Read kirikeni Jerimaya 36 Bible Online

Jerimaya 36 - kirikeni bible

Jerimaya 36

¹Josaya ya Jẹhoịakim ḅe Juda amanyanaḅọ sọ inein karama kụra mị ḅie, Nyanaḅọ Ḅe nwọse ị̀ ḅẹmẹ,

²“Fangalama gbọrị ḍiri ọkịḅo se à ḍuko ị́ pịrịḅịaye goyegoye, Izrẹl na Juda na, pịkị sẹ mamgba na ḅụ, nwọ gịẹịn anịa ḅie chụa. Yemamgba gịẹịn, anị Josaya ḅe sakị amanyana sịkị ngịsị à tatarị ḍuko ị́ pịrịye goyegoye ọkịḅo mịọkụ la.

³Sosi Juda tomonima, à tọn na àrị iniaḅụ yesimaḅịa nwọḅẹye mị naaḅịa sịkị ini inia si-a mịẹmịẹaye ma ḅụ vinpịkịḅịa. Anịsịkị mị àrị inia sitịḅị na inia sima na ḅụ ḅarasin ini pịrịḅịaye-ẹ.”

⁴Anịḅụ à Barọk, Neraya tọkụ ḅe, chịnmẹ se Nyanaḅọ Ḅe ị̀ ḅẹye goyegoye nwọ go pakụma ọ̀ pịrịmẹ. Se Barọk ḅe gbọrị fangalama ḍiri ḅie arịmgba gịẹịnmẹ.

⁵Se à ma tọn-aye ma ḍuko Barọk ḅe pịrịmẹ. “Ini ḅarị ḅereni ị̀ pịrịkẹ à sọ Oputẹkẹwarị ḅie mun.

⁶Ọkụma à ḅiḅịa ị́rị́ anịnyọ mun, tomonima ḅurukụmaḅịa jịn sịkị ḅụ. Ị́ fangalama ḍiri mị ḅie sime ayema gele pụkọ se àrị go pakụmaḅịa mịẹso sịkị ini Nyanaḅọ Ḅe ị̀ ḅe-aye ma la-ọkụ la-ọkụ nwọ naaḅịa ọkụ, anị à pịkị go pakụma ị́ pịrịaye ma-ẹ. Mịn mị mịẹ nwenimgba ineda ị́ naaḅịa nyọ ḅụ, Juda tomonima, inia amama ḅie ḅo apụma sọ se chụa.

⁷Sosi ini Nyanaḅọ Ḅe tẹkẹḅịa se inia si-a nwẹngị ma ḅie vinpịkịḅịa, anịatịḅị Nyanaḅọ Ḅe, ọ̀ mịna tomonima ẹrẹmasam oria ḅalafama ịganị na owoi-kuḅie na ḅụ.”

⁸Anịḅụ Barọk ḅe, à ḍuko ọ̀ pịrịsa ḅaraḅụ, gbọrịye sọ irimaka ḅaraḅụ Nyanaḅọ Ḅe oria ọkwẹịn ma go pakụma ini pịrịmẹ Oputẹkẹwarị ḅie.

⁹Jẹhoịakim ḅe Juda amanyanaḅọ sọ sọnọ karama kụra mị ḅie esenie-akalụ ḅie, tomonima ini ḅurukụmamẹ, se Nyanaḅọ Ḅe ḅara iḅi fẹ gose Jerusalẹm ḅie angapụ mamgba na Juda amama ḅie ḅo apụma na, ḅurukụnma mị wẹrịmẹ.

¹⁰Anị nwenimgba pokiarịogbo, Barọk ḅe à ḍuko ọ̀ pịrịaye mamgba gomẹ fangalama ḍiri mị ḅie. Oputẹkẹwarị mị ḅie anị ọ̀ mị mịẹye-ẹ, Gẹmaraya, Shefan ya ḅẹrẹkọn-warị-ḍiri-gịẹịnḅọ ḅe jukuru ḅie ḅụ. Oria jukuru mị ọgọnọju warị mị ḅie omi-ẹ, anị ḅọrọ Oputẹkẹwarị-mị-ḅe-Ịwọ-Ḅọkọ mị sọ nyọ na kpekima.

¹¹Shefan tọkụ Gẹmaraya ḅe tọkụ Maịkaya ḅe, Barọk ḅe fangalama ḍiri mị ḅie gịẹịn ayema go àrị sịkị Nyanaḅọ Ḅe ḍuko aye mamgba ọ̀ naamẹ.

¹²Anị ori amanyanaḅọ odo ḅẹrẹkọn warị ḍiri gịẹịnḅọ ḅe warị ḅie sọmunye-ẹ, fịrịnwẹngịapụ mamgba fịrị ḅie simearịogbo. Ẹlishama, ḅẹrẹkọn warị ḍiri gịẹịnḅọ ḅe na, Dilaịya, Shẹmaịya tọkụ ḅe na Ẹlnatan, Akbọ tọkụ ḅe na, Gẹmaraya, Shefan tọkụ ḅe na, Zẹdẹkaya, Hananaya tọkụ ḅe na, pịkị ísí-a fịrịnwẹngịapụ mamgba, ini omi-ẹ anịnyọ.

¹³Maịkaya ḅe ọ̀ naa se Barọk ḅe ḍiri ḅie go aye mamgba nwọ ḍuko tomonima pịrịmẹ.

¹⁴Anị fịrịtịḅịnị ma Jẹhudaị (Netanaya tọkụ, Shẹlẹmaya yaḅe yi tọkụ ḅe, anị Kọshaị yaḅe yi tọkụ ḅe yi ḅọ ḅe) fịrịmaye-ẹ na ò Barọk ḅe ḅẹ na ò go tomonima pịrị fangalama ḍiri ma ọ̀ nwọ ọkịḅo. Barọk ḅe ḍiri mị ori ọkịḅo ini pịrịmẹ.

¹⁵“Kpọnjị sime,” ini nwọ ḅẹmẹ, “se fangalama ḍiri mị go wa pịrị.” Anị Barọk ḅe ḍiri mị goye-ẹ.

¹⁶Ori anị go so, mị ini ḅalafa ḅaraḅụ jụmḅọ jụmḅọ ḍiki se Barọk ḅe ḅẹye-ẹ, “Wa mịn mị ḍuko amanyanaḅọ ḅe pịrịḅịa.”

¹⁷Anị ini ò gbelaye-ẹ, “Ḍuko wa pịrị mịọkụ, nde ị́ ḅara-wẹrịma maye mamgba gịẹịn ọkụ? Jerimaya ḅe àrị gopakụma ị́ pịrị?”

¹⁸Barọk ḅe pẹkẹrẹmẹ, “Jerimaya ḅe ọkwẹịn mgbọlụ layelaye nwọ gopakụma ị̀ pịrịmẹ se àrị inki se mị fangalama ḍiri ḅie àrị gịẹịnmẹ.”

¹⁹Anị ini ḍuko ọ̀ pịrịye-ẹ, “Ị́rị́ na Jerimaya ḅe na, ó mun ḅọị. Ó ḅerenima gbọrịḅọ sọ ó sime nyọ nemi.”

²⁰Fịrịtịḅịnị ma fangalama ḍiri mị se Ẹlishama, ḅẹrẹkọn warị mị ḅe ḍiri gịẹịnḅọ ḅe warị ḅie wẹrịmẹ se ini amanyanaḅọ ḅe ḅẹrẹkọn warị nwọ munse, yemamgba ḍuko ọ̀ pịrịmẹ.

²¹Anị amanyanaḅọ ḅe Jẹhudaị ḅe fịrịmaye-ẹ, ọ̀ fangalama ḍiri mị ọkịḅo. Ẹlishama jukuru ḅie ḅụ ori anị ọkịpakụmaḅo se anị go amanyanaḅọ ḅe na chịẹ ò kelema fịrịtịḅịnị ma na pịrịmẹ.

²²Sịkị mị oḅoku sịkị-ẹ, anịsịkị amanyanaḅọ ḅe oria oḅoku-sịkị-odo-ḅie ọ̀ fịnị tọrọkọ sime waraḅẹ.

²³Jẹhudaị ḅe anị go mun tẹrẹ na inein na ọrụ laḅịa sịkị, amanyanaḅọ ḅe anị pọkọ ọkị se ọ̀ ḅara sime kingi-tọkụ mị se anị kanị se anị se fịnị ḅie gbinmẹ. Ọ̀ mị ḅara mịẹmẹ ọkịmun ọ̀ fangalama ḍiri mị mgba dọkịmamẹ.

²⁴Ọkụma amanyanaḅọ ḅe anịkanịka oria fịrịtịḅịnị ma ḅụ mayema naa gbọrịḅọ sọ ḅalafakẹ anịkanịka kururu elekima ḍiepakụmakẹ.

²⁵Ẹlnatan ḅe na, Dilaịya ḅe na, pịkịna Gẹmaraya ḅe na, mịnapụma amanyanaḅọ ḅe tẹkẹmẹ, ọ̀ fangalama ḍiri mị dọkịmama-ẹ nwọḅẹ sọ, ò ḅifie ini pịrịkẹ.

²⁶Anịsịkị mị ọ̀ kụrọ se Amanyanaḅọ Tọkụ Jiramịẹl ḅe na, Azriẹl tọkụ Sẹraịya ḅe na, pịkị Abdil tọkụ Shẹlẹmaya ḅe na, nwọ pịrịye-ẹ na ini ị̀rị̀ na ị̀ya ḍiri gịẹịnḅọ Barọk ḅe na kun. Ọkụma Nyanaḅọ Ḅe ọ̀ wa ḅọịsam.

²⁷Amanyanaḅọ Jẹhoịakim ḅe, à go pakụma Barọk ḅe pịrị se ọ̀ gịẹịn fangalama ḍiri mị dọkịma so, Nyanaḅọ Ḅe ḍuko ị̀ pịrịmẹ na

²⁸à jịn fangalama ḍiri ọkị se à tatarị gịẹịn ḍiri mị ḅie simeye goyegoye à pịkị nwọ gịẹịn mịn mị ḅie.

²⁹Nyanaḅọ Ḅe, ḍuko ị̀ pịrịmẹ na àrị amanyanaḅọ ḅe ḅẹ, “Ị́ fangalama ḍiri mị dọkịmasam, se ị́ Jerimaya ḅe gbelamẹ ò cheye gose nwọ gịẹịn na Babilọn amanyanaḅọ ḅe, ò ḅo mị ama mị kan se anịa tomonima na anịa namama na ḅaafamaḅịa.

³⁰Anịgose mịọkụ, Ị̀rị̀, Nyanaḅọ Ḅe, ḍuko ị́rị́ Amanyanaḅọ Jẹhoịakim ḅe pịrịaḅẹ na, ị́ furo ḅie pakaḅoḅịa apụma ḅụ, gbọrịḅọ sọ Devid amanyanakiri mị da ẹkẹ. Ị́ya ḍụẹịn mị ini anị se gbinkoromaḅịa; enekaka ịrụa anị tẹịnḅịa nyọ na, ḍinḅụ ijiriji anị pisimaḅịa nyọ na.

³¹À fomuḅara se ị́ pịrịḅịa, ị́ furo ḅie pakaḅoḅịapụ ma na ị́ya fịrịtịḅịnị ma na, ọ́mịna sima tịḅịgose. Ị́rị́ anịkanịka Jerusalẹm apụ na, Juda na ḅe-a tomonima na ngịsị à se ọ́mịna ḅerijine ḅara mgba ómine anị pokikẹ, anịgose àrị ómine mgba ẹrẹma na àrị ọ́ famaḅịa ḅẹye mị àrị anị ọkịḅo ọ́ pịrịḅịa.”

³²Anị à ḅo jịn fangalama ḍiri ọkịḅo ị̀ya ḍiri gịẹịnḅọ Barọk ḅe pịrịye-ẹ, se à go pakụma ọ̀ pịrịaye mamgba ọ̀ nwọ gịẹịnye-ẹ. Tatarị fangalama ḍiri mị ḅie sime aye mamgba ọ̀ gịẹịnmẹ, pịkịna à go pakụma ọ̀ pịrịayema na kịkịna oku ma na.