Read kirikeni Kururu Ma 4 Bible Online

Kururu Ma 4 - kirikeni bible

Kururu Ma 4

¹Yei! Iḅi fịafịa goli mị tọrụ ḅarị banabanakẹ; Oputẹkẹwarị ḍụparịma ateli ogbo àrị galagala saramẹ.

²Zaịyọn asẹmẹnị ma ini goli yela ọkụ se mịnaḅụ yelamẹ, ọkụma mịọkụ ini papa aḅaịnḅẹlẹ ḅara se ini ọkịmẹ.

³Piri obiri nyengiḅọ pembe ndo se árịa awọma ḍikiḍiki pakụmaḅịa, ọkụma ị̀ya tomonima ini tọrụsiọrịarị ọjụ feni awọ kịkẹmẹ.

⁴Ini mịẹmẹ inia awọma fịye pụkọtarị na mengi pụkọtarị na ḅie sime fị; awọmẹnịma inia ḅarala ẹka fịye ọmgbọma ḅọrọaḅẹ.

⁵Gbọrị sịkị iḅitẹịn fịaye fị tomonima ateli ogbo ḅuruḅaa ḅie fịmẹ; tọrụ ḅẹlẹ ḅie sẹnị pakaḅo apụma sara ḅie fịye ḍọkịaḅẹ.

⁶Ị̀ya tomonima da fomuḅara ḅakatẹịn Sọdọm ḅie angapụma ye nẹngịsam, anị gbọrị kirikiri Tamụnọ Ḅe ḅarama ḅie kan ama mị.

⁷Mịna tịḅịnịma tatarị ini pụlakẹ, ini pịkị ene okpokpo ḅịa ọkụ ḅịamẹ, nwana-nwana pịkị kụrọ ḍumo ḅụ kpụrụkpụrụmẹ.

⁸Mịọkụ ateli ma ḅie ini ḅọlọlọmẹ, tomoni ḅarị ini lekirika ḅụ, fị inia tọrụ ma kurukurumasam; oju apụra mị fịnịpẹkẹrẹ samịna ọkụ samịna se inia oju ịmgbema oḅolosam.

⁹Ọmụ ḅie fịapụma iḅitẹịn ọḅụkọ ḅo fịapụma nẹngịsam, anị ini ḍumomaḅịa fịye ọrị fịka se sụna fịapụma.

¹⁰Ị̀ya tomonima la ḅụḅalaḅala mị ḅalafamamẹ; awọ ḅẹlẹma nyengiapụ inia awọma chụọ pẹị mẹ fịye gose.

¹¹Nyanaḅọ Ḅe oria opu ịganị mị ọsụn pakụmamẹ; ọ̀ tọnjị Zaịyọn ḅụ chụa fịnị, anị ḍọkịmaḅo kiri saramẹ.

¹²Mị sẹkiri sime jịn-a sẹma ḅie ḅẹrẹtọn apụ sọ ḅereni ẹkẹ na owuni ineda Jerusalẹm onu ḅọkọ ma kantolu sọ se owuse anị pakaḅịa-ẹ.

¹³Ọkụma anị mịẹmẹ, anịatịḅị anịa ịkịankoroapụma ini si mịẹmẹ pịkị anịa agbamịẹapụma ini ḅẹrẹ ḅarasi nyanamẹ anị ini mịẹse ḅẹrẹnemikapụma fịye gose.

¹⁴Anịa tịḅịnịma ateli ma ḅie gelegelema ḅọrọaḅẹ tọrụmgbọlụ pụn apụ ḅara, pulo inia oju-a ḅụchụayema sima so ọkụma tomoni ḅarị ḅara se ini lamakẹ.

¹⁵“Ḍarịma!” tomoni inia tịḅị olokumẹ. “Ị́ pụlamẹ! Ḅara se ị̀ lamama!” Mị ini gelegelema ḅọrọarị ọkụ-ẹ, sẹ ḅụ ḅọrọ sẹ la, gbọrịḅọ sọ inida warị chukẹ.

¹⁶Nyanaḅọ Ḅe ọ̀ ḅarị ini na mịẹgbolomaye nyanakẹ; ori ḅarana ini galagalamamẹ. Ọ̀ ḅarị mịna agbamịẹapụma na tịḅịnịma na se yechịnkẹ.

¹⁷Wa ḍiki nweni-a ḅarachụa ḅokẹ, ḍiki ḅụ ịnyọ mịnaḅụ fasam. Koru ḅụ wa tọrụ se ḍikiarị ḅarachụaḅịa sẹ sọ wa ọrịkẹ.

¹⁸Tarakaḅọ ḅe ọ̀ wa kịlẹ aḅẹ; wa ineda ateli ma ḅie nwẹngịkẹ. Mịna enema ḅọrọsam; kuluma mị ḅo lasam.

¹⁹Ọbịrị sotọrụ fin àrị igo ma nẹngị ḅara, ini nwọse wa ḍukomẹ. Ini wa tombi mun chịngịma lamẹ; ḅụnemikaḅụ onwun ele ḅie ini mine na bịamamẹ.

²⁰Ini mịna ḍumo mị ḅe chuku ḅe kunmẹ, Nyanaḅọ Ḅe sẹlẹḅo amanyanaḅọ ḅe, anị wa kuḅie-se-ḅụgbana na ḅo owuse-wa-pakapụ goyegoye ḅara ḅie ọ̀ wa ḍụaḅịa nwọḅẹ ḅọ ḅe.

²¹Ọ́ ḍẹrị, Idọm na Ọz na tomoni; ọ́mịna ḅụḅẹlẹḅara ọ́ nwọse ḅieḅẹlẹ. Ọ́mịna ḅụḅalaḅala sọ ḅo aḅẹ, ómine sọ ọ́ papaḅụsin se ḅụgerere ḅụ jiajiama ḅọrọḅịa.

²²Zaịyọn mị anị mịẹ si mị ḅe sa anị gbẹịnsam; Nyanaḅọ Ḅe ọ̀ ḅarị wa se desinḅie koroma ẹkẹ. Ọkụma Idọm, Nyanaḅọ Ḅe ọ̀ ḅụfụka se ị́ pịrịḅịa; ori ị́ya sima kanfinjiḅịa.