Read kirikeni Jerimaya 27 Bible Online

Jerimaya 27 - kirikeni bible

Jerimaya 27

¹Josaya tọkụ Zẹdẹkaya ḅe ḅo Juda amanyanaḅọ sọ ma ḅọlọka simeogbo, Nyanaḅọ Ḅe nwọse ị̀ ḅẹmẹ na

²à nama-oju-apụra-ḍiki nwọ ọkị se mgbẹsẹchịn fịna gbọrị kọngọ kpọye mịẹ ị̀ ḅụ pịrị se anị ọkị ị̀ kọngọ kpọ.

³Anị Nyanaḅọ Ḅe ḍuko ị̀ pịrịye-ẹ na Idọm na, Moab na, Amọn na, Taya na, Saịdọn na amanyanapụ amama ḅe ẹrẹ ḅụ chịẹ fịrịnwẹngịapụma se ḅo Zẹdẹkaya, Jerusalẹm amanyanaḅọ ḅe la-ẹḅo-apụ ma ḅụ ḅọrọ oku se ini fịrịma.

⁴Kụrọmamgba Nyanaḅọ Ḅe, Izrẹl Tamụnọ Ḅe, ḍuko ị̀ pịrịmẹ na à tọn ini pịrị ini ḍuko inia amanyanapụma pịrị na Nyanaḅọ Ḅe, ò ḍukosam:

⁵“Ị̀ya opu kụrọ na ịnyọ na ḅụ à sẹkiri mị tẹmẹmẹ, mbuapụ na, tomonikiri ḅie anga nama mamgba na; à pịkị anị se ị̀ ḅụḅẹlẹḅọ-ḅẹlẹḅọ pịrịmẹ.

⁶Ị̀rị̀, anị ma sẹ mamgba se ị̀ya fịrịnwẹngịḅọ Babilọn amanyanaḅọ Nebukadneza ḅe kụrọ chuku ḅie koromaye-ẹ, à pịkị piri-a namama sọnị mịẹsam àrị fịrịnwẹngị ọ̀ pịrị.

⁷Sẹ mamgba fịrịnwẹngị ọ̀ pịrịḅịa, ini pịkị fịrịnwẹngị oria tọkụ na oria tọkụ-tọkụ na pịrịḅịa, ọkịmun oria sẹ mị ḅịkịḅịa sịkị laḅịa. Anịsịkị mị oria sẹ mị fịrịnwẹngị kụrọ sẹ na opu amanyanapụ na pịrịḅịaye-ẹ.

⁸“Ọkụma nemikase chusin oria sẹkẹnị kiri mị pịrịka sẹ anịkanịka amanyanakiri omi-ẹ nwọ ḅẹḅẹ, à fomuḅara se anị sẹ mị pịrịḅịa ọmụ ḅie na ḅuruḅaa ḅie na, obi ḅụ na ọkịmun à ḅereni Nebukadneza ḅe pịrịḅịa na ori anị kanfama.

⁹Ómine ọ́mịna ịkịankoroapụma pokima anịkanịka ḅereni iniaḅụ pịrịapụ ma na ini ineda tọrọkọju pakaḅịaye nwọ ọrị ḍukoḅịa nwọ ḅe apụma, ḍawọ ḅụ anịkanịka fịḅọrọsapụ ma tẹmẹ chịn ḅụ, anịkanịka ḅịrị ḅụ. Ini ḍuko ọ́ pịrịḅịa ọ́ ḅịkị Babilọn amanyanaḅọ ḅe pịrịma.

¹⁰Ini oḅori-se-ọ́ chịẹmaḅẹ se pịkị ọ́ mịẹḅịa ini ọ́mịna sẹ ḅie ómine ọkị so ḅọlọ nyọ munḅịa. Àrị ómine depakụmaḅịa se ini ómine ḅaafamaḅịa.

