Read kirikeni Jerimaya 49 Bible Online

Jerimaya 49 - kirikeni bible

Jerimaya 49

¹Mịn anị Nyanaḅọ Ḅe ḍukoye-ẹ Amọn ḅụ: “Nde Izrẹl owuapụma? Inia ama ḍụaḅịapụ ofori? Cheye gose ini ḅereni Mọlẹk tẹkẹarịapụ ma pịrị ini Gadị sẹ mị nyana eke ḅụ nyọ ọkị anga?

²Ọkụma sịkị mị ḅoaḅẹ, à mịẹḅịa Raba tịḅịnị opuama-a tomonima owusọ nyọ fiema mị naa se anị sara sọḅịa, pịkị ini anịa ịwọ amama dọkịma kiri pịrịḅịa. Anịsịkị Izrẹl mị pịkị anịa amama ọkịḅịa, inia ḅara anị ọkị apụma ḅara.

³Hẹshbọn-a tomoni ómine oloku pakụma! Eaị mị kansam! Raba eremeni ọ́ ḍụẹịn ḍin ḅie sọ! Ómine okuru kaka se ḍụẹịn ḍin, ọ́ mangịma ḅọrọ ḅụḅalaḅala ḅụ. Ọ́mịna oru Mọlẹk ḅe na oria agbamịẹapụma na amanyanaḅọ awọma na ini nwọ desinḅịa.

⁴Cheye gose ómine tomoni kuḅie-se-ḅụgbanakapụ ma ḅụboma-ao? Ọ́mịna ịnyọ kọkọ fa-ao. Ó cheye gose kuḅie-se-ọ́mịna kụrọ ḅụgbana se ḅẹ-ao na gbọrịḅọ sọ ḅiekpọma owu se ọ́ dapaka ẹkẹ?

⁵Angana angana ḅụ, à ḅalafamaye ọkịḅo ómine daḅịa. Ọ́ mangịḅịa óminemgba. Ọrụḅọḅọ iniḅọ ḍumo gose mangị iniḅọ ateli daḅịa, pịkịna pakaḅo ọ́mịna owunima koḅiriḅịa gbọrịḅọ sọ ḅarị ofori-ẹ.

⁶“Ọkụma ọḅụkọ lasịkị à pịkị Amọn mịẹḅịa mịẹye inia ḅarasọḅịa. Ị̀rị̀, Nyanaḅọ Ḅe, ḍukosam.”

⁷Mịn anị Kụrọmamgba Nyanaḅọ Ḅe ḍukoye-ẹ Idọm ḅụ: Idọm-a tomonima ini inia iḅi ḅẹrẹkọn ḅịpị wokumasa? Ini tetemapụ ma ini ḅarị ineda ini mịẹḅịaye ḍuko ini pịrịka? Inia nemi mamgba fasosa?

⁸Dẹdan-a tomoni, ọ́ pịkị se mangị! Ḅọị! Àrị Isọ ḅe ḅụ koroḅo apụma ḅaasinḅịa, anịatịḅị à fomuḅara se ini pịrịḅịa sịkị lasam.

⁹Owuapụ tụmgbakị elelenda kaịnḅịa sịkị, ini daye kọnma-kọnmamẹ chịn mị ḅụ, pịkị furuapụ ḍin ḅụ furuḅịa sịkị ini ḅiye kẹngẹ mị ini ọkịkịye-ẹ.

¹⁰Ọkụma Isọ ḅe furoḅie koroḅoapụ ma à gbọtụḅara ini se papaḅụsinsam pịkị inia ḅọịnyọ ma finjisam mịẹso sịkị ini ḅarị ineda ḅọị ẹka ḅara. Idọm-a tomoni mamgba à ḅaasam, kọn gbọrịḅọ ofori-ẹ.

¹¹Ọ́ daḅọ na nyengiḅọ na nyanaka awọmẹnịma ḅụ ḅarasin ị̀ pịrị, se àrị ini ḍikiḍikiḅịa. Ị́ya deapụ nyanakapụma ini ineda tọrụ se ị̀ ḍikiḅịa.

¹²“Nemikase fomuḅara da gbẹịnkapụ ma pembe fomuḅara da ọkụma, ị́ koroma ḅara, ị́rị́ re anị anịa ḅie pọkọḅịaye? Ẹn-ẹn, anị kọpụ ḅie iru ị́ ḅu nyanamẹ!

