Read kirikeni Jerimaya 46 Bible Online

Jerimaya 46 - kirikeni bible

Jerimaya 46

¹Nyanaḅọ Ḅe sẹma ḅụaye ḍuko ị̀ pịrịmẹ,

²Ijipt sẹ mị ḅụ sakị. Mị anị Ijipt Amanyanaḅọ, Niko owuni kụlọ ḅụ ò ḍuko ị̀ pịrịye-ẹ, anị Babilọn Amanyanaḅọ Nebukadneza ḅe inumapụ ma Kakẹmish ḅie, Yufretis Tọrụ na kpeki nyọ ḅụ Jẹhoịakim ḅe Juda ama da inein karama kụra ḅie:

³“Ijipt owuni tịḅịnịma olokumẹ, ‘Ómine ọ́mịna agbọ ma karakarama se paka mun ọmụ ḅie sọ!

⁴Ómine ọ́mịna asụnma se kporokporoma ḅụ kpọ se àrị tanjị! Ómine ọrụrụ ḅụ chịẹ se ọ́mịna okpochu ma chira! Ọ́mịna sụḅa ma ọ́ nwọ farị! Se owuni ḅụchụaye chụa!’

⁵“Ọkụma à che ọrị?” Nyanaḅọ Ḅe nwọ gbelamẹ. “Opu ḅalafa ḅụ ini vinpịkị aḅẹ. Inia owunima ini ini de ọḅụ dasam; ḅalafa ḅụ, ini inia ịnyọ laḅara se mangịmẹ tọrụ pịkị ọḅụ ḍikika ḅụ.

⁶Opuma mangị apụma ini sokẹ; owunima ini pịọrụ ḅọrọkẹ. Ọgọnọju, Yufretis anga, inia ḅụọ tọmbụlọ se ini ḅịkịmẹ.

⁷Mịn tụḅọ, Naịl mị kọpụ ọkụ kọpụ-ao, tọrụ ḅara se seriwa anịa akaka ma ḅilema-ao?

⁸Ijipt anị-ẹ, Naịl mị seri ọkụ seriwa, anịa akaka ma ḅilema aḅẹ. Ijipt mị ọkọ ḅẹmẹ, ‘À seri sẹkiri gbẹịnḅịa; àrị opuamama kanḅịa, anịa ḅie anga apụma na.

⁹Tọn asụnma pịrị àrị mun se kporokporoma mịẹ àrị nwẹngị! Owuni ma fịrịma pakụma: Sudan na Libya na ḅụ ḅo agbọ ọlọ owuapụma, pịkịna Libya ḅo lubu tẹịn ḍin apụma na.’”

¹⁰Mịmgba anị Kụrọmamgba Nyanaḅọ Ḅe ene mị-ẹ: mịmgba ò sowuḅiḅịa; mịmgba ò fomuḅara se ori-na-tarakapụ ma pịrịḅịa. Oria kongo ini ḅaa nweni anịa ḅụlọ ḅeinḅịa, pịkị inia pulo ḅu nweni anịa pụkọtanḅịa. Mịmgba Kụrọmamgba Nyanaḅọ Ḅe oria fịapụma se agbamịẹmẹ ọgọnọju ḅụ, Yufretis akaka ḅụ.

¹¹Ijipt-a tomoni, ó mun Giledị ḅụgwọ ḍiri ḍọkị! Ọ́mịna ḅụgwọ ḍiri mamgba ye arịa ḅie ofori-ẹ; ọ́ gwọḅịaye ofori-ẹ.

¹²Sẹ mamgba ọ́mịna ḅụgerere mị naasam; nwenimgba ọ́mịna owu pụkọ naasam. Gbọrị owuni ḅọ jịn owuni ḅọ ọgọnọ tanjị, se ini mama apụma ḅịkị kirikoromẹ.

¹³Babilọn Amanyanaḅọ Nebukadneza ḅe Ijipt gbẹịnmachịẹ-ẹ ḅo sịkị, Nyanaḅọ Ḅe ọkwẹịn ị̀ pịrịmẹ. Ori ọkọ ḅẹmẹ,

¹⁴“Mun ḍuko kelema Ijipt amama ḅie Migdọl ḅie na, Mẹmfịs ḅie na, pịkị Tapanhiz ḅie na: ‘Ọ́ ḅụkarakarama ọ́mịna ḅụ ma ḍụa; ọ́ nyanaye goyegoye owu ḅie kọsịfaḅịa!

¹⁵Cheye gose ọ́mịna opu oru Apis ḅe ḅịkị? Nyanaḅọ Ḅe ọ̀ ḅakụ gbinsam!’

