Read kirikeni Jerimaya 7 Bible Online

Jerimaya 7 - kirikeni bible

Jerimaya 7

¹Nyanaḅọ Ḅe ị̀ se tẹkẹwarị onu ḅọkọ mị fịrịmamẹ, anị Juda-a tomonima mun tẹkẹtẹkẹ nyọ mị. Ò ḍuko ị̀ pịrịmẹ àrị anịnyọ chịẹ se ḍukopakụma, Kụrọmamgba Nyanaḅọ Ḅe, Izrẹl Tamụnọ Ḅe, ḍuko ị̀ pịrị se à ḍuko ini pịrị nwọ ḅẹ-aye ma: “Ómine anga àrị ḅara ọ́ nwọ ḍinma, pịkị ọ́ mịẹarịaye ma na, se à ḅereni ọ́ pịrịḅịa ọ́ mịanga angama mun.

⁴Àrị oḅori-se-nweni-chịẹma ọkwẹịn ma ḅụ ọ́ dachịẹ nyana, ‘Wa ḍumo waraḅẹ! Mị Nyanaḅọ Ḅe oria Oputẹkẹwarị-ẹ, mị Nyanaḅọ Ḅe oria Oputẹkẹwarị-ẹ, mị Nyanaḅọ Ḅe oria Oputẹkẹwarị-ẹ!’

⁵“Ómine anga àrị ḅara ọ́ nwọ ḍinma se ọ́ mịẹarịye ma ḅụ ọ́ dachịẹ nyana. Ọ́ jụmḅọ jụmḅọ na mịẹarịye ma ḅụ ọ́ karakara nyana.

⁶Ọ́ ḅarị igoniapụma na ḍapụ na nyengiapụ na koroma fịsa apụma na, pịkị deapụ koroma fịsa apụma na se sọyemịẹma. Ọ́ ḅarị ḅẹrẹnemika apụ ḅaama ama mị ḅie. Ọ́ ḅarị jịn-a oru tẹkẹma, anịatịḅị anị mị anị ọ́ famaḅịa.

⁷Ọ́ nemikase ḍinmamẹ ḅẹḅẹ, à ḅereni ọ́ pịrịḅịa ọ́ mịọ angama mun, anị à se ọ́mịna ḅieju-aḍapụma pịrị, se ini anga gbaso nwọḅẹ nyọ mị.

⁸“Ḍiki, ó kuḅie se oḅori-se-nweni-chịẹma ọkwẹịnma ḅụgbanamẹ.

⁹Ó furufurumẹ, ó nini kọnkọnmẹ, ọ́ sẹfịfịmẹ, ó yekarịfịfị-se-iruo kọnkọnmẹ, ómine agbamịẹ Beal ḅe pịrịpịrịmẹ, pịkị jene-ma-ó-nemika oru tẹkẹtẹkẹmẹ.

¹⁰Ma à ḍikiḅụnwọnwọ ayema ọ́ nwọ mịẹ, se ó ḅo ị̀ tọrụkuḅu chịẹ se ị̀ya Oputẹkẹwarị ḅie ḅẹ aḅẹ, ‘Wa ḍumo waraḅẹ!’

¹¹Ọ́ chịn ḅara ị̀ya Oputẹkẹwarị mị sime furu apụ pịrị ḅọịnyọ-ẹ? Ó ye arịye ma àrị ọrịsam.

¹²Ọ́ Shịlo mun, à tatarị sẹlẹọkị ini ị̀ tẹkẹ nwọḅẹ nyọ mị, se à se anị mịẹye ḍiki, Izrẹl ị̀ya tomonima mịẹ sima gose.

¹³Ma si mamgba ọ́ mịẹsam, se àrị ọkwẹịn ọ́ pịrị la-ọkụ la-ọkụ sọ, ó poki ḍụkụkẹ. Àrị ọ́ chịn sịkị, ọ́ pẹkẹrẹkẹ.

¹⁴Anịgose, à se Shịlo mịẹye mị anị à pịkị se mị ị̀ya Oputẹkẹwarị, ó kuḅie se gbanaye mị mịẹḅịaye-ẹ. Mịanga, anị à se ọ́mịna ḅieju-aḍapụma na ómine na pịrị nyọ mị, à Shịlo mịẹọkụ anị à se anị mịẹḅịa ọkụ-ẹ.

¹⁵Àrị ị̀ tọrụkuḅu ómine desinḅịa, àrị ọ́mịna mịnapụ, Izrẹl-a tomonima desin ọkụ mị. Ị̀rị̀, Nyanaḅọ Ḅe ọkwẹịnsam.”

¹⁶Nyanaḅọ Ḅe ọkọ ḅẹmẹ, Jerimaya, tẹkẹ mịnapụma pịrịma. Inia tịḅị gose owuma, anịkanịka tẹkẹma; ị̀rị̀ na yeḍukoma, anịatịḅị àrị ị́ poki ẹkẹ.

¹⁷Ini Juda ḅe opuamama ḅie na Jerusalẹm ateli ma ḅie na mịẹarịaye ma ị́ ọrịka?

¹⁸Awọmẹnị ma fịnị kpokponimaḅịa, owuapụma fịnị tọnọḅịa, eremeni ma fịlawa wọlọma se, anị se keki mịẹmẹ se oru pịrịmẹ, anị ini Soḅie Amanyanaḅọ se chịn eremeniḅọ ma. Ini pịkị iru agba mịẹ jịn-a oru pịrịmẹ, se ị̀ kuḅie ọyịmaḅịa ẹrẹchị.

¹⁹Ọkụma ini jokoma ḅụ ọyịma àrị ḅọḅe ị̀rị̀? Ẹn-ẹn, ini inia ḅụ ọyịma aḅẹ, pịkị ḅụgerere dekiḅo inia ḅụ ma pịrị aḅẹ.

²⁰Anịgose, Ị̀rị̀, Kụrọmamgba Nyanaḅọ Ḅe, ị̀ya ḅalafama ịganị mị ọsụn pakụma mị Oputẹkẹwarị mị ọgọnọ saraḅịa. Àrị anị ọsụn tomonima na namama na ḅụ saraḅịa, pịkị ejema na ḍipiaye ma na ḅụ. Ị̀ya ịganị mị, nweniḅọ ineda binma ẹka fịnị kịkẹḅịa.

²¹“Ị̀ya tomoni, da agba ó ḅeinma àrị dọkịma famamẹ ẹbẹ ọgọnọ, pịkị kụrọ se ọ́ pịrị se ómine àrị fịmẹ. Ọkụma Ị̀rị̀, Nyanaḅọ Ḅe, ḍukoye mị anị, ómine ineda àrị fị sinḅịa okorona okorona.

²²Ọ́mịna ḅieju-aḍapụma à nwọ ọkịḅo sịkị Ijipt ḅie, àrị oloko chụa ini pịrịkẹ dọkịma agba anịkanịka jịn kịrị agba na gbolomaye ḅụ.

²³Ọkụma à tọn ini pịrịmẹ na ini ị̀ ḅịpị poki, mịẹsosịkị àrị inia Tamụnọ sọ, se ini ị̀ya tomoni sọḅịa ọkụ. Se ḍuko ini pịrịmẹ, ini à chụa ini pịrị olokoma ḍiki anga, mịẹsosịkị ye ini na iḅiḅịa ọkụ.

²⁴Ọkụma ini pokikẹ anịkanịka tọrụ se anị dakẹ. Anịnakaraka, ini inia ininachịn si-kuḅie ma tọn ini pịrịayema mịẹmẹ, se iniḅo sitẹịnmẹ, iḅitẹịn na karaka.

²⁵Ọ́mịna ḅieju-aḍapụma Ijipt ḅie pakaḅo ene ngịsị ọkịḅo mịmgba ene la, àrị ị̀ya fịrịnwẹngịapụma se ọ́ sẹịnma aḅẹ, ịkịankoroapụma.

²⁶Anịsọ gbọrịḅọ sọ pokikẹ anịkanịka tọrụ pịkịkẹ. Anịnakaraka ó ḅo ininachịn pịkị kọngọ kụrọmatẹịn ọ́mịna ḅieju-aḍapụma nẹngịmẹ.

²⁷“Anịgose, Jerimaya, ị́ ma ọkwẹịn mamgba kọn ị̀ya tomonima pịrịḅịa, ọkụma ini ị́ poki ẹkẹ; ị́ ini chịnḅịa, ọkụma ini ị́ pẹkẹrẹ ẹkẹ.

²⁸Ị́ ḍuko ini pịrịḅịa na inia sẹ mị anị ị̀ ḅịpị pokikẹ, Nyanaḅọ, inia Tamụnọ Ḅe, anịkanịka inia fomuḅara ḅie yeḍawọkẹ. Kuḅie-se-ḅụgbana mị fịsam. Nweni pịkị ḅarị anị se ọkwẹịn ḅụ chukẹ.

²⁹“Ómine Jerusalẹm tomoni, ọ́ ḍụẹịn ḍin; ómine ọ́mịna tịḅị inime sẹịnsin se anị wokuma. Ọ́ chịngịma ọgọnọ ḍụẹịn ḍipi-a nime chu anịatịḅị Ị̀rị̀, Nyanaḅọ Ḅe, àrị ịganịmẹ se àrị ị̀ya tomonima sịkịsam.

³⁰“Juda-a tomonima ini siye mịẹsam. Ini inia oru ma, à ḍikiḅụnwọnwọ ayema, se ị̀ya Oputẹkẹwarị mị ḅie koromasam se anị pụlamasam.

³¹Hinọm Pẹsịkiri mị ḅie ini ẹbẹ namasam, Tọfẹt anị ini se anị chịnye-ẹ, mịẹsosịkị ini ineda inia owuapụ awọma na, eremeni awọma na se fịnịḅie agbamịẹḅịa ọkụ. Ị̀rị̀ tọn ini pịrịkẹ ini nwọ simeye mịẹ—ị̀ kuḅie ngịsị ọkọsimeye tọnkẹ.

³²Sịkị ḅoḅịa ini ḅarị Tọfẹt anịkanịka Hinọm Pẹsịkiri se anị chịn ẹkẹ, ọkụma Nweni Ḅa Pẹsịkiri. Anịnyọ ini nweni ḍipiḅịa anịatịḅị nyọ ḅarị sime ẹkẹ ini ini ḍipiḅịa nyọ.

³³Fị ojuma àrị fịyesọ feni na piri-a nama na pịrịḅịa, nweni pịkị sime àrị de ẹkẹ.

³⁴Ama mị anị onwun ele sọḅịa, Juda opuamama ḅie na Jerusalẹm ateli ma ḅie na, à mịẹḅịa ḍoroku na ḅieḅẹlẹ na pịkị eresime ḅe alalị koroma mịẹmịẹaye mamgba dachịẹḅịa.