Read kirikeni Jerimaya 51 Bible Online

Jerimaya 51 - kirikeni bible

Jerimaya 51

¹Nyanaḅọ Ḅe ọkọ ḅẹmẹ, “À yesima fọrụ ọkịḅo aḅẹ se Babilọn na anịa tomonima na dapaka.

²Àrị igoniapụ se Babilọn sẹịnmaḅịa, ini anị kan, fọrụ osirosiroḅa ofurosin ọkụ. Anị yesima ene mị ḅo lasịkị, ini ḅọkọḅọkọ ḅụ anị gbẹịnmachịẹḅịa se ama mị se kpọngọlọma koromaḅịa.

³Sịkị se anịa owunima pịrịma ini ẹmbẹ nyana inia ḍẹịn ma tẹịn, anịkanịka inia owuni ḅụchụayema chụa. Ómine inia asẹmẹnị ma wẹrịsoma! Bebe owuni ogbo mị mgba ḅaa!

⁴Ye ini laḅịa se inia opuama ateli ma ḅie ini ini ḅaasinḅịa.

⁵Ị̀rị̀, Kụrọmamgba Nyana Tamụnọ Ḅe ma àrị Izrẹl na Juda na sarakoromakẹ, ini ị̀ ḅụ simịẹsam nwọḅẹ sọ, Osiḅụ sime Izrẹlḅọ Ḅe.

⁶Babilọn ḅie ọ́ mangị so! Ọ́mịna ḍumo gose ọ́ mangị! Ini ọ́ ḅaama Babilọn mịẹ sima gose. À mịọkụ ị̀ya sowu ḅiḅịa se fomuḅara se anị pịrịaḅẹ anị gbẹịn ḅaraḅụ.

⁷Babilọn mị anị ị̀ ḅara ḅie goli-goli kọpụ kịkẹmẹ, iru tọrụsọ-ḅara-se bebe sẹkirimgba mịẹ-aḅẹ. Sẹ ma anịa iru mị ḅumẹ se inia kuḅie ḅarị yekoromakẹ.

⁸Babilọn mị anị ḅụnemika ḅaraḅụ ḅịkịsam pịkị kansam! Ḍụẹịn ḍin anị pịrị! Ḍiri ọkịḅo anị la ayema gose, nwọfa ini ineda anị gwọḅịa-ẹtuḅo.

⁹Anịnyọ anga igoniapụma ọkọ ḅẹmẹ, — ‘Wa ḅụkụrọma ḅarachụa Babilọn mị pịrịmẹ, ọkụma sịkị opuma ḅarị ofori-ẹ. Ó ye wa mịọkụ vinpịkị so warị mun. Tamụnọ Ḅe oria kụrọmgba ọ̀ nwọse fomuḅara se Babilọn mị pịrịsam ọ̀ pịkị gbọtụma anị kansam.’”

¹⁰Nyanaḅọ Ḅe ọkọ ḅẹmẹ, “Ị̀ya tomoni, ómine oloku, ‘Nyanaḅọ Ḅe ò ḍiepakụmasam na wa karakara ḅie omi-ẹ. Ó ye wa mun ḍuko tomonima pịrị Jerusalẹm ḅie, Nyanaḅọ mịna Tamụnọ Ḅe mịẹsa ye.’”

¹¹Nyanaḅọ Ḅe ò Midia amanyanapụma jike-sịsẹmasam anịatịḅị ọ̀ tọnmẹ ọ̀ Babilọn mị kanḅịa. Anị ḅaraḅụ anị ọ̀ ḅara-wẹrịma ini kan oria Oputẹkẹwarị mị tịḅị-so-owu ḅiḅịa ọkụ-ẹ. Owusọarị tịḅịnịma tọnmẹ, “Ọ́ ḍẹịn ma farị! Ọ́mịna agbọ ma ọ́ nwọ karakarama!

¹²Elekima mị pịrị ini Babilọn onu ma gbẹịnmachịẹ. Nyọkoruapụ ma mịẹkụrọma! Nyọkoru-owuni ma se kirikiriḅụ koroma! Ḅọịma owu pakaḅịa owunima karakarama!” Nyanaḅọ Ḅe, ọ̀ tọn na ò se Babilọn-a tomonima mịẹḅịaye mị, ori anị mịẹsam.

