Read kirikeni Jerimaya 3 Bible Online

Jerimaya 3 - kirikeni bible

Jerimaya 3

¹Nyanaḅọ Ḅe nwọ ḅẹmẹ, “Nemikase gbọrị owuḅọ ḅarị tarọ ma na simekẹ, se árị ọ̀ wẹrịso se mun jịn owuḅọ na simemẹ nwọ ḅe ọkụma, ọ̀ ḅarị ngịsị árị ọkị sime ẹkẹ. Mịn mị jokoma ama mị pụlamaḅịa. Ọkụma, Izrẹl, ị́ tọn-a lekiriapụ nyana ḅọrọsam, se mịọkụ ị́ ḍọkịaḅẹ ị́ pịkịna ị̀ damaḅo!

²Tọrụ deki chịngịma ọgọnọ ḍiki. Arịa amama ḅie ma ị́ sẹfị mun laka nyọ omi? Ateli akaka ị́ sime lekiriapụ korukorumẹ, Arab ḅọ ateli ḅọkọ ḅụ ọ̀ ḅaaḅịapụ onwun ele ḅie nwọ koru ọkụ. Ị́ya sẹfị mị ị́ se ama mị pụlamasam.

³Anịgose ini enema ọlọchịẹmamẹ, se kiriḅie ideri mengi ma ḅarị sara paka ḅokẹ. Ị́ sẹfị ḅọ kịkẹmẹ, ị́ ḅụgerere nemikẹ.

⁴“Ọkụma mịọkụ ị́ nwọse ị̀ ḅẹmẹ, ‘Ị́rị́ ị̀ ḍa-ẹ, na kalatọkụ ḅụ à sime sịkị ngịsị ị́ ị̀ ḅẹlẹmamẹ.

⁵Sịkịmamgba ị́ ịganị nyana ị̀ pịrị ẹkẹ; ị́ jenejene ḅụḅalaḅala se ị́ ḅụ pịrị ẹkẹ ị̀ gose.’ Izrẹl, anị ị́ ḍukoye-ẹ, ọkụma ị́ ị́ya ịnyọ la-ọkụ se siaye mamgba mịẹmẹ.”

⁶Josaya ḅe amanyana sịkị ḅụ, Nyanaḅọ Ḅe nwọse ị̀ ḅẹmẹ, “Ị́ ọrịsa kuḅie-se-ḅụgbana-gbẹịnka eremeniḅọ, Izrẹl ma mịẹye? Árị ị̀ ḅụḅụ á tọrụsinsam, se chịngịma ọgọnọ ḅụ mgba na, ejema chuku ḅụ na á sẹfịḅọ sọsam.

⁷À nwọ chịnmẹ na á mamgba mịẹso sịkị, á jokoma vinpịkị ị̀ damaḅoḅịa. Ọkụma á pịkịmaḅokẹ, se nụmbụrarọ kuḅie-se-ḅụgbana-gbẹịnka Juda ma, maye mamgba ọrịmẹ.

⁸Juda ma sọ pịkị ọrịmẹ na à ḅarị Izrẹl ma na simekẹ, se á desinsam anịatịḅị árị ị̀ wẹrịso se mun sẹfịḅọ sọsam. Ọkụma Juda, Izrẹl ma árịa eremeni mịnaḅọ, kuḅie-se-ḅụgbana-gbẹịnka ḅọ ma, á ḅalafakẹ. Árị sọ ḅo sẹfịḅọ sọmẹ

⁹pịkị ngịsị ḅụgerere nemikẹ. Árị ama mị pụlamamẹ, pịkị sẹfịmẹ á nwọ ḍụparị na eje na tẹkẹsa sịkị.

¹⁰Maye mamgba ḅọrọso sịkị, Juda, kuḅie-se-ḅụgbana-gbẹịnka eremeni mịnaḅọ ma, epeletima pịkịma ị̀ damaḅomẹ; á kuḅiemgbọlụ mgba se ḅo ka ḅaraḅụ. Ị̀rị̀, Nyanaḅọ Ḅe, ọkọ ḅẹmẹ.”

¹¹Anịeso Nyanaḅọ Ḅe ḍuko ị̀ pịrịmẹ na, Izrẹl ma ọ̀ ḅụḅụ á tọrụsinsam nwọḅẹ sọnị, árị á ḅụ ḍiepakụmamẹ na árị iḅitẹịn kuḅie-se-ḅụgbana-gbẹịnka Juda ma nẹngịmẹ.

¹²Ori ị̀ ḅẹmẹ na à mun Izrẹl ma ḅẹ, “Kuḅie-se-ḅụgbana-gbẹịnka Izrẹl, pịkịma ị̀ damaḅo. À ḍikiḅụgerere nyanamẹ, àrị ịganị ẹkẹ; ngịsị àrị ị́ ḍikiḅieḅu ẹkẹ.

¹³Ị́rị́ pa ḅereni ọkị na ị́ ḅẹrẹ ḅarasi nyanamẹ, ị́ pịkịna kọngọ kụrọma Nyanaḅọ Ḅe pịrịmẹ, ị́ Tamụnọ Ḅe. Si go pakụma na ejema chuku ḅụ ị́ ị́ya ḅẹlẹma se jịn-a oru ma pịrịsam, ị́ ị̀ ḅịpị pokikẹ pịkịna à tọn-aye ma mịẹkẹ. Ị̀rị̀, Nyanaḅọ Ḅe ọkọ ḅẹmẹ.

¹⁴“Kuḅie-se-ḅụgbana-gbẹịnka tomoni, ọ́ pịkịmaḅo; ó sime ị̀ pịrịmẹ. Àrị ọ́mịna ḅie gbọrịḅọ gbọrị ama, pịkịna mamapụ gbọrị sẹ, nwọ ọkịḅịa, se àrị ómine pịkịma Zaịyọn Tụndụ mị ḅoḅịa.

¹⁵À ḅẹrẹtọn apụ se ọ́ pịrịḅịa, anị ị̀ ḅịpị poki apụ, se ini ḅẹrẹtọn ọ́ pịrịḅịa nemi na yekaịnḅo na ḅụ.

¹⁶Anịeso ó ḅo anị ama ḅie kịẹn ḅịpị ḅụ ḅakaḅịa sịkị tomoni ḅarị ị̀ya Ọḅọkụ Igbe mị ḅẹrẹ ḍuko ẹkẹ. Ini ḅarị anị se koroma ḅụ chu ẹkẹ anịkanịka anị se ḅiekoroma ẹkẹ; pịkị ḅarị anị se fịrịḅụ chu ẹkẹ anịkanịka ịwọye mịẹ ẹkẹ.

¹⁷Anị ḅo anị sịkị lasịkị, ini nwọse Jerusalẹm mị chịnḅịa, ‘Nyanaḅọ Ḅe Emine,’ se sẹ mamgba anị nyọ ḅụ ḅo koḅiria se tịḅịtu ị̀ tẹkẹḅịa. Ini ḅarị inia ininachịn si-a kuḅie ma tọn ini pịrị ayema mịẹ ẹkẹ.

¹⁸Izrẹl mị Juda ḅụ sọḅịa, se gboloma ḅụ ini sẹ mị ḅe ọgọnọju, sẹịnso nyọ ḅụ pịkịma soḅoḅịa, se à se ọ́mịna ḅieju-aḍapụma pịrị ama mị, gbọtụma okorona okorona anị ọkị angaḅịa.”

¹⁹Nyanaḅọ Ḅe ọkọ ḅẹmẹ, “Izrẹl, à ḅimẹ àrị ị̀ya tọkụ ḅara se ị́ ọkị se ḍikitọrụgbẹịn amakiri se ị́ pịrị, sẹkiri mgba ḅie iḅitẹịn amakiri. À ḅimẹ ị́ ḍaḅọ se ị̀ chịn se jenejene ḅarị ị̀ ḅụḅụ ị́ tọrụ sin ẹkẹ.

²⁰Ọkụma kuḅie-se-ḅụgbana-gbẹịnka eremeniḅọ sime ọkụ, ị́ kuḅie se ị̀ ḅụ gbanakẹ. Ị̀rị̀, Nyanaḅọ Ḅe, ọkọ ḅẹmẹ.”

²¹Chịngị ma ọgọnọ fieaḅẹ Izrẹl-a tomonima ini-ẹ; ini owuaḅẹ, ini tẹkẹ aḅẹ anịatịḅị ini nwẹngị irima ḍumo kọn mẹ; se Nyanaḅọ inia Tamụnọ Ḅe se ḅieḅaramasam.

²²Ọ́ pịkịmaḅo, ómine Nyanaḅọ Ḅe ḅụ ḅụsikimasapụ mamgba; ori ọ́ gwọḅịa, ọ̀ pịkị ọ́ mịẹḅịa ó kuḅie-se-ḅụgbana-gbẹịn apụ sọḅịa. Ómine ọkọ ḅẹmẹ, “Iin, wa Nyanaḅọ Ḅe damaḅo aḅẹ, anịatịḅị ori anị mịna Tamụnọ-ẹ.

²³Chịngị ma ọgọnọ wa kọn àrị oru-a tẹkẹma àrị ḅarachụa wa pịrịkẹ ngịsị. Sime Izrẹl mị pịrị ḅarachụa, Nyanaḅọ, mịna Tamụnọ Ḅe ḅara kẹngẹ mị anị ḅoye-ẹ.

²⁴Ọkụma Beal, ḅụgererema oru ḅe tẹkẹ mị, wa mịẹse, anana na namakpo na, owuapụ awọ na, eremeni awọ na, ye goyegoye, mịna ḅieju-aḍapụ mamgba kụra ma ḅie ḍọkịḅo aye mamgba famasam.

²⁵Wa ḅụgerereḅụ kiri ḅọlọlọḅịa se ye ḅụgererema mịẹye ma wa gbẹịn. Mine na mịna ḅieju-aḍapụma na, wa sịkịmamgba Nyanaḅọ mịna Tamụnọ Ḅe ḅụ siye mịẹmẹ, wa oria olokoma ḍukoye mịẹkẹ.”