Read kirikeni Jerimaya 43 Bible Online

Jerimaya 43 - kirikeni bible

Jerimaya 43

¹Nyanaḅọ, inia Tamụnọ Ḅe, ị̀ fịrịma na ḍuko tomonima pịrị nwọḅẹye ma goyegoye à ḍuko famamẹ.

²Anịeso, anị Hoshaya tọkụ Azaraịya ḅe na Karea tọkụ Johanan ḅe na ísí opuayemịẹ owuapụma na ị̀ ḅẹye-ẹ, “Ị́ iruokọn-aḅẹ. Nyanaḅọ, mịna Tamụnọ Ḅe, ị́ fịrịmakẹ ḅo ḍuko wa pịrị na wa Ijipt mun angama-ẹ.

³Barọk, Neraya tọkụ ḅe, ị́ chukuruma sịsẹma wa dasam mịẹso sịkị Babilọn apụma kụrọ ẹmbẹ nyana ḅo wa ḅaa anịkanịka wa ọkịso Babilọn munḅịa ọkụ.”

⁴Anịḅụ Johanan ḅe-o, anịkanịka owuni-fịrịnwẹngịapụ ma ḅụ-apụ-o, anịkanịka tomoni ma-o, iniaḅụ gbọrịḅọ sọ Nyanaḅọ Ḅe ḅịpị poki se Juda ḅie sime ḍọkịḅọ ofori-ẹ.

⁵Anị Johanan ḅe na owuni-ogbomgba, ini Juda ḅie se koromaso-apụ mamgba na ini ini galagala sẹịn nyọma ḅie pakaḅo-apụ ma na, ọkị Ijipt mun ye-ẹ:

⁶owuapụma na eremeni ma na awọmẹnịma na amanyanaḅọ eremeni awọma na. Nebuzaradan, owunitịḅịnịḅọ ḅe se Gẹdalaya ḅe chuku ḅie koromaso-apụ goyegoye, ị̀rị̀ na Barọk ḅe na, se chụa ini wa ọkị somẹ.

⁷Ini Nyanaḅọ Ḅe ḅịpị poki se ọ̀ tọnye mịẹkẹ, se Ijipt mun mẹ ọkịmun Tapanhiz opuama lamẹ.

⁸Anịnyọ anị Nyanaḅọ Ḅe ị̀ ḅẹye-ẹ,

⁹“Ḍụḅa ḍụparị okpokpo ọkịḅo, se àrị se ḅọrọ-sẹkẹnị-ogbo warị sọḅịa tọrọkọ, ini chụapakụma nyọ ḅụ ḍipi, mị opuama ḅie mịanga, ḍọkịḅo ọrị na da Izrẹlapụ ị́ mịẹarịye mị ọrịmẹ.

¹⁰Anịsịkị, ḍuko ini pịrị na, Ị̀rị̀, Kụrọmamgba Nyana Izrẹl Tamụnọ Ḅe, ị̀ya fịrịnwẹngịḅọ Babilọn Amanyanaḅọ Nebukadneza ḅe ọkị mịanga ḅoḅịa, se ori oria emine mị se ma ḍipi ḍụparịma ọgọnọ gbanaḅịa, se amanyanaḅọ-ikowarị mị se arịa ọgọnọ gbẹịn-finjimaḅịa.

¹¹Nebukadneza ḅe ò ḅo Ijipt kanḅịa. Anịa tomonima ḅie obi ḅụ fịḅịapụma, obi ḅụ ḅọrọ fịḅịa, anịapụma ḅie ikoli-go-ḅo-apụ ma, ini ikoliapụ ḅaraḅụ ini kunsoḅịa, se pịkịna owuḅie fịḅịapụma owuḅie mị ini ini ḅaaḅịaye-ẹ.

¹²À fịnị se Ijipt-a tamụnọ-tẹkẹ-warị ma ḅụ chụaḅịa se Babilọn amanyanaḅọ ḅe inia oru ma dọkịmaḅịa anịkanịka àrị dekisoḅịa. Ananaḍikiḍikiḅọ mịna ḅụchụaye ḅụ iku kpọmbị-sin-ọkụ mị Babilọn amanyanaḅọ ḅe Ijipt ama mị kpọmbị-sin-ḅịa ọkụ-ẹ se ọmụḅaraiḅi se soḅịa ọkụ-ẹ.

¹³Heliopolịs ama ḅie Ijipt ḅụ, tọnḅụ-sime-ini-ḍụparị-se-tẹmẹ agbambuapụma, ọ̀ kansinḅịa, se Ijipt-a tomonima tẹkẹwarịma dọkịma-gbinḅịa.”