Read kirikeni Jerimaya 52 Bible Online

Jerimaya 52 - kirikeni bible

Jerimaya 52

¹Zẹdẹkaya ḅe sigbọrị kụra fịnjị mị ọ̀ la se ò ḅo Juda Amanyanaḅọ sọye-ẹ, ọ̀ pịkị oyigbọrị kụra fịnjị nwọse Jerusalẹm ḅie ḅẹrẹtọnmẹ. Nyọngọrọ ma ẹrẹ anị Hamutal, Libna opuama ḅie anga Jerimaya ḅe oria eremeni tọkụ ma.

²Amanyanaḅọ Zẹdẹkaya ḅe, ọ̀ Nyanaḅọ Ḅe ḅụ simịẹmẹ, anị Amanyanaḅọ Jẹhoịakim ḅe mịẹọkụ mị.

³Nyanaḅọ Ḅe ò ḅo opu ịganị nyana Jerusalẹm na Juda na-a tomonima pịrịso ọkụma, ori ini desinmẹ ọ̀ tọrụkuḅu. Zẹdẹkaya ḅe ọ̀ kọngọ kụrọma Babilọn Amanyanaḅọ Nebukadneza ḅe pịrịmẹ,

⁴anịẹrẹchị Nebukadneza ḅe Zẹdẹkaya ḅe Amanyanaḅọ ḅe esenie-karama kụra ḅụ, oyi karama akalụ ḅie, oyi-a ḍin ene ḅụ, oria owuni ogbo mamgba nwọ ọkịmun Jerusalẹm gbẹịnmachịẹmẹ. Ini opuama mị ḅụ sikima tọn-a ikowarị nama ama mị kelemamẹ,

⁵se furu ọmụ se opuama mị paka-paka-paka nweni mun Zẹdẹkaya ḅe ama nyana ḅe oyigbọrị kụra fịnjị karama kụra mị lamẹ.

⁶Se anị gbọrị kụra ḅie, inein karama akalụ ḅie esenia-a ḍin ene ḅụ ḅuru ḅo ama mị ḅaaso-ọkụma, anị ene fịfịye ḅarị ofori-ẹ,

⁷mị onu-agbagba ma ini nwọ kantoluye-ẹ. Babilọn apụma ini opuama mị kelemamẹ nwọḅẹ sọ, owuni mamgba ini mangị somẹ ḍin ḅụ. Amanyanaḅọ ozu ḅie mị ini kanaḅọrọ mun mama onu-agbagba ma gboloma-onu-ḅọkọ-ḅụ ḅọrọ mun Jọdan Pẹsịkiri nyọ la ateli ḅụ mangịsoye-ẹ.

⁸Ọkụma Babilọn owuni ogbo mị Amanyanaḅọ Zẹdẹkaya ḅe ḍuko mun ò kunmẹ Jẹriko-a chịngịma na kpeki nyọ ḅụ, se oria owuni mamgba ò koromasomẹ.

⁹Ini ori ọkị Amanyanaḅọ Nebukadneza ḅe damamunmẹ Ribla opuama ḅie, Hamat eke ḅie, se anịju mị Nebukadneza ḅe ḅẹrẹpẹlẹ ọ̀ pịrịye-ẹ.

¹⁰Ribla ḅie mị ini Zẹdẹkaya ḅe oria owuapụ awọma ḅaaye-ẹ Zẹdẹkaya ḅe ori ini ḍikiarịogbo, pịkịna Juda ḅie oria fịrịnwẹngịapụma tịḅị pẹlẹsinye-ẹ.

¹¹Anị ḅọrọso, mị ini Zẹdẹkaya ḅe tọrụmgbọlụma sọkị se ikoli se ori ịkasị se ò se Babilọn sẹịnmẹ, Zẹdẹkaya ḅe Babilọn ikoli warị ḅie mị ò sime fịye-ẹ.

¹²Babilọn Amanyanaḅọ Nebukadneza ḅe amanyana ḅe gbọrị kụra fasi ḅụ, sọnọ akalụ ḅie oyi-a ḍin ene ḅụ, mị Nebuzaradan, amanyanaḅọ tetemaḅọ pịkị oria owuni tịḅịnịḅọ ḅe Jerusalẹm ḅie sọye-ẹ.

¹³Ori Oputẹkẹwarị mị na amanyanaḅọ odo mị na pịkị Jerusalẹm ḅie opuapụ ma warị mamgba dọkịmamẹ.

¹⁴Se oria owunima opuama mị onu-agbagba ma sumagbinmẹ.

¹⁵Anịsịkị mị Nebuzaradan ḅe, opuama ḅie kọn apụma na, kọn ḅarafịrịnwẹngị-dịn owuapụma na pịkị mangị Babilọn apụma ḅie sọ apụma na nwọ ọkịso Babilọn mun mẹ.

¹⁶Ọkụma ò se Juda ḅie koroma so apụma anị, igweintẹịn apụma ḅụ dapụ-ẹ, gbọrịye sọ nyanakapụma, ọ̀ pịkị ini se irumịẹ ozuma ḅie na ele ma ḅie na koromamẹ na ini fịrịnwẹngị.

¹⁷Babilọn apụma Oputẹkẹwarị ḅie sime alapẹlẹka-ogbo-chịn ma na ye deki kporokporoma na ini kankọsịmamẹ; pịkị ḍụḅa alapẹlẹka mengi chụaye mị na, se ini alapẹlẹka mamgba ọkịsomẹ.

¹⁸Ini pịkị kirisoku ọgụ ma na fọn-chụaye ma anị ini se agbamịẹ ẹbẹ guro fịafịama-fịafịamaye ma na, tọnjie fịrịnwẹngịaye ma na, agbamịẹ-pulo-da bọlị ma na, insẹnsị dọkịma bọlị ma na, pịkịna ísí-a alapẹlẹka se tẹmẹ Oputẹkẹwarị fịrịnwẹngịaye mamgba na ọkịsomẹ.

