Read kirikeni Jerimaya 42 Bible Online

Jerimaya 42 - kirikeni bible

Jerimaya 42

¹Anịeso, owuni tịḅịnị mamgba, Johanan, Karea tọkụ ḅe na Hoshaya tọkụ Azaraịya ḅe na iniaḅụ sọ se ogbogboḅụ tomonima na ị̀ damaḅo

²se ị̀ ḅẹmẹ, “Sisi wa ị́ ḅara ḅiye mịẹ! Nyanaḅọ Ḅe tẹkẹ mịna tịḅị gose. Tẹkẹ mine kọn apụ mamgba pịrị. Gbọrị sịkị wa ḅakamẹ, ọkụma mịọkụ, mịnaḅụ kalapụ mị kọnsaye-ẹ, ị́rị́ sọ ineda ọrịḅịa.

³Tẹkẹ, mịẹse Nyanaḅọ mịna Tamụnọ Ḅe, wa ḅọrọḅịa ateli na wa mịẹḅịaye na se wa ḍie.”

⁴À pẹkẹrẹmẹ, “Iḅimẹ, anịọkụma àrị ó ḅi ḅaraḅụ Nyanaḅọ mịna Tamụnọ Ḅe tẹkẹḅịa, se ò ḍukoye goyegoye à ḍuko ọ́ pịrịḅịa. À se ọ́ ḅọịmaḅịa gbọrịye sọ ofori-ẹ.”

⁵Mị ini ị̀ ḅẹye-ẹ, “Ye Nyanaḅọ Ḅe, karakara pịkị kuḅie-se-gbana-gbẹịn onyechịẹḅọ-sọ wa pịrị, wa nemikase Nyanaḅọ mịna Tamụnọ Ḅe, ị́ ḅẹ se tọn wa pịrị nwọ ḅẹ-aye ma ḅịpịpokikẹ nwọ ḅẹḅẹ.

⁶Anị mịna ḅụḅẹlẹ-o, mịna ḅụḅẹlẹka-o, wa Nyanaḅọ mịna Tamụnọ Ḅe ḅịpị pokiḅịa, anị wa ị́ ḅẹ ọ̀ tẹkẹ wa pịrị nwọ ḅẹ ḅọ ḅe. Yemamgba mine na iḅiḅịa wa nemikase ọ̀ ḅịpị poki ọkụma.”

⁷Oyi-a ḍin ḅọrọḅụ, Nyanaḅọ Ḅe ọkwẹịn ị̀ pịrịmẹ;

⁸anị à Johanan ḅe na ori na sime ọmụ tịḅịnịma na ísíapụ mamgba na chịn gbolomaye-ẹ.

⁹Àrị ini ḅẹmẹ, “Nyanaḅọ, Izrẹl Tamụnọ Ḅe, ómine ị̀ fịrịma sẹịnḅọ ḅe ó ḅiye ḅụ ọkọ ḅẹmẹ,

¹⁰‘Ó nemikase ḅimẹ ó mị ama ḅie angama munḅịa nwọ ḅẹḅẹ, àrị ọ́ namachịẹmaḅịa, àrị ọ́ kangbin-ẹkẹ. Àrị ó ḍipiḅịa, àrị ọ́ wọrọpakụma ẹkẹ. Àrị ọkịḅo ọ́mịna tịḅị gbana fa mị, opu kururu se ị̀ pịrịsam.

¹¹Ọ́ ḅarị Babilọn amanyanaḅọ ḅe ḍikiḅalafama. Àrị ómine na omi-ẹ, à pịkị oria kụrọ ḅie ọ́ ḍụaḅịa.

¹²À ḍikiḅụgerere nyana ẹrẹchị, àrị ọ̀ mịẹḅịa ò ḍikiḅụgerere nyana ọ́ pịrị se ḅereni ọ́ pịrị se ọ́ pịkịma so ama mị mun. Ị̀rị̀, Nyanaḅọ Ḅe, ḍukosam.’

¹³“Ọkụma ómine ini Juda ḅie se koromaso apụma ómine ọ́ Nyana Tamụnọ Ḅe ḅịpị pokika se ḅarị mị ama ḅie anga ḍụkụka apụ nwọ sọ ma. Ọ́ ḅẹma, ‘Ẹn-ẹn, wa mun Ijipt ḅie angaḅịa, wa ḅarị owu ọrị ẹka anga, anịkanịka owu-chịnḅịpị naa, anịkanịka fịye pụkọtarị-ẹka nyọ.’ Ó nemikase mị ḅara mị ḍukomẹ nwọ ḅẹḅẹ, anịọkụma Kụrọmamgba Nyana Izrẹl Tamụnọ Ḅe ḅẹḅịa, ‘Ó nemikase kuḅiekụrọma mun Ijipt ḅie angaḅịa nwọ ḅẹḅẹ,

¹⁶anịọkụma ó ḍikiḅalafarị owu mị, anị ọ́ pẹlẹmaḅịa, se ọ́ pịkị ḅụtọn-arị ḅuruḅaa mị, anị ó ḍukoḅịa se anịnyọ Ijipt ḅie ọ́ fịḅịa.

¹⁷Kuḅiekụrọma mun Ijipt ḅie anga ḍọkịarịapụ mamgba ini fịḅịa owu ḅie anịkanịka ḅuruḅaa ḅie anịkanịka obi ḅie. Gbọrịḅọ sọ ḍumo ẹkẹ, gbọrịḅọ sọ pịọrụ-pakaḅo-ẹkẹ à se ini pịrịḅịa ḅụfụkaḅie.

¹⁸“Nyanaḅọ, Izrẹl Tamụnọ Ḅe ọkọ ḅẹmẹ, ‘Ị̀ya ịganị na owoi-kuḅie na Jerusalẹm-a tomonima ḅụ sara ọkụ anị ị̀ya owoi-kuḅie mị ọ́ ḅụ saraḅịa ọkụ-ẹ ó nemikase Ijipt mun mẹ nwọ ḅẹḅẹ. Tomoni ḍikiḅụtọn apụ ọ́ nwọ kịkẹḅịa; tomoni ó se kpọtiḅịa, se fụla na worinime na se ọ́mịna ẹrẹ pịrịḅịa, ọ́ ḅarị pịkị mị nyọ ọrị ẹkẹ.’”

¹⁹Se à pa ọkwẹịn-aḅẹ, “Nyanaḅọ Ḅe ò ḍuko ómine Juda ḅie ini koromase so apụma pịrịsam na, Ijipt ó munma. Anịgose àrị ó ḅerijine-aḅẹ

²⁰na fịdekiḅoḅịa mịẹmịẹaye ọ́ nwọ mịẹ-aḅẹ. Ómine ị̀ ḅẹmẹ à tẹkẹ Nyanaḅọ mịna Tamụnọ Ḅe pịrị ọ́ tịḅị gose, se ó ḅerenimẹ, na ọ̀ tọn ọ́ pịrịye goyegoye ọ́ mịẹḅịa.

²¹Mịọkụ, à ḍuko ọ́ pịrịsam, ọkụma ómine Nyanaḅọ mịna Tamụnọ Ḅe ị̀ fịrịma na à ḍuko ọ́ pịrị nwọ ḅẹ-aye ma goyegoye sịkị aḅẹ.

²²Anịọkụma ọ́ mịn mị se ḅiekoroma, ọ́ fịḅịa owu ḅie, anịkanịka ḅuruḅaa ḅie anịkanịka obi ḅie, ó mun anga ḍọkịarị nyọ ḅụ.”