Read kirikeni Jerimaya 50 Bible Online

Jerimaya 50 - kirikeni bible

Jerimaya 50

¹Mịn anị Nyanaḅọ Ḅe se ị̀ fịrịma oku-ẹ, Babilọn opuama mị na anịa tomonima na gbolomaye ḅụ:

²“Ḍukoaye ma ḍuko sẹma pịrị! Anị ḍukopakụma! Elekima pịrị se ḍukoaye ma ḍukopakụma! Anị se ḅọịma! Babilọn ḅịkịsam! Anịa oru Madọk mị ini anị dọkịmasam! Babilọn oru ma ini àrị se ḅụgerere ḅie chusam; ini kara ḅụngụngụmaye ma ini àrị kọsịmasam!

³“Gbọrị sẹ ọgọnọju ḅo Babilọn mị gbẹịnmachịẹḅịa, se anị se onwun ele mịẹḅịa. Tomoni na nama na mangị soḅịa, pịkịna gbọrịḅọ sọ anịnyọ anga ẹkẹ.”

⁴Nyanaḅọ Ḅe, ọkọ ḅẹmẹ, “Anị ḅo anịsịkị lasịkị, Izrẹl na Juda na tomonima ini owuḅịa, se ị̀ ḍọkịḅịa.

⁵Ini Zaịyọn mun ateli mị gbelaḅịa se ini anị pẹkẹrẹ da munḅịa. Ini ị̀rị̀ na simegbaso ọḅọkụ fịḅịa pịkị anị kan ẹkẹ.

⁶“Ị̀ya tomonima ini ḍikiḍikiḅọ ofori-ẹ se ini tụndụma ḅie gelegelefa anana kịkẹmẹ. Ini anana ḅara nwọse gbọrị tụndụ ḅụ ḅọrọ mun jịn tụndụ lamẹ, se ini inia warịma sime nyọma se ḅieḅaramasam.

⁷Ini ḍọkịḅo ọrịapụ goyegoye owu se ini pakamẹ. Inina-tarakapụ ma ọkọ ḅẹmẹ, ‘Ini Nyanaḅọ Ḅe ḅụ si mịẹmẹ, anịgose wa mịẹsaye mị irimayekẹ. Inia ḅieju-aḍapụma kuḅie-se Nyanaḅọ Ḅe ḅụgbanamẹ, anị ini sọ mgbọkụ kuḅie se ọḅụ gbanaḅịa ọkụ-ẹ.’

⁸“Izrẹl-a tomoni, ọ́ mangị Babilọn ḅụ ḅụsikima! Sẹ mị ḅie ó so! Ọ́ tatarị so!

⁹Àrị ọgọnọju mun kụrọ-a sẹma tomoni kpo gboḅịa se, ini mịẹḅịa iniḅo Babilọn mị gbẹịnmachịẹ. Ini owu ḅụ sụngụma chịẹ se, owu se sẹ mị pakaḅịa se anị inumaḅịa. Ini anị, tọrụkwein namatẹịn-ḍin-apụ-ẹ, pịkị gbarị-gbarịka ḍẹịn-tẹịn-ḍin-apụ-ẹ.

¹⁰Babilọn mị, ini anị ọfọịnḅịa, pịkịna anị ọfọịn apụma, ini ḅiyeḅiye, ini ọkịḅịa. Ị̀rị̀, Nyanaḅọ Ḅe, ḍukosam.”

¹¹Nyanaḅọ Ḅe ọkọ ḅẹmẹ, “Babilọn tomoni, ómine ị̀ya sẹ mị ọfọịnmẹ. Ó ḅieḅẹlẹ nwẹngịma ḅọrọaḅẹ, nambulo mgbọlụ-a-fịye nangama ḅọrọ ọkụ anịkanịka asụn olokuma ḅọrọ ọkụ,

¹²ọkụma ọ́mịna opuama mị, ini anị mịẹiderimaḅịa, pịkị anịa ḅụgereremaḅịa. Babilọn mị ḅo yeḅụsọkatẹịn sẹ nwọ sọḅịa, sẹ mamgba ḅụ; anị ḅo mengi nyanaka samịna onwun ele sọḅịa.

