Read kirikeni Jerimaya 44 Bible Online

Jerimaya 44 - kirikeni bible

Jerimaya 44

¹Nyanaḅọ Ḅe ọkwẹịn ị̀ pịrịmẹ, Ijipt ḅie anga Izrẹlapụ mamgba gbolomaye ḅụ, Migdọl na Tapanhiz na Mẹmfịs Opuama ma ḅie na, pịkịna chukuda nyọma sẹ mị ḅie.

²Kụrọmamgba Nyana Izrẹl Tamụnọ Ḅe ọkọ ḅẹmẹ, “Ómine na ọ́ ḅụ na, ḅarana ọrịsam, àrị ọkịḅo Jerusalẹm na Juda ḅie sime ama mamgba na pịrị fa mị la-ọkụ. Mịọkụ sọ àrị pa kan ḅie omi-ẹ, gbọrịḅọ sọ ḅarị pịkị arịa ḅie angakẹ

³anịatịḅị arịa tomonima, ini siye mịẹsam pịkị ị̀ ịganịmasam. Ini agbamịẹ jịn-a oru pịrịmẹ se fịrịnwẹngị jịn-a oru, anị ini anịkanịka ómine, anịkanịka ọ́mịna ḅieju-aḍapụma jenejene tịḅịtu pịrịka oru ma pịrịmẹ.

⁴À chama ị̀ya fịrịnwẹngịapụ ịkịankoroapụma se ọ́ sẹịnmamẹ, se ḍuko ọ́ pịrị na ọ́ ḅarị mị à ḍikiḅụnwọnwọye mị mịẹma, nwọḅẹ apụma.

⁵Ọkụma ó poki ḍụkụkẹ anịkanịka tọrụ se anị ḍikikẹ. Ọ́mịna si mịẹmịẹye mị, agbamịẹ jịn-a oru pịrị mị, ómine anịaḅụ ḅarasin ḍụkụkẹ.

⁶Anịḅụ àrị ị̀ya ịganị na owoi-kuḅie na ọsụn Juda amama na Jerusalẹm ateli ma na ḅụ saramẹ, se à fịnị se anịa ḅụ chụamẹ. Àrị kankọsị ḅụ simemẹ pịkịna ḅalafama nyọ sọ ḅo mịmgba anị sime ọkụ lamẹ.

⁷“Anịḅụ, Ị̀rị̀, Kụrọmamgba Nyana Izrẹl Tamụnọ Ḅe, mịọkụ gbelaḅẹ, ó cheye gose nwọ sime siye mịẹ ọḅụ pịrị-ao. Ó ḅia-o ó yesima ọkịḅo ama na ere na, awọ na ḍọkọḍọkọ awọmẹnị na pịrị, mịẹse ọ́mịna tomonima ḅụ gbọrịḅọ sọ kọn-ẹka ḅara?

⁸Ó che gose ị̀ ịganịma-ao, mị orutẹkẹ pịkị agbamịẹ jịn-a oru pịrị ḅụ ó ḅo anga Ijipt ḅie? Ọ́ mịn mị mịẹse pa ọḅụ sima, se tomonikiri sime-a sẹ mamgba ó se kpọti, se worinime se ọ́mịna ẹrẹ pịrịḅịa ọkụ?

⁹Ó ḅie ḅarasa, ọ́mịna ḅieju-aḍapụma na, Juda amanyanapụma na, inia erema na, pịkịna ómine na ọ́mịna erema na, Juda ama ḅie na Jerusalẹm ateli ma ḅie na, nyana ḅọrọsa sitịḅị-a mịẹmịẹayema?

¹⁰Ọkụma ọkịḅo mịmgba la, ma ómine ọḅụ iderimakẹ. Ma ọ́ kụn se ị̀ pịrịkẹ anịkanịka à chụa ómine na ọ́mịna ḅieju-aḍapụma na pịrị olokoma ḍuko ḅara nwọse angakẹ.

