Read kirikeni Jerimaya 33 Bible Online

Jerimaya 33 - kirikeni bible

Jerimaya 33

¹À pa ikoli ḅie simearịogbo ḅẹrẹkọn warị nụngọ ḅie, Nyanaḅọ Ḅe oku mị pịkị ḅo ị̀ lamẹ.

²Nyanaḅọ Ḅe tomonikiri tẹmẹ ḅọ ḅe anị mịẹpakụma se anị se kiri koromaḅọ ḅe, ọkwẹịn ị̀ pịrịmẹ. Ori, anị Nyanaḅọ ini nwọse chịnḅọ ḅe ọkọ ḅẹmẹ,

³“Ómine ị̀ chịn, à pịkịna ọ́ pẹkẹrẹḅịa, à ḅụgbiripuma pịkị ḅụbuanmaye, ma ó nemikaye ḍuko ọ́ pịrịḅịa.

⁴Ị̀rị̀, Nyanaḅọ, Izrẹl Tamụnọ Ḅe, nwọ ḅẹmẹ na Jerusalẹm warịma na Juda amanyanaḅọ odo mị na, ini àrị kangbinḅịa, ini ama mị koro pịkị anị jụ ḅaraḅụ.

⁵Dapụ Babilọn apụma na dama owusọḅịa, anị ị̀ya ịganị ḅụ na kuḅie ọfịrị ḅụ na, à ḅaa saraḅịapụ ma ḅe ḍụẹịn ma, warịma ḅeinmaḅịapụ ma. À mịn opuama mị ḅụ ọ̀ tọrụ sinsam, inia tomonima mịẹ siaye ma tịḅị gose.

⁶Ọkụma à mịn opuama mị na anịa tomonima na gwọ sịsẹmaḅịa, se pịkịna ịnyọ se ini pịrịḅịa. À ḅaka dein na kokoḅara na se ini pịrịḅịa.

⁷À Juda na Izrẹl na mịẹḅịa mịẹye inia ḅarasọ, se à kpoto ini nama ini tatarị sime ḅara wẹrịḅịa.

⁸Ini se ị̀ mịẹ siaye ma ḅie àrị ini mịẹfịafịamaḅịa, se à pịkị inia sima na nyanaḅerenika ma na ḅụ ḅarasin ini pịrịḅịa.

⁹Jerusalẹm mị anịḅo ḅieḅẹlẹ na kụn na opuayemịẹ na nwọ sọ ị̀ pịrịḅịa, se sẹkiri ḅie sẹ goyegoye ḅalafaḅịa pịkị ḅụgeregereḅịa, à mịẹ Jerusalẹm-a tomonima pịrị iḅiaye ma na mịẹye ḅarasọ ma na ini nwọ naaḅịa sịkị.”

¹⁰Nyanaḅọ Ḅe nwọ ḅẹmẹ, “Tomoni ḅẹaḅẹ, na mịanga onwun ele sime ọkụ simemẹ, na anịa ḅie angarị tomoni na nama na ofori-ẹ. Ini pịkị kọkọma ọrịḅomẹ; Juda amama na Jerusalẹm ateli ma ḅie ye ofori-ẹ; tomoni anịkanịka nama anịnyọ angakẹ. Ọkụma ma nyọma ḅie ọ́ pịkị

¹¹ḅieḅẹlẹ oloku-a tịḅịḅie na, ḍoroku na, ereya-alalị-nyọ-fiema na nwọ naaḅịa. Mịẹḅaka ḅe ḍiepịrịaye se ị̀ya Oputẹkẹwarị mị ḅie ḅoarị apụ nime ọ́ nwọ naaḅịa; ini nwọ ḅẹḅịa, ‘Ọ́ mịẹḅaka se Kụrọmamgba Nyanaḅọ Ḅe ḅẹ, anịatịḅị ori iḅimẹ pịkịna oria ḅẹlẹma mị sime gbasomẹ.’ À mịn ama mị mịẹḅịa, tatarị sịkị ye iḅi anị pịrị ḅara anị nwọ simeḅịa. Ị̀rị̀, Nyanaḅọ Ḅe, ḍukosam.”

¹²Kụrọmamgba Nyanaḅọ Ḅe nwọ ḅẹmẹ, “Mịn onwun ele kịkẹ kiri ḅie, tomoni anịkanịka nama angaka nyọ mị; sịkị pịkị ḅoḅịa anịa ḅie osuein paka se, ananaḍikiḍiki apụ ineda inia ananama se mun àrị kokoḅịa.