¹³Ị̀ya ịganị gose, gbọrịḅọ sọ Babilọn ḅie ḅarị anga ẹkẹ; anị sara sọḅịa, pịkị anịanga ḅọrọ apụ goyegoye ḅụkpiripu nyanaḅịa pịkị ḅalafa nyanaḅịa.

¹⁴“Ḍẹịn-tẹịn-tẹịn-owuapụ, ọ́ sụngụma chịẹ, Babilọn na dama pịkị anị kelema. Ọ́mịna lubu mamgba ó se Babilọn da tẹịn anịatịḅị ini Ị̀rị̀, Nyanaḅọ Ḅe ḅụ si mịẹsam.

¹⁵Owuni oloku mị paịn-pakụma opuama mị kelema! Mịọkụ Babilọn mị anị ḅaradekichịẹmasam. Anịa onu agbagba ma ini tolusọsam se ini àrị kangbinsam. À Babilọn apụma ḅara ị̀ya sowuḅiaḅẹ, se ini se jịn apụ mịẹọkụ se ini mịẹ-aḅẹ.

¹⁶Ó ḅerenima fịayemgbọlụ anị sẹ ḅie ini nwọ ḍipi anịkanịka fịaye soku koḅirima. Anịnyọ anga àrị igoniḅọ goyegoye, owupakarị owunima ḍikiḅalafa ḅụ so iniḅọ ama munḅịa.”

¹⁷Nyanaḅọ Ḅe ọkọ ḅẹmẹ, “Izrẹl-a tomonima, ini chịrịḅa ḅe ḍuko galagalamarị anana sime ọkụ simemẹ. Tatarị, Asiria sẹdaḅọ ḅe ini gbẹịnmachịẹmẹ, anịeso, Babilọn Amanyanaḅọ Nebukadneza ḅe inia ịmgbema tokurumẹ.

¹⁸Mịn mị tịḅịgose, Ị̀rị̀, Kụrọmamgba Nyanaḅọ Izrẹl Tamụnọ Ḅe, à fomuḅara se Amanyanaḅọ Nebukadneza ḅe na oria sẹ mị na pịrịḅịa, anị à fomuḅara se Asiria sẹdaḅọ ḅe pịrịọkụ.

¹⁹Àrị Izrẹl-a tomonima pịkịma mun inia ama ḅie koromaḅịa. Ini Kamẹl tụndụ kiri ọgọnọ pakaḅo fịye nwọ fịḅịa anị Bashan pẹkẹrẹ nyọ ḅụ, se ini pịkị ini ḍọkị fịye ọrụ ḅara Ifrem na Giledị na nyọma ḅụ pakaye nwọ fịḅịa.

²⁰Anịsịkị mị ḅo laḅịa sịkị, nweni ḅarị si mịẹye ọrị ẹkẹ Izrẹl ḅie, pịkị sitịḅị ọrị ẹkẹ Juda ḅie, anịatịḅị à si-wẹrịso ini pịrịḅịa, inia ḍumo ma à nwọ ḍụasapụ ma. Ị̀rị̀, Nyanaḅọ Ḅe, ḍukosam.”

²¹Nyanaḅọ Ḅe ọkọ ḅẹmẹ, “Mẹrateim na Pẹkọd na tomonima ini gbẹịnmachịẹ. Ini ḅaa pịkị ini sima. À tọn ị́ pịrịye goyegoye ye. Ị̀rị̀, Nyanaḅọ Ḅe, ḍukosam.

²²Owuni tịḅịḅie fiemẹ ama ḅie pịkịna ḅakama yesima omi-ẹ.

²³Babilọn mị amana se bebe sẹkiri mgba kọsịmamẹ, mịọkụ anị amana mị anị kọsịsam! Sẹ mamgba ḅụ kpịrịpụmẹ, anị sẹ ḅụ pakaye gose.