¹³Anị sẹ mị, anị tọn-a tọrụ na ngọ na nyanamẹ, ọkụma anịa sịkị karasam, pịkịna anịa ḍumo ḍiki pẹlẹsam.

¹⁴Kụrọmamgba Nyanaḅọ Ḅe, oria ḍumo se yekarịfịsam, na ọ̀ tọn-a owuapụ ọkịḅo Babilọn mị gbẹịnmachịẹḅịa, igurube ogbo ḅara, se ini ọmụḅaraiḅi ḅụ olokuḅịa.

¹⁵Nyanaḅọ Ḅe oria kụrọ ḅụ tomonikiri mị tẹmẹmẹ; oria nemi ḅụ ọ̀ sẹkiri mị tẹmẹmẹ pịkị so ma finjimamẹ.

¹⁶Ọ̀ tọnḅara ḅụ, so ọgọnọ mengi ma ekereamẹ; tomonikiri ḅe kuluma nyọ ḅụ ò soḅuno ma ọkịḅomẹ. Ọ̀ mịẹse eneḅie so wakam ḅịamẹ pịkị oria yekoko nyọ ḅụ fọrụ fịrịma pakụma.

¹⁷Mị ye mị ọrị ḅụ, tomoni oḅori sọ pịkị koroma nyanakẹ; oru tẹmẹ apụma ini ḅụgerere ḅie omi-ẹ, anịatịḅị ini tẹmẹ oru ma iruoaye-ẹ arịa ḅie ḍumo ofori-ẹ.

¹⁸Àrị yeḅụofori ḅaraḅụ ḍikisima na gbẹịnmẹ; ini àrị simaḅịa Nyanaḅọ Ḅe ḅo àrị na sọḅịa sịkị.

¹⁹Jekọb Tamụnọ Ḅe ori àrị kịkẹkẹ; ori anị yemamgba mịẹḅọ ḅe-ẹ, ọ̀ pịkị Izrẹl sẹlẹ ọkịsam oria jokoma tomoni ḅaraḅụ. Kụrọmamgba Nyanaḅọ anị oria ẹrẹ-ẹ.

²⁰Nyanaḅọ Ḅe ọkọ ḅẹmẹ, “Babilọn, ị́rị́ anị ị̀ya amana-ẹ, ị̀ya ọmụsọaye. Àrị ị́ se sẹ na amanyanakiri na kọsịmamẹ,

²¹se asụn na asụn dọkụ apụ na kan, se kporokporo na dọkụ apụ na kan,

²²se ama na ere na ḅaa, se olomu na asẹ na pẹlẹ kọsịma, se owuapụ awọ na eremeni awọ na ḅaa,

²³se ananaḍikiḍikiapụ na inia anana ogboma na kẹnịḅa, se ozukọrị apụ na inia fịrịnwẹngị asụnma na kẹnịḅa, se ḅẹrẹtọn apụ na gele fịrịnwẹngịapụ na kọsịma.”

²⁴Nyanaḅọ Ḅe ọkọ ḅẹmẹ, “Ómine ị̀ ọrịḅịa, à Babilọn na anịa tomonima na se Jerusalẹm mịẹ siaye mamgba, à nwọ pịkị ini gbẹịn ọkụ.

²⁵Babilọn, ị́ sẹkirimgba sima gbọrị tụndụ kịkẹmẹ, ọkụma, Ị̀rị̀, Nyanaḅọ Ḅẹ, anị ị́rị́na-tarakaḅọ-ẹ. Àrị ị́ ọlọḅoḅịa, se ị́ mịẹ ị́ kiri na karakaraḅịa se ị́ se fọn mịẹḅịa se ị́ wẹrịsoḅịa.

²⁶Ọ́mịna kansara-nyọ ḅụ ḍụparịma ini ḅarị se warị nama ẹkẹ. Ị́ onwun ele kịkẹ gbasoḅịa. Ị̀rị̀, Nyanaḅọ Ḅe, ḍukosam.