¹¹“Anịḅụ, Ị̀rị̀, Kụrọmamgba Nyana, Izrẹl Tamụnọ Ḅe, pịkị ómine na tụḅụrụḅịa se Juda mgba kansinḅịa.

¹²Juda-a tomonima ọkụma, anị ama ḅie kọn se so Ijipt ḅie mun anga ḍọkịarịapụ ma à ḍọkịḅo ọrịḅịa na ini inimgba ḅaamẹ. Inimgba, kalaḅọ-o, sẹnịḅọ-o, Ijipt ḅie ini fịḅịa, owu ḅie anịkanịka ḅuruḅaa ḅie. Ini ḅalafama sisaye-sọḅịa tomoni-a tọrụ ḅie, tomoni ini se kpọtiḅịa, se worinime se inia ẹrẹ pịrịḅịa.

¹³Àrị owu ḅie na, ḅuruḅaa ḅie na, obi ḅie na Jerusalẹm fomu ọkụ anị à se Ijipt ḅie angapụma fomuḅịa ọkụ-ẹ.

¹⁴Ini koromaso se ḅo Ijipt ḅie anga Juda-a tomonima ḅụ gbọrịḅọ sọ pịọrụso ẹkẹ anịkanịka ḍumo ẹkẹ. Gbọrịḅọ sọ inia ḅie pịkịma Juda ḅo ẹkẹ anị ini kuḅie-se-gbana pịkị anga inia pụkọtarịarị nyọ mị. Gbọrịḅọ sọ pịkịma ḅo ẹkẹ, pịọrụ ḅo kalapụ sakịsikima.”

¹⁵Anịsịkị, inia erema agbamịẹ jịn-a oru pịrịarịọkụ nemi owuapụ mamgba, pịkị anịnyọ chịẹarị eremeni ma na, Ijipt chuku ọrụḅụ anga ḅaka Izrẹlapụma se chụa—ị̀ ḅẹmẹ,

¹⁶“Wa Nyanaḅọ Ḅe ere ḅụ ị́ ḍuko wa pịrịayema wa poki ḍọkịkẹ.

¹⁷Wa tọn se wa mịẹḅịa nwọḅẹaye mamgba wa mịẹḅịa. Wa agbamịẹ mịna tamụnọ-arọ, Soḅie Amanyanaḅọ ma pịrịḅịa, se iru agba sara á pịrịḅịa, anị mine na mịna ḅieju-aḍapụma na, mịna amanyanaḅọ ḅe na, mịna tịḅịnịma na, Juda amama ḅie na Jerusalẹm ateli ma ḅie na, mịẹmịẹ ọkụ mị. Anịsịkị wa ḅakama fịye nyanamẹ, mịẹmịẹye mịna ḅarasọmẹ, wa pịkị ḅụfụka nyanakẹ.

¹⁸Ọkụma wa ḅarị agbamịẹ mịna Soḅie Amanyanaḅọ ma pịrị pịkị ḅarị iru agba sara á pịrịka sịkị ngịsị, wa ḅarị yenyanakẹ, se pịkịna mịna tomonima, owu ḅie na ḅuruḅaa ḅụ na fịmẹ.”

¹⁹Pịkịna eremeni ma pochumẹ, “Wa mịna Soḅie Amanyanaḅọ ma kịkẹma fịturu ma fọị se agbamịẹ á pịrị, pịkị iru sarapakụma á pịrị sịkị, mịna deapụ ma wa mịẹarịye ma mịẹkụrọmamẹ.”

²⁰Mịn à ḅo mị ḅara se ị̀ pẹkẹrẹ owuapụ mamgba na eremeni mamgba na ḅẹye-ẹ,

²¹“Ọ́ chịn ḅara Nyanaḅọ Ḅe, ómine na ọ́mịna ḅieju-aḍapụma na, ọ́mịna amanyanapụma na, tịḅịnịma na, amapụ ma na, Juda amama ḅie na Jerusalẹm ateli ma ḅie na ọ́ mịẹ agbama ori àrị nemikẹ anịkanịka ori àrị se ḅieḅarama sa?

