Read kirikeni Kururu Ma 3 Bible Online

Kururu Ma 3 - kirikeni bible

Kururu Ma 3

¹Ị̀rị̀ anị Tamụnọ Ḅe ḅụfụka se tomoniḅọ pịrị mị fieye nemi gbọrịḅọ-ẹ.

²Ori ị̀ suma suma mun gbun kanakana ḅie chumẹ

³Se ị̀ ḅakụ gulugulumẹ ḍikiḅụgerere nyana ị̀ pịrịkaḅụ.

⁴Ori ị̀ya oju mịnị kanfinjisam, se ị̀ya ịmgbema anyịmasam.

⁵Ori ị̀ se ḅụḅalaḅala na opuma kuḅie sima ikoli ḅie ịkasịsam.

⁶Ọ̀ kụrọḅara se ị̀ mịẹmẹ se à jikeka kanakana ḅie fị ḅọrọsapụ ḅara se angamẹ.

⁷Ori ikoli se ị̀ ịkasịsam; ị̀rị̀ ikoli ḅọ-ẹ, pọkọsoḅịa ẹmbẹ nyanakaḅọ.

⁸Àrị oloku owumẹ ḅarachụa ḍọkịḅụ, ọkụma Tamụnọ Ḅe ị̀ poki ḍụkụkẹ;

⁹À nwẹngị ọkụma à jiajiaḅẹ, ḍụparị onu agbagba ị̀ kikimẹ, à pịkị daju-daju.

¹⁰Tun ye ọbị ḅara ọ̀ nwọse ị̀ ọbịmẹ; chịrịḅa ḍosi ḅara ọ̀ nwọse ḍosi ị̀ koromẹ.

¹¹Ori ateli ḅie ị̀ depakụmamẹ, ị̀ kanị kọsịmamẹ, se ị̀ se gbin koromamẹ.

¹²Ori oria lubu mị nụnụ se ḍẹịn ma pịkị ị̀ damẹ.

¹³Ori oria ḍẹịn ma tẹịn gbunma ị̀ya oju chumẹ.

¹⁴Tomoni ene mịmgba ị̀ ḍẹrịmẹ; à titiye sọ inimgba pịrịmẹ.

¹⁵Akụ tọrụsiọrị anị ò se fịye na mengi na ḅaraḅụ ị̀ pịrịsaye-ẹ.

¹⁶Ori ị̀ tọrụ se kiri sikirimẹ se onwun aka ma ḅie ị̀ya aka ma kpọkpọmẹ.

¹⁷Ḍumo na dein na ḅieḅẹlẹ na à se ḅieḅaramasam.

¹⁸À ḅaka sịkị nyanakẹ se anga; Nyanaḅọ Ḅe ḅụ à nyana kuḅie kụrọ ḅọrọsam.

¹⁹Ị̀ya oju akụ mị na, angaḅịa nyọ ofori mị na ḅe koroma, ḅo akụ nweni ḅaa ḍiri sọsam.

²⁰Àrị anị se ḅiekoromamẹ sịkịmamgba, anị pịkị ị̀ kuḅie lọkọmamẹ.

²¹Anịsọ kuḅie kụrọ pịkịmaḅomẹ à mị gbọrịye mị se ḅiekoroma sịkị:

²²Nyanaḅọ Ḅe oria simegbaso ḅẹlẹma mị na, ḍikiḅụgerere mị na, pa simegbasomẹ, anịgose wa ḅarị fịfakẹ,

²³Dede mị ịwọ ọkụ anị pịkị gbarịmaka ḅaraḅụ ịrụa mị ḅịaḅịa ọkụ-ẹ.

²⁴Nyanaḅọ Ḅe ngẹrị mị à nyanaye-ẹ, anịẹrẹchị ọ̀ ḅụ mị àrị ị̀ya kuḅie kụrọ se gbanaye-ẹ.

²⁵Nyanaḅọ Ḅe ori iḅi ini pịrịmẹ kuḅie se ọ̀ ḅụ gbanapụ mamgba

²⁶Anịgose anị iḅitẹịnmẹ wa inema—ó koru se ọ̀ wa ḍụa—

²⁷Anị pịkịna iḅitẹịnmẹ wa mịna kalaḅiri ḅụ mị inema mị ḍawọ.

²⁸Wa tọrụsiọrị sịkị, wa ngẹrị yawụma inema ḅie simeḅịa;

²⁹Wa tịḅịtu Nyanaḅọ Ḅe pịrịḅịa anịatịḅị ḅiekpọ pa pakaḅịa.

³⁰Ini wa fomu pịkị wa wọlọmẹ nwọḅẹ sọ, wa arịmgba ḅereni ọkị.

³¹Nyanaḅọ Ḅe ò ḍikiḅụgerere nyanamẹ, ọ̀ pịkị wa sịkị gbaso ẹkẹ.

³²Ori ineda kururu se ḅoḅịa, ọkụma ọ̀ nyana wa pịrị ḅẹlẹma mị ḅiekpọmamẹ pịkị kụrọmẹ.

³³Anị ọ̀ tọrụḅẹlẹmaye sọkẹ ọ̀ wa mịẹse wa kuḅie si anịkanịka ḅụakụ nwọ nyana.

³⁴Nyanaḅọ Ḅe ò nemimẹ mịna kuḅie ma ikoli ḅie kọsị sịkị;

³⁵Ò nemimẹ ò se wa pịrị kụrọ ma ini nwọ piki sịkị;

³⁶Ḅẹrẹkọn warị ḅie ini karakaraye mị pịkị iḅo sịkị ò nemimẹ.

³⁷Gbọrị tomoniḅọ sọ ineda yemịẹpakụma ẹkẹ Nyanaḅọ Ḅe ḅereni anị pịrị sikima.

³⁸Tamụnọ Ḅe tọnsa ḅaraḅụ iḅiye ineda pakaḅoḅịa siye pịkị ineda pakaḅoḅịa.

³⁹Wa mịẹ-a sima gose ini fomuḅara se wa pịrị ọkụma cheye gose wa ḍukoye nyanaḅe?

⁴⁰Ó ye wa mịna nwẹngị-a ḅụọma pekele ḍiki se pịkịma Nyanaḅọ Ḅe damamun.

⁴¹Ó ye wa mịna kuḅiemgbọlụma finji soḅie Tamụnọ Ḅe pịrị se tẹkẹ,

⁴²“Wa mịẹirimasam pịkị nyana ḅerenikẹ se ị́rị́, Yei Nyanaḅọ ma ị̀ ḅarasin wa pịrịkẹ.

⁴³“Ị́ wa ḍuko se wa ḅaamẹ; ị́ya ḍikiḅụgerere mị ị́ya ịganị ḅie ḅọịmẹ,

⁴⁴Opuma kputu gbọrị soḅuno ḅerenikẹ se mịna tẹkẹma kan tolu ḅọrọ.

⁴⁵Ị́ wa se sẹkiri mị ḅe sara mịẹsam.

⁴⁶“Mine na tarakapụ mamgba wa wọlọ pịkịna wa kombomẹ.

⁴⁷Tọrụsiọrị na opufa ḅie na wa ḅọrọmẹ; wa ḅụḅalaḅala na ḅalafa na ḅie angamẹ.

⁴⁸Ị̀ya tomonima ḅe kan mị ḅụ owu mengi ị̀ tọrụ iderimẹ.

⁴⁹“Ị̀ya owu mengi ma àrị ọsụn ideriarị mengi ḅie saraḅịa.

⁵⁰Ọkịmun Nyanaḅọ Ḅe soḅie ọ̀ tọrụ tu wa ḍiki se mine ọrị sịkị laḅịa.

⁵¹Ị̀ kuḅiemgbọlụ si mẹ à tọrụ se opuama mị ḅe eremeni ma ḅụ pakaye ma ọrịsịkị.

⁵²“Feni ḍẹịn ḅie koro ọkụ à nwọse tarakapụ ḅie koromẹ, ini gose taraka se ị̀ wẹrịmaḅịaye ofori-ẹ.

⁵³Ini fịka ḅụ ị̀ se olulu ḅie gbinmẹ se ḍụparị se anịa ḅịpị gbẹịnmẹ.

⁵⁴Mengi sakị ị̀ ḅilemamẹ, se à nwọ chịnmẹ fị kpekisam.

⁵⁵“Olulu mị chuku ḅie Yei Nyanaḅọ, àrị owu pakụma ị́ pịrịmẹ,

⁵⁶Se àrị ị́ tẹkẹ na ị̀ya owu mị poki nwọḅẹ sịkị ị́ ị̀ naamẹ.

⁵⁷Ị́ ị̀ pẹkẹrẹ se nwọ ḅẹmẹ à ḅalafama.

⁵⁸“Ị́ ḅo ị̀ ḍụaḅọrọmamẹ se ị̀ ḍumo ḍụamẹ Nyanaḅọ.

⁵⁹Ḅẹrẹiḅi pẹlẹ ị̀ pịrị; ini se ị̀ mịẹsiaye ma ị́ nemimẹ.

⁶⁰Ị́ nemimẹ ị̀rị̀ na tarakapụma ị̀ ḍikiḅụnwọnwọ pịkị siyeḅia ị̀ pịrị ọkụ.

⁶¹“Ị́ ini naamẹ ini ị̀ wọlọ sịkị, Yei Nyanaḅọ, ini ḅiaye mamgba ị́ nemimẹ.

⁶²Ene mị mgba ini ị̀ ḅụ ḅẹrẹ ḍukomẹ pịkị mịẹḅịaye ma tọnmẹ.

⁶³Dede ọkịmun ene san ini ị̀ se ḍẹrịye mịẹmẹ.

⁶⁴“Fomuḅara se ini pịrị ini mịẹsaye ma gose, Yei Nyanaḅọ;

⁶⁵Worinime se ini pịrị pịkị inia kuḅie mịẹlọkọma!

⁶⁶Ini kunḅo se ini ọfịnsin tomonikiri ḅie!”