²⁷“Owupaka elekima mị pịrị! Oḍu mị ofuro mịẹso sịkị sẹma ineda naaḅịa ọkụ! Sẹ ma karakarama àrị Babilọn na owusọ! Ḍuko Ararat na, Mịnị na, pịkị Ashkẹnaz na amanyanakiri ma pịrị ini owu se anị paka. Fịrịnwẹngịḅọ tọn iniḅọ owukụlọda. Igurube ḅara nwọse asụnma ọkịḅo.

²⁸Sẹ ma karakarama àrị Babilọn na owusọ. Midia amanyanapụma fịrịmaḅo, inia tịḅịnịma na fịrịnwẹngịapụma na, pịkị ini ḅẹrẹtọn pịrị àrị owuni ogboma na.

²⁹Tomonikiri mị anị geregere pịkị jikemẹ anịatịḅị Nyanaḅọ Ḅe ọ̀ tọnye ọ̀ nwọ mịẹpakụmaḅẹ, na ọ̀ Babilọn mị mịẹse anịḅo onwun ele sọḅịa, tomoniḅọ anga ẹka nyọ.

³⁰Babilọn owunima, owusọḅụ ini dachịẹsam se ini inia owuni-a kụrọ warịma ḅie sọsam. Inia kuḅie kụrọ fasam se iniḅo eremeni kịkẹsam. Opuama ma ḅọkọ ma ini sumagbinsam pịkị orumo warịma ḅụ pakasam.

³¹Okunwẹngịapụ ma ḍuko jụmḅọ jụmḅọ pịrị se mun ḍuko Babilọn amanyanaḅọ ḅe pịrịaḅẹ na oria opuama mị ḅie ini kansọsam ḅọkọḅọkọ mamgba ḅụ.

³²Tarakapụ ma tọrụ saḅa nyọ mị kun ọkị se fịnị se owuni-a kụrọ warịma ḅụ chụasam. Babilọn owunima ḅalafa inia ḅụ sọsam.

³³Ḅọlọ ẹkẹ, tarakapụma ini pẹlẹgbin se, mgbọlụfịye nanga nyọ ḅara, se ini nangaḅịa. Ị̀rị̀, Kụrọmamgba Nyana Izrẹl Tamụnọ Ḅe ḍukosam.”

³⁴Babilọn amanyanaḅọ ḅe Jerusalẹm pẹlẹ se anị pẹịmẹ. Ojongo kụnụnụ ḅara se opuama mị kụnụnụmẹ; ojuju ye mịnị ḅara ori anị mịnịmẹ. Ori ọkị ḍọkịye nwọ ọkị se kọnye se gbin wokumamẹ.

³⁵Ye Zaịyọn-a tomonima ḅẹ, “Ye ini Babilọn ọlọ ini se wa mịẹ kụrọaye ma gose!” Ye Jerusalẹm-a tomonima ḅẹ, “Ye ini Babilọn ọlọ wa ọrịsa tọrụsiọrị ma gose!”

³⁶Anịḅụ Nyanaḅọ Ḅe Jerusalẹm-a tomonima ḅẹmẹ, “Àrị ọ́mịna ḅẹrẹ mị ọkị se ómine na tarakapụma mịẹḅịa ini se ọ́ mịẹye ḅụ ye se ọ́ gbẹịnḅịa. À Babilọn mengi mị sakị nyọ anị samịnamaḅịa se anịa tọrụ ma mịẹsamịnamaḅịa.

³⁷Anị sẹ mị anịḅo piriḅie owoi-a nama anga opu sara sọḅịa. Anị tomoni-a tọrụḅie opuma ḅalafamaye sọḅịa; gbọrịḅọ sọ anịnyọ anga ẹkẹ, pịkị anị ọrịapụ mamgba ḅalafa nyanaḅịa.

³⁸Babilọn apụ mamgba chịrịḅa ḅe oloku ọkụ olokumẹ, se chịrịḅa awọ ḅara se ḅiedemẹ.