¹³Chịngị ọgọnọ amama ḅie na chịngị chuku amama ḅie na pịkị Juda ḅie chukuda amama na, Bẹnjamin ẹkẹpụ nyọ, Jerusalẹm kelema ịwọ amama ḅie na pịkịna Juda sẹ ḅie amama na, ananaḍikiḍiki apụ pịkịna gbọrị sịkịḅụ arịa ḅie inia ananama kịẹnḅịa. Ị̀rị̀, Nyanaḅọ Ḅe, ḍukosam.”

¹⁴Nyanaḅọ Ḅe nwọ ḅẹmẹ, “Sịkị mị ḅoaḅẹ à ḅereni Juda na Izrẹl-a tomonima na pịrịye à nwọ mịẹḅịa.

¹⁵Anịsịkị Devid ḅe furoḅie koroḅoapụ ma ḅụ tẹmẹḅụ-karakara gbọrịḅọ à nwọ sẹlẹ amanyanaḅọ mịẹḅịa. Ḅe amanyanaḅọ ḅe sẹ mị ḅie mgba ọ̀ karakaraye na iḅiye na mịẹḅịa.

¹⁶Juda na Izrẹl na tomonima, ini ini ḍụapakụmaḅịa se ini deinma ḅie angaḅịa. Opuama mị ini anị chịnḅịa ‘Nyanaḅọ Ḅe Mịna Ḍụaḅọrọmaḅọ-ẹ.’

¹⁷Ị̀rị̀, Nyanaḅọ Ḅe, ḅerenimẹ na sịkịmamgba Devid furoḅie koroḅo gbọrịḅọ mị Izrẹl amanyanaḅọ sọḅịaye-ẹ

¹⁸pịkịna Livaị furoḅie nweni sịkịmamgba pakaḅoḅịa ḅo agbamịẹapụ sọ se fịrịnwẹngị ị̀ pịrị pịkị dọkịma ḍiepịrịaye na, mgbọlụ ḍiepịrịaye na, agba na mịẹ ị̀ pịrịḅịa.

¹⁹Nyanaḅọ Ḅe nwọse ị̀ ḅẹmẹ,

²⁰“Ị̀rị̀ na enekuḅu na ḍin mị na wa ọḅọkụ fịsam, mịẹso sịkị àrị arịa karakara sịkị ḅụ ḅụpakụma, anị ọḅọkụ mị jenejene kan ẹkẹ.

²¹Anị gbọrị ḅaraḅụ à pịkị ị̀ya fịrịnwẹngịḅọ Devid ḅe na ọḅọkụ fịsam na sịkịmamgba ọ̀ ḅụḅụ koroḅoḅịapụ ḅo amanyanaḅọ sọḅịa pịkị Livaị furoḅie agbamịẹapụma na ọḅọkụ fịmẹ na ini sịkịmamgba fịrịnwẹngị ị̀ pịrịḅịa, pịkịna ma ọḅọkụ mamgba jenejene àrị kan ẹkẹ.

²²À mịẹḅịa ị̀ya fịrịnwẹngịḅọ Devid ḅe furoḅie pakaḅoḅịapụ ma kịẹnḅịpị na pịkị Livaị furoḅie agbamịẹapụma kịẹnḅịpị su, mịẹso ọkụma ini kịẹn mị, sotọrụ lolia ma na tọrụ aka onwunmgbọlụ ma na kịẹn mị ḅụfụkama ọkụ anị ọkọ se ḅụfụkamaḅịa.”

²³Nyanaḅọ Ḅe nwọse ị̀ ḅẹmẹ,

²⁴“Ị́ kpaịnma se elekima chụa tomoni ḍukoarịye ma, na àrị Izrẹl na Juda na sịkịsam, anị ị̀rị̀ sẹlẹ ọkị mama furoma? Anịgose ini ị̀ya tomonima ḍikisima se ḅarị sẹ ḅara se ini ọkịkẹ.

²⁵Ọkụma Ị̀rị̀, Nyanaḅọ Ḅe na enekuḅu mị na ḍin mị na ọḅọkụ fịmẹ, se pịkị tomonikiri mị na so mị na ḍikiḍikiarị olokoma chụamẹ.

²⁶À kụrọma ḅereni mayema mịẹọkụ, anị à pịkị Jekọb-ḅe-ḅụ koroḅoapụ ma na fị ọḅọkụ mị mịẹkụrọmaḅịa ọkụ-ẹ, pịkịna ị̀ya fịrịnwẹngịḅọ Devid ḅe na. À Devid ḅeḅụ-koroḅo-apụ ma ḅụ gbọrịḅọ nwọ sẹlẹ se iniḅọ ḅẹrẹtọn Ebraham ḅe na Aịzịk ḅe na Jekọb ḅe na ḅụ koroḅoapụ ma pịrịḅịa. À ḍikiḅụgerere nyana ị̀ya tomonima pịrịḅịa se ini pịkịna mịẹyeḅarasọ nyanaḅịa.”