¹⁶Ọ́mịna owunima inia ḅụọ tọmbụlọ se ini ḅịkịsam; ísíḅọ ísíḅọ ḅẹḅịa, ‘Ḅe ye! Ye wa so mịna tomonima damamun se tarakaḅọ ḅe kongo ḅịpị pịọrụ so!’

¹⁷“Ịwọ ẹrẹ se Ijipt amanyanaḅọ ḅe pịrị— ‘Nyọ fiema Ḅụbomaḅọ Mịna Kiri Gbarịḅọ.’

¹⁸Ị̀rị̀, Kụrọmamgba Nyanaḅọ Ḅe, anị amanyanaḅọ-ẹ. Ị̀rị̀ anị ḍumo Tamụnọ Ḅe-ẹ. Tebọ Tụndụ ma gele tụndụma nẹngị ọkụ pịkị Kamẹl tụndụ mị chịẹ gele tọrụ mị nẹngị ọkụ, anị ḅo ọ́ gbẹịnmachịẹḅịa ḅọ ḅe kụrọ sime ọkụ-ẹ.

¹⁹Ọ́ ḅụkarakarama ini ikoliapụ ḅara se kunsoḅịapụ ḅara wẹrị, ómine Ijipt-a tomoni! Mẹmfịs mị anị onwun ele sọḅịa, tomoniḅọ anga ẹka kansara nyọ.

²⁰Ijipt mị ọgọnọḅụ ḅo nweni tẹịntẹịn ọmụmụ gbori fịafịa nambulo ọkụ simemẹ.

²¹Ini ọkọ owunima sọ mịẹḅịa ọkụ ofori se ye se nweni lama ẹka nambulo awọ kịkẹmẹ. Ini ineda chịẹ owu sọkẹ; inimgba vinpịkị mangị mẹ. Inia ḅịkị ene mị ḅo lasam, ini ini kankọsịḅịa sịkị mị.

²²Ijipt mị oruwu ḅie de ọkụ dema mangị mẹ, ini nwọ ḅoarị tarakapụma ọmụarụ kụlọ mị ọrị ananga. Ini apala ma na ini gbẹịnmachịẹmẹ, tomoni eje pẹlẹgbin-ọkụ

²³opu piri ḅie eje pẹlẹgbin-apụ ḅara. Inia owunima ini opuma ḅakamẹ kịẹnḅịpị ḅụ; inia owunima ini ḅaka igurube nẹngịmẹ.

²⁴Ijipt apụma ini ini se ḅụgerere ḅụ chumẹ; ọgọnọju ḅo-a tomonima ini inumamẹ. Ị̀rị̀, Nyanaḅọ Ḅe, ḍukosam.”

²⁵Kụrọmamgba Nyanaḅọ Ḅe, Izrẹl Tamụnọ Ḅe nwọ ḅẹmẹ, “À fomuḅara nwọse Amọn mị pịrịḅịa, Tebẹs oru mị na Ijipt na inia oru ma na amanyanapụma na se chụa. Àrị Ijipt amanyanaḅọ ḅe na kuḅie-se-ọ̀-ḅụgbanapụ mamgba na ọkịḅịa,

²⁶se ini ḅọrọma ini ḅaa-ḍọkị-arị-apụ ma pịrịḅịa, ini se Babilọn Amanyanaḅọ Nebukadneza ḅe na oria owunima na pịrịḅịa. Ọkụma ọḅụkọ, tomoni pịkị Ijipt ḅie angaḅịa ini ḅọrọsa sịkị sime ọkụ mị. Ị̀rị̀, Nyanaḅọ Ḅe, ḍukosam.”

²⁷“Ị̀ya tomoni, ọ́ ḅalafama, Izrẹl-a tomoni, ọ́ ḅalafa nyanama. Àrị ọ́ ḍụaḅịa anị ḅọlọju ama mị ḅara ḅie, ómine ikoliapụ sọ ama mị ḅara ḅie. Ọ́ pịkịma ama ḅoḅịa se deinma angaḅịa; ó koko ḅụ simeḅịa, pịkịna ọ́ ḅalafamaḅịaḅọ ofori-ẹ.

²⁸Àrị ọ́ damaḅo se ọ́ ḍụaḅịa. Àrị ọ́ galagalama chu sẹ mamgba kanḅịa se, à ḅara se ọ́ lama ẹkẹ. Fomuḅara ọ́ lakaḅụ àrị ọ́ ḅụḅarasin ẹkẹ; ọkụma à fomuḅara se ọ́ pịrịḅịa sịkị, à kịẹnmaḅịa. Ị̀rị̀, Nyanaḅọ Ḅe, ḍukosam.”