Read kirikeni Kururu Ma 5 Bible Online

Kururu Ma 5 - kirikeni bible

Kururu Ma 5

¹Yei Nyanaḅọ, mịnaḅụ pakaye ma se ḅiekoroma. Wa ḍiki, se mịna ḅụgerere mị ọrị.

²Mịna opu ḍapụma se koroma wa pịrị kirima igoniapụ ḅaraḅie omi-ẹ; jịn anga ḅo apụ mịna warịma ḅie anga aḅẹ.

³Tarakaḅọ ḅe mịna ḍapụma ḅaasam, mịọkụ mịna nyengiapụ ma deapụ nyanakapụ sọsam.

⁴Wa ḅụ mengi wa gbẹịnḅịa; wa tọnọ fịnị wa fẹḅịa.

⁵Kụrọḅara se suma yepụra asụn anịkanịka ike-nambulo ḅara, ịnyọ mịnaḅụ fasam, ọkụma wa ịnyọsara ini ḅereni wa pịrịkẹ.

⁶Ḅakama fịye nyana se ḍumoḅịaye gose, wa ọmgbọma Ijipt na Asiria na damamunmẹ.

⁷Mịna ḅieju-aḍapụma ini simịẹmẹ, ọkụma mịọkụ ini ḅọrọsosam, wa inia sima tịḅịgose tọrụsiọrịaḅẹ.

⁸Iḅi omoni nẹngịkapụ anị ḅẹrẹtọn wa pịrịarịye-ẹ, pịkịna inia kụrọ ḅie wa ḍụapakụmaḅịaḅọ ofori-ẹ.

⁹Niniapụ amama ḅiemgba nwẹngịma ḅọrọaḅẹ, wa mịna ḍumo se fịḍiamẹ wa fịḅịaye ḍọkịarị sịkị.

¹⁰Fịye pụkọtarị mịẹso ọkụma mịna oju apụra mị fịturu fọị ọpọchuku ọfịrịọkụ ọfịrịmẹ.

¹¹Zaịyọn Tụndụ ọgọnọ ḅụoju mị ini mịna eremeni ma ḅụ kanye-ẹ; Juda ḅie sime amama goyegoye ḅie ini kụrọḅara se mịna eremeni awọma mịẹ se ini yeḅereni ini pịrịmẹ.

¹²Mịna tịḅịnịma ini nwọ ọkị kpọḅaamẹ; gbọrị kụn sọ ini nyana mịna olomu apụma pịrịkẹ.

¹³Ini kụrọḅara se mịna asẹmẹnị ma mịẹmẹ ini omoniapụ ḅara se fịayemgbọlụ gbẹịnmẹ; owuapụ awọ iku fịnị pụra se jiajia aḅẹ.

¹⁴Sẹnịapụ ma ini ḅarị opuama mị onu ḅọkọ simekẹ, pịkịna asẹmẹnị ḅarị yefarịkẹ.

¹⁵Ḅieḅẹlẹ mịna ḍumo ma ḅie sosam; kuḅie si mịna sẹkị ma kiri ọkịsam.

¹⁶Wa se opuaye mịẹye mamgba gbọrịye sọ ḅarị kọnkẹ. Wa si mịẹmẹ, mịọkụ wa fasam.

¹⁷Mịna kuḅiemgbọlụma ḅie wa obimẹ pịkịna owu-a mengi ma mịẹso ọkụma mịna tọrụmgbọlụma giniginisam,

¹⁸Zaịyọn Tụndụ mị ini anị koromaso se anị kpọngọlọma simeye ẹrẹchị, piri obiri anịa sara ma kanma ḅọrọmẹ.

¹⁹Ọkụma yei, Ị́rị́ Nyanaḅọ Ḅe, anị simegbaso amanyanaḅọ-ẹ pịkị ḅẹrẹtọn mun sịkị mị ḅe kuluma laḅịa.

²⁰Ị́ chegose wa sarakoroma nwọ sime ḅọlọ sịkị la? Ị́ kpaịnma pịkị wa se ḅiekoromaḅe?

²¹Wa pịkịmaḅo ị́ ḅụ pịrị, Nyanaḅọ! Wa pịkịmaḅo! Mịna olomu opu mị ọkịḅo.

²²Anịkanịka ị́ wa sịkị gbasosa? Ị́ya ịganị anị kuluma nyanaka?