²⁴Babilọn, ị́rị́ ị̀rị̀ na owu sọmẹ, mịọkụ à tu ị́ pịrị ḍẹịn ḅie àrị ị́ kunsam, ị́ anị nemika sọ.

²⁵Àrị ị̀ya owuniayema se koroma nyọ, à finjisam se à àrị sinpakụmasam ị̀ya ịganị ḅụ, anịatịḅị Ị̀rị̀, Geletẹịn Kụrọmamgba Nyanaḅọ Ḅe Babilọn ḅie à nwẹngịḅịa fịrị nyanamẹ.

²⁶Anị gbẹịnmachịẹ ḅọkọḅọkọ ḅụ mamgba, se ini mgbọlụ fịaye mamgba koko-a nyọma kan finji! Fịayemgbọlụ koḅirima kpelu ọkụ ọkọse kọrịḅoaye ma chiri-chiri ḅụ àrị kpelu koroma. Sẹ mị kan! Gbọrịye sọ ḅarasinma ngịsị!

²⁷Inia owuni mamgba ḅaa! Ini pẹlẹkọsịma! Babilọn tomonima ḅẹrẹ inia ḅụ pakasam! Sịkị mị ḅosam ini fomuḅara ḅie sọḅịa sịkị mị!”

²⁸(Ịnyasọ-apụ Babilọn ḅie ọ́ pịọrụ paka Jerusalẹm ḅo se ó ḍuko Nyanaḅọ mịna Tamụnọ Ḅe, ḅara-wẹrịma gbẹịn-fịye fịọkụ, ini Babilọn apụma ḅụ, ini se oria Oputẹkẹwarị mịẹye gose.)

²⁹“Ḍuko lubu-tẹịn-apụ ma pịrị ini owu se Babilọn paka. Lubu na ḍẹịn na fịrị nemi apụ mamgba fịrịma pakụma. Opuama mị ḍẹkịkelema se ḅerenima se gbọrịḅọ sọ pịọrụ paka. Ini mịẹye mamgba se ini gbẹịn, se ini se jịn apụ mịẹ ọkụ nwọse ini mịẹ, anịatịḅị ini opuaye mịẹ ị̀ pịrịmẹ, Osiḅụ sime Izrẹlḅọ Ḅe.

³⁰Anị ini asẹmẹnị ma ḅaaḅịa ọkụ-ẹ opuama mị ateli ma ḅie, pịkịna owuni mamgba ini ini simaḅịa anị gbọrị ene ḅie, Ị̀rị̀, Nyanaḅọ Ḅe, ḍukosam.

³¹“Babilọn apụ opuamịẹye ị́ ḅụ ḅeinmẹ, anịgose Ị̀rị̀, Geletẹịn Kụrọmamgba Nyanaḅọ Ḅe àrị ị́rị́ na tụḅụrụmẹ! À fomuḅara se ị́ pịrịḅịa sịkị mị ḅo lasam.

³²Ị́ya opuaye mịẹ sẹ mị anị tọmbụlọ se ḅịkịḅịa, pịkị ị́ dekichịẹmaḅịaḅọ ofori-ẹ. À fịnị se ị́ya opuamama ḅụ chụaḅịa, se àrị kelemaye goyegoye sifaḅịa.”

³³Kụrọmamgba Nyanaḅọ Ḅe, ọkọ ḅẹmẹ, “Ini Izrẹl na Juda-a tomonima pụndamẹ. Ini kun apụ mamgba ini kapụma ini ọlọmẹ mịẹso sịkị ini so ẹka ḅara.

³⁴Ọkụma ini ḍụaḅịaḅọ ḅe ọ̀ kụrọmẹ oria ẹrẹ anị Kụrọmamgba Nyanaḅọ. Ori na mịnaḅụ na inia ḅụfụka da ọkị se dein ọkị tomonikiri ḅo ḅịa, ọkụma tọrụsiọrị sime Babilọn apụma pịrị.”