¹³Ị̀rị̀ na mịnaḅụ na, à ye karịfịsam na Bozra mị ḅo tomoni-a tọrụḅie ḅalafamaye na pịkị onwun ele na sọḅịa; tomoni anị se kpọti pịkị worinime se anịa ẹrẹ pịrịḅịa. Kpeki ịwọ ama mamgba sara sọ gbasoḅịa. Ị̀rị̀, Nyanaḅọ Ḅe, ḍukosam.”

¹⁴À ḅẹmẹ, “Idọm, à Nyanaḅọ Ḅe ḅara oku nyanaḅosam. Ori okunwẹngịḅọ fịrịmasam ḅo ḍuko sẹma pịrị ini inia owunima koḅiri se inia ḅụkarakarama se ḅo ị́ gbẹịnmachịẹ.

¹⁵Nyanaḅọ Ḅe, ọ̀ mịẹse ị́ lọkọḅịa se ị́ osiḅịa gbọrịḅọ sọ ofori-ẹ.

¹⁶Ị́ya opuayemịẹ mị oḅori-se-ị́-chịnsam. Ị́ ḍikiḅalafa gbọrịḅọ sọ ofori-ẹ, ị́ koromamẹ na ini ị́ ḍikiḅalafamẹ. Ị́ tụndụma aka angamẹ, gele tụndụ ọgọnọ; ọkụma ị́ igo gele ọkụ gele nyọ ḅụ angamẹ nwọḅẹ sọ, Nyanaḅọ Ḅe, ori ị́ iderimaḅoḅịa. Nyanaḅọ Ḅe ḍukosam.”

¹⁷Nyanaḅọ Ḅe ọkọ ḅẹmẹ, “Idọm laḅịa siye mị, anị ḅalafama so ọkụma, nwẹngị ḅọrọḅọ goyegoye ḅụkpiripu nyana se ḅalafaḅịa.

¹⁸Sọdọm na Gomọra na ḅụ paka gbọrịye anị Idọm ḅụ pakaḅịaye-ẹ, ini anị na, anị na kpeki amama kan sịkị. Gbọrịḅọ sọ ḅarị pịkị anịnyọ anga ẹkẹ. Ị̀rị̀, Nyanaḅọ Ḅe, ḍukosam.

¹⁹Chịrịḅa Jọdan Tọrụ aka opu piriḅie kan pakaḅo osuein ele la-ọkụ mị, à pakaḅo Idọm apụma mịẹse ini inia ama wẹrịso mangịḅịa ọkụ-ẹ ḅụnemika ḅụ. Anịsịkị à sẹlẹ tịḅịnịḅọ mị ḅo sẹ mị ḍikiḍikiḅịaye-ẹ. Tụḅọ ini nwọse ị̀ otoma ḅe? Tụḅọ ḅiekpọma ị̀rị̀na-pikia ḅe? Nde tịḅịnịḅọ ị̀rị̀ na tụḅụrụ ḅe?

²⁰Anịgose à tọn Idọm-a tomonima wẹrịma oku mị poki, pịkịna à tọn Timan opuama mị pịrịye na. Inia awọma pembe sọ à fọnọsinḅịa se nwenimgba ḅalafa nyanaḅịa.

²¹Idọm mị ḅịkị sa ḅẹḅẹ, nyọ mị fieḅịa ḅara, kirimgba jikeḅịa, pịkịna owu-a tịḅịḅie nweni nwọ naa mun Akaba Okolo mị laḅịa.

²²Tarakaḅọ ḅe, igo pamba finji ọkụ se koro Bozra mị gbẹịnmachịẹḅịa. Anị ene Idọm owunima, yi jikearị eremeniḅọ ḅalafa ọkụ se ḅalafaḅịa.”

²³Mịn anị Nyanaḅọ Ḅe ḍukoye-ẹ Damaskọs ḅụ: “Hamat na Apad na opuamama ḅie sime-a tomonima ḅụḅalaḅala na tọrụsiọrị na nyanamẹ, anịatịḅị ini si oku naasam. Kuḅie-chịẹ-chịẹ-chịẹ opu tọrụ ḅara se ini kelemasam, ini ḅarị ineda ịnyọsarakẹ.

