rị̀, Kụrọmamgba Nyanaḅọ Ḅe, ọkwẹịnsam.

³⁰“Ị́rị́, Jerimaya, à ḍukoarịye mamgba ḍuko wasama. Ị́ ḍuko mịna tomonima pịrị nyanamẹ, ‘Nyanaḅọ Ḅe soḅie ḅụ ori ekereaḅịa soalagba gele so ma ḅie ekereaḅịa. Ori ekerea oria tomonima pịrịḅịa; ọ̀ tụmgbakị elelenda nangarịḅọ oloku ọkụ olokuḅịa. Tomonikiri simeḅọ goyegoye ọ̀ pụkọ naaḅịa,

³¹se anịa fiepụkọ mị wọkọwọkọma fiemun tomonikiri kuluma mị laḅịa. Nyanaḅọ Ḅe ọ̀ sẹma na ḅẹrẹ nyanamẹ. Ò tomoni mamgba ọkị ḅẹrẹchiri ḅoḅịa se sitịḅịnyanapụma se fị ḅie chuḅịa. Nyanaḅọ Ḅe ọkwẹịnsam.’ ”

³²Kụrọmamgba Nyanaḅọ Ḅe nwọ ḅẹmẹ na ḅụfụka sẹ sẹ ḅie ḅoaḅẹ, pịkịna opu irisi tomonikiri mị ịkọlị ma ḅie kpokponimaḅẹ.

³³Anị ene Nyanaḅọ Ḅe ḅaasapụ-ma-oju-akpakpa ma galagalama saraḅịa tomonikiri mị ḅie gbọrị ịkọlị ḅụ ọkịmun jịn ịkọlị laḅịa. Inia ḍụẹịn-ḍinḅịaḅọ ofori-ẹ, pịkị ini ọkịsomun ḍipiḅịaḅọ ofori-ẹ. Kiri ọgọnọ mị ini sarasimeḅịaye-ẹ, saratịḅị ḅụrụye kpelu ọkụ.

³⁴Owu, ómine owuni tịḅịnị, ómine anana-koru-apụ-ḅara se ị̀ya tomonima koruarịapụ ma, ọ́ gagama owupakụma! Ọ́ ḍụẹịn-ḍin pịkị fọn ḅie kpeleki. Sịkị mị ḅosam ini ọ́ ḅaaḅịa sịkị se ajirima kẹnị ḅara ini nwọse ọ́ kẹnịḅịa.

³⁵Ọ́ pịọrụ ḅọrọ soḅịa nyọ ofori-ẹ.

³⁶Ó ḅiefie pịkị owupakụmamẹ kuḅiesi ḅụ, anịatịḅị Nyanaḅọ Ḅe, oria ịganị ḅụ, ori ọ́mịna sẹ mị kọsịmasam se ọ́mịna dein ḅụ sime sẹ mị se tekele pịrịsam.

³⁸Nyanaḅọ Ḅe, ori oria tomonima sarakoromasam, chịrịḅa ḅe oria pokolo ḅie so ọkụ. Owu sịkị ḅalafamaye na Nyanaḅọ Ḅe kụrọ ịganị na sẹ mị pịkịḅo onwun ele mịẹsam.