³⁹Ini opu fịye ḍọkị? Àrị alalị fịye koroma ini pịrịḅịa se àrị ini mịẹḅịa ini iruḅu tọrụḅaama se ḅieḅẹlẹḅịa. Ini mun mọnọ se ḅarị sịsẹ ẹkẹ.

⁴⁰Àrị ini ọkịmun se ini anana na oḅori na ajirima na pẹlẹ ḅara se ini pẹlẹḅaaḅịa. Ị̀rị̀, Nyanaḅọ Ḅe, ḍukosam.”

⁴¹Nyanaḅọ Ḅe Babilọn ḅụ ọkọ ḅẹmẹ, “Bebe sẹkirimgba tokoni opuama mị, ini anị kun-ọkịsam! Nde Babilọn mị ḅo sẹma tọrụḅie ḅalafamaye sọ ọkụ!

⁴²Tọrụ mị anị imbibile Babilọn ọgọnọ gbanasam se ịganịarị ambura anị gbẹịnsam.

⁴³Ama ma àrị ḍikitọrụ ḅụ ḅalafamaye sọsam pịkị mengi nyanaka onwun ele sọsam, tomoniḅọ angaka pịkị nwẹngị ḅọrọka nyọ.

⁴⁴À fomuḅara se Bẹl, Babilọn oru ḅe pịrịḅịa, se àrị ọ̀ mịẹḅịa ò furu ngọma ọ̀ nwọ pakụmaḅoḅịa, sẹma ḅarị ngịsị ọ̀ tẹkẹ ẹkẹ. “Babilọn onu-agbagba ma ḅịkịsam.

⁴⁵“Izrẹl-a tomoni anịnyọ ḅụ ọ́ mangị so! Ị̀ya kụrọ ịganị ḅụ ọ́mịna ḍumo gose, ọ́ mangị.

⁴⁶Ó kuḅie lọkọmama anịkanịka ḅalafama ini ḍuko ọ́ naa iriaḅa ma ḅụ. Kụra goyegoye kịrị iriaḅa finjimaḅịa—ama ḅie kụrọkụrọ-amịẹmịẹye ḅe iriaḅa, pịkịna gbọrị amanyanaḅọ jịn amanyanaḅọ na owusọ.

⁴⁷Anịḅụ à Babilọn oru ma na yemịẹḅịa sịkị ḅoaḅẹ, ini sẹ mị mgba se ḅụgerere ḅie chuḅịa, pịkịna anịa tomoni mamgba ini ini ḅaaḅịa.

⁴⁸Tomonikiri na soḅie na simeye goyegoye ḅieḅẹlẹ ḅụ olokuḅịa Babilọn mị ḅịkị ọgọnọju ḅo anị kanḅịapụ ma pịrịḅịa sịkị.

⁴⁹Babilọn mị anị mịẹse tọn-a tomoni sẹkiri fịye-ẹ, mịọkụ Babilọn mị ḅịkịḅịa, anịatịḅị anị mịẹse tọn-a Izrẹlapụ fịmẹ. Ị̀rị̀, Nyanaḅọ Ḅe, ḍukosam.”

⁵⁰Nyanaḅọ Ḅe Babilọn ḅie sime oria tomonima ḅẹmẹ, “Ọ́ fị ḅie pịọrụ sosam! Mịọkụ ó so! Ó koruma! Ómine ọ́mịna ama ḅụ sasasọ, ómine ị̀ se koroma ḅụ chu, ómine Nyanaḅọ Ḅe, ọ́ pịkịna Jerusalẹm se ḅiekoroma.

⁵¹Ómine ọkọ ḅẹmẹ, ‘Ini mịna ḅụgereremasam se mịna tọrụ simasam; wa jokoma ḅarị ḅarachụa ḅọ nyanakẹ, anịatịḅị igoniapụ Oputẹkẹwarị ḅie osi nyana kirima ọkịsam.’

⁵²Anịọkụma, à ḅẹmẹ na sịkị mị ḅoaḅẹ à Babilọn oru ma na sọḅịa sịkị, se yelapụ ma ini ḅiefie sẹ mị kelemaḅịa.