²⁴Damaskọs-a tomonima ini kụrọkẹ, ḅalafa ḅụ ini mangịsosam. Ini ḅụakụ ḅụ na tọrụsiọrị ḅụ na ḅie omi-ẹ, yi àrị eremeniḅọ ḅara.

²⁵Ẹrẹsoso ḅieḅẹlẹ nyana-nyana opuama mị ini okorona okorona anị koroma mangịsosam.

²⁶Anị ene ini opuamama ateli ma ḅie inia asẹmẹnị ma ḅaaḅịa, se anịa owuni mamgba fịfamaḅịa.

²⁷À fịnị se Damaskọs onu ma ḅụ chụa se Amanyanaḅọ Bẹnhadad odo mị dọkịma kiri gbinḅịa. Ị̀rị̀, Kụrọmamgba Nyanaḅọ Ḅe, ḍukosam.”

²⁸Mịn anị Nyanaḅọ Ḅe ḍukoye-ẹ Kida sẹ ḅụ na Hezọ ḅe ḍikiḍikiarị nyọma ḅụ na, anị Babilọn Amanyanaḅọ Nebukadneza ḅe inuma nyọma: “Kida-a tomonima gbẹịnmachịẹ se anị ịrụapakapaka nyọ sẹ ḅie-a tomonima ḅaa!

²⁹Inia ikowarịma na, inia namama na, ikowarị-ḅọkọ-kiki-ḅịtẹ ma na, ikowarị ḅie simeye mamgba na, kọrị. Inia ike-nambuloma ọkị se ḍuko tomonima pịrị, ‘Ḅalafamaye óminemgba kelema waraḅẹ!’

³⁰“Hezọ-a tomoni, Ị̀rị̀, Nyanaḅọ Ḅe, ó ḅerijinemẹ na ọ́ mangị ḅọlọju mun ḅọị. Babilọn Amanyanaḅọ Nebukadneza ḅe ò ye ḅia ọ́ pịrịsam, pịkịna mịn anị ò ḍukoye-ẹ,

³¹‘Ó ḅo! Wa owu se ini dapakaḅịa anị ọkị na ini deinma kokoḅaraḅie omi-ẹ nwọ chịn apụma! Inia opuama mị anị ḅọkọ nyanakẹ anịkanịka igodo pịkịna anị ịkasịkẹ.’

³²“Inia ike-nambuloma na nama mamgba ọkị! Inia tịḅị inime kịrị iderima tomonima, àrị ini galagalamaḅịa nyọnyọ ḅie, se à ḅụfụka ọkịḅo inia ọgọnọ gbanaḅịa anganga ḅụ.

³³Hezọ mị anị onwun ele sọ gbasoḅịa, anị piri obiri kẹngẹ anga nyọ. Gbọrịḅọ sọ ḅarị jenejene anịnyọ anga ẹkẹ. Ị̀rị̀, Nyanaḅọ Ḅe, ḍukosam.”

³⁴Zẹdẹkaya ḅe ḅo Juda ama nyana ḅọrọ, ma ḅọlọka simeogbo mị Kụrọmamgba Nyanaḅọ Ḅe, ọkwẹịn ị̀ pịrịye-ẹ Ilam mị gbolomaye ḅụ.

³⁵Ori ọkọ ḅẹmẹ, “Ilam mị mịẹkụrọma lubu owuni mamgba, àrị ini ḅaaḅịa.

³⁶Nyọ mamgba ḅụ àrị irisi se Ilam sẹịnmaḅịa se àrị anịa tomonima galagalama nyọnyọ ma pịrịḅịa, ọkịmun jene ma ini laka nyọ paka ẹkẹ.

³⁷À mịẹḅịa, Ilam-a tomonima, ini ḅaa ḍọkị, inina-tarakapụma ini nwọ ḍikiḅalafa. Ị̀ya opu ịganị ḅụ àrị Ilam-a tomonima ḅaaḅịa, pịkịna owuni se ini sẹịnmaḅịa ọkịmun àrị inimgba gurosin sịkị la.

³⁸Àrị inia amanyanapụma na tịḅịnịma na ḅaasin se ị̀ya amanyana emine mị chịẹmaḅịa anịnyọ.

³⁹Ọkụma, ọḅụkọ à mịẹḅịa, Ilam-a tomonima ḅo pịkị mịẹyeḅarasọ nyana. Ị̀rị̀, Nyanaḅọ Ḅe, ḍukosam.”