¹¹Ọkụma nemikase ó chusin Babilọn amanyanaḅọ ḅe pịrị, pịkị fịrịnwẹngị ọ̀ pịrị sẹ omimi, à ḅereni anị sẹ mị pịrịḅịa anị anịa nyọ sime, ozu kọrị, pịkị anga. Ị̀rị̀ Nyanaḅọ Ḅe ḍukosam.”

¹²Àrị anị gbọrịye mị ḍuko Juda Amanyanaḅọ, Zẹdẹkaya ḅe pịrịmẹ, “Ḅịkị Babilọn amanyanaḅọ ḅe pịrị. Fịrịnwẹngị ori na oria tomonima na pịrị, se ị́ ḍumoḅịa.

¹³Cheye gose ị́rị́ na ị́ya tomonima na ọmụ ḅie fịḅe anịkanịka ḅuruḅaa ḅie anịkanịka obi ḅie fịḅe? Anị Nyanaḅọ Ḅe ò ḍukosaye-ẹ, ḅereni se ḅịkị Babilọn amanyanaḅọ ḅe pịrị ḍụkụka sẹ goyegoye ḅụ pakaḅịaye-ẹ.

¹⁴Ḍuko ọ́ pịrị na ọ́ ḅịkị ọ̀ pịrịma ḅe ịkịankoroapụma, ómine ini pokima. Ini oḅori-se-ọ́-chịẹmaḅẹ.

¹⁵Nyanaḅọ Ḅe na mịnaḅụ na, ḅarana ḍukosam na, ori ini fịrịmakẹ, na ini oria ẹrẹ ḅụ iruokọn ọ́ pịrịaḅẹ. Anịgose ori ó depakụmaḅịa, ini ómine ḅaaḅịa, ómine na ma iruo ma kọn ọ́ pịrịarị ịkịankoroapụma na.”

¹⁶Anị à ḍuko agbamịẹapụma na tomonima na pịrịye-ẹ, na Nyanaḅọ Ḅe ò ḍukosam: “Ómine ịkịankoroapụma pokima, anị ḍuko na Oputẹkẹwarị ḅie ḅụ koko sime ngọma ini pịkịna àrị ọkịḅịa ḅọlọka sịkị, Babilọn ḅie. Ini iruo kọn ọ́ pịrịaḅẹ.

¹⁷Ómine ini pokima! Ọ́ ḅịkị Babilọn amanyanaḅọ ḅe pịrị, ọ́ pịkị ḍumoḅịa! Cheye gose mị opuama mị kansara nyọ sọḅe?

¹⁸Nemikase ini kọkọma ịkịankoroapụ-ẹ pịkị nemikase ini ị̀ya fịrịma ḅịpị mị nyanamẹ nwọ ḅẹḅẹ, ye ini ị̀ gbela, Kụrọmamgba Nyanaḅọ Ḅe, na Oputẹkẹwarị ḅie sime ngọma na amanyanaḅọ odo ḅie kọn ngọma na à ḅerenima ini dekiso Babilọn mun.”

¹⁹(Amanyanaḅọ Nebukadneza ḅe Juda amanyanaḅọ Jẹhoịakin, anị Jẹhoịakim tọkụ ḅe, na Juda na Jerusalẹm na tịḅịnịma na ọkịso Babilọn mun sịkị; ogbochịnma na, alapẹlẹka kuku ma na, kporokporo ma na, pịkị Oputẹkẹwarị mị ḅie koko sime da ngọ na ori àrị wẹrịsomẹ.)

²¹“Ị̀rị̀, Kụrọmamgba Nyanaḅọ Ḅe, Izrẹl Tamụnọ Ḅe, Oputẹkẹwarị mị ḅie na Jerusalẹm mị ḅie amanyanaḅọ odo ḅie sime kọn ngọma ḅụ à ḍukoye poki:

²²Ini àrị ọkị Babilọn munḅịa se àrị anịnyọ simeḅịa ọkị nweni à tọrụ pịkị àrị ḍiki sịkị laḅịa. Anịsịkị àrị àrị ọkịḅoḅịa se kpoto àrị kokoḅịa mịanga. Ị̀rị̀, Nyanaḅọ Ḅe ḍukosam.”