⁵³Babilọn mị nemikase tanjị mun soḅie kụrọ owuni warị nama sọ, à pa pịkị tomoni se sẹịnḅịa ini mun anị kan. Ị̀rị̀, Nyanaḅọ Ḅe, ḍukosam.”

⁵⁴Nyanaḅọ Ḅe ọkọ ḅẹmẹ, “Babilọn ḅie owu tịḅịḅie poki, ama ḅie siaye ma gose ḅe-ḍụẹịn-ḍin.

⁵⁵À Babilọn kan aḅẹ, pịkị anị mịẹ yawụma aḅẹ. Owuni ogbo kan sọmẹ ekerea àrị ambura ḅara se nyọfiema ḅara se anị gbẹịnmachịẹmẹ.

⁵⁶Iniḅo Babilọn kan-ẹḅomẹ; anịa owunima ini ini kunmẹ, pịkịna inia lubu ma anyịmamẹ. Ị̀rị̀ anị fomuḅara se siye pịrịpịrị Tamụnọ-ẹ, à pịkị Babilọn mị gbẹịn ḅara se anị na angaḅịa.

⁵⁷À mịẹḅịa anịa ḅẹrẹtọn apụma iru inia tọrụ sọ— nemi nyana owuapụ, tịḅịnị na, owuni na. Ini mun mọnọḅịa se ḅarị sịsẹ ẹkẹ. Ị̀rị̀, amanyanaḅọ ḅe, ḍukosam; Ị̀rị̀, anị Kụrọmamgba Nyanaḅọ Ḅe-ẹ.

⁵⁸Opuma kụrọ Babilọn mị onu-agbagba ma ini àrị suma kiri gbinḅịa, se arịa gele onu ḅọkọ ma ini dọkịma koromaḅịa. Sẹ ma ḅe-a-fịrị ma papaye sọmẹ; inia ịnyọ ma iwo fịnị ḅẹlẹḅie famẹ. Ị̀rị̀, Kụrọmamgba Nyanaḅọ Ḅe, ḍukosam.”

⁵⁹Amanyanaḅọ Zẹdẹkaya ḅe ḅiekoruḅọ ḅe anị Sẹraịya ḅe-ẹ, Neraya tọkụ ḅe, pịkị Measaya tọkụ ḅe yaḅe. Zẹdẹkaya ḅe Juda amanyana ḅe inein-karama kụra ḅie, Sẹraịya ḅe na ori na Babilọn mun aḅẹ, anị à yetọn se ọ̀ pịrịye-ẹ.

⁶⁰Ḅo Babilọn mị laḅịa ḅụfụka mamgba pịkị ma jịn-aye mamgba Babilọn ḅụ à nwọ gịẹịnmẹ gbọrị ḍiri ḅie.

⁶¹À Sẹraịya ḅe ḅẹmẹ, “Ị́ mun Babilọn lasịkị ḍọkịḅo ọrị kụrọma na mịanga gịẹịnye goyegoye, ị́ oloku pụkọ se anị go tomonima pịrịmẹ.

⁶²Anịeso, tẹkẹ, ‘Nyanaḅọ, ị́ ḍukosam na ị́ mị nyọ mị kanḅịa, mịẹso sịkị gbọrị ḍumoarịye sọ anịa ḅie anga ẹkẹ, mbuḅọ anịkanịka nama, anị pịkị onwun ele kịkẹ gbasoḅịa.’

⁶³Sẹraịya, ị́ mị ḍiri go nweni ma pịrịsosa ḅẹḅẹ, anị ọkị gbọrị ḍụparị ḅụ kpọ se anị se Yufretis Tọrụ ḅie gbin,

⁶⁴se ḅẹ, ‘Mịn anị Babilọn ḅụ pakaḅịaye-ẹ—anị ḅileḅịa se ḅarị pakaḅo ẹkẹ, anịatịḅị Nyanaḅọ Ḅe se Babilọn pịrịḅịa ḅụfụka ma gose.’” Jerimaya ḅe ọkwẹịn ma mịọ anị àrị kulumaye-ẹ.