²²Mịmgba ọ́mịna ama mị anị sara sọsam, gbọrịḅọ sọnị pịkị anịa ḅie angakẹ. Anị si ḅụ ḅalafamaye sọsam, tomoni-a tọrụ ḅie, tomoni pịkị worinime se anị pịrịaḅẹ, anịatịḅị Nyanaḅọ Ḅe ọ̀ ḅarị ineda ọ́mịna sitịḅị ma na simịẹmịẹaye ma na inemakẹ.

²³Mị gbọrị ḅụfụka mị ḅo ọ́mịna tịḅị gbanasam anịatịḅị ómine agbamịẹ jịn-a oru pịrị se Nyanaḅọ Ḅe ḅụ simịẹmẹ ọ̀ tọn aye mamgba pokika ḅụ.”

²⁴À ḍuko tomoni mamgba pịrịmẹ, anịtẹịn-anga, eremeni ma, Kụrọmamgba Nyana Izrẹl Tamụnọ Ḅe, ḍuko Ijipt ḅie anga Juda tomonima pịrịarịaye: “Ómine na ọ́mịna erema na tọrụgbẹlẹma ye ḅereni Soḅie Amanyanaḅọ ma pịrịmẹ. Ó ḅerenimẹ na ómine agbamịẹ á pịrị se iru agba sarapakụma á pịrịḅịa, se ó ḅereni ḅaraḅụ ọ́ mịẹsam. Anị opuma iḅi ḅaraḅụ! Ó ḅereni ayema ọ́ mịẹsam!

²⁶Ọkụma mịọkụ Ị̀rị̀, Nyanaḅọ Ḅe, ị̀ya opu ẹrẹ ḅụ, ḅereni Ijipt ḅie sime Izrẹlapụma pịrịye mị, ọ́ nwọ poki: Jenejene à ḅarị ḅereni ọ́mịna ḅụ gbọrịḅọ sọ pịrị ẹkẹ, iniḅo pịkị ị̀ya ẹrẹ ḅụ yekarịfị se ḅẹ na, ‘À ḍumo Kụrọmamgba Nyanaḅọ Ḅe ẹrẹ ḅụ yekarịfịmẹ!’

²⁷À ḍọkịḅo ọrịḅịa na, mịẹye ḅarị ọ́mịna ḅarasọ-ẹkẹ, ọkụma ọ́ fịḅịa. Óminemgba ọ́ fịḅịa, owu ḅie anịkanịka obi ḅụ, ọkịmun gbọrịḅọ sọ kọn ẹkẹ.

²⁸Ọkụma ọ́mịna ḅie boka kalapụ fị ḅie Ijipt pịọrụ-pakaḅo se Juda munḅịa. Anịsịkị mịn ḍumo-sime-kọn-apụ ma nemiḅịaye-ẹ, tụḅọ ọkwẹịn ḅo kọkọmaye sọ, ị̀yaye mị mọnọ se iniaye mị.

²⁹Ị̀rị̀, Nyanaḅọ Ḅe, onyechịẹmaye se ọ́ pịrịḅịa, na à fomuḅara se ọ́ pịrịḅịa mịanga se àrị ọ́ karị na ọ́mịna ḅụ à yesimaḅịa nwọḅẹye mị ḅo kọkọmaye sọḅịa.

³⁰Àrị Ijipt Amanyanaḅọ Họfra ḅe ḅọrọma ori-na-tarakapụ ma pịrịḅịa, anị ọ̀ ḅaa ḍọkịarịapụ ma, à Juda Amanyanaḅọ, Zẹdẹkaya ḅe ḅọrọma Babilọn Amanyanaḅọ, Nebukadneza ḅe pịrịọkụ, anị ori-na-taraka se ọ̀ ḅaa ḍọkịḅọ ḅe.”