¹⁹Ini goli na seleḅa na se tẹmẹ aye mamgba na ini ọkịsomẹ: kala bọlị ma na binka anyị tanda panị ma na agbamịẹ pulo da bọlị ma na fọn chụaye ma na tọnjie gbanaye ma na insẹnsị bọlị chụaye ma na agbamịẹ iru chụapakụma bọlị ma na àrịmgba ini dekisomẹ.

²⁰Amanyanaḅọ Sọlọmọn ḅe tẹmẹ Oputẹkẹwarị ḅirimaye ma—mama ogbo chịnma na yedeki kporokporoma na opu mengi chụaye mị na pịkị anị deki oyimaịn nambulo fịnjịma na, opuma ikumẹ àrị tọn ọkụma.

²¹Mama ogbo chịnma kịkịnamẹ: gbọrịye gbọrịye gele, tẹrẹfa ḅụọ-a soi, kpokoro mị, maịnfa si ḅụọ-ẹ. Arịa ḅie fomẹ, pịkịna tẹrẹ-a inchisị akpakpa nyanamẹ. Àrị gbolu alapẹlẹka ma ineda sọnọma ḅụọ na pẹkẹrẹ laḅịa gele ḅụ, se anị ojumgba kẹịn-kẹịnmẹ, mgbafa ini nwọ karakara nyọma kẹịnmẹ ọrụrụ ḅụ, arịmgba alapẹlẹka ini nwọse àrị mịẹmẹ.

²³Gbọrị ogbo chịn ọgọnọ goyegoye mgbafa sọnọasi-ẹ, ini nwọse àrị ḅirimamẹ, ị́ kiri ḅie sime ọkụma ineinfa mgbafa sọnọasi anị ị́ ọrịḅịaye-ẹ.

²⁴Nebuzaradan owuni tịḅịnịḅọ ḅe, Sẹraịya Gele Agbamịẹḅọ ḅe na kiriḅụ ò ḍukoma agbamịẹḅọ Zẹfanaya ḅe na pịkị ísí tẹrẹ-a Oputẹkẹwarị ḅie yela fịrịnwẹngịapụ na se ísíapụma ḅụ chụa se nwọ ọkịsomẹ ikoliapụ ḅaraḅụ.

²⁵Opuama mị ḅie ori ọkịsoapụ anị, owuni ogboma tịḅịnịḅọ ḅe na, ama ḅie sime sọnọma apụ amanyanaḅọ tetemapụ ma na owuni tịḅịnịḅọ ḅe palịḅọ ḅe, anị owuni-a mịẹaye ma se ḍiri ḅie chụachụaḅọ ḅe na, jịn opu kịnị-a owuapụ soi na.

²⁶Nebuzaradan ḅe ori ini ọkị mun Babilọn amanyanaḅọ ḅe pịrịmẹ Ribla ḅie ò simearịogbo

²⁷Hamat eke ḅụ. Anịju anị amanyanaḅọ ḅe ini fomuso se ini ḅaaye-ẹ. Anị ḅaraḅụ anị Juda-a tomonima ini inia ama ḅie ini kun se ini sẹịnso ọkụ-ẹ.

²⁸Mị anị gịẹịn koromaye-ẹ Nebukadneza ḅe, ikoliapụ ḅaraḅụ ọkịsoapụ ma ḅụ, oria sọnọma kụra ḅie, amanyanakiri ḅụ ori ọkịsoapụ anị kịnị-a sọnọma-ẹndẹ-oyiasi na sitẹrẹ apụ fịnjị na;

²⁹oria maịnfasi karama kụra mị ḅie, kini-a-mẹndẹ soi ma apụ fịnjị Jerusalẹm ḅie ọ̀ nwọ dekisomẹ;

³⁰pịkịna oria sitẹrẹ-a kụra fịnjị karama kụra mị ḅie, kịnị ẹndẹ jieasi fịnjị na sọnọfa mesi oyi fịnjị Nebuzaradan ḅe Jerusalẹm na Juda na ḅie ọ̀ nwọ ọkịsomẹ. Inimgba, kịnị-a oyigbọrị ẹndẹ fịnjị na oyiasi ini nwọ ọkịsomẹ.

³¹Ivil-Mẹrọdak ḅe Babilọn amanyanaḅọ sọ sịkị, ori iḅi se Juda amanyanaḅọ, Jẹhoịakin ḅe mịẹmẹ, ọ̀ nwọ ikoli ḅie ò sinpakụmaḅo mị ḅụ. Mịn mị mịẹ ene anị, ini Jẹhoịakin ḅe se ikoli ḅie chu ḅọrọ ḅe tẹrẹfamesi karama kụra ḅụ oyimaịn akalụ fịnjị ḅie sisọnọ-a ḍin fịnjị ene.

³²Ivil-mẹrọdak ḅe ori iḅiọkụma ori ọkị se, iḅi geletẹịn ò se ísí amanyanapụma anị ori na Babilọn ḅie kururu ḅie sọ apụma pịrị kiri nẹngịye, nwọse ọ̀ pịrịmẹ.

³³Se anịḅụ Jẹhoịakin ḅe, ini ḅereni ọ̀ pịrịmẹ na ori oria ikoli-a ḅụchụayema ḍinma se amanyanaḅọ dẹbụl ọgọnọ yefị ọkịmun ọ̀ fị ene lamẹ.

³⁴Oria ḍumo enema ḅie, eneḅeneḅene ini ye se ọ̀ gbẹịn-gbẹịnmẹ ò seni ò ḅiye goyegoye mịẹḅịa ẹrẹchị.