³⁵Nyanaḅọ Ḅe ọkọ ḅẹmẹ, “Fị sime Babilọn pịrị! Fị sime anịa tomonima pịrị, anịa ḅẹrẹtọn apụ, anịa nemi nyana owuapụ.

³⁶Fị sime anịa iruokọn-arị ịkịankoroapụma pịrị— ndende sime oḅori apụ! Fị sime anịa owunima pịrị— ndende sime ḅalafa nyanapụ!

³⁷Kankọsị sime anịa asụnma pịkị kporokporoma na pịrị! Fị sime ini ọkọ owunima pịrị— ndende sime ḅụlọkọ apụ! Anịa ngọ kokowarịma sima; guluguluma pịkị ọfọịn.

³⁸Ịrụakpoin ọkịḅo anịa kiri pịrị se anịa tọrụ ma samịnama. Babilọn anị ḅalafama oru ama-ẹ tomonima se oḅori chịẹmaye ma.

³⁹“Anịḅụ sitẹmẹ na oru na Babilọn ḍukoḅịa, pịkịna fịafịaka feni na. Jenejene tomoni ḅarị pịkị anịnyọ anga ẹkẹ, ḅoḅịa sịkị mamgba.

⁴⁰Sọdọm na Gomọra na ḅụ pakaye ma anị pịkị Babilọn ḅụ pakaḅịaye-ẹ, àrị na kpeki amama na àrị na à nwọ kan sịkị. Gbọrịḅọ sọ ḅarị anịnyọ anga ẹkẹ. Ị̀rị̀, Nyanaḅọ Ḅe, ḍukosam.

⁴¹“Tomoni ọgọnọju gbọrị ama ḅie ḅoaḅẹ; nanga-nanga ju opu sẹ-ẹ; ḅaka amanyanapụ ḅụkarakarama owu pịrị aḅẹ.

⁴²Ini inia lubu ma na kongo ma na ọkịsam; ini akụ kuḅie nyanamẹ pịkị ḍikiḅụgerere nyanakẹ. Fiearị tọrụ kịkẹ ḅara mị ini fiearịye, inia asụnma ini nwọ dọkụarị sịkị. Ini ḅụkarakaramasam Babilọn na ọmụgbinḅịa gose.

⁴³Babilọn amanyanaḅọ ḅe ḅẹrẹ ma ọ̀ naamẹ, ọ̀ ḅarama kẹkụmẹ. Opu ḅalafa oria oju ḅaamẹ, ọ̀ ḅalafamẹ yi jike àrị eremeniḅọ ḅara.

⁴⁴“Jọdan tọrụ aka opu piriḅie kanpakaḅo osuein ḅie sọ chịrịḅa ḅe ọkụ, mị Ị̀rị̀, Nyanaḅọ Ḅe, à pakaḅo Babilọn apụma mịẹḅịa se ini ḅụnemika ḅụ, inia opuama mị ḅie ḅụ mangị sọḅịa. Anịsịkị à sẹlẹ tịḅịnịḅọ ḅe sẹ mị ḍikiḍikiḅịa. Tụḅọ ini ineda nwọse ị̀ otomaḅe? Tụḅọ dana ị̀rị̀ na piki-a ḅe? Che ḅẹrẹtọnḅọ ị̀rị̀ na tụḅụrụḅe?

⁴⁵Anịgose à tọn Babilọn opuama pịrị, pịkị se anịa tomonima mịẹḍọkịye ọ́ nwọ poki. Inia awọma sọ, àrị ini fọnọsinḅịa se anị nwenimgba ḅalafamaḅịa.

⁴⁶Babilọn ḅịkịḅịa sịkị, nyọ mị fie so ọkụma amakiri mị jike mun nyọnyọ mamgba laḅịa se oloku-a tịḅịḅie ma ísí-a sẹma àrị naaḅịa.”