Read kirikeni Jerimaya 39 Bible Online

Jerimaya 39 - kirikeni bible

Jerimaya 39

¹Zẹdẹkaya ḅe Juda ama nyana ḅe esenie-a karama kụra ḅụ oyi akalụ ḅie, anị Babilọn Amanyanaḅọ Nebukadneza ḅe, oria owunima se ḅo Jerusalẹm gbẹịnmachịẹye-ẹ.

²Zẹdẹkaya ḅe ama nyana ḅe oyigbọrị kụra fịnjị ḅe inein karama akalụ ḅie esenia-a ḍin ene, mị opuama mị kelema onu ma ini nwọ kantoluye-ẹ.

³(Ini kụrọḅarase Jerusalẹm ọkị sịkị, Babilọn amanyanaḅọ ḅe opu fịrịnwẹngịapụ mamgba ḅo inia kirima ọkịmẹ, Ogboku Onu Ḅọkọ ḅie, ini anị Nagaị Sarẹza ḅe na, Samga Nebo ḅe na, Sasekim ḅe na, jịn Nagaị Sarẹza ḅe na.)

⁴Amanyanaḅọ Zẹdẹkaya ḅe na oria owuni mamgba na ḅo paka arịye ma ọrị sịkị, mị ini ḅụkụrọma ḍin ḅụ opuama mị ḅie mangị pakasoye-ẹ. Ini ḅọrọ ama mị wẹrịso nyọ anị, amanyanaḅọ ngwengwe ozu ḅie ḅọrọ mun ama mị kelema mama-onu-ma-gboloma onu ḅọkọ mị la, se ḅọrọ Jọdan-Pẹsịkiri-nyọ-ḍuko mun ateli mị-ẹ.

⁵Ọkụma Babilọn owunima ini ḍuko mun se Zẹdẹkaya ḅe kunmẹ, Jẹriko na kpeki sẹrẹrẹkiri nyọ ḅụ. Anị ini ḅo ori ọkị Amanyanaḅọ Nebukadneza ḅe damamunye-ẹ. Hamat ẹkẹpụ ḅie sime Ribla opuama ḅie, se anịnyọ Nebukadneza ḅe ḅẹrẹpẹlẹ ọ̀ pịrịmẹ.

⁶Ribla ḅie ọ̀ Zẹdẹkaya owuapụ awọma se fịḅie chumẹ, Zẹdẹkaya ḅe chịẹ ini ḍikiarịogbo, se ọ̀ pịkị Juda fịrịnwẹngịapụma tịḅị ma pẹlẹsinmẹ.

⁷Anị ḅọrọso ini Zẹdẹkaya ḅe tọrụmgbọlụma sọkịsin se ikoli se ori ịkasị se ò se Babilọn mun mẹ.

⁸Ma sịkị ma ḅụ, Babilọn apụma amanyanaḅọ odo mị dọkịma kiri pịrịsam, pịkịna tomonima warịma na, pịkịna Jerusalẹm kelema onu ma sọ ini suma gbinsam.

⁹Anịḅe kuluma, Nebuzaradan, owu kụlọdaḅọ ḅe, ikoliapụ ḅaraḅụ, ama ḅie kọn-a tomonima na, inia ḅie so ọ̀ damamun apụma na ọkịso Babilọn mun mẹ.

¹⁰Juda ḅie ye nyanaka se igweintẹịn apụma ḅụ dapụ mị ò se koromaye-ẹ, ori irumịẹ chịnmgbọlụ ḍipi ozu na ele na se ini pịrịmẹ.

¹¹Ọkụma Amanyanaḅọ Nebukadneza ḅe kụrọ se Nebuzaradan, owu kụlọdaḅọ ḅe pịrịmẹ na ò mun mayema ḍuko kụrọma:

¹²“Mun Jerimaya ḅe ḍọkị se iḅi ḅara se ò ḍikiḍiki. Ye se ọ̀ lamama ọkụma, ò ḅiyeḅiye mịẹ ọ̀ pịrị.”

¹³Anị Nebuzaradan ḅe na ọḅụ sọ opu fịrịnwẹngịapụma na Nebushazban ḅe na Nagaị Sarẹza ḅe na ísí Babilọn amanyanaḅọ fịrịnwẹngịapụ mamgba na,

¹⁴amanyanaḅọ ḅẹrẹkọn warị nụngọ ḅie ị̀ sinpakụmaḅoye-ẹ. Ini ị̀ se Shefan Gẹdalaya, anị Ahaịkam owutọkụ pịkị Shefan ḅe ḅieju-tọkụ ḅe, ḅara chụamẹ, anị ḍọkịḅo ọrị na à dein ḅaraḅụ ḅo ama lamẹ nwọ ḅẹḅọ ḅe-ẹ. Se àrị anịnyọ tomonima na simemẹ.

¹⁵Anị amanyanaḅọ-odo-ḅẹrẹkọn-warị nụngọ ikoli ḅie à pa sime àrị sịkị, Nyanaḅọ Ḅe ḍuko ị̀ pịrịmẹ na

¹⁶à ḍuko Ebẹdmẹlẹk Sudanḅọ ḅe pịrị na, Kụrọmamgba Nyanaḅọ Ḅe, Izrẹl Tamụnọ Ḅe ḅẹsam, “À ḍukosa ḅaraḅụ, à mịẹḅịa; à yesima nwọ ọkịḅo mị opuama mị ọgọnọ saraḅịa, mịẹye ḅarasọka. Se mịn mị pakaḅịa sịkị, ị́ anịnyọ sime anị ọrịḅịa.

¹⁷Ọkụma Ị̀rị̀, Nyanaḅọ Ḅe, ị́ ḍikiḍikiḅịa, se ini ị́ saḅama ị́ ḍikiḅalafa-arị-apụ ma pịrị ẹkẹ.

¹⁸Àrị ị́ kokoḅịa, ị́ pịkị fịḅie sọ ẹkẹ. Ị́ ḍumoḅịa anịatịḅị ị́ kuḅie se ị̀ ḅụgbanasam. Ị̀rị̀, Nyanaḅọ Ḅe, ḍukosam.”