Read kirikeni Jerimaya 34 Bible Online

Jerimaya 34 - kirikeni bible

Jerimaya 34

¹Nyanaḅọ Ḅe ọkwẹịn ị̀ pịrịmẹ, anị Babilọn Amanyanaḅọ Nebukadneza ḅe na oria owunima na, ò chuku ḅie sime sẹ mamgba na tomoni-kịrịkịrị-apụ mamgba, ọ̀ mịẹkụrọmarị sịkị, ò Jerusalẹm na anị na kpeki amama na gbẹịnmachịẹarị ogbo.

²Nyanaḅọ, Izrẹl Tamụnọ Ḅe, ḍuko ị̀ pịrịmẹ na à mun Zẹdẹkaya, Juda amanyanaḅọ ḅe ḅẹ, “Ị̀rị̀, Nyanaḅọ Ḅe mịn opuama mị ḅọrọma se Babilọn amanyanaḅọ ḅe pịrịḅịa se ori anị dọkịma koromaḅịa.

³Ị́ pịọrụ-so-ẹkẹ; ini ị́ kun se ị́ saḅaḅọrọma ọ̀ pịrịḅịa. Ị́ tọrụna-tọrụna ori ọrịḅịa pịkị ḅarana orina-ọkwẹịnḅịa; anịsịkị ị́ so Babilọn munḅịa.

⁴Zẹdẹkaya, àrị ị́ ḅụ ḍukoye poki. Owu ḅie ini ị́ ḅaa-ẹkẹ.

⁵Ị́ deinma fịḅịa se tomoni ị́ya ḅieju-aḍapụma amanyanaḅọrọsapụ ma ḍipi sịkị ini insẹnsị dọkịma ọkụ anị gbọrị ḅara mị ini insẹnsị dọkịma ị́ pịrịḅịa ọkụ-ẹ. Ini ḍụẹịn ḍin ị́ pịrịḅịa se ḅẹḅịa, ‘Mịna amanyanaḅọ ḅe, ọ̀ fịsam!’ Ị̀rị̀, Nyanaḅọ Ḅe, ḍukosam.”

⁶Anịsịkị à mịn oku mị se Amanyanaḅọ Zẹdẹkaya ḅe pịrịmẹ, Jerusalẹm ḅie

⁷anịsịkị Babilọn amanyanaḅọ ḅe owunima, opuama mị gbẹịnmachịẹaḅẹ. Owuni ma ini pịkị Juda ḅie, ịkịan ma kọn ini mịẹkụrọma amama, Lekish na Azika na, sọnị nwọ gbẹịnmachịẹaḅẹ.

⁸Amanyanaḅọ Zẹdẹkaya ḅe na Jerusalẹm-a tomonima na ḅịpị-se-ogbo-chụamẹ na ini inia

⁹Hibru omoni ma ḅụ ḅarasinḅịa, eremeni na owuapụ na, mịẹso sịkị gbọrịḅọ sọ ḅarị ò juo Izrẹl ḅọ se omoniḅọ mịẹ ẹka ọkụ.

¹⁰Tomoni mamgba na inia tịḅịnịma na, ḅerenimẹ na ini inia omoni ma ḅụ ḅarasinḅịa se ḅarị ini se omoniapụ mịẹ-ẹkẹ. Ini kọkọma ini wẹrịsomẹ,

¹¹ọkụma ọḅụkọ ini inia kuḅie ḍinmamẹ, ini pịkịmaḅo se pịkị ini se omoniapụ mịẹmẹ.

¹²Anị Nyanaḅọ,

¹³Izrẹl Tamụnọ Ḅe, ḍuko ị̀ pịrịye-ẹ, à ḍuko tomonima pịrị; “Àrị ọ́mịna ḅieju-aḍapụma na ọḅọkụ fịmẹ, àrị Ijipt ini ḍụapakụmaḅo se ini omoni ḅaraḅie pọkọ sịkị. Àrị ini ḅẹmẹ na

¹⁴sọnọma kụra goyegoye ini Hibru omoniḅọ ḅụ ḅarasin anị sonio-a kụra se fịrịnwẹngị ini pịrịsaḅọ. Ọkụma mịna ḅieju-aḍapụma tọrụse ị̀ ḍiki ḍụkụkẹ anịkanịka à ḍukoye pokikẹ.

¹⁵Ḅọrọsa kalasịkị ḅụ ómine ọ́mịna kuḅie ḍinma se ị̀ ḅieḅẹlẹmaye mịẹmẹ. Óminemgba ḅerenimẹ na ómine ọ́mịna juo Izrẹlapụma ḅụ ḅarasinḅịa se ị̀ tọrụkuḅu, ini chusin ị̀ pịrịarị Oputẹkẹwarị ḅie, ọḅọkụ fịmẹ.

¹⁶Ọkụma, ọḅụkọ ọ́ pịkị ó kuḅie ḍinmamẹ se ḅarị kụn se ị̀ pịrịkẹ. Óminemgba pịkịna ọ́ ḅarasinsa omoniapụ mamgba ọkịḅo pịkị omoniapụ mịẹsam.

¹⁷Anịgose, mịọkụ, Ị̀rị̀, Nyanaḅọ Ḅe, ḅẹmẹ na ómine ị̀ ḅịpị pokikẹ, ọ́mịna juo Izrẹlapụma ḅụ ḅarasin ini pọkọso mị ma ó ḅereni ini pịrịkẹ. Anịọkụma ị̀rị̀ à ḅereni se ọ́ pọkọso ḅịa pọkọso ḅereni ọ́ pịrịse ó mun owu ḅie fị, obi, na ḅuruḅaa na ḅie sọḅịa. À mịẹḅịa, sẹkiri ḅie sẹma la-ọkụ ḅụgbiripu nyana, à se ọ́ mịẹḅịaye na ḅụ.

¹⁸Juda na Jerusalẹm na ḅie fịrịnwẹngịapụ na amanyanaḅọ odo ḅie fịrịnwẹngịapụma na se chụa, agbamịẹapụma na pịkị tịḅịnị mamgba na, ị̀rị̀ na ọḅọkụ fịmẹ, anị ini se mama ikiḅa woli nambulo ḅe, mama ikiḅa ma ogboku nwẹngị ḅọrọ mị ḅụ. Ọkụma ini ọḅọkụ mị kanmẹ pịkị anị ḍukoye mị mịẹkẹ. Anịẹrẹchị, mịna apụma ini nambulo ḅe mịẹọkụ à nwọse ini mịẹḅịa.

²⁰Àrị ini ḅọrọma ini ḅaa ḍọkịarị tarakapụma pịrịḅịa se feni na piri-a nama na inia ḍụẹịn ma pẹịḅịa.

²¹À pịkị Juda Amanyanaḅọ Zẹdẹkaya ḅe na oria fịrịnwẹngịapụma na ḅọrọma ini ḅaa ḍọkịarịapụ ma pịrịḅịa. À pịkị ini ḅọrọma Babilọn owunima pịrịḅịa, anị ómine gbẹịnmachịẹ mị ọlọchịẹmasapụ ma.

²²À kụrọ pịrị ḅịpị mị pịrịḅịa, se ini pịkịma mị opuama mị ḅoḅịa. Ini owuse-anị pakaḅịa, anị ọkị se anị dọkịma gbinḅịa. À Juda amama mịẹḅịa àrị nweni angaka onwun ele kịkẹḅịa. Ị̀rị̀, Nyanaḅọ Ḅe, ḍukosam.”