Read kirikeni Jerimaya 32 Bible Online

Jerimaya 32 - kirikeni bible

Jerimaya 32

¹Nyanaḅọ Ḅe ọkwẹịn ị̀ pịrịmẹ, Zẹdẹkaya ḅe Juda da oyi karama kụra ḅie, anị pịkị Nebukadneza ḅe Babilọn da maịnfasi karama kụra ḅie.

²Anịsịkị mị anị Babilọn amanyanaḅọ-ḅe-owuni-ogbo mị owu se Jerusalẹm mị pakarị sịkị mị-ẹ, anị ini pịkị amanyanaḅọ odo ḅie sime ịnyọsara warị mị ḅie ị̀ ịkasị koroma wẹrị sịkịmị-ẹ.

³Amanyanaḅọ Zẹdẹkaya ḅe ị̀ se anịnyọ ikoli ḅie chụamẹ se pịkị ḍuko ị̀ tịḅị gbanamẹ na àrị ò se ḍukowasamamẹ na Nyanaḅọ Ḅe nwọ ḅẹmẹ, “À ḅereni Babilọn amanyanaḅọ ḅe pịrịḅịa ọ̀ kụrọḅara se mị opuama mị ọkịḅịa,

⁴se Amanyanaḅọ Zẹdẹkaya ḅe ọ̀ pịọrụ-paka-ẹkẹ. Ini ọ̀ saḅaḅọrọma Babilọn amanyanaḅọ ḅe pịrịḅịa; ọ̀ tọrụna-tọrụna ori ọrịḅịa se ọ̀ pịkị ḅarana ọkwẹịn ọ̀ pịrịḅịa.

⁵Ini Zẹdẹkaya ḅe nwọ ọkị Babilọn munḅịa, ọ̀ pịkị anịnyọ sime nweni àrị ori na mịẹḅịa sịkị laḅịa. Ọ̀ Babilọn apụma na owusọ sọ, anị ḅịrị ọ̀ pịrị ẹkẹ. Ị̀rị̀, Nyanaḅọ Ḅe, ḍukosam.”

⁶Nyanaḅọ Ḅe ḍuko ị̀ pịrịmẹ

⁷na Hanamẹl, ị̀ ḍaḅe numbireowu Shalọm ḅe oria owu tọkụ, ḅo ị̀ gbelaḅịa nwọfa oria ele, Bẹnjamin ịkpangị ḅụ sime ye mị Anatọt ama ḅie, à fẹḅịa-otuḅo, anịatịḅị ị̀rị̀ anị ori na kpekitẹịn mịnaḅọ-ẹ pịkị kụrọ nyana anị fẹ ị̀ ḅụ pịrị gbẹịnḅọ-ẹ.

⁸Anịḅụ, Nyanaḅọ Ḅe ḍukosa ḅaraḅụ, Hanamẹl ḅe anịnyọ amanyanaḅọ odo ịnyọsara warị mị ḅie ị̀ damaḅomẹ se ị̀ ḅẹmẹ à nyọ mị fẹ. À pịkị nemi ḅaraḅụ Nyanaḅọ Ḅe ò jokoma ḍuko ị̀ pịrịsam.

⁹Àrị ele mị fẹmẹ Hanamẹl ḅe ḅara; à ḅo igbiki mị tọnpakụma ọ̀ pịrịmẹ; anịa dẹrị ḅịpị ḅo laye anị tẹrẹfasi-a seleḅa okpokpo-ẹ.

¹⁰À ḅarapụnụ pịkị anịa ḍiri ma mịẹkụrọmamẹ, pịkị onyechịẹapụ nyana anị pịrịmẹ, se ḅo yetọnye se igbiki mị tọnpakụmamẹ.

¹¹Se à ḅo wa ḅịpị-se-ogbo-chụa mama ḍiri ma, anị wa ḅarapụnụ pịrịye mị na ọkọ fịrịye mị na gbolomaye ma nyanaye mị, na finjima ọkwẹịn ma nyanaye mị na, nwọ ọkịmẹ—

¹²se àrị se Barọk ḅe pịrịmẹ, anị Neraya tọkụ, pịkịna Measaya ḅe yi-ḅọ-ḅe-yi-tọkụ ḅe, à àrị se ọ̀ pịrịmẹ, Hanamẹl ḅe tọrụkuḅu, pịkị onyechịẹ ḅara pụnụ fẹ ayema ḍiri mị pịrị apụma simearịogbo pịkịna ḅẹrẹtọn warị ḅie simeapụma sọ sime sịkị ḅụ.

¹³Inimgba tọrụkuḅu à Barọk ḅe ḅẹmẹ,

¹⁴“Kụrọmamgba Nyanaḅọ Ḅe, Izrẹl Tamụnọ Ḅe, ọ̀ tọn ị̀ pịrịsam na ma mama ḍiri ma ọkị, ḅara pụnụ pịrịye fẹ ḍiri mị na finjima ọkwẹịn ḍiri mị na, se àrị se aḅaịn-ojongo ḅie koroma, mịẹso sịkị àrị koko ḅaraḅụ sime ḅoḅịa kụra ma laḅịa ọkụ.

¹⁵Kụrọmamgba Nyanaḅọ Ḅe, Izrẹl Tamụnọ Ḅe, ḍukosam na ama ḅie sime warịma na ele ma na irumịẹ chịnmgbọlụ ozuma na, ini pịkị àrị fẹḅịa.”

¹⁶À yefẹ ḍiri mị se Barọk ḅe pịrịso, à tẹkẹmẹ,

¹⁷“Kụrọmamgba Nyanaḅọ, ị́rị́ mị kiri mị na so mị na tẹmẹye-ẹ, ị́ya opu kụrọ na ịnyọ na ḅụ; gbọrịye sọ ofori-ẹ ị́ nẹngịmaḅịaye.

¹⁸Ị́ya ḅẹlẹma mị, ị́ se sịkịmamgba ẹndẹ-ẹndẹ-a tomoni ḍiesam, ọkụma ị́ pịkị fomuḅara se tomoni pịrịmẹ ini yiapụ ma mịẹ sima gose. Ị́rị́ anị ḍụḅa pịkị kụrọ Tamụnọ-ẹ; Ị́rị́ anị Kụrọmamgba Nyanaḅọ Ḅe-ẹ.

¹⁹Ị́ nemi nyanaye tọntọnmẹ, pịkịna ḍụḅaye mịẹmịẹmẹ; tomoni mịẹarịye goyegoye ị́ ọrịmẹ, ị́ pịkị inia mịẹmịẹaye ma la ḅara se ini gbẹịn-gbẹịnmẹ.

²⁰Ḅọlọsa sịkị ḅụ, Ijipt ḅie ị́ ḅụbuamaye na ḅụgbiripumaye na mịẹmẹ, ị́ pịkị pa àrị mịẹma mun aḅẹ ọkịḅo mị ene la, Izrẹl ama ḅie na jịn amama ḅie na ḅụ, anịgose nyọ mamgba nweni ị́ nemisam.

²¹Ḅụbuamaye ma na ḅụgbiripumaye ma na ḅụ ị́ mine na tarakapụma ḅalafamamẹ, se ị́rị́ ị́ya kụrọ na ịnyọ na nwọse Izrẹl ị́ya tomonima ọkịpakụmaḅomẹ Ijipt ḅie.

²²Ị́rị́ mị yela pịkị yepakụma kiri se ini pịrịmẹ, ị́ ḅereni inia ḅieju-aḍapụma pịrị ḅaraḅụ.

²³Ọkụma iniḅo mị ama mị sọ se anịa ḅie anga sịkị, ini ḅarị ị́ ḅịpị pokikẹ anịkanịka ị́ se ini ḍie ḅaraḅụ angakẹ; ị́ tọn ini pịrịayema, gbọrịye sọ ini mịẹkẹ. Anịgose ị́ maye mamgba simamẹ.

²⁴“Babilọn apụma gelema kiripịrị opuama mị ḍẹkịkelemasam kụrọḅarase anị ọkịḅịa ẹrẹchị, ini pịkị owu se anị pakasam. Ọmụ na ḅuruḅaa na obi na mịẹse opuama mị ineda ḅịkị inia ḅara sọḅịa. Ị́ ineda ọrịḅịa na ị́ ḍukoaye mamgba karakara ḅaraḅụ ḅosam.

²⁵Anịsọ, Kụrọmamgba Nyanaḅọ Ḅe, ị́rị́ anị tọn ị̀ pịrịye-ẹ na à mị ele mị fẹ, onyechịẹ apụma tọrụkuḅu, opuama mị tumgbo Babilọn apụma ḅara ḅie sọ-ẹmun-aḅẹ nwọḅẹ sọ.”

²⁶Anịeso, Nyanaḅọ Ḅe, nwọse ị̀ ḅẹmẹ,

²⁷“Ị̀rị̀ anị Nyanaḅọ Ḅe-ẹ, tomoni goyegoye mamgba ḅe Tamụnọ Ḅe. Ị̀ nẹngịmaḅịaye ofori-ẹ.

²⁸À mịn opuama mị saḅama Babilọn Amanyanaḅọ, Nebukadneza ḅe na oria owunima na pịrịḅịa, ini kụrọḅara se anị ọkịḅịa

²⁹se fịnị se anịa ḅụ chụaḅịa. Ini anị dọkịma gbinḅịa, ini se ị̀ ịganịma warịma na, anị ini arịa ochu ma ọgọnọ insẹnsị dọkịma-dọkịma pịkị arịa ḅie iru sarasara Beal ḅe na jịn-a oru na pịrịpịrị-a warịma.

³⁰Inia ḍumo sịkị ngịsị, Izrẹl na Juda na tomonima ị̀ ịganịmasam ini mịẹarịaye ma ḅụ.

³¹Mịn opuama mị ḅe-a tomonima ị̀ ịganịmasam anị sakị nama ene ngịsị. À tọnsam na àrị anị kanḅịa

³²anịatịḅị anịa ḅie sime Juda na Jerusalẹm na tomonima mịẹ si ayema gose, pịkị inia amanyanapụma na, tịḅịnịma na, agbamịẹapụma na ịkịankoroapụma na se chụa.

³³Ini ọḅụ pịkị ị̀ gbinmẹ; à pa ye se ini ḍieaḅẹ nwọḅẹ sọ, ini ị̀ poki se yeḍawọ ḍụkụkẹ.

³⁴Ini àrị ḅụịnjịnjịma oru ma sọ ọkị Oputẹkẹwarị ḅie chumẹ, anị ini ị̀ tẹkẹḅịa gose nama warị mị; ini pịkị anị pụlamasam.

³⁵Ini Hinọm Pẹsịkiri nyọ ḅie ẹbẹ nama Beal ḅe pịrịsam, se inia owuapụ awọma na eremeni awọma na ọkị agbamịẹ se Mọlẹk oru ḅe pịrịḅịa ọkụ. À tọn ini pịrịkẹ ini nwọ simeye mịẹ, anị pịkị ị̀ kuḅie sọkẹ na ini nwọ simeye mịẹḅịa ọkụ, se Juda tomonima mịẹse ini si mịẹḅịa.”

³⁶Nyanaḅọ, Izrẹl Tamụnọ Ḅe, nwọse ị̀ ḅẹmẹ, “Jerimaya, tomonima ḍukoaḅẹ na ọmụ na ḅuruḅaa na obi na mịẹse mị opuama mị ḅịkị Babilọn amanyanaḅọ ḅe ḅara sọḅịa. Mịọkụ à nyana ḍukoḅịaye poki.

³⁷À tomonima koḅirimaḅịa, àrị ịganị ḅụ ini galagalama sẹịn amama ḅie, se à pịkị ini ọkị mịanga ḅoḅịa, se ini dein ḅaraḅụ angaḅịa.

³⁸Anịsịkị ini ị̀ya tomoni sọḅịa, ị̀rị̀ inia Tamụnọ sọḅịa.

³⁹Ini mịẹḅịa gbọrịye à nwọse ini pịrịḅịa inia ḍumo ḅụ: ini sịkịmamgba ị̀ osiḅịa, ini na inia furo ḅie apụma na iḅi gose.

⁴⁰Àrị ini na sime-gbaso-ọḅọkụ fịḅịa, iḅiaye mịẹ ini pịrịḅụ ngịsị à dachịẹma nyana ẹkẹ, àrị ini mịẹḅịa ini inia kuḅie mgba se ị̀ ḍikiḅalafaḅịa mịẹso sịkị ini ḅarị ị̀ ḅụ ḅụ pịkịmaso ẹka ḅara.

⁴¹À ḅẹlẹ kuḅie se iḅiaye mịẹ ini pịrịḅịa, se à gbọtụma ini se mịn ama mị ḅie korochịẹ apụ nwọ mịẹḅịa.

⁴²“À ḅụfụka se ḅo mịna tomonima pịrị ọkụ, mị à pịkị à ḅereni ini pịrị iḅiaye mamgba ọkịḅo ini pịrịḅịa ọkụ-ẹ.

⁴³Tomonima ini ḅẹaḅẹ na mịn ama mị anị onwun ele kịkẹḅịa, tomoni na nama na ineda anga ẹka nyọ, se ini anị ọkị Babilọn apụma pịrịḅịa, ọkụma ini pịkị kiri fẹḅịa mịn ama mị ḅie.

⁴⁴Tomoni àrị fẹḅịa, se ḅara pụnụ, mịẹkụrọma, pịkị onyechịẹ arịa ḍiri ma pịrịḅịa. Mịn mị kiri ọkịḅịa anga anị, Bẹnjamin ẹkẹpụ ḅie, Jerusalẹm kelema ịwọ amama na Juda ḅie sime amama na, pịkịna chịngịma ḅie sime amama na chịngị-a chuku ma ḅie amama na pịkị Juda ḅie chukuda amama na. À tomonima pịkịma inia amama munḅịa, Ị̀rị̀, Nyanaḅọ Ḅe